Azərbaycan Respublikasının Prezidenti İlham Əliyev cənablarının 2025-ci ilin “Konstitusiya və Suverenlik İli” elan edilməsi ilə bağlı təşəbbüsləri dövlətçilik tariximizdə mühüm mərhələ kimi qiymətləndirilir. Bu çərçivədə irəli sürülən amnistiya təşəbbüsü isə ölkəmizdə hüquqi dövlət quruculuğu, humanizm, ədalət və sosial məsuliyyət prinsiplərinin bariz ifadəsidir.

Azərbaycan Respublikasının Konstitusiyası müstəqil dövlətimizin hüquqi-siyasi əsaslarını müəyyən edən ali hüquqi sənəd olmaqla yanaşı, insan və vətəndaş hüquq və azadlıqlarının təminatçısıdır.  Möhtərəm Prezidentimiz İlham Əliyev cənablarının rəhbərliyi ilə həyata keçirilən hüquqi islahatlar Konstitusiyanın real həyatda tətbiqini, hüququn aliliyinin möhkəmləndirilməsini və cəmiyyətin rifahının yüksəldilməsini hədəfləyir. “Konstitusiya və Suverenlik İli” çərçivəsində amnistiyanın gündəmə gətirilməsi də məhz bu məqsədlərə xidmət edir.

Amnistiya təşəbbüsü dövlətin cəza siyasətində humanist yanaşmanı ön plana çıxarır. Bu addım bir tərəfdən cəzaçəkmə müəssisələrində saxlanılan şəxslərin islah olunmasına stimul yaradır, digər tərəfdən isə onların cəmiyyətə reinteqrasiyasına şərait formalaşdırır. Xüsusilə ilk dəfə az ağır və ya ağır olmayan cinayətlər törətmiş şəxslərin, sosial həssas qruplara aid məhkumların amnistiya aktı ilə azadlığa buraxılması dövlətin insana verdiyi dəyərin göstəricisidir.

Möhtərəm Prezidentimizin amnistiya təşəbbüsü həm də Azərbaycan dövlətinin güclü və suveren mövqeyinin ifadəsidir. Tam bərpa olunmuş ərazi bütövlüyü və dövlət suverenliyi şəraitində həyata keçirilən bu təşəbbüs göstərir ki, Azərbaycan yalnız hərbi-siyasi gücü ilə deyil, eyni zamanda hüquqi və mənəvi üstünlükləri ilə də regionda nümunəvi dövlətdir. Dövlət güclü olduqda bağışlamağı bacarır və bu, yüksək siyasi mədəniyyətin göstəricisidir.

Amnistiya aktları Azərbaycanda artıq davamlı hüquqi ənənəyə çevrilib. Son illərdə qəbul edilən əfv və amnistiya qərarları minlərlə ailənin sevincinə səbəb olmuş, cəmiyyətdə sosial həmrəyliyi və dövlətə inamı daha da gücləndirmişdir. “Konstitusiya və Suverenlik İli” münasibətilə irəli sürülən amnistiya təşəbbüsü də bu humanist siyasətin davamı olaraq tarixə düşəcək.

Nəticə etibarilə, Prezident İlham Əliyevin amnistiyanın elan edilməsi ilə bağlı təşəbbüsü Konstitusiyanın ruhuna, müstəqil və suveren Azərbaycan dövlətinin dəyərlərinə tam uyğun olmaqla yanaşı, cəmiyyətdə ədalət, mərhəmət və hüquqa hörmət anlayışlarını daha da möhkəmləndirir.

Eldar Əsədov,

YAP Tərtər rayon təşkilatının sədri

ÖLKƏNİN TALEYİNDƏ DÖNÜŞ YARADAN TARİXİ ŞƏXSİYYƏT

Tərtər Rayon İcra Hakimiyyətinin və YAP Tərtər Rayon Təşkilatının birgə təşkilatçılığı ilə rayon Mədəniyyət Mərkəzində Ulu Öndər Heydər Əliyevin anım gününə həsr olunmuş tədbir keçirilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, YAP rayon təşkilatının sədri Eldar Əsədov, Ağsaqqallar Şurasının sədri Faiq Məmmədov, Qarabağ Regional Memarlıq və Şəhərsalma Baş idarəsinin rəisi Qədir Babayev, Milli Məclisin deputatı Anar Məmmədovun köməkçisi Elçin Cahangirov, QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov, şəhid ailələri, qazilər, müharibə veteranları, idarə, müəssisə, təşkilat rəhbərləri, İƏD üzrə nümayəndələr, bələdiyyə sədrləri öz kollektivləri ilə iştirak ediblər.
Tədbir iştirakçıları əvvəlcə foyedə Ümummilli Lider Heydər Əliyevin həyat və fəaliyyətini əks etdirən foto-stendlərlə tanış olublar. Anım mərasimi Dövlət Himninin səsləndirilməsi ilə başlayıb. Ardınca Ulu Ön-dərin və şəhidlərimizin xatirəsi bir dəqiqəlik sükutla anılıb. Daha sonra Ümummilli Lider Heydər Əliyevin ömür yoluna həsr olunan film nümayiş etdirilib.
Tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov bildirib ki, Ulu Öndər Heydər Əliyev Azərbaycan dövlətçiliyinin memarı, siyasi rəhbərliyi və uzaqgörənliyi ilə ölkənin taleyində dönüş yaradan tarixi şəxsiyyətdir.
Rayon rəhbəri qeyd edib ki, Ümummilli Liderin rəhbərliyi dövründə Azərbaycan həm sovet hakimiyyəti illərində, həm də müstəqilliyin ağır və məsuliyyətli mərhələlərində böyük sınaqlardan uğurla çıxıb. Onun siyasi iradəsi, xalqına olan sevgisi və qətiyyətli addımları sayəsində ölkəmiz dağılmaq təhlükəsindən xilas olub, sabitlik və inkişaf yoluna qədəm qoyub.
Müstəqim Məmmədov çıxışında xüsusi olaraq Tərtər rayonuna göstərilən diqqət və qayğıdan danışıb. Bildirib ki, Heydər Əliyev Tərtəri daim strateji əhəmiyyətə malik bölgə kimi qiymətləndirib, burada sənaye, kənd təsərrüfatı, sosial infrastrukturun inkişafı üçün mühüm layihələr həyata keçirilib.
Başçı əlavə edib ki, bu gün Ulu Öndərin müəyyən etdiyi siyasi kurs Prezident İlham Əliyev tərəfindən ardıcıllıqla həyata keçirilir. Ali Baş Komandanın rəhbərliyi ilə ərazi bütövlüyünün bərpası, Qarabağın dirçəldilməsi və ölkəmizin beynəlxalq nüfuzunun yüksəldilməsi bu xəttin uğurunun ən böyük sübutudur.
Daha sonra YAP rayon təşkilatının sədri Eldar Əsədov çıxış edib, QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov Ulu Öndərin və şəhidlərin ruhuna dualar oxuyub.

Azərbaycanın bütün bölgələrində olduğu kimi, Tərtər rayonunda da xalqımızın dahi oğlu, görkəmli siyasi xadim Heydər Əliyevin əziz xatirəsi ehtiramla anılıb.
Tədbirdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, YAP Tərtər rayon təşkilatının və rayon Ağsaqqallar şurasının sədrləri, Qarabağ Regional Memarlıq və Şəhərsalma Baş idarəsinin rəisi Qədir Babayev, Milli Məclisin deputatı Anar Məmmədovun köməkçisi Elçin Ca-hangirov, şəhid ailələri, qazilər, YAP rayon təşkilatının, hüquq mühafizə orqanlarının, idarə, müəssisə, təşkilatların kollektivləri, ictimai birliklərin, rayon ictimaiyyətinin nümayəndələri iştirak ediblər.
Ulu Öndər Heydər Əliyevin Mərkəzi Meydanda abidəsi önünə gül dəstələri düzülərək, dünya şöhrətli siyasi xadimin əziz xatirəsi ehtiramla yad edilib.

Tərtər Rayon İcra Hakimiyyətinin təşkilatçılığı ilə Ümummilli Lider Heydər Əliyevin anım günü ilə əlaqədar ehsan süfrəsi açılıb.
Mərasimdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, YAP rayon təşkilatının sədri Eldar Əsədov, rayon Ağsaqqallar Şurasının sədri və Qərbi Azərbaycan İcmasının Tərtər üzrə nümayəndəsi Faiq Məmmədov, Milli Məclisin deputatı Anar Məmmədovun köməkçisi Elçin Cahangirov, QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov, ziyalılar və idarə, müəssisə və təşkilat rəhbərləri iştirak ediblər.
Tədbirdə əvvəlcə Ümummilli Lider Heydər Əliyevin və torpaqlarımızın suverenliyi uğrunda canlarını qurban vermiş şəhidlərin ruhu bir dəqiqəlik sükutla yad edilib. Ardınca QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov tərəfindən Ulu Öndərin əziz xatirəsinə “Qurani-Kərim”dən ayələr və Yasin surəsi oxunub.
Sonra Tərtər Rayon İcra Hakimiyyətinin başçısı Müstəqim Məmmədov çıxış edərək Ümummilli Liderin həyat və fəaliyyətinin Azərbaycan üçün müstəsna əhəmiyyət daşıdığını diqqətə çatdırıb.
Daha sonra Vətən Müharibəsi şəhidləri Rəşad Mirzəlinin anası Afidə Mirzəyeva, Elnur Abbasovun atası Yaşar Abbasov, rayon Ağsaqqallar Şurasının sədri və Qərbi Azərbaycan İcmasının Tərtər üzrə nümayəndəsi Faiq Məmmədov, Tərtər Təhsil Sektorunun müdiri Oqtay Sarıkişiyev çıxış edərək Ulu Öndər Heydər Əliyevin müasir Azərbaycanın formalaşmasında və inkişafında oynadığı tarixi roldan danışıblar.

Tərtər Rayon İcra Hakimiyyəti və Qərbi Azərbaycan, Dərələyəz mahalı, Paşalı rayon Herher kənd icmasının təşkilatçılığı ilə “Qərbi Azərbaycana Qayıdış Konsepsiyası” çərçivəsində “Herher kəndinə qayıdış bizim mənəvi haqqımızdır” adlı tədbir keçirilib.
Tədbir iştirakçıları əvvəlcə Tərtər şəhərinin Mərkəzi Meydanında Ümummilli Lider Heydər Əliyevin abidəsini ziyarət edərək önünə gül dəstələri düzüblər.
Yeni Azərbaycan Partiyası (YAP) rayon təşkilatının inzibati binasında davam edən tədbirdə Ulu Öndər Heydər Əliyevin və şəhidlərin xatirəsi bir dəqiqəlik sükutla yad olunub.
Qərbi Azərbaycan İcmasının Tərtər rayonu üzrə nümayəndəsi Faiq Məmmədov çıxış edərək Herher kəndinin tarixi, sakinləri barədə məlumat verib, Qərbi Azərbaycana qayıdışla bağlı respublikamızın müxtəlif bölgələrində yaşayan irəvanlılarla keçirilən görüşlərin böyük əhəmiyyət daşıdığını qeyd edib.
Tədbirdə çıxış edən rayon icra hakimiyyətinin başçısı Müstəqim Məmmədov bildirib ki, torpaqlarını işğaldan azad edən ölkəmiz Prezident İlham Əliyevin rəhbərliyi ilə Qərbi Azərbaycana ləyaqətli qayıdışa da nail olacaq. Qərbi Azərbaycandan didərgin salınanların öz yurdlarına qayta-rılması, onların ləyaqətli qayıdışının təmin olunması prioritet olaraq qalır.
Digər çıxış edənlər – YAP rayon təşkilatının sədri Eldar Əsədov, Vətən müharibəsi qəhrəmanı Azər Abdullazadə, “Azərbaycan Bayrağı” ordenli şəhid Mehrac Mahmudovun oğlu Ziya Mahmudov, Herher icmasının sədri Afaq Sadıqova çıxışlarında herherlilərin öz doğma ata-baba yurdlarına qayıdacaqlarına inandıqlarını ifadə ediblər.
Görüşün sonunda icma üzvlərinə Qərbi Azərbaycan icmasına üzvlük vəsiqələri təqdim edilib.

Tərtər Rayon İcra Hakimiyyətinin və Dini Qurumlarla İş üzrə Dövlət Komitəsinin birgə təşkilatçılığı ilə rayonumuzda yerləşən məscidlərin əra-zilərində ağacəkmə aksiyası təşkil olunub.
Aksiya zamanı Tərtər şəhəri, Azad Qaraqoyunlu, Hacıqərvənd, Qaynaq və Əskipara kənd məscidlərinin həyətlərində müxtəlif növ gül kolları və həmişəyaşıl ağaclar əkilmişdir.
Aksiya zamanı biz Ulu Öndər Heydər Əliyevin əziz xatirəsini yad etməklə yanaşı, dini ibadət yerlərinin abadlaşdırılması və ətraf mühitin yaşıllaşdırılmasına töhfə verməyə çalışdıq.

Saleh Ədilov

Tərtər rayon Həbib Hüseynov adına Mamırlı kənd tam orta ümumtəhsil məktəbində fəaliyyət göstərən “Təbiətə qayğı” və “Təbiətsevərlər” dərnəkləri öz ardıcıl və məqsədyönlü fəaliyyəti ilə seçilir. Hər iki dərnəyin üzvləri ilboyu təbiətin mühafizəsi ilə bağlı maarifləndirici tədbirlər, aksiyalar və ekoloji layihələr həyata keçirərək məktəb ictimaiyyətinin fəal hissəsinə çevriliblər.
Dərnək üzvləri Nəzrin, Polad, Səmayə, Nurlan, Günel, Gözəl, Gülsüm, Emil, Həsən, Əli, Məhəm-məd, Atabəy, Asiman, Miryusif, Qasım, Məhəmməd, Nihad qarşıya qoyduqları məqsədlərə həmrəylik ruhunda nail olurlar. Onlar təbiətlə bağlı keçirilən bütün tədbirlərdə birlik nümayiş etdirir, ətraf mühitin qorunmasına ehtiramla yanaşırlar. Şagirdlər zibil toplama aksiyaları, ağacəkmə təşəbbüsləri, su hövzələrinin təmizlik kampaniyaları, ekoloji maarifləndirmə çıxışları ilə məktəbdə və kənddə təbiətsevər düşüncənin formalaşmasına ciddi töhfələr verirlər.
Dərnəyin rəhbəri Səbuhi Kərimov bildirdi ki, bu günlərdə uşaqlar Ulu Öndər Heydər Əliyevin anım günü ilə əlaqədar keçirilən tədbirlərdə fəal iştirak ediblər.

“YENİ TƏRTƏR”

DOSTLUQ VƏ QARDAŞLIQ ƏLAQƏSİNİN BƏHRƏSİ

Türkiyə Respublikasının Gəncə şəhərindəki Baş Konsulu Recep Öztop və Türk Əməkdaşlıq və Koordinasiya Agentliyinin (TİKA) Bakı proqram koordinatoru Hayrettin Özçelik Tərtər Rayon İcra Hakimiyyətinin başçısı Müstəqim Məmmədov ilə görüşüblər.
Görüşdə rayon rəhbəri Türkiyənin həmişə Azərbaycanın yanında olduğunu vurğulayıb və “Bir millət, iki dövlət” prinsipi əsasında qurulan səmimi və qarşılıqlı dostluq münasibətlərinin daim mövcud olduğunu bildirib. Müstəqim Məmmədov həmçinin müxtəlif sahələrdə qardaş ölkənin dəstəyinin hər zaman hiss olunduğunu qeyd edərək, bu münasibətlərin gələcəkdə də uğurla davam etdiriləcəyinə əminliyini ifadə edib.
Qonaqlar iki ölkə arasındakı möhkəm dostluq və qardaşlıq əlaqələrindən danışaraq rayon rəhbərinə xatirə olaraq kitab hədiyyə ediblər.
Görüşdən sonra qonaqlar TİKA-nın dəstəyi ilə yenidən təmir olunmuş Tərtər şəhəri Heydər Əliyev adına parkda yerləşən “Açıq Hava Səhnəsi” ilə tanış olublar. Rayon Mədəniyyət Mərkəzi tərəfindən təşkil olunan konsert proqramında ilk olaraq hər iki dövlətin himnləri səsləndirilib, daha sonra yerli incəsənət ustalarının çıxışları təqdim olunub. Tamaşaçılar xoş və maraqlı anlar yaşayıblar.
Görüş və tədbir iki ölkə arasındakı dostluq, mədəni və humanitar əməkdaşlığın daha da gücləndirilməsinə xidmət edən mühüm addım kimi dəyərləndirilib.

Bu il tariximizə “Konstitusiya və Suverenlik ili” kimi daxil oldu. Xalqımız Azərbaycan Respublikası Konstitusiyasının qəbul edilməsinin 30 illiyini qeyd etdi. Bu yubiley ölkəmizin bütün suveren ərazilərində böyük qürurla keçirildi.
Bəli, igid oğullarımızın sayəsində artıq torpaqlarımız işğalçılardan tam təmizlənib. Bütün ərazilərimizdə Azərbaycan bayrağı dalğalanır. Şanlı Zəfərimizin 5 illik yubileyini keçirərkən xalqımız Vətən yolunda canından keçən hər bir övladının əziz xatirəsini yad etdi, onların ailələri ziyarət olundu, qazilərimizlə görüşlər keçirildi. Tərtər rayonunda bu ənənə illərdir davam edir. Şəhid ailələri yalnız doğum və anım günlərində deyil, daimi olaraq ziyarət edilir, onların qayğı və problemləri öyrənilərək, lazımi köməklik göstərilir. 2025-ci ildə də belə oldu. Rayon rəhbəri, ictimaiyyət nümayəndələri daim bizim yanımızda oldular. Şəhidlərimizin əziz xatirəsinin əbədiləşdirilməsi məqsədi ilə rayonda görülən işlər davam etdirildi. İndi şəhərimizin ən yaraşıqlı küçələri Vətən uğrunda canından keçən oğulların adlarını daşıyır. Bu küçələr abadlaşdırılıb, qəhrəmanların barelyefləri quraşdırılıb. Görülən işlər, göstərilən qayğı övladlarımızın əbədiyaşarlığını xatırladır.
Eləcə də işğaldan azad edilən ərazilərə insanların qayıdışı bizim üçün təsəllidir.
Hər dəfə illərin qovuşuğunda arzumuz torpaqlarımızın işğalına son qoymaq idi. İndi diləklərimiz çin olub. Arzu edirəm ki, bundan sonra da ölkəmizdə əmin-amanlıq olsun, Azərbaycan daha da qüdrətlənsin, böyüyən nəsil sülh şəraitində, xoşbəxt və firavan yaşasın!

Bəhruz İsgəndərov,
şəhid atası

Zəfər sözünü həmişə sevmişik. Amma 44 günlük Vətən müharibəsindən sonra bu sözü səsləndirdikdə, qəlbimizi bürüyən qürur, rahatlıq bambaşqadır.
Bəli, məhz həmin Şanlı Qələbədən sonra hər bir azərbaycanlının, eləcə də ölkəmizin hər bir vətəndaşının həyatı dəyişdi. İllərin deyil, əsrlərin çətin yükü çiyinlərimizdən götürüldü.
Vətən müharibəsi 44 gün ərzində başa çatsa da, Zəfərə aparan yol bundan xeyli əvvəl başlamışdı. Bu çətin və şərəfli yolda atılan hər bir addımın öyrənilməsi, yaddaşalarda yaşaması üçün tarixçilərimizə çox vaxt lazım gələcək. Biz isə o unudulmaz günlərin şahidləri kimi deyə bilərik ki, bu qələbə Azərbaycan Respublikasının Prezidenti, Müzəffər Ali Baş Komandan cənab İlham Əliyevin apardığı uğurlu, uzaq-görən xarici və daxili siyasətin, milli ruhumuzun, ölkəmizdəki tolerantlıq mühitinin və möhkəm birliyimizin nəticəsi oldu.
Bu illər ərzində biz milliyətindən, dinindən asılı olmayaraq, hər bir Azərbaycan vətəndaşının işğal altında olan torpaqlarımızı azad etmək arzusu ilə yaşadığını gördük.
İstər Birinci Qarabağ müharibəsində, istərsə də sonrakı dövrlərdə ölkəmizdə yaşayan xalqların nümayəndələri Vətən uğrunda canlarından keçiblər. Təsadüfi deyil ki, Qarabağ müharibəsində şəhid olan ilk qəhrəmanlar sırasında yəhudi əsilli qəhrəmanımız Albert Aqarunovun adı xüsusi çəkilir.
Vətən müharibəsi zamanı da Azərbaycanda yaşayan bütün dini icmalar, etnik azlıqlar dövlətin, ölkə Prezidentinin ətrafında sıx birləşdilər.
Milli ruhumuzdan danışarkən fəxrlə deyə bilərik ki, bunun bariz nümunəsi 30 ildən artıq bir müddətdə qəhrəman Tərtərin düşmənlə üzbəüz dayanması idi. Ermənilərin bütün çirkin cəhdlərinə baxmayaraq, evlərimizin işıqları heç zaman sönmədi, əlimiz işdən soyumadı, mübarizəmiz zəifləmədi. Bir zamanlar düşmən bizə yüksəkliklərdən baxıb, istədiyi vaxt atəş açırdı. Qəhrəman oğullarımızın sayəsində indi o yüksəkliklərdə əzəli-əbədi sakinlər yaşayır. Bu xoşbəxtliyi bizə öz gənc həyatları hesabına bəxş edən şəhidlərimizə Allahdan rəhmət diləyirik, qazilərimizə, veteranlarımıza cansağlığı arzulayırıq.

“YENİ TƏRTƏR”