Tərtərdə peşəkar həkimlərin fəaliyyət göstərdiyi və ən müasir avadanlıqlarla təchiz edilmiş “Tərtər Sağlamlıq Mərkəzi”nin açılışı olub.

Açılış mərasimində Tərtər Rayon İcra Hakimiyyətinin başçısı Müstəqim Məmmədov, YAP Tərtər rayon təşkilatının sədri Eldar Əsədov, şəhid ailələri, qazilər, sağlamlıq mərkəzinin əməkdaşları və ictimaiyyət nümayəndələri iştirak ediblər.

Klinikanın təsisçisi Yamən Cəfərov çıxış edərək qonaqları salamlayıb, sahibkarlara yaradılan şəraitə görə ölkə rəhbərinə minnətdarlığını bildirib. Qeyd edib ki, kollektivin ən böyük məqsədi sağlam gələcəyə gözəl və yüksək səviyyədə xidmət göstərməkdir. Klinikada vətəndaşlar üçün laboratoriya, ginekoloq, USM (ultrasəs müayinəsi), terapevt, stomatoloq, psixoterapevt və loqoped xidmətləri fəaliyyət göstərir. O, həmçinin şəhid ailələrinin klinikada növbədən kənar müayinə və müalicə oluna biləcəyini də vurğulayıb.

Rayon rəhbəri Müstəqim Məmmədov klinikanın açılışını əlamətdar hadisə kimi qiymətləndirərək, burada çalışan həkimlərin və tibbi heyətin vətəndaşlarımız üçün yüksək səviyyədə tibbi xidmət göstərəcəklərinə inandığını qeyd edib. RİH başçısı həmçinin qeyd edib ki, əvvəllər bəzi müayinə və müalicələr üçün qonşu rayonlara üz tutan rayon sakinləri bundan sonra yeni klinikanın xidmətlərindən istifadə edə biləcəklər. Peşəkar həkimlərin fəaliyyət göstərdiyi bu müəssisə deməyə əsas verir ki,  qonşu rayonlardan da tibbi müayinələr üçün bura müraciət edənlər olacaq.

Çıxış edənlər YAP Tərtər rayon təşkilatının sədri Eldar Əsədov, şəhid Qəhrəmanlı Yaqubun valideyinləri Abdulla Qəhrəmanov, Mətanət Qəhrəmanova və Birinci Qrabağ müharibəsinin əlilləri Tərlan Zeynalov, Eldəniz İbadov yeni tibb mərkəzinin istifadəyə verilməsinə görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.

Sonda tədbir iştirakçıları klinikanın imkanları ilə yaxından tanış olublar.

Prezident İlham Əliyev 31 iyul 2026-cı ildə Qırğızıstana dövlət səfəri zamanı mətbuata bəyanat verib. Ölkə başçısı bildirib ki, müttəfiqlik münasibətləri çox böyük məsuliyyət deməkdir və biz bu məsuliyyətə hazırıq. Biz bütün təşəbbüslərdə – həm beynəlxalq platformalarda, həm də iqtisadi-ticari sahədə və təhlükəsizliyin möhkəmləndirilməsində bir-birimizi bundan sonra da dəstəkləyəcəyik.
Qeyd olunub ki, Azərbaycan-Qırğız İnvestisiya Fondunun büdcəsi 200 milyon dollara qədər artırılıb.
Ağdam bölgəsində Manasın adını daşıyan məktəb qardaşlığımızın daha bir rəmzidir.
Prezident həmçinin Qarabağın bərpasına göstərilən kömək üçün dərin minnətdarlığını ifadə edib. Bildirib ki, bu, Qırğız xalqının 30 il ərzində işğaldan zərər çəkən Qarabağın bərpası işinə böyük töhfəsi oldu.
Ölkə başçısı deyib:
– Bizi tarix, mədəniyyət, xalqla-rımızın görkəmli nümayəndələrinə hörmət ilə bağlı çox şey birləşdirir. Biz Sizinlə, həmçinin Ba-kıda Çingiz Aytmatovun abidəsini və onun adını daşıyan parkın açılışını etdik. Bu yerlər, həmçinin Çingiz Aytmatovun həyatı və fəaliyyəti ilə bağlıdır. Bu gün görüş keçirdiyimiz ev də onunla bağlıdır və divarlarda onun portreti var. Bütün bunlar bizim bir-birimizə yaxınlaşmaq səylərimizi nümayiş etdirir.
Bir neçə il əvvəl Sizinlə birlikdə Bişkekdə Qırğızıstan-Azərbaycan dostluğu parkının açılışını da unutmayacağam. Bu park da bir-gə əməkdaşlığımızın paytaxtdakı kiçik guşəsidir.
Bu gün bizim danışdığımız humanitar əlaqələr– Qırğızıstanda Azərbaycanın, Azərbaycanda isə Qırğızıstanın Mədəniyyət Günləri müsbət abhava yaradır, ortaq köklərə malik və bir neçə beynəlxalq strukturda birləşmiş xalqlarımızın necə yaxın olduğunu bir daha nümayiş etdirir.
Prezident İlham Əliyev Qırğı-zıstan Respublikasının Prezidentinə, Mərkəzi Asiya ölkələrinin digər prezidentlərinə Azərbayca-nın Mərkəzi Asiya Məşvərət görüşlərinə tamhüquqlu üzv qəbul olunmasına görə təşəkkürünü bildirib.
Prezident İlham Əliyev Qırğız Respublikasının ali dövlət mükafatı – 1-ci dərəcəli “Manas” ordeni ilə təltif olunub.
Eyni zamanda Qırğızıstan Respublikasının Prezidenti Sadır Japarov Azərbaycanın ən yüksək dövlət təltifi – “Heydər Əliyev” ordeni ilə təltif olunub.

Hər bir Azərbaycan vətəndaşının mənəvi borcu

Azərbaycan əlifbası və Azərbaycan dili günü münasibətilə Tərtər Rayon İcra Hakimiyyəti və Yeni Azərbaycan Partiyası rayon təşkilatının təşkilatçılığı ilə “dəyirmi masa” keçirilib.
Tədbir iştirakıları əvvəlcə Ümummilli Lider Heydər Əliyevin və Vətənimizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad ediblər.
Tədbiri giriş sözü ilə açan Tərtər Rayon İcra Hakimiyyəti başçısı aparatının İctimai-siyasi və humanitar məsələlər sektorunun müdiri Zabil Paşayev bildirib ki, Azərbaycan əlifbası və Azərbaycan dili günü Ümummilli Lider Heydər Əliyevin 9 avqust 2001-ci il tarixli Sərəncamına əsasən hər il 1 avqust tarixində qeyd olunur.
Ümummilli Lider Heydər Əliyevin müəyyənləşdirdiyi dil siyasəti bu gün Prezident İlham Əliyev tərəfindən uğurla davam etdirilir. Qeyd olunub ki, dövlət başçısının “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” 1 noyabr 2018-ci il tarixli Fərmanı ana dilimizin qorunması, dövlət idarələrində Azərbaycan dilindən düzgün istifadə olunması, ədəbi dil normalarına riayət edilməsi və milli-mənəvi dəyərlərimizin yaşadılması baxımından mühüm əhəmiyyət daşıyır. Bildirilib ki, Azərbaycan dili dövlət müstəqilliyimizin əsas rəmzlərindən biri olmaqla xalqımızın milli kimliyini və mənəvi dəyərlərini özündə yaşadır. Daha ətraflı »

Həyatımızın hansı sahəsindən danışsaq, mütləq orada Ulu Öndər Heydər Əliyevin titanik zəhmətini və silinməz izlərini görürük.
Bu sözlər müstəqil Azərbaycanın dil siyasətinə də aiddir. Ümummilli Liderimiz bu siyasətin təməlini müstəqillik əldə edildikdən hələ çox əvvəl – Sovet imperiyasının sərt qanunları tüğyan etdiyi bir dövrdə qoymuşdur.
Bu barədə öz gördüklərim əsasında danışa bilərəm. Belə ki, çox əvvəl, 1969-cu ildə Bakı Dövlət Universitetinin (o zamankı Azərbaycan Dövlət Universiteti) I kurs tələbəsiydim. Heydər Əliyev ölkədə hakimiyyətə yenicə gəlmişdi. Onun Azərbaycana gətirdiyi abuhava universitet auditoriyalarında da hiss olunurdu. İndiyədək Azərbaycan dilində danışan rayondan gələn uşaqları “kəndçi” adlandıranlar, bir az sözlərinə sərhəd qoymağa başlamışdılar. Buna səbəb Ulu Öndərin şəxsi nümunəsiydi.
Belə ki, 1970-ci ildə Bakıda Azərbaycan Dövlət Universitetinin 50 illik yubileyi keçirildi və Ulu Öndər Heydər Əliyev həmin yubiley tədbirində mövcud qayda-qanunları, özündən əvvəlki çoxillik ənənələri sındıraraq rus dilində deyil, doğma ana dilində çıxış etdi. Bununla da görkəmli dövlət xadimi öz ana dilimizə hörmətlə yanaşmağı hər bir Azərbaycanlının müqəddəs borcu olduğunu xatırlatdı.
Bu gün biz Azərbaycan Respublikasının Prezidenti cənab İlham Əliyevin Azərbaycan dilində çıxışlarını, məruzələrini dinlədikdə, haqlı olaraq qürur hissi keçiririk.
Çox dil bilmək gözəldir, müasir gənclərimizin bu həvəsi alqışalayiqdir. Ancaq yaxşı olar ki, uşaqlar dil açanda dünyadakı ən şirin, ən gözəl Azərbaycan dilində danışsınlar. İlk kəlmələrini bu dildə söyləsinlər. Ziyalılarımızın ailələrində ünsiyyət dili öz doğma dilimiz olsun.

Svetlana BAĞIROVA

Müqəddəs borc

Bəzən bir insanın həyatı təkcə öz taleyi deyil, bütöv bir xalqın qürur salnaməsinə çevrilir. Vətənin keşiyində dayanmaq, onun uğrunda canını təhlükəyə atmaq böyük cəsarət tələb edir. Bu cəsarətin ən gözəl nümunələrindən biri də qazilərimizdir. Cəfərli Elvin Hafiz oğlu Azərbaycanın igid oğullarından biridir. O, 1998-ci il iyun ayının 5-də Tərtər rayonunun Qapanlı kəndində anadan olub. Orta təhsillidir. Təhsilini başa vurduqdan sonra Vətənə xidmət etməyi özünə müqəddəs borc bilib. Vətən müharibəsi zamanı döyüşlərdə böyük şücaət göstərərək, torpaqlarımızın azadlığı uğrunda mərdliklə vuruşub. O, 2016-cı ildən 2020-ci ilin 5 oktyabrına qədər Azərbaycan Respublikası Silahlı Qüvvələrində xidmət edib. Ağdərə istiqamətində gedən döyüş əməliyyatlarında manqa komandiri vəzifəsində çalışıb. Müharibənin 10-cu günü, oktyabr ayının 5-də Suqovuşan istiqamətində yaralanıb.
Döyüşlər zamanı aldığı yaralara baxmayaraq, ruhdan düşməyən qazi bu gün də vətənpərvərliyi, iradəsi və mübarizliyi ilə hər kəsə nümunədir. Onun keçdiyi həyat yolu göstərir ki, əsl qəhrəmanlıq təkcə döyüş meydanında vuruşmaq deyil, həm də çətinliklər qarşısında sınmamaqdır.
Göstərdiyi igidliyə görə Cəfərli Elvin Hafiz oğlu “Cəsur döyüşcü”, “Suqovuşanın azad olunmasına görə”, “Vətən müharibəsi iştirakçısı” medalları ilə təltif olunub. Bu mükafatlar onun Vətən qarşısında göstərdiyi xidmətlərin dövlət tərəfindən yüksək qiymətləndirildiyini sübut edir.
Bu gün qazilərimiz xalqımızın qürur mənbəyidir. Onların şücaəti gələcək nəsillərə vətən sevgisi, birlik və fədakarlıq dərsi verir. Biz onların qəhrəmanlığını daim hörmətlə yad etməli, göstərdikləri şücaəti heç vaxt unutmamalıyıq. Çünki bu gün azad və qalib Azərbaycanda yaşayırıqsa, bunu şəhidlərimizə və qazilərimizin fədakarlığına borcluyuq.

Əfşanə Əlizadə
Tərtər rayon İcra Hakimiyyətində
Könüllü, gənc jurnalist

Rayonumuzda qiymətli tərəvəz – kök becərilir

“Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”nda digər sahələrlə yanaşı tərəvəz istehsalının artırılması da nəzərdə tutulub.
Hal-hazırda ölkə üzrə özümüzü tərəvəzlə 107 faiz təmin edirik və 214 min ton tərəvəz ixrac olunur.
Tərtərli fermerlər də tərəvəz istehsalına öz töhfələrini verirlər. Son illərdə rayonda xüsusən kök istehsalına maraq artıb. Bu sahə rayonumuz üçün ənənəvi olmasa da, əldə olunan göstəricilərdən belə nəticə çıxarmaq olar ki, Tərtər torpağına atılan hər bir toxum qayğı və diqqətlə becəriləndə, əkinçini sevindirir.
Tərəvəz əkini ilə məşğul olan fermerlərdən biri də Sarıcalı kəndindən İlqar Bəbişovdur. Onun öhdəsində ümumilikdə 45 hektar əkin sahəsi var. Bunun 17 hektarında kök əkir.
Fermer deyir:
– Kök ildə iki dəfə əkilir və yığılır. Onun becərilməsi zamanı əsas tələbat suyadır. Suvarma zamanı həm subartezian quyularından, həm də arxlarımızdan istifadə edirik.
Təsərrüfatda suvarma damlama üsulu ilə aparılır, suya qənaət edilir. Becərmə işləri isə həm texnika vasitəsilə, həm də əllə görülür. Mövsümi işlər zamanı sahədə 50-60 nəfər çalışır.
Fermer bildirdi ki, əkin üçün toxumu xaricdən gətirirlər, məhsuldar sortlardır, hektardan 45-50 sentner yüksək keyfiyyətli kök götürülür. Məhsul yığılıb yuyulduqdan sonra, kisələrə yığılır və Bakıya göndərilir. Tərtərdə istehsal olunan kök ölkə bazarlarında satılmaqla yanaşı, ixrac üçün nəzərdə tutulur.
Rayon Statistika İdarəsinin verdiyi məlumata görə 2025-ci ildə rayonumuzda 39 hektarda kök əkilmiş təkrar əkinin məhsulu ilə birgə 1005,4 ton qiymətli tərəvəz toplanmışdır.
2026-cı ildə ümumilikdə əkin sahəsi 103 hektardır, 50 hektarın məhsulu yığılıb və hələlik 739,5 ton kök satışa göndərilib.

Svetlana BAĞIROVA

Tərtər Rayon İcra Hakimiyyətinin müraciəti əsasında Türk Əməkdaşlıq və Koordinasiya Agentliyinin (TİKA) Bakı Proqram Koordinatorluğu ilə əldə olunmuş razılığa əsasən, rayonda aqrar sektorun inkişafına dəstək vermək, heyvandarlıqla məşğul olan yerli fermerlərin süd istehsalı potensialını artırmaq və onların gəlirlərinin yüksəldilməsini təmin etmək məqsədilə “Tərtərli Fermerlərə Süd Sağan Aparat Alınması” layihəsi icra olunub.
Layihə çərçivəsində 29-30 iyul 2026-cı il tarixlərində Tərtər Rayon İcra Hakimiyyətinin iclas zalında heyvandarlıqla məşğul olan 50 nəfər tərtərli fermer üçün 2 günlük maarifləndirici təlim keçirilib. Fermerlərin heyvan yetişdiriciliyi sahəsində nəzəri və praktiki biliklərinin artırılmasına töhfə vermək məqsədilə keçirilən təlimlərə Türkiyə Respublikası Kənd Təsərrüfatı və Meşəçilik Nazirliyindən ezam olunmuş 2 nəfər yüksək-ixtisaslı mütəxəssis cəlb edilib.
Tədbirin açılışında çıxış edən Tərtər Rayon İcra Hakimiyyəti başçısının birinci müavini Elvin Umudov iştirakçıları salamlayaraq, dövlətimiz tərəfindən aqrar sektorun inkişafına göstərilən diqqət və qayğıdan, eləcə də Azərbaycan-Türkiyə qardaşlıq əlaqələrinin regional layihələrdəki uğurlu təzahüründən söz açıb. O, TİKA ilə birgə reallaşdırılan bu layihənin rayonun kənd təsərrüfatı infrastrukturunun gücləndirilməsi və fermerlərin rifahının yaxşılaşdırılması baxımından mühüm əhəmiyyət kəsb etdiyini vurğulayıb.
Təlimin yekun günü layihə çərçivəsində TİKA tərəfindən təmin edilmiş Türkiyə istehsalı olan 50 ədəd müasir südsağan aparat (eyni anda iki inək üçün nəzərdə tutulmuş, elektrik motorlu, paslanmayan materialdan hazırlanmış 40 litr tutumlu) fermerlərə təhvil verilib.
Avadanlıqların təhvil verilməsi mərasimində Tərtər Rayon İcra Hakimiyyəti başçısının birinci müavini Elvin Umudov və TİKA Bakı Proqram Koordinatoru Mahmut Ağırman iştirak edərək fermerlərə gələcək fəaliyyətlərində uğurlar arzulayıblar.
Fermerlər onlara göstərilən diqqət və qayğıya görə ölkə rəhbəri cənab İlham Əliyevə öz minnətdarlıqlarını bildiriblər.

Azərbaycan Respublikasının dövlət suverenliyinin və ərazi bütövlüyünün bərpası uğrunda şəhid olmuş şəxslərin ailələrinin və qazilərin sosial qayğılarının öyrənilməsi və həlli istiqamətində tədbirlərin davam etdirilməsi məqsədilə Tərtər Rayon İcra Hakimiyyəti başçısı Müstəqim Məmmədov Milli Məclisin deputatı Anar Məmmədov və YAP rayon təşkilatının sədri Eldar Əsədovla birlikdə Bəyimsarov kəndində Vətən müharibəsi şəhidi, 3-cü dərəcəli “Vətənə xidmətə görə” ordenli Məmmədli Tural Aqil oğlunun ailəsində olub, ailənin qayğıları ilə maraqlanıblar.
Qeyd edək ki, Məmmədli Tural Aqil oğlu 1998-ci il martın 22-də Tərtər rayonunun Bəyimsarov kəndində doğulub, Azərbaycan Ordusunun müddətdən artıq xidmət keçən hərbi qulluqçusu kimi Vətən müharibəsində iştirak edib, oktyabrın 9-da Suqovuşan istiqamətində gedən döyüşlərdə şəhid olub.
Onun nəşi neytral zonada olduğu üçün çətinliklə tapılıb və noyabr ayının 4-də doğulduğu Bəyimsarov kəndində dəfn olunub.
Şəhid Məmmədli Tural Aqil oğlu ölümündən sonra Aəzrbaycan Respublikası Prezidentinin müvafiq sərəncamı ilə “Suqovuşanın azad olunmasına görə”, “Cəsur döyüşçü”, “Vətən uğrunda” medalları və 3-cü dərəcəli “Vətənə xidmətə görə” ordeni ilə təltif olunub.
Şəhidin ailə üzvləri şəhid ailələrinə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnnətdarlıqlarını bildiriblər.

Yarımçıq ömrün 37-ci baharı

Avqustun 4-ündə Aprel döyüşləri iştirakçısı, şəhid gizir Nicat İsgəndərovun 37 yaşı tamam oldu.
İllər bir-birini sürətlə əvəz edir, uşaqlar böyüyür, yaşlılar daha da qocalır, Nicat isə xatirələrimizdə elə beləcə yaşayır– gənc, həyat eşqi ilə dolu, xeyirxah, vətənpərvər, igid bir oğul kimi. Bu illər ərzində nə qədər göz yaşı axıdıb Maya ana, Bəhruz ata.
Bu barədə Bəhruz ata deyir:
– 2020-ci ildə Ali Baş Komandan, möhtərəm Prezidentimiz İlham Əliyevin dilindən torpaqlarımızın yağı düş-məndən azad edilməsi, 44 günlük Vətən müharibəsinin Qələbəmizlə başa çatması xəbərini eşidəndə, ilk dəfə olaraq sevinc göz yaşlarımızı saxlaya bilmədik. Bu qələbə ilə Nicatın və torpaqlarımızın azadlığı uğrunda canlarından keçən hər bir şəhidimizin arzuları gerçəkləşdi. Təsəllimiz budur ki, ölkəmizdə sülh və əmin-amanlıqdır. Öz siyasətilə bu sülhü təmin edən Prezident İlham Əliyevə cansağlığı arzulayır, şəhidlərimizə Allahdan rəhmət diləyirəm.
Aprel döyüşləri şəhidi gizir Nicat İsgəndərov 1989-cu il avqustun 4-də Tərtər şəhərində anadan olub. Füzuli istiqamətində Lələtəpə uğrunda döyüşlərdə qəhrəmancasına şəhid olub. Daha ətraflı »

Əlizadə Elşən Faiq oğlu 1995-ci il avqustun 10-da İsmayılbəyli kəndində anadan olub. Valideynləri danışırlar ki, ürəkli, qorxmaz, boylu-buxunlu, ölümün gözünə dik baxan oğlanıydı.Vaxtilə kolxozda traktorçu, çilingər işləyən Faiq kişi övladlarını da zəhmətkeş böyütmüşdü. Oğlanları Elşən və Elçin uşaqlıqdan texnikaya maraq göstəriblər. Hər ikisi elə öz həyətlərində maşın təmiri ustası kimi çalışırdı. Onlar həm qardaş, həm də ayrılmaz dost, sirdaş idilər.
Elşən valideynlərinə bildirmədiyi sözünü qardaşına deyə bilirdi. Elə müharibəyə könüllü getməsini də birinci olaraq qardaşı bilmişdi. Onun döyüş yolu Tapqaraqoyunludan başlayıb, Talışdan keçib və Suqovuşanda şəhidlik zirvəsinə ucalıb. Oktyabrın 3-də yaralanmışdı. Bir neçə gün hospitalda yatıb, yenidən cəbhəyə qayıtmışdı. Bu barədə evlərinə heç nə bildirməmişdi.
Anası Sahibə xanım deyir ki, Elşən sözünün qiymətini biləniydi, çox danışmağı sevməzdi. Bir də heç vaxt razı olmazdı ki, valideynləri narahatçılıq keçirsinlər.
Hospitaldan qayıdandan sonra evlərinə zəng vurmuşdu. Hər şeyin yaxşı olduğunu, yenidən döyüşlərə qatıldığını bildirmişdi.
Çiyin-çiyinə vuruşduğu yoldaşları danışırlar ki, onun ayağı tam sağalmamışdı, ayaqqabısının ipini möhkəm sıxırdı ki, ağrını hiss etməsin. Ancaq onlardan bir addım belə geri qalmırdı.
Elşən uşaqlığından idmanı çox sevirdi. Ordu həyatında hər kəsə lazım olan dözümlülüyü, cəsarəti də məhz o illərdə qazanmışdı. Bir də onda Vətən sevgisi güclüydü. Bu sevgini də həm təhsil aldığı İsmayılbəyli kənd tam orta məktəbində, həm də sadə, zəhmətkeş ailəsində aşılamışdılar. Daha ətraflı »