“Olimpiya Kompleksinin Tərtərdə açılması böyük məna daşıyır. Burada öz gücünü artıran gənclər ölkəmizin uğurlu inkişafına töhfələr verəcəklər. Mən buna əminəm.”

İlham Əliyev,
Azərbaycan Respublikasının Prezidenti

Rayonumuzda Olimpiya İdman Kompleksinin tikintisi Prezident İlham Əliyevin Fərmanı ilə təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramı”na əsasən aparılıb. 3 iyun 2020-ci il tarixində kompleksin açılışında iştirak edən dövlət başçısı burada görülən işlərlə tanış olub və qeyd edib ki, “indi Tərtərdə də idmanla məşğul olmaq üçün çox gözəl imkanlar olacaq”.

Hazırda Tərtər Olimpiya İdman Kompleksində vəziyyət necədir? Bu sualla Kompleksin müdiri Emin Dadaşova müraciət etdik O dedi:
–Əlbəttə, rayonumuzda belə bir müasir İdman Kompleksinin açılması qəhrəman Tərtərin tarixində mühüm hadisə oldu və bütün rayon sakinlərini sevindirdi. Ona görə ki, fiziki güc həm də mənəvi saflıq deməkdir. Gənclərimizin idmanın müxtəlif növləri ilə məşğul olmasının vətənpərvər gəncliyin yetişməsində böyük rolu var. Hesab edirəm ki, 44 günlük Vətən müharibəsində qazandığımız möhtəşəm Qələbə gənclərimizin idmana olan marağını daha da artırıb. İdman meydançalarında qalib xalqın nümayəndəsi kimi çıxış etmək olduqca qürurvericidir. Məhz buna görə də son illərdə idmançılarımızın nailiyyətləri xeyli artıb.
–Hazırda Kompleksdə idmanın ənənəvi növləri ilə yanaşı, rayonumuz üçün yeni olan idman bölmələri fəaliyyət göstərir. Bu barədə nə deyə bilərsiniz?
–Əvvəlcə qeyd edim ki, karate, futbol, kikboksinq və sərbəst güləş tərtərlilərin ən çox maraq göstərdikləri idman növləridir. Ümumiyyətlə, Qarabağda güləş həmişə sevilib və geniş yayılıb. Tərtərdə də güləş üzrə gözəl məşqçi müəllimlərimiz olub və onlar bu növ idmanı uşaq və yeniyetmələrə sevdiriblər. SSRİ idman ustası Sabir Zeynalovun və başqalarının adlarını çəkə bilərəm.
Ənənəvi idman növlərilə yanaşı, son illər, yəni Kompleksimiz fəaliyyətə başlayandan sonra burada idmanın üzgüçülük, gimnastika, idman rəqsləri kimi yeni növləri üzrə bölmələri fəaliyyətə başlayıb. Nəticələr gözləniləndən də sevindiricidir. Xüsusən tərtərlilər arasında üzgüçülüyə maraq böyükdür. Bu bölmədə həm uşaqlar məşğul olurlar, həm də həkim təyinatı ilə göndərilən müxtəlif vətəndaşlar xidmətimizdən istifadə edirlər. Xüsusən yay aylarında üzgüçülüyə maraq böyük olur. Hovuzlarda gigiyenik qaydaların gözlənilməsini, uşaqlara və böyüklərə daimi nəzarət olunmasını diqqət mərkəzində saxlayırıq.
Uşaqlara və yeniyetmələrə fiziki və mənəvi cəhətdən böyük təsir göstərən idman növünün biri də gimnastikadır. Kompleksimizdə “Gimnastika hamı üçün” bölməsi fəaliyyət göstərir. Qürurverici haldır ki, ötən il Tərtərin tarixində ilk dəfə olaraq gimnastika üzrə respublika birinciliyi məhz bi-zim kompleksdə keçirildi. Bu hadisə rayonumuzda böyük maraq doğurdu və uşaqların və eləcə də böyüklərin gimnastikaya olan münasibətini kökündən dəyişdi. Düzdür, bizim yetirmələr birbaşa çempionata qatılmadılar, ancaq onlar da öz bacarıqlarını nümayiş etdirdilər ki, bu da gimnastikanın rayonumuzda gələcək inkişafına stimul verdi.
İdman rəqsləri bölməsi də yenidir və uşaqlarımız tərəfindən çox sevilir.
–Emin müəllim, 2024-cü ilin yekunları ilə bağlı nə deyə bilərsiniz?
–Uğurlarımız çoxdur və bunları sadalamaqla qurtaran deyil. Qeyd etmək istəyirəm ki, ötən il Şamxal Rəfizadənin rəhbərliyi ilə yaradılmış Azərbaycanın Milli Qəhrəmanı El-man Hüseynov adına “Dəmir Yumruq” İdman Klubu ili əla nəticələrlə başa vurub və region üzrə “Ən yaxşı klub” adına layiq görülüb. Ayrı-ayrı yarışlarda 30-a yaxın idmançımız kikboksinq idman növü üzrə nümunəvi çıxışlarına görə qızıl medalla təltif edilib.
Sərbəst güləş üzrə məşqci Nicat Həsənovun rəhbərliyi ilə tərtərli uşaqlar bölgə və respublika yarışlarında ümumilikdə 31 medala layiq görülüblər, bunlardan 11 qızıl, 12 gümüş, 8 bürünc medaldır.
Məşqçilər arasında Ruhi Hüseynovun adını xüsusilə qeyd etmək istəyirəm. Belə ki, onun yetirmələrindən Qədir Bərxudarlı Savat üzrə birincilikdə və Kunq-Fu üzrə Azərbaycan birinciliyində 1-ci yerin sahibi olub. Davud Vəlibəylinin, İbrahim Həsənzadənin, İsabalı Məmmədzadənin, Məhəmməd Mahmudovun, Röyal Həsənlinin adlarını da fəxrlə çəkmək istəyirəm. Onlar bir qayda olaraq yarışlarda ən yüksək nəticələr əldə edərək qəhrəman Tərtərin adını yüksəklərə qaldırırlar. Gənc idmançılarımızın qələbədən-qələbəyə inamla ad-dımlamasında Tərtər Rayon İcra Hakimiyyətinin başçısı Müstəqim Məmmədovun xüsusi dəstəyi qeyd olunmalıdır. Rayon rəhbəri daimi olaraq yarışlardan qayıdan idmançılarımızı qəbul edir, onlarla söhbətlər aparır, hədiyyə və təşəkkürnamələr təqdim edir. Bu isə uşaqlarda ruh yüksəkliyi yaradır, özlərinə inam hissini artırır. Daha ətraflı »

“Kənd təsərrüfatının inkişafı prioritet məsələdir. Bu, sosial, iqtisadi sahədir, qeyri-neft sektorunun inkişafı üçün dəstəkdir.”                                                                                                 İlham Əliyev, Azərbaycan Respublikasının Prezidenti

Kənd təsərrüfatı – ərzaq təhlükəsizliyinin təmin edilməsində, iş yerlərinin yaradılmasında, kənd yerlərinin inkişafında mühüm rol oynayan fundamental iqtisadi sahədir. İqlim dəyişikliyi, əhalinin artımı və ərzaq bazarında rəqabətin artması kimi qlobal çağırışlar fonunda kənd təsərrüfatının dəqiq, aktual və hərtərəfli təhlilinin aparılması günümüzün tələbi kimi ortaya çıxır. Bu istiqamətdə işlərin təşkili üçün ən effektiv vasitələrdən biri kənd təsərrüfatının siyahıyaalınmasının aparılmasıdır.
Kənd təsərrüfatının siyahıyaalınması – ölkədə kənd təsərrüfatının bütün əsas aspektləri üzrə təfsilatı məlumat əldə etmək üçün aparılan kompleks statistik sorğudur. Bu sorğu torpaqdan istifadə vəziyyəti, əkin sahələrinin strukturu, suvarma, mal-qaranın sayı və sürü dövriyyəsi, təsərrüfatların istehsal göstəriciləri, əmək resursları və digər imkanları barədə geniş məlumat almaq fürsətini verir. Siyahıyaalmanın keçirilməsi təkcə kənd təsərrüfatı sektorunun mövcud vəziyyətini qiymətləndirməyə deyil, həm də onun güclü və zəif tərəflərini görməyə, bu sahədəki tendensiyaları müəyyən etməyə imkan verir. Bu mühüm informasiya mənbəyi dövlət tərəfindən fermerlərə dəstək üçün effektiv strategiya və proqramların işlənib hazırlanmasında, eyni zamanda aqrar sektora cəlb ediləcək investisiyaların istiqamətinin müəyyənləşdirilməsində xüsusi əhəmiyyətə malikdir.
Dünya ölkələrinin təcrübəsində kənd təsərrüfatı siyahıyaalmaları adətən on ildə bir dəfə keçirilir. Nəzərə alsaq ki, sonuncu dəfə keçirilmiş kənd təsərrüfatının siyahıyaalmasından ötən on il ərzində ölkədə kənd təsərrüfatı istehsalçılarının fəaliyyətində, sayında, strukturunda, inzibati ərazi bölgüsündə dəyişikliklər baş vermişdir, bu halda so-sial-iqtisadi inkişaf sahəsində çağdaş problemlərin həllinə ünvanlanacaq tədbirlər kənd təsərrüfatı məhsulu istehsalçıları haqqında ətraflı məlumatların toplanması üçün yeni siyahıyaalmanın keçirilməsi zərurətini ortaya qoyur.
Kənd təsərrüfatı siyahıyaalmasından bəhs edərkən bu mühüm statistik tədbi-rin tarixinə qısa nəzər salmaq məqsədəuyğun olardı. Beləliklə, 19-cu əsrdən başlayan kənd təsərrüfatı siyahıyaalmaları 1835-ci ildə Norveçdə, 1840-cı ildə ABŞ-da, 1846-cı ildə Belçikada, 1852-ci ildə Uruqvayda, 1866-cı ildə Böyük Britaniyada, 1888-ci ildə Argentinada, 1895-ci ildə Macarıstanda, 1896-cı ildə Kanadada, 1897-ci ildə Bolqarıstanda keçirilmişdir. 1905-ci ildə Romada Beynəlxalq Kənd Təsərrüfatı İnstitutunun (IIA) yaradılmasından sonra bir çox dövlətlər bütün dünyada kənd təsərrüfatı siyahıyaalmalarının vahid əsaslarla keçirilməsi barədə razılığa gəldilər. Beləcə 1929-1930-cu illər üçün ilk Ümumdünya kənd təsərrüfatı siyahıyaalınması proqramı (WCA) hazırlandı və 60-a yaxın ölkədə tətbiq edildi. Proqramın 1940-cı il üçün nəzərdə tutulan növbəti mərhələsi İkinci Dünya müharibəsinin başlaması səbəbindən tamamlana bilmədi. 1945-ci ildə Beynəlxalq Kənd Təsərrüfatı İnstitutunun əsasında Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) yaradıldı və 1950-ci ildən başlayaraq hər on ildən bir yenilənən vahid Ümumdünya kənd təsərrüfatı siyahıyaalınması proqramının hazırlanması təmin edildi. Hal-hazırda dünya ölkələri tərəfindən tətbiq olunan mövcud Ümumdünya kənd təsərrüfatı siyahıyaalınması proqramının 2020-ci il raundu 10-cu proqramdır və 2016-2025-ci illəri əhatə edir. Daha ətraflı »

“MƏNİM HƏYAT ROMANIM”

Jurnalist Qədir Tərtərlinin ”Mənim həyat romanım” kitabı təkcə bir insanın taleyini əks etdirmir. Burada eyni zamanda rayonumuzun tarixi öz əksini tapıb. Aşağıda oxucularımıza həmin kitabdan bir parçanı təqdim edirik.
Mərkəzi Komitədə mənə hələlik işim barədə heç kəsə heçnə demədən gözləməyi tapşırmışdılar. “Keçmiş nəzarət komitəsi sədrinin katiblik məsələsi həll olunandan sonra çağıracaqlar səni” demişdilər.
Gözləyirdim. Çoxları işimin düzələcəyinə şübhə edirdi. “Düzələsi olsa, indiyə kimi düzələrdi” fikrinə düşənlər də vardı. Kimin nə deməsinin, necə düşünməsinin mənə dəxli yox idi. Arxayın idim. Başqa cür nə ola bilərdi ki? Respublika rəhbərinin işləyəcəyim vəzifəyə görə şəxsən əlimi sıxıb məni təbrik etməsi elə belə deyildi ki?
Partiya işində bəzi məsələlərin müəyyən vaxta kimi bir növ gizli saxlanıb dərhal açıqlanmaması barədə məlumatım vardı. Buna görə evimizdəkilərə də işimin necə olacağı haqda heç nə deməmişdim.
Çox gözləyəsi olmadım. Aradan bir həftə keçməmiş raykomdan zəng vurub birinci katibin məni yanına çağırdığını bildirdilər.
Məsələ məlum idi. Birinci katibin qəbuluna nə üçün çağrıldığımı yaxşı bilirdim. Rayonumuzda birinci katib işləyən Zülfüqar Abdullayevə böyük hörmətim vardı. Onunla hələ Moskvada oxuduğum vaxtlardan tanış olmuşdum. Tanışlığımızın tarixini indi də olduğu kimi xatırlayıram.
1972-ci il idi. Məktəbdən icazə alıb bir həftəliyə rayona gəlmişdim. Rayonumuzun birinci katibi haqqında eşitdiyim xoş sözlər məndə onunla görüşüb tanış olmaq marağı yaratmışdı. Daha ətraflı »

Tərtər Rayon İcra Hakimiyyətinin əməkdaşları tərəfindən qanunsuz küçə ticarətinin qarşısının alınması məqsədilə keçirilən reyd şəhərin müxtəlif ərazilərini, o cümlədən mərkəzi hissəsini əhatə edib.
Şəhərin Heydər Əliyev prospekti boyunca davam edən reyd zamanı səkilərdə piyadaların hərəkətinə maneə törədən pərakəndə ticarətlə məşğul olanlara xəbərdarlıq edilib. Tərtər Rayon İcra Hakimiyyəti başçısı Aparatının əməkdaşları həmin şəxslərlə maarifləndirici söhbətlər apararaq, yalnız müəyyən olunan yerlərdə ticarətlə məşğul olmalarını onların diqqətinə çatdı-rıblar.
Keçirilən reyd sakinlər tərəfindən rəğbətlə qarşılanıb. Onlar yol kənarında satılan mənşəyi məlum olmayan ərzaq məhsullarının antisanitar vəziyyət yaratdığını bildirməklə, şəhərin ümumi görünüşünə də xələl gətirdiyini qeyd ediblər.
Reyd zamanı qanunsuz küçə ticarəti ilə məşğul olanlara bildirilib ki, profilaktiki söhbətlərə və edilən xəbərdarlıqlara məhəl qoymayan qanunsuz olaraq küçə ticarəti ilə məşğul olan şəxslər barədə İnzibatı Xətalar Məcəlləsinə uyğun protokollar tərtib olunacaq. Qeyd olunub ki, bu cür reydlər mütəmadi olaraq keçiriləcək. Hamımız birlikdə Qəhrəman Tərtərin müasir və gözəl şəhərlər sırasında olmasına kömək etməliyik.

“YENİ TƏRTƏR”

Azərbaycan gənclərinin müasir, inkişaf etmiş, yüksək intellektli aparıcı qüvvə kimi formalaşmasının əsasını, məhz ümummilli lider qoymuşdur. Ulu öndər Heydər Əliyevin əsaslarını yaratdığı və Prezident İlham Əliyevin uğurla davam etdirdiyi dövlət gənclər siyasəti yeni nəslin öz bilik və bacarıqlarının, potensialının səmərəli reallaşdırılmasını, cəmiyyətdə layiqli yer tutmasını təmin edən prioritetlər və həyata keçirilən tədbirlər sistemidir.

Gənclik böyük və tükənməz bir qüvvədir. Gənclər Vətənin işıqlı sabahı, nurlu gələcəyidir. Gəncliyin savadlı, dünyagörüşlü yüksək əxlaqlı, tərbiyəli, vətənpərvər ruhlu olması hər bir dövlət üçün vacibdir. Gənclər cəmiyyətin aparıcı təbəqəsidir. Fiziki və mənəvi cəhətdən sağlam olan , dünyada gedən prosesləri qavrayan, müasir texnologiyalarla işləməyi bacaran  , əqidəli, milli-mənəvi dəyərlərə malik gənclər Vətənimizi uğurlu gələcəyə aparmaq üçün böyük qüvvədir. Dövlətin və cəmiyyətin gələcəyi gənclərdir və gələcəyini düşünən dövlət gənclərin inkişafına qayğı göstərir. Gənclərin inkişafına yardım edən hər bir dövlət  bununla öz xoşbəxt və firavan gələcəyini təmin edir.

Müstəqil Azərbaycan Respublikasında uğurlu gənclər siyasətinin əsasını xalqımızın Ümummilli Lideri Heydər Əliyev qoyub. Qeyd edək ki, Ümummilli Lider Heydər Əliyevin 1994-cü il iyulun 26-da imzaladığı müvafiq Fərmana əsasən, ölkəmizdə gənclər siyasətini həyata keçirən mərkəzi icra orqanı – Gənclər və İdman Nazirliyi yaradılıb. Ulu Öndər 1995-ci ildə Azərbaycan gənclərinin forumunun keçirilməsi təşəbbüsünü irəli sürüb. 2 fevral 1996-cı il tarixində müstəqil Azərbaycan gənclərinin ilk forumu keçirilib. Bundan bir il sonra isə Ümummilli Lider gənclərə böyük qayğısının daha bir təzahürü kimi, 2 fevralın Azərbaycanda Gənclər Günü elan edilməsi haqqında müvafiq Sərəncam imzalayıb. Ölkəmizdə Ulu Öndər Heydər Əliyevin əsasını qoyduğu uğurlu gənclər siyasəti Möhtərəm  Prezidentimiz cənab İlham Əliyevin rəhbərliyi altında    bu gün   eyni ardıcıllıqla davam etdirilir. Prezident İlham Əliyevin müvafiq Sərəncamı ilə 2007-ci il respublikamızda “Gənclər İli” elan edilib. Daha ətraflı »

Prezident İlham Əliyev Gürcüstanın Baş naziri İrakli Kobaxidze ilə görüşündən sonra mətbuata bəyanat verib.

Dövlət başçısı qeyd edib ki, Baş nazir İrakli Kobaxidzenin səfərinin xüsusi əhəmiyyəti var. Çünki Gürcüstanda keçirilmiş parlament seçkilərindən sonra bu ilk xarici səfərdir.

Bizim xalqlarımız əsrlər boyu dostluq, mehriban qonşuluq, qardaşlıq şəraitində yaşamışlar.

Bu ənənələr bu gün də yaşayır. Bu gün Gürcüstan-Azərbaycan əlaqələri bütün istiqamətlər üzrə uğurla inkişaf edir. Bizim siyasi əlaqələrimiz bütün qonşular üçün nümunə ola bilər. İqtisadi sahədə yaxşı nəticələr var. Azərbaycan Gürcüstan iqtisadiyyatına 3,6 milyard dollar sərmayə qoyub. Əlbəttə, bu onu göstərir ki, hökumətinizin uğurlu iqtisadi siyasəti, sərmayələrin cəlb edilməsi, Gürcüstanda olan çox müsbət sərmayə iqlimi bütün investorları həvəsləndirir. O cümlədən Azərbaycan investorları da böyük həvəslə Gürcüstana öz sərmayələrini qoyurlar.

İki ölkə arasında enerji sahəsində əməkdaşlıq xüsusilə əhəmiyyətlidir.

Təbii ki, energetika sahəsindəki iki ölkə arasındakı əməkdaşlıq həm ölkələrimiz üçün, həm daha böyük, geniş coğrafiya üçün xüsusi əhəmiyyət daşıyır. Birgə həyata keçirdiyimiz neft-qaz layihələri bu gün bir çox ölkələrin enerji təhlükəsizliyinin əsasını təşkil edir. Təkcə onu demək kifayətdir ki, Gürcüstan tranziti vasitəsilə Azərbaycan hazırda 11 ölkəyə öz təbii qazını ixrac edir, ildən-ilə ixrac artır. Keçən il bu, 25 milyard kubmetrə çatmışdır və bunun 10 faizi – ümumi ixracımızın 10 faizi Gürcüstanın payına düşür. Daha ətraflı »

AZƏRBAYCANIN İSTİQLAL YOLUNUN İLK ZİRVƏSİ

1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib. Sovet ordusunun xüsusi təyinatlı dəstələrinin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklə müşayiət edilib.
Belə ki, fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirmiş, 20 nəfəri ölümcül yaralamışlar. Fövqəladə vəziyyət elan edildikdən sonra isə yanvarın 20-də və sonrakı günlərdə Bakı şəhərində 21 nəfər öldürülmüşdür. Fövqəladə vəziyyətin elan olunmadığı rayonlarda yanvarın 25-də Neftçala, yanvarın 26-da Lənkəranda daha 8 nəfər qətlə yetirilmişdir. Ümumilikdə 131 nəfər öldürülmüş, 744 nəfər yaralanmış, 841 nəfər qanunsuz həbs olunmuş, 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlak məhv edilmişdir.
20 Yanvar hadisəsi milli məfkurənin inkişafına təkan vermiş hadisədir. 20 Yanvar Azərbaycan tarixində təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günüdür. Bu, uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
Ulu Öndərin mərdliyi və siyasi iradəsi sayəsində 20 Yanvar hadisələri öz hüquqi və siyasi qiymətini almışdır. Azərbaycan xalqının başına gətirilən qanlı faciəyə ilk siyasi-hüquqi qiyməti verən, təhlükələrdən çəkinməyərək Sovet hakimiyyətinin bu əməlinə etiraz edən Ümummilli lider Heydər Əliyev oldu. 1990-cı il yanvarın 21-də Sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı daimi nümayəndəliyinə gələn Ulu Öndər Heydər Əliyev qanlı faciənin təşkilatçılarını dünya ictimaiyyəti qarşısında ittiham etdi, ifşaedici və cəsarətli bir bəyanat verdi.
Ümummilli lider Heydər Əliyevin təşəbbüsü ilə Naxçıvan Muxtar Respublikasının Ali Məclisi 20 Yanvar faciəsinə ilk siyasi qiymət verən 21 noyabr 1990-cı il tarixli qərar qəbul etdi. Daha ətraflı »

Bu küçədə onun ayaq izləri var

Tərtər Qəhrəman şəhərdir. Onun sakinləri də qəhrəmandırlar. Ermənilərin Qarabağa köçürülməsindən sonra, daimi olaraq namərd qonşulardan gizli, yaxud aşkar zərbələr almışıq. 1988-ci ildən sonra isə düşmənin gizli niyyətləri üzə çıxdı. Uzun illər ərzində tərtərlilər düşmənlə üz-üzə mərdliklə yaşadılar və döyüşdülər. Birinci Qarabağ müharibəsində də beləydi, atəşkəs dövründə də, sonrakı qəhrəmanlıq mübarizəmizdə də.
Tərtərin qəhrəman olması bu şəhərə qədəm qoyulan ilk anlardan məlum olur. Möhtəşəm Şəhidlər AbidəKompleksi, şəhidlərin adlarına verilmiş küçələr, onların barelyefləri, xatirələrini əbədiləşdirən bulaqlar–bütün bunlar rayon sakinlərinin öz əbədiyaşar övladlarına ehtiram və məhəbbətindən xəbər verir.
Şəhərimizin bütün küçələri abad və səliqəlidir. Şəhid adlarını daşıyan küçələr isə rayon rəhbərinin xüsusi diqqətindədir. Bura vaxtaşırı asfalt örtük salınır, səliqə-səhman yaradılır, təmizlik işləri görülür.
Bu günlərdə rayon rəhbəri oğlum şəhid Mahir Əsədovun adını daşıyan küçədə aparılan abadlıq işləri ilə tanış olarkən ailəmizdə olub və məni 80 illik yubileyim münasibəti ilə təbrik edib. Oğlumun qısa, lakin şərəfli ömür yolu ilə bağlı xatirələr söylənildi. Qeyd olundu ki, Mahir elə məktəb partasından ayrılıb öz arzusu ilə döyüşlərə qatılıb, gənc yaşlarında böyük qəhrəmanlıq göstərib. Sonra Tərtər Rayon İcra Hakimiyyətinin başçısı Müstəqim Məmmədovla birlikdə küçədə görülən işlərlə tanış olduq. Daha ətraflı »

97 saylı Tərtər-Ağdərə-Goranboy seçki dairəsi üzrə 50 seçki məntəqəsi fəaliy-yət göstərir. 3 seçki məntəqəsi isə qapalıdır.
Artıq 43,5 min seçici olan dairə üzrə siyahılar dəqiqləşdirilib və əhalinin tanış olması üçün müvafiq yerlərə asılıb.
Dairə üzrə 8 bələdiyyəyə üzv seçiləcək. 94 yer uğrunda 185 namizəd mübarizə aparacaq. Qeydə alınan namizədlərdən 94 nəfəri YAP, 1 nəfəri Ağ Partiya üzvü, 90 nəfəri isə tərəfsizdir.
Dairənin seçki məntəqələrində lazım olan hazırlıq işləri tam başa çatdırılıb. 9 seçki məntəqəsində VEB kameraların quraşdırılması nəzərdə tutulub. Bundan əlavə, seçkiləri müşahidə etmək üçün 551 nəfər müşahidəçi qeydə alınıb.
Hazırda qeydə alınmış namizədlərin təbliğat-təşviqat kampaniyası aparılır. Bu məqsədlə seçicilərlə görüş üçün müvafiq yerlər müəyyən olunub. Bələdiyyə seçkiləri ilə əlaqədar seçicilərlə görüşlərin keçirilməsi və seçkiqabağı təşviqat işlərinin aparılması ilə bağlı rayonun yaşayış məntəqələrində müəyyənləşdirilmiş açıq və qapalı yerlərin siyahısı və ünvanı yerli rayon qəzetində dərc olunub.

Lazım QULİYEV,
“Azərbaycan”