DƏMİRÇİ HÜSEYN

DSMF Tərtər rayon şöbəsinin verdiyi məlumata görə qeydiyyatda 128 nəfər 90 yaşdan yuxarı sakinimiz var. Belə insanlardan birinin ailəsində oldum. 66 ildir ki, birgə ömür yaşamış Mustafayev Hüseyn Səlim oğlu və Mustafayeva Zərniyar Hüseyn qızı ilə görüşdüm.
Hüseyn Mustafayev 11 aprel 1926-cı ildə Ağdərə rayonunun Sırxavənd kəndində doğulub. Uşaqlığı şura hökumətinin vurhavur, tuthatut dövrünə təsadüf edib. O zamankı bütün ailələrdə olduğu kimi, Səlim kişi də ailəsini, uşaqlarını mal-heyvan saxlamaqla, əkin-biçinlə məşğul olmaqla dolandırıb. Böyük Vətən müharibəsi başlayanda Hüseynin 15 yaşı varıydı.
1951-ci ildə qonşu kənddə yaşayan Zərniyarla ailə həyatı qurdu. İş-gücün olmaması gənc ailənin ehtiyac-larının təmin olunmasında çətinliklər törədirdi. Odur ki, 1952-ci ildə Tərtər rayonuna köçürlər. Həmin ildən 1957-ci ilədək yerli sənaye kombinatında işə dəmirçi kimi başlayan Hüseyn o zamankı Mirbəşir rayonunun fərdi yaşayış evlərinin, ictimai binaların dam örtüklərini vuraraq ailəsinin dolanışığını təmin edirdi. 1957-ci ildən 1986-cı ilədək rayonun kommunal müəssisələri kombinatında armaturçu işləyib. Hüseynin əl qabiliyyəti hər kəsin diqqətini çəkirdi. Onu bütün tərtərlilər “Dəmirçi Hüseyn” kimi tanıyırdılar. O, həm də gözəl tar ifaçısı olub. Daha ətraflı »

Bu yaxınlarda “Azərbaycan” qəzetində sevimli şairimiz Fikrət Qocanın “Allahım, sahib çıx yaratdıqlarına” şeirini oxudum və çox təsirləndim. Şeirin əvvəlində şair yazıb: “Suriyada əhalinin üstünə atılan kimyəvi bombalardan boğulan, sudan çıxmış balıq kimi nəfəsi çatışmayan uşaqları ekrandan izlədim. Azərbaycanda, öz evimdə mənim də havam çatışmadı, az qala boğulurdum. Bu, bəşəriyyətə qarşı cinayətdir”.
Daha sonra Fikrət Qoca şeirin dili ilə cinayəti törədənlərə mədəni qarğışlar yağdırır. Sonda isə deyir: “Amma balasına dəymə, bala hamıya baladı, Allahım”. Bu, Azərbaycan xalqının mentalitetidir: Başqasının balasına nəinki fiziki əzab verməmək, heç fikirlərində də ona pislik arzulamamaq.
Çox təəssüf ki, bunun əksinə olaraq bizə erməni kimi qəddar bir düşmənlə qonşuluqda yaşamaq nəsib olub və əsrlər boyu balalarımız onların insanlığa sığmayan vəhşiliklərinin qurbanına çevrilirlər. Daha ətraflı »

Yeni Azərbaycan Partiyasının öz liderinə, dövlətçiliyə nə qədər sadiq olduğunu tarix sınaqdan keçirirdi. Bütün bu sınaqlardan bizim partiyamız üzüağ çıxdı. Bütün bu sınaqlardan biz daha da güclənmiş şəkildə çıxa bildik.

İlham Əliyev,
Azərbaycan Respublikasının Prezidenti

TARİXƏ QIZIL HƏRFLƏRLƏ YAZILAN GÜN

Azərbaycan xalqının taleyində böyük əhəmiyyət daşıyan elə günlər vardır ki, həmin günlərdə onun gələcək həyatını müəyyən edən böyük başlanğıcların əsası qoyulub. Müxtəlif tarixi hadisələrlə əlamətdar olan belə günlərdən ən önəmlisi 1993-cü ilin 15 iyun günüdür. Tariximizə Milli Qurtuluş Günü kimi daxil olmuş bu gün onu qiymətləndirənlər, dərindən dərk edənlər üçün çox əzizdir. Milli Qurtuluş günü sadəcə təqvim bayramı deyil, böyük ictimai, siyasi və tarixi əhəmiyyətə malik olan bir gündür.
Vətənini, xalqını, millətini sevən, həmin çətin, ağrılı günlərin dəhşətlərini yaşayan, hadisələri gözləri ilə görən insanlar üçün 15 iyun əsl qurtuluş tarixidir. Azərbaycan xalqının ölüm-dirim mübarizəsinin tarixidir.
1993-cü ilin 15 iyununda Azərbaycan xalqının bir millət, Azərbaycan Respublikasının isə bir dövlət kimi yaşaması sual altında idi. Daha ətraflı »

Yeni Azərbaycan Partiyası Tərtər Rayon Təşkilatının növbəti IX konfransı keçirildi. Konfrans iştirakçıları öncə Ümummilli Lider Heydər Əliyevin rayonun mərkəzi meydanında ucaldılmış abidəsi önünə gül-çiçək dəstələri düzüb, onun xatirəsini ehtiramla yad etdilər. Sonra tədbir öz işini rayon Mədəniyyət mərkəzinin iclas zalında davam etdirdi.
Konfransda YAP Siyasi Şurasının üzvü, Ekologiya və Təbii Sərvətlər nazirinin müavini Firdovsi Əliyev və YAP Mərkəzi Aparatının məsul işçisi Araz Xudadanov iştirak etdilər.
Konfrans iştirakçıları rayonun ictimai-siyasi, iqtisadi və mədəni həyatından bəhs edən videoçarxa baxdılar. Ulu Öndər Heydər Əliyevin və rayon təşkilatının VIII konfransından sonrakı dövrdə vəfat etmiş YAP üzvlərinin xatirəsi bir dəqiqəlik sükutla yad edildi. Konfrans açıq elan olunduqdan sonra Azərbaycanın Dövlət Himni səsləndirildi. Daha ətraflı »

Hörmətli cənab Məmmədov!
Çərşənbə günü Tərtər rayonuna səfər zamanı görüşün keçirilməsi və Qapanlı məktəbinə səfərin təşkil olunması ilə bağlı sizə oz minnətdarlığımı bildirmək istərdim. Regionda əsaslı iqtisadi inkişafı görmək məni çox sevindirdi. Ən çox məmnunluq duyduğum məqam isə gənclərə öz gələcəklərini daha yaxşı qurmaları üçün, xüsusilə kənd təsərrüfatı sektorunda çoxlu sayda imkanlar təklif etməklə, onları gələcək inkişafın mühüm bir hissəsinə çevirməyə çalışmağınızdır.
Gənclərə Dəstək Proqramının daim təbliğ olunmasında sizə etibar edə biləcəyimə əminəm. Nəzərinizə çatdırmaq istərdim ki, rayonun inkişafı prosesinə gənclərin cəlb olunması və onların rolunun artırılması üçün öz təcrübə və biliklərimizi sizin komandanızla bölüşməyə hazırıq. Daha ətraflı »

BMT Uşaq Fondu və onun yerli tərəfdaşı Beynəlxalq Avrasiya Mətbuat Fondunun rəsmiləri “Azərbaycan Gənclərinə Dəstək” Proqramı layihəsi çərçivəsində Tərtər rayonuna səfər edib. Görüşdə BMT Uşaq Fondunun Azərbaycan nümayəndəliyinin rəhbəri Edvard Karvardin, yeniyetmə və gənclərin işləri üzrə mütəxəssisləri xanım Aida Aylarova və Natiq Umarov, Beynəlxalq Avrasiya Mətbuat Fondunun prezidenti Umud Mirzəyev, fondun əməkdaşı və “Azərbaycan Gənclərinə Dəstək” Proqramı layihəsinin koordinatoru Qiyas Abasov iştirak edib.
Səfərin məqsədi “Azərbaycan Gənclərinə Dəstək” Proqramı layihəsi çərçivəsində formalaşdırılan Yeniyetmə və Gənclərdən İbarət Məşvərət Şuraları və onların fəaliyyəti ilə tanış olmaq, icra hakimiyyətləri ilə Şuralar arasında qarşılıqlı əməkdaşlıq çərçivəsində gələcək fəaliyyətlərin müzakirəsi idi. Daha ətraflı »

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Əsgər Ailələrinə Dəstək İctimai Birliyi rayon icra hakimiyyəti ilə birlikdə “Vətənpərvərliyin təbliğində aprel döyüşləri” adlı layihə çərçivəsində Tərtər Rayon Gənclər Mərkəzində tədbir keçirmişdir. Tədbirdə Qarabağ müharibəsi veteranları, şəhid ailələri, əlillərlə yanaşı yeniyetmələr və gənclər də iştirak etmişlər.
Tədbiri giriş sözü ilə Tərtər Rayon İcra Hakimiyyəti başçısının İctimai-siyasi və humanitar məsələlər şöbəsi müdirinin müavini Elvin Umudov açaraq sözü ictimai birliyin sədri Mətanət Əsgərqızına vermişdir.
O, çıxış edərək bildirmişdir ki, layihənin əsas məqsədi aprel döyüşlərində həlak olan şəhidlərin ailələrinin problemlərinin həllinə kömək etmək, onların mübarizə yolunun örnək olduğunu gənclərə nümunə göstərmək, yeniyetmələrin, gənclərin vətənpərvərlik ruhunun yüksəldilməsi və onlara mənəvi dayaq durmaq, əsgərlərimizin vətənə, torpağa, dövlətə bağlılıq hisslərini artırmaq üçün əsgər və şəhid ailələri ilə görüşlərin təşkilidir. Bununla biz vətəndaşlarımız arasında Qarabağ müharibəsi əlillərinə, şəhid ailələrinə və veteranlara dövlət qayğısının ictimai rəydə yüksəldilməsinə nail oluruq. Daha ətraflı »

BARAMAÇILIQ UĞURLA İNKİŞAF ETDİRİLİR

Dövlət səviyyəsində həyata keçirilən stimullaşdırıcı tədbirlərdən sonra baramaçılıq sahəsinin də inkişaf edərək əvvəlki şöhrətinə çatacağı gözlənilir.
Baramaçılıq olduqca qədim tarixə malik gəlirli məşğulluq növlərindən biridir. Tarixi mənbələrə görə, tut ipəkqurdundan ipəyin alınması hələ eramızdan əvvəl məlum olub. İpəkçilik qədim zamanlardan Çin, Yaponiya, Cənubi Koreya, Hindistan, İran, Türkiyə, həmçinin digər ərazilərdə inkişaf edib. VII əsrdən isə ipəkçilik Azərbaycanda inkişaf etməyə başlayıb. Bunun üçün Azərbaycan ərazisinin səth quruluşu, əlverişli iqlim şəraiti, xüsusən bol günəş işığı, ta-rixi əmək vərdişləri, çəkil və tut ağaclarının yetişdirilməsi üçün əlverişli şərait imkan verirdi. XIX əsrdə Rusiyada ipək istehsalı müəssisələri əsasən Azərbaycandan alınan barama xammalı hesabına işləyib. Sovet dönəmində ölkəmizdə istehsal olunan ipək parça təkrar emal üçün SSRİ-nin 250 ipək parça kombinatlarına göndərilirdi. Daha ətraflı »

YÜKSƏK MƏHSULDARLIQ GÖZLƏNİLİR

Rayonumuzda taxılçılığın inkişafı üçün Bölgə Təcrübə Stansiyasının mütəxəssisləri məhsuldar toxum sortları yetişdirirlər.
Rayon statistika idarəsinin məlumatına əsasən cari ilin məhsulu üçün 6873,9 hektar sahəyə buğda, 2645,1 hektara isə arpa səpilib. Bunlar “Qırmızıgül-1”, “Qobustan”, “Murov-2”, “Şəfəq-2”, “Zirvə-85”, “Fatimə” və digər məhsuldar toxum sortlarıdır.
Məhsul bolluğu yaratmağa çalışan sahibkarlar taxıl əkini sahələrini əvvəlki illərə nisbətən xeyli genişləndirmişlər.
Rayon kənd təsərrüfatı idarəsinin məlumatına əsasən, Şıxarx qəsəbəsində 1116, Hüsənlidə 649, Bəyimsarovda 540, Hacıqərvənddə 480, Qaradağlıda 426 hektar sahədə taxıl becərirlər.
Ötən il rayon üzrə taxıl sahələrinin hər hektarından 37,3 sentner, arpa sahələrindən isə 27,2 sentner məhsul götürüldü. Daha ətraflı »