BEYNƏLXALQ QADINLAR BAYRAMINI İKİQAT SEVİNCLƏ QARŞILADI

8 Mart-Beynəlxalq Qadınlar Günü münasibətilə həmyerlimiz, Tərtər Bələdiyyəsinin sədri Tünzalə Vəliyeva Azərbaycan Respublikası Prezidentinin 6 mart 2023-cü il tarixli Sərəncamı ilə “Tərəqqi” medalı ilə təltif olunub. Tünzalə xanımı yüksək dövlət mükafatı münasibətilə ürəkdən təbrik edir, cansağlığı, işlərində yeni-yeni uğurlar arzulayırıq. Qeyd edək ki, Tünzalə Vəli qızı Vəliyeva şəhərimizdəki 1 saylı tam orta məktəbin məzunudur. 1993-cü ildə Gəncə Dövlət Texnologiya Universitetini bitirib. 2020-ci ilin yanvar ayından Tərtər Bələdiyyəsinin sədri kimi fəaliyyət göstərir.
Fəal ictimaiyyətçi, qayğıkeş insan olan Tünzalə xanım ötən illər ərzində tərtərlilərin böyük hörmətini qazanıb.
Qəzetimizə verdiyi qısa müsahibə zamanı Tünzalə Vəliyeva dedi:
–Bütün Azərbaycan qadınları adından Ulu Öndərin layiqli davamçısı möhtərəm Prezidentimiz İlham Əliyevə dərin təşək-kürümü bildirirəm. Ona görə ki, ölkəmizdə qadınların fəaliyyəti üçün hər cür şərait yaradılıb. Məhz buna görə də qadınlarımız hər bir sahədə həvəslə çalışır, irəli çəkilirlər. “Tərəqqi” medalı ilə təltif olunmağım məsuliyyətimi qat-qat artırıb. Bundan sonra da mənə göstərilən etimadı doğrultmağa çalışacağam.
Qadınlarımız dövlət qulluqçuları, bələdiyyə sədrləri, müəllim və həkim, mühəndisdirlər. Onlar ailə ocağının isti nəfəsi, mehriban ana, qayğıkeş həyat yoldaşıdırlar.
Təsadüfi deyil ki, Azərbaycan qadınları Şərqin ilk demokratik respublikası olan Azərbaycan Xalq Cümhuriyyəti dövründə seçib-seçilmək hüququ qazanaraq ölkəmizin ictimai siyasi həyatında yaxından iştirak etməyə başlamışlar.
Keçmiş ənənələr bu gün də layiqincə davam etdirilir.

“Yeni Tərtər”

“Ağ ölüm” sərhəd tanımır

Növbəti tədbir Sabir Paşayev adına Umudlu kənd tam orta məktəbində keçirilib. Tədbirdə rayon polis şöbəsinin rəisi polis polkovniki Elçin Qasımov, rayon prokuroru Əli Qurbanov, Tərtər təhsil sektorunun müdiri Oqtay Sarıkişiyev, narkoloq həkim Rima Axundova və “Yeni Tərtər” qəzetinin baş redaktoru Svetlana Bağırova iştirak ediblər.
Əvvəlcə qonaqlar məktəbin həyətində Şəhidlərin xatirəsinə ucaldılmış abidəni ehtiramla yad edib, önünə gül dəstələri düzüblər.
Qeyd edək ki, Umudlu məktəbinin kollektivi uzun illər doğma kənddən uzaq düşsə də, burada Umudlunun ənənələri yaşadılır. Bunu şagirdlərin təhsildə qazandıqları uğurlar da sübut edir. Belə ki onlar nəinki rayon miqyasında, həm də respublika səviyyəli müxtəlif müsabiqələrdə, yarışmalarda uğur qazanırlar.
Bununla belə, həyatda heç kim xoşagəlməyən hadisələrdən sığortalanmayıb. Xüsusilə “ağ ölüm” adlanan bəla sərhəd tanımır. Onu yaxın buraxmamaq üçün isə maariflənmək, məlumatlı olmaq lazımdır.
Polis rəisi Elçin Qasımov öz məruzəsində şagirdlərə narkomaniya və onun törətdiyi fəsadlar barədə ətraflı məlumat verərək, onları ayıq-sayıq olmağa çağırdı, rastlaşdıqları mənfi hallarla bağlı polis əməkdaşlarına müraciət etməyi tövsiyə etdi.
Tədbir iştirakçıları digər çıxışçıların da məsləhətlərini diqqətlə dinlədilər. Belə nəticəyə gəlindi ki, “Narkotiklərə yox!” demək üçün birgə mübarizə aparmaq lazımdır. Burada valideynlərin, məktəbin və şagirdlərin özlərinin üzərinə böyük məsuliyyət düşür.
Tədbirdə Rima həkim erkən nikahla bağlı valideyn məsuliyyətinin vacibliyini önə çəkdi. Çünki hər şey ailədən başlayır. Uşaqların taleyi ilə bağlı sonrakı peşimançılıq fayda vermir.
Sonda qonaqlar müzakirə olunan mövzularla bağlı şagirdlərin suallarını cavablandırdılar. Narkomaniyanın zərərli təsirlərinə həsr olunmuş videoçarx nümayiş etdirildi.

“Yeni Tərtər”

Son illər Tərtər rayonunda sənaye sahəsi sürətlə inkişaf edir. Rayon iqtisadiyyatının əsas sahələri üzrə ümumi məhsul buraxılışının 7.3 faizi sənaye sahəsinin hesabına formalaşır.
2022-сi ildə rayonda sənaye sahəsində fəaliyyət göstərən təsərrüfat subyektləri tərəfindən istehsal olunmuş mal və xidmətlərin həcmi 2021-ci illə müqayisədə 35.7 faiz artaraq 17206.2 min manat təşkil etmişdir ki, onun da 3440 min manatı və ya 20 faizi qeyri-dövlət sektorunun payına düşür.
Sənaye məhsulunun 546 min manatı və ya 3.2 faizi mədənçıxarma, 7480.4 min manatı və ya 43.5 faizi emal, 7780 min manatı və ya 45.2 faizi elektrik enerjisi, qaz və buxar istehsalı, bölüşdürülməsi və təchizatı, 1399.8 min manatı və ya 8.1 faizi su təchizatı, tullantıların təmizlənməsi və emalı sektorlarında istehsal olunmuşdur. 2021-ci ilə nisbətən emal sənayesi 5.2 dəfə, elektrik enerjisi, qaz və buxar istehsalı, bölüşdürülməsi və təchizatı sahəsi 39 faiz, su təchizatı, tullantıların təmizlənməsi və emalı sahəsi 10.3 faiz artmışdır.
İstehsal olunmuş sənaye məhsullarının böyük əksəriyyəti istehlakçılara göndərilmişdir. Bununla yanaşı, 2023-cü ilin yanvar ayının 1-i vəziyyətinə sənaye müəssisələrinin anbarlarında 3207.6 min manatlıq hazır məhsul qalığı olmuşdur.

Tərtər Rayon Statistika İdarəsi

Azərbaycan Respublikası Prezidenti cənab İlham Əliyevin “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya”nın tələblərinə əsasən rayonumuzda sağlamlıq naminə əhali üçün fiziki aktivliyə dair maarifləndirici materillar hazırlanaraq təşviq edilməsi nəzərdə tutulmuşdur.
Bununla bağlı Tərtər Rayon İcra Hakimiyyətinin əməkdaşları və könüllü gənclər tərəfindən sağlamlıq naminə fiziki aktivliyə dair hazırlanmış maarifləndirici materiallar əhaliyə təqdim olunmuş və maarifləndirici söhbətlər aparılmışdır.

Arif Oruc oğlu Əhmədov əslən Qərbi Azərbaycandan idi. Dərələyəz mahalından olan valideynləri deportasiya nəticəsində doğma yurdu tərk edib, Tərtər rayonunun İrəvanlı kəndində məskunlaşmışdılar. Arif müəllim 1948-ci ilin may ayının 23-də bu kənddə doğulub.
O, 1955-ci ildə Söylən kənd orta məktəbinin birinci sinfinə qəbul olub. Sonralar Gəncə şəhər 20 saylı orta məktəbdə təhsilini davam etdirib. Lakin ailə vəziyyəti ilə əlaqədar yenidən rayonumuza qayıdıb və 1965-ci ildə Tərtər şəhər 1 saylı orta məktəbi əla qiymətlərlə bitirib. Arif müəllimin qızı Samirə xanım deyir: “Atamda elmlərə, xüsusən dəqiq elmlərə böyük həvəs vardı. Bu, həm fitri qabiliyyətindən, həm də hədsiz dərəcədə çalışqan olmasından irəli gəlirdi. O, bizə daim tövsiyə edirdi ki, təbiətin verdiyi qabiliyyəti inkişaf etdirək, öz üzərimizdə çalışaq”.
Arif Əhmədov 1965-ci ildə Azərbaycan Politexnik İnstitutunun (indiki Texniki Universitet) Avtomobilin İstismarı fakültəsinə qəbul olub. Universitet illərində həmişə qabaqcıl tələbə kimi tanınıb. Birinci kursu yenicə bitirdiyi vaxt atasını itirib və ailə yükünün artıq onun çiyinlərində olduğunu dərk edib. Həm təhsil alıb, həm də işləyərək universiteti əla qiymətlərlə başa vurub və Tərtərə qayıdıb.
Arif Əhmədov ilk əmək fəaliyyətinə 1969-cu ildə Bərdə rayon Tikinti Trestində mexanik kimi başlayıb. Həm savadı, həm işgüzarlığı ilə seçilən gənc mütəxəssis rəhbərliyin dərin rəğbətini qazanıb. O, vəzifəsində irəli çəkilib, həmin idarədə qaraj müdiri, müdir müavini və, nəhayət, trestin müdiri kimi fəaliyyətini davam etdirib. Daha ətraflı »

Oruc tutun ki, həm ruhunuz, həm də cisminiz sağlam olsun

Bismillahir –Rəhmanir-Rəhim.
Mehriban və bagışlayan Allahın adı ilə.
… Ey iman gətirənlər, sizdən əvvəlkilərə (ümmətlərə) yazıldığı kimi, sizə də oruc yazıldı və qərara alındı ki, bəlkə (ruhunuz qüvvətlənə və nəfsi istəklərdən) çəkinəsiniz. (Bəqərə sur, 183 ayə)
İnsanı ucaldan amillərdən biri də onun öz nəfsinə qalıb gəlməsidir. Təsadüfi deyildir ki, ağır döyüşdən qayıdan səhabələrə Hz. Peyğəmbərimiz “Kiçik cihaddan qayıdanlara salam olsun” – deyib. Səhabələr: “Ya Rəsulallah! Biz ağır bir döyüşdən gəlirik, yaralanmayan adam qalmayıb. Amma siz bu döyüşü kiçik sayırsınız”. Peyğəmbərimiz cavabında onlara belə buyurur: “Ən böyük cihad insanın nəfsi ilə apardığı cihaddır. Qılınc oynatmağa, ox atmağa, qalxan tutmağa nə var ki?!”
Ramazan sözünün mənası “yandırmaq” deməkdir. Yəni, insanlar bu ayda oruc tutub, pəhriz saxlamaqla həm mənəvi, həm də cismani cəhətdən əlavə bir yüksəliş əldə edirlər. Sevimli peyğəmbərimiz buyurub: “Mədə bütün xəstəliklərin evi, pəhriz isə onun dərmanıdır. Oruc tu-tun ki, sağlam olasınız”. Və həm də bu aya dua ayı deyilir. Daha ətraflı »

Novruz gəlir. Ən əziz, ən doğma, ən sevimli bir bayram – Bahar Bayramı! Xalq şaxtadan, soyuqdan, qışın əziyyətindən qurtulmasının ilk gününü qeyd edir. İnsanlar bu bayrama bir ay qalmış hazırlaşırlar. Həyət-bacada, evlərdə təmizlik işləri aparılır, baharın gəlişinə hazırlıq görülür. Doğurçu dörd çərşənbənin hər biri insanların yaşaması, bütün həyatı üçün vacib olan dörd ünsürə – suya, oda, küləyə və torpağa həsr olunur. Bu da onu göstərir ki, Novruz ən müdrik, ən qədim bayramlardan biridir. Həmin günlərdə analar, bacılar şəkərbura, paxlava, badambura və başqa şirniyyatlar bişirir, bolluq və bərəkət rəmzi olan səməni qoyurlar .
El tonqal başına yığışır, küsülülər barışır, qohumlar, dostlar bir-birinin evinə bayramlaşmağa gedirlər. Uşaqlar, gənc qızlar, oğlanlar məşəl yandırıb, tonqal üstündən tullanıb əylənirlər. Novruzda yumurta boyayırlar. Əvvəlcədən hazırlanmış səməni halvası da süfrədə olur. Daha sonra uşaqlar evlərə papaq atırlar və onun içi şirniyyatlarla doldurulur. Qadınlar isə qulaq falına çıxırlar. Novruz şənlikləri arasında ilin axır çərşənbəsi daha təntənə ilə qeyd olunur.
Novruz bayramında şəhərlərdə, ən əsası da kənd yerlərində uşaqlar müxtəlif oyunlar hazırlayıb, yumurta döyüşdürürlər. Yumurta döyüşdürmək isə balaca vaxtımızdan hamımızın ən sevimli adətidir. Bir biri ilə yola getməyən Keçəl ilə Kosa Novruz bayramının əsas personajlarından biridir. Onlar duzlu-məzəli söhbətləri ilə uşaqlara sevinc gətirir, əyləndirirlər. Bir sözlə, baharın gəlişi hamını ruhlandırır. Qaranquşların qanadında yurdumuza Novruz gəlir, bahar gəlir, yaz gəlir. Yavaş-yavaş qış yuxusundan oyanan torpağın, ağacların, gül-çiçəklərin qoxusu gəlir.
Bayramımız mübarək!

Səbinə ELXANQIZI,
Naxçıvan Dövlət Universitetinin
jurnalistika ixtisası üzrə
I kurs tələbəsi

Zaman sürətlə ötüb keçir. Bacarsaq da, bacarmasaq da, bu sürətlə ayaqlaşmalıyıq. Elə bil dünən yalançı çərşənbələrin gəlişinə sevinirdik. İndi isə ilaxır çırşənbə astanadadır. Onu yola salıb Novruzu, baharı qarşılayacağıq.
Novruz xalqımızın qədim və çox gözəl milli adət-ənənələrindən biri olmaqla, əsrlərdir ki, həyatımıza yeni nəfəs, xoş əhval-ruhiyyə, bolluq, barışıq, mehribançılıq gətirir. Novruzu hamı sevir. Qocalar da, uşaqlar da. Həyətlərdə tonqallar qalananda yaşlılar öz cavanlıqlarını ya-da salır, balacalar isə bitib-tükənməyən arzularının qanadlarında səmalara uçmaq istəyirlər. Həmin gün hər kəs ən çox arzuladığı insanlarla görüşə bilir. Çünki adətdir, valideynlər, qohumlar ziyarət edilir, küsülülər barışır. Hər evdə bol ruzi olur ki, qarşıdakı il də ruzili-bərəkətli olsun.
Novruzqabağı günlərdə dünyadan köçən doğmaları yad etmək də nəsildən-nəsilə ötürülən adətlərdən biridir. Builki bayram günlərində də şəhərimizin hər iki qəbiristanlığında, eləcə də kənd qəbiristanlıqlarında şəhidlərimizin əziz xatirəsi yad olundu, eləcə də insanlar öz doğmalarının məzarlarını ziyarət etdilər. Rayonumuzdan uzaqda yaşayanların çoxu həmin gün vaxt tapıb doğma Tərtərə gəldilər. Bu da milli adətimizin bir qiymətli cəhətidir, əlaqələrin qırılmasına, unudulmasına yol verilmir.
Ümummilli Lider Heydər Əliyev Novruz bayramı haqqında belə deyib:”Təbiətin oyanışının, varlığın yenidən canlanmasının müjdəsini verən Novruz bayramı ən qədim zamanlardan bəri həyat və məişətimizə daxil olmuş, insanlara aydın və işıqlı sabaha, xoşbəxt gələcəyə inam duyğusu bəxş etmişdir”. Daha ətraflı »

Prezident İlham Əliyev 10.03.2020-ci il tarixində VI çağırış Azərbaycan Respublikası Milli Məclisinin ilk iclasında çıxış edib.

Dövlət başçısı bildirib ki, növbədənkənar seçkilərin keçirilməsinin əsas səbəbi ölkədə aparılan sistemli islahatları dərinləşdirmək və Milli Məclisin fəaliyyətini daha təkmil şəkildə təşkil etmək idi.

Avropa İttifaqı seçkilərin keçirilməsi ilə əlaqədar obyektiv bəyanat vermişdir. “Avropa İttifaqı yeni seçilmiş deputatlarla, Azərbaycan parlamenti ilə işləməyə hazırdır” – Aİ tərəfindən verilmiş bu qiymət, seçkilərin tanınması deməkdir.

Qeyd olunub ki, altıncı çağırış Milli Məclis çoxpartiyalı məclisdir, bu mənada siyasi sistemin təkmilləşdirilməsi işində Milli Məclisin böyük rolu vardır. Bütün siyasi qüvvələr rəqabət mühitində keçirilmiş seçkilərdə iştirak etmişlər.

Müxalifət partiyalarının nümayəndələri altıncı çağırış Milli Məclisin rəhbərliyində və komitələrin rəhbərliyində təmsil olunur. Sözügedən fakt Azərbaycanda siyasi sistemi möhkəmləndirmək, siyasi münasibətləri sağlam zəmində gücləndirmək üçün böyük əhəmiyyətə malikdir.

Qanunvericilik sahəsində də siyasi sistemin təkmilləşdirilməsi üçün Milli Məclis tərəfindən lazımi addımlar atılacaq. Azərbaycanda çoxpartiyalı sistem daha da möhkəm əsaslar üzərində qurulacaq. Çoxpartiyalı sistemin inkişafı naminə siyasi partiyaların fəaliyyəti üçün lazım olan bütün alətlər spektri mövcud olmalıdır.

Prezident bildirib ki, ölkədə aparılan islahatlar həm konseptual xarakter, həm də struktur xarakteri daşıyır. Kadr islahatları aparılır. Bəzi yerli icra orqanlarında müşahidə olunan biabırçı mənzərə bütün xalqımızı hiddətləndirir. Bundan sonra da təmizləmə işləri aparılacaqdır, həm mərkəzi, həm də yerli icra orqanlarında, bütün dövlət qurumlarında. Daha ətraflı »

Azərbaycan qadınları Şərqin ilk demokratik respublikası olan Azərbaycan Xalq Cümhuriyyəti dövründə seçib-seçilmək hüququ qazanaraq ölkəmizin ictimai-siyasi həyatında yaxından iştirak etməyə başlamışlar. Sürətlə maariflənən qadınlarımız yüz illərdən bəri formalaşmış milli dəyərlərə sadiq qalmaqla ana dilimizin, mədəniyyətimizin və mənəviyyatımızın ən etibarlı dayağı olmuşlar. Keçmişimizin unudulmaz səhifələrindəki möhkəm iradəyə malik görkəmli qadın şəxsiyyətlərimizin yüksək ləyaqətinin, ağbirçək analarımızın müdrikliyinin daşıyıcıları kimi müasir Azərbaycan xanımları öz dərin zəkaları və tükənməz daxili potensialları ilə bu gün də xalqa və cəmiyyətə fədakarcasına xidmət edirlər. Dünyanın bir çox ölkələrinin qadınlarından əvvəl seçib-seçilmək hüququ əldə etməsi, elm, mədəniyyət və digər sahələrdə qazandığı uğurlar Azərbaycan qadınının mədəni və intellektual potensialından xəbər verir.

Daha ətraflı »