-İyunun 14-də Tərtər rayonunun 34 tam, 10 ümumtəhsil məktəbində “Son zəng” tədbirləri təşkil olunub.
Keçirilən “son zəng” tədbirlərində məktəblərin pedaqoji kollektivləri və məzunlarla birlikdə Tərtər Rayon İcra Hakimiyyəti başçısının birinci müavini Elvin Umudov, hüquq-mühafizə orqanlarının rəhbərləri, YAP rayon təşkilatının sədri Eldar Əsədov, rayon Təhsil Sektorunun müdiri Oqtay Sarıkişiyev, idarə, müəssisə, təşkilat rəhbərləri, şəhid ailələri, qazilər, veteranlar, valideynlər və ictimaiyyət nümayəndələri iştirak ediblər.
Tədbirlər Dövlət himninin səsləndirilməsi ilə başlayıb.
Tədbir iştirakçıları əvvəlcə Ümummilli Lider Heydər Əliyevin və torpaqlarımızın ərazi bütövlüyü uğrunda canlarından keçən şəhidlərimizin xatirəsini bir dəqiqəlik sükutla yad ediblər.
Bu il rayonun ümumtəhsil məktəblərində 784 nəfər şagird 1-ci sinfi, 975 nəfər şagird 9-cu sinfi, 759 nəfər şagird isə 11-ci sinfi bitirir.
Tərtər şəhər 1, 5, 6 saylı tam orta məktəblərində və 2 saylı məktəb-liseydə keçirilən son zəng tədbirlərində iştirak edən rayon icra hakimiyyəti başçısının birinci müavini Elvin Umudov onbirinciləri məzun adı almaqları münasibəti ilə Tərtər Rayon İcra Hakimiyyətinin başçısı Müstəqim Məmmədovun adından təbrik edərək, onlara qədəm qoyduqları müstəqil həyatda uğurlar diləyib, təhsilə olan dövlət qayğısından danışıb, Ulu Öndərin təhsilin inkişafına, müəllimlərə göstərdiyi diqqət və qayğını dilə gətirib, ”Təhsil millətin gələçəyidir”,-kəlamını yada salıb, Daha ətraflı »

Tərtər Rayon İcra Hakimiyyəti və YAP rayon təşkilatının təşkilatçılığı ilə 17 iyun–Tibb işçilərinin peşə bayramı günü münasibəti ilə rayonun tibb işçilərinin iştirakı ilə tədbir keçirilib.
Əvvəlcə tədbir iştirakçıları Ümummili lider Heydər Əliyevin abidəsini ziyarət edərək, önünə gül-çiçək dəstələri düzüblər. Sonra tədbir YAP rayon təşkilatının inzibati binasında davam etdirilib.
Ulu Öndərin və torpaqlarımızın suverenliyi uğrunda canlarını qurban vermiş şəhidlərin ruhu bir dəqiqəlik sükutla yad edilib.
Tərtər Rayon İcra Hakimiyyətinin başçısı Müstəqim Məmmədov səhiyyə işçilərini peşə bayramları münasibəti ilə təbrik edərək, bildirib ki, Ümummilli Lider Heydər Əliyevin 2001-ci il iyunun 4-də imzaladığı Sərəncama əsasən, hər il iyunun 17-si ölkəmizdə Tibb İşçilərinin Peşə Bayramı Günü kimi qeyd olunur.
Bu münasibətlə rayon rəhbəri bütün tibb işçilərinə uzun ömür, cansağlığı və şərəfli peşələrində müvəffəqiyyətlər arzu edib.
Sonra YAP rayon Təşkilatının sədri Eldar Əsədov, rayon Mərkəzi Xəstəxanası Publik Hüquqi şəxsinin direktoru Sərxan Cəlahani, xəstəxananın baş həkimi Bəkir Nağıyev və Fizioterapiya kabinetində kabinet müdiri Zəhra Hüseynova çıxış ediblər.
Tədbirdə bir qrup tibb işçisi rayon icra hakimiyyəti tərəfindən fəxri fərmanla təltif edilib.

İyun ayının 9-da Dövlət Sərhəd Xidmətinin Sərhəd Qoşunlarının “Lənkəran” sərhəd dəstəsinin xidməti ərazisində mayor Baxışlı Baxış Elşən oğlu dövlət sərhədinin mühafizəsi üzrə xidməti vəzifələrini icra edərkən ildırım vurması nəticəsində şəhid olub.
Baxışlı Baxış Elşən oğlu ilə doğulub boya-başa çatdığı Tərtər rayonunun İsmayılbəyli kəndində vida mərasimi keçirilib.
Mərasimdə şəhidin doğmaları ilə yanaşı Tərtər Rayon İcra Hakimiyyətinin başçısı Müstəqim Məmmədov, İsmayıllı Rayon İcra Hakimiyyətinin başçısı Nahid Bağırov, Dövlət Sərhəd Xidmətinin general-mayoru, Dövlət Sərhəd Xidmətinin Mərkəzi Aparatının rəhbəri, Vətən Müharibəsi Qəhrəmanı Babək Qurbanov, hüquq mühafizə orqanlarının rəhbərləri, YAP rayon Təşkilatının sədri Eldar Əsədov, Dövlət Sərhəd Xidmətinin əsgər və zabitləri, şəhid ailələri, qazilər, veteranlar, idarə, müəssisə, təşkilat kollektivləri, təhsil, səhiyyə, mədəniyyət işçiləri, kənd sakinləri, rayon ictimaiyyətinin və KİV nümayəndələri iştirak ediblər.
Dəfn mərasimində çıxış edən Tərtər Rayon İcra Hakimiyyətinin başçısı Müstəqim Məmmədov və Dövlət Sərhəd Xidmətinin general-mayoru, Dövlət Sərhəd Xidmətinin Mərkəzi Aparatının rəhbəri, Vətən Müharibəsi Qəhrəmanı Babək Qurbanov şəhidin ailəsinə başsağlığı verərək, Dövlət Sərhəd Xidmətinin Sərhəd Qoşunlarının mayoru Baxış Baxışlının eldən gedən oğul olduğunu vurğulayaraq ailəsinə səbr diləyiblər. Daha ətraflı »

Birinci Qarabağ müharibəsi şəhidi Əliyev Ədalət Veysəl oğlu 18 sentyabr 1973-cü ildə Kəlbəcər rayonunun Çorman kəndində anadan olub. Ailədə 9 uşaq olublar, 5 bacı, 4 qardaş. Ədalət 4-cü övlad, həm də qardaşların böyüyü idi.
18 yaşı tamam olanda, o, Kəlbəcər Özünümüdafiə Batalyonuna daxil olur. İlk döyüşü Ağdaban kəndindən başlayır. Faciədən dərhal sonra kəndə daxil olan batalyon üzvləri dəhşətli mənzərə ilə qarşılaşırlar. Bu, gənc Ədaləti çox sarsıdır. Həmin vaxt onunla birlikdə xidmət edən yaxın qohumu Ayaz Verdiyev deyir: “ 18 gün Ağdabanda mühasirə şəraitində qaldıq. Ədalət özünə yer tapa bilmirdi. Ancaq hücuma keçmək, düşməndən intiqam almaq arzusu ilə yaşayırdı.”
Ağdaban əməliyyatından sonra Batalyon həyəcan siqnalı ilə Laçın, oradan Ağdərə istiqamətinə göndərilib. 20-25 gün Aydoğan yüksəkliyində qalıblar. Qozlu döyüşləri ilə tarixdə qalan qanlı əməliyyat zamanı 30 döyüşcüdən yalnız 8-i salamat çıxıb. Onlardan biri Ədaləıt idi. Birinci Qarabağ müharibəsinin döyüşləri 44 günlük müharibəyə bənzəmirdi. Bəzən əsgərlər çətin relyef şəraitində, meşələrdə, düşmənin əhatəsində tək qalır və çıxış yolunu özləri tapırdılar. Qozlu əməliyyatından sonra qalın meşədə taleyin ümidinə qalan Ədalət dağlarda qazandığı dözümlülüyün və səriştəliliyin hesabına düzgün istiqamət götürüb nabələd cığırlarla 3-4 günə çox çətinliklərlə gəlib özlərinin yurd yerinə çatıb.
Bu hadisədən sonra Söyüdlü Zastavasında xidmətini davam etdirib. Artıq xeyli döyüş təcrübəsi toplayan Ədaləti tez-tez kəşfiyyata göndərirdilər. Döyüş yoldaşı və qohumu Ayaz Verdiyev söyləyir ki, Ədalət qorxu nə olduğunu bilmirdi. Tapşırığı yerinə yetirmək üçün o, hər an canını qurban verməyə hazır idi. Daha ətraflı »

SAKİTLİYİ KOMBAYNLARIN SƏSİ POZUR

Taxılçıların gərgin günləri başlayıb. Ötən ilin payızından üzübəri görülən işlərə yekun vurulur, bərəkətli sünbülləri ilə gözoxşayan qızılı zəmilərin məhsulu biçilir.
Tərtərli fermerlərin də ovqatı yüksəkdir. Ötən illərin təcrübəsindən bacarıqla bəhrələnən taxılçılar elmin qabaqcıl nailiyyətlərini əkin-biçində tətbiq etməklə uğurlarının sayını artırırlar. Ərzaq təhlükəsizliyinin təmin edilməsinə müsbət təsir edən amillərdən biri də torpaqlarımızın işğaldan azad edilməsinin yaratdığı qürur hissidir. Bu torpağı qanı, canı bahasına qoruyan insanlar onun əkilib-becərilməsində də fədakarlıq göstərirlər. Vətənpərvər insanlar torpağın hər qarışının dəyərini bilir, ondan daha çox məhsul götürmək üçün inamla çalışırlar.
2023-cü ilin məhsulu üçün rayon üzrə 5,2 min hektarda buğda, 3,6 min hektarda arpa əkilmişdir. Məhsuldarlıq buğda üzrə 44,3, arpa üzrə 42,5 sentner olmuşdur. Cari təsərrüfat ilində isə taxıl əkin sahələri xeyli genişləndirilib. Belə ki, bu mövsüm 8,8 min hektarda buğda (bunun 4947 hektarı dəmyə, 3850 hektarı suvarılan ərazidə yerləşir), 5,1 hektarda arpa (40 hektar dəmyə, 5092 hektarı suvarılan ərazi) əkilib.
Rayonda 6 toxumçuluq təsərrüfatı var. İlk növbədə illər uzunu nəinki tərtərli fermerləri, həm də qonşu rayonların təsərrüfatlarını məhsuldar toxumlarla təmin edən Bölgə Təcrübə Stansiyasının adı qeyd olunmalıdır. Bundan başqa, Fərman Qurbanovun, Emin Qurbanovun, Fazil Vəliyevin, Mirzə Cümşüdovun təsərrüfatları da toxumçuluq üzrə ixtisaslaşıblar.
Rayonda, əsasən, “Qırmızı gül”, “Murov-1”, “Murov-2”, “Qobustan” buğda, “Qarabağ-33”, “Qarabağ-22” arpa sortları əkilir. Əkin sahələrinin genişləndirilməsi, o cümlədən düşməndən azad edilmiş ərazilərdə taxıl əkilməsi yeni, susuzluğa davamlı növlərin sınaqlardan keçirilməsinə imkan yaradıb. Daha ətraflı »

Tərtərdə barama tədarükünə başlanılıb

Baramaçılıq kənd təsərrüfatının mühüm və gəlirli sahələrindən biridir. Sovet dönəmində rayonumuzda bu sahədə xeyli təcrübə toplansa da, müstəqilliymizin ilk illərində insanların baramaçılığa olan marağı azalmışdı.
Ölkə iqtisadiyyatının bütün sahələrinin inkişafını diqqət mərkəzində saxlayan Prezident İlham Əliyevin sərəncam və göstərişləri əsasında son illərdə ölkəmizin hər yerində olduğu kimi, Tərtərdə də kümçülərin işində dönüş yaranıb.
Belə ki, “Azərbacan Respublikasında baramaçılığın və ipəkçiliyin inkişafına dair 2015-2025-ci illər üçün Dövlət Proqramı”nın icrası ilə əlaqədar rayonumuzda ipəkqurdunun yem bazasının bərpası məqsədilə 2016-2023-ci illərdə 339 min 757 çəkil tingi əkilmişdir ki, onun da 133 min ədədi Çin Xalq Respublikasından gətirilmiş tinglərdir. Mövcud və yeni əkilən tut ağacları, əhalinin baramaçılıq sahəsindəki təcrübəsi, həmçinin bu sahənin gəlirli olması baramaçılığın inkişafına marağı artırıb. 2016-cı ildə 1 ton , 2017-ci ildə 4,6 ton, 2018-ci ildə 10.2 ton, 2019-cu ildə 18.3 ton, 2020-ci ildə 12.1 ton, 2021-ci ildə 13.6 ton, 2022-ci ildə 10.2 ton, 2023-cü ildə isə 14.8 ton barama istehsal olunmuşdur. Bu il isə kümçülərə 300 qutu ipəkqurdu verilib. 12 ton barama istehsalı nəzərdə tutulub.
Artıq rayonda yaş barama tədarükünə başlanılıb. Qəbul məntəqəsində baramanın qəbulu üçün lazımi şərait yaradılıb.
Tərtər Rayon İcra Hakimiyyətinin başçısı Müstəqim Məmmədov tədarükün ilk günü barama qəbulu məntəqəsində olub, kümçülərlə görüşüb, müvafiq tövsiyələrini verib. Onlara məhsul yığımında uğurlar arzulayıb.
Mövsümün ilk günlərində kümçülərin yetişdirdikləri 1905 kiloqram məhsul “AZ SİLK” MMC-nin nümayəndələri tərəfindən qəbul edilib.

“YENİ TƏRTƏR”

Məlum Qarabağ zəfərimizdən sonra Ali Baş Komandan, məğrur liderimiz, Azərbaycan Respublikası Prezidenti İlham Əliyev tərəfindən rəsmi olaraq öz tarixi statusunun bərpasına nail olan Ağdərə rayonunun nadir və qədim tarixini özündə, hər qarışında yaşadan incilərindən biri də Baş Güney kəndidir. Nəzərinizə çatdıraq ki, ümumiyyətlə məlum səbəblərə görə Qarabağın Ağdərəsinin tarixini araşdırmaq, yazmaq kifayət qədər məsuliyyətli və bir o qədər də çətindir. Bu kəndin tarixinin araş-dırılması da mühüm məsələlərdən biridir. Sözügedən məsələni geniş təfərrüatlı araşdıran dəyərli tədqiqatçı Daşqın Güneylidir. Oxucuların nəzərinə çatdırılan məsələlər Daşqın Güneylinin 2013-cü ildə qələmə aldığı “Kəmərin qan yaddaşı” əsərindən bir parçadır ki, bu da qarşıda qoyulan missiyamıza xüsusi bir təkandır.
Əlavə olaraq, qeyd edə bilərəm ki, Baş Güney kəndinin tarixi haqqında daha bir dəyərli fakt XX əsr Azərbaycan nəsrinin yaradıcılarından biri, böyük yazıçımız Məmməd Səid Ordubadi qələminin məhsulu olan “Qanlı illər” adlı əsəridir. Həmin əsər uzun illərin siyasi təbəddülatlarından keçmiş tarixi həqiqətlərin üzə çıxarılmasına kömək edən dəyərli bir nümunədir. Bu tarixi mənbədə kəndin adı Göynəpay deyə qeyd olunmuşdur. Sözügedən hissəni mənbənin 63-cü səhifəsində qeyd olunduğu kimi diqqətinizə çatdırırıq: “3-cü sahə isə Dağbasar köylərindən ibarət olub əksəriyyətdə varlı və sərvət sahibi olan ermənilərin əlində idi. Bu sahədə islam köyləri fəqət Dəmirli, Hacıqərvənd, Çıraqlı, Ümidli, İmarət Qərvənd, Xaçın çayı boyunca Şaxavənd, Köynəpay, Əliağalı, Sırxavənd, İsmayılbəyli kimi sair dağlıq köylərdən ibarətdir ki, Kolanılar adlandırılmışdır” Daha ətraflı »

ÖMRÜN BARLI-BƏHRƏLİ ÇAĞINDA

Uzun illər rayon qəzetində işlədiyimə görə, İbrahim Məmmədovu da, onun atası Yolçu Məmmədovu da yaxşı tanıyırdım. Hər ikisi rayonda qabaqcıl kənd təsərrüfatı işçisi olub. Keçmiş M. F. Axundov adına kolxozun adı çəkiləndə, ilk növbədə yada düşən Yolçu Məmmədov olur. Onun briqadası yarış cədvəlində birinci yerdə dayanırdı. Bu nailiyyətlərinə görə “Oktyabr inqilabı”, “Qırmızı Əmək bayrağı” ordenləri, “Lenin yubiley medalı” ilə təltif olunmuş, hətta növbədənkənar minik maşını almışdı.

Oğul da atadan geri qalmırdı. Təsadüfi deyil ki, Ulu Öndər Heydər Əliyev ötən əsrin 70-ci illərində rayonumuzda olarkən, gənc mütəxəssi-sin başçılıq etdiyi təsərrüfatın pambıq tarlalarını gəzib və işini çox bəyənib. Hətta qələbə raportunu nəzərdə tutulandan bir neçə gün əvvəl imzalamağı tövsiyə edib. İbrahim Məmmədov dövlət başçısına verdiyi sözə əməl edib. Məhz Umummilli Lider Heydər Əliyevin dediyi gündə onun başçılıq etdiyi kolxoz dövlətə pambıq satışı barədə tapşırığı yerinə yetirib.
İbrahim müəllim həmin görüşü belə xatırlayır:
–Sentyabr ayının əvvəlləriydi. Sahələrdə məhsul bol idi. Heydər Əliyev maşından düşən kimi pambıq yığan qadınların yanına gəldi, hər biri ilə mehribancasına görüşdü. Belə böyük bir insanın bu qədər sadə və səmimi olmasına hamımız heyranlıqla tamaşa edirdik.
“Həmin görüş mənim həyatımda böyük rol oynadı,”– deyir İbrahim müəllim. “Ulu Öndərimiz ikinci dəfə hakimiyyətə qayıtdıqdan sonra Bərdədə keçirilən müşavirədə yenidən o dahi şəxsiyyəti görüb dinləmək nəsibim oldu. Həmişə düşünürəm ki, nə yaxşı ki, Tanrı xalqımıza belə bir lider qismət etdi. Onun titanik fəaliyyəti nəticəsində ikinci dəfə itirə biləcəyimiz müstəqilliyimiz əbədi oldu”,– deyə ağsaqqal sözünə davam etdi. Daha ətraflı »

Su arxı təmizlənib

Tərtər Rayon İcra Hakimiyyəti başçısının növbəti qəbulunda Cəmilli kənd sakini Qasımov Vilayət İsgəndər oğlu müraciət edərək evinin yaxınlığından keçən “Qaramanlı” arxının daşaraq evinə və həyətyanı sahəsinə ziyan vurduğunu bildirərək, su arxının təmizlənməsinə köməklik göstərilməsini xahiş etmişdir.
Müraciət əsasında rayon icra hakimiyyəti başçısının tapşırığına uyğun olaraq Tərtərçay Hidroqovşağı İstismarı İdarəsinin xüsusi texnikası va-sitəsilə vətəndaşın evinin yaxınlığından keçən su arxı 300 metr məsafədə təmizlənmişdir.
Son zamanlar vətəndaşların onlarla belə müraciəti öz həllini tapıb.

Rayonun Mamırlı kənd Həbib Hüseynov adına tam orta məktəbində fəaliyyət göstərən “Təbiətə qayğı” dərnəyinin uğurları artıq nəinki bu məktəbdə, respublika səviyyəsində tanınır və alqışlanır.
9 saylı Regional Ekologiya və Təbii Sərvətlər İdarəsi tərəfindən ekoklub şagirdlərinə hər zaman xüsusi diqqət göstərilir, onlarla mütəmadi görüşlər keçirilir, ağacəkmə aksiyası təşkil olunur, ətraf mühit sahəsində kitablar və dəstəkləyici vasitələr təqdim edilir, eyni zamanda şagirdləri maraqlandıran suallar cavablandırılır.
Bu günlərdə Azərbaycan Respublikasının Ekologiya və Təbii Sərvətlər Nazirliyindən məktəbin müəllimi Səbuhi Kərimovun adına məktub gəlib. Məktubda deyilir: ”Regionlarda yaşayan əhalinin ətraf mühitin mühafizəsi sahəsində məlumatlılığını artırmaq və bu sahədə məsuliyyət hissini aşılamaq məqsədilə maarifləndirici tədbirlərin keçirilməsi böyük önəm daşıyır.
Bu məqsədlə tərəfimizdən kənd məktəbində yaradılmış “Təbiətə qayğı” adlı ekoklubun fəaliyyətini dəstəklədiyinizi bildirir, ekoloji məsuliyyətli gənc nəslin yetişməsinə töhfə verdiyiniz üçün təşəkkür edirik.
Ətraf mühitə qarşı duyarlı gənclərin yetişməsi, onların bu sahədə daha çox maariflənməsi işində sizə uğurlar arzu edir, şagirdlərə bol nailiyyətlər diləyirik”.

“Yeni Tərtər”