Şəhid anası

Qələbənin bir addımlığında…

Hər bir ana övladını xoş günlər üçün böyüdür. Övladın boyu artdıqca, anaların arzuları çoxalır, onlarla bağlı nə qədər xəyallar qururlar.
Ancaq İltifat xanım oğlu Cahangirlə birlikdə bu arzularını Vətənə, bayrağımıza, torpağa qurban verdi.
Cahangir Surxayzadə 44 günlük Vətən müharibəsində Şuşa uğrunda gedən döyüşlərin sonuncu günü, qələbəmizin bir addımlığında şəhidlik zirvəsinə ucalıb.
İltifat ana deyir:
–Cahangir çox vətənpərvər övlad idi. 2016-cı ildə əsgəri borcunu yerinə yetirib, gəlmişdi. Düşünürdük ki, kəndimizdə qalıb təsərrüfat işlərilə məşğul olacaq. Ancaq o, razılaşmadı Səbəbini hamımız başa düşürdük. Vətənimizin, torpaqlarımızın, azadlığı onun üçün hər şeydən üstün idi.
Beləliklə də Cahangir Surxayzadə yenidən orduya qayıdır. Müddətdən artıq hərbi qulluqçu kimi DİN-in Daxili Qoşunlarında xidmət edirdi. Döyüş yolu Füzuludən, Cəbrayıldan, Qubadlıdan, Daşaltıdan keçdi.
İltifat ana danışır ki, çox az halda o zəng edib ailəsi ilə danışa bilirdi. Erməni quldurları Bərdəni raket atəşinə tutanda, burada doğum evində qardaşı Babəkin övladı dünyaya gəlməliydi. Cahangir elə bu anlarda zəng elədi. Çox həyəcanlıydı. Bildirdi ki, narahat olmayın, düşmən törətdiyi hər cinayətin cəzasını alacaq, elə alır da. Biz onları qova-qova gedirik. Tezliklə görüşəcəyik. Daha ətraflı »

Şərəfli və çətin yolun davamçısı

“Elm fədaisi” ifadəsini tez-tez eşidirik. Bu sözlərin çox böyük mənası var. Çünki həyatını elmə həsr edən insan həqiqətən fədai olmalıdır. Bizim yaxşı tanıdığımız və çox sevdiyimiz Həqiqət xanımın atası Cavanşir müəllim kimi. Bu məqalədə biz atasının yolunu layiqincə davam etdirən bir övlad haqqında söhbət açdığımıza görə, Azərbaycanın görkəmli seleksiyaçı alimi, bir neçə kəşfin və patentin müəllifi Cavanşir Həşimovu da yada salmaq istəyirik.
O, elmin dalınca Sankt-Peterburqa getmişdi. Bu zaman artıq ailəliydi. Elə qızı Həqiqət də Sankt-Peterburqda dünyaya gəlib. Həqiqət xanım deyir ki, atası elmi işini Rusiyada müdafiə etsə də, onun dissertasiyası Böyük Qafqazın bitki örtüyünə həsr edilmişdi. Vətənini, onun təbiətini çox sevirdi. Ona görə də müdafiədən sonra Rusiyada yaşamaq istəməyib, Azərbaycana qayıtdı. Həqiqət xanım da öz Vətənində böyüdü. Atasından ona qalan ən böyük miras Vətəninə və elmə olan sevgidir. Daha ətraflı »

Hər kəs öz yolunu seçib uğur qazana bilər

İnsan həyatı həmişə hamar olmur. Xüsusən qadınlar çox sınağa çəkilirlər. Yalnız səbrli, dözümlü, ən əsası isə, zəhmətkeş insanlar uğur qazanıb həyatlarını davam etdirirlər. Onlardan biri də rayonumuzun Soyulan kəndinin sakini, hazırda sahibkar kimi fəaliyyət göstərən Əskinaz Məmmədovadır.
Onun həyatı dəfələrlə kökündən dəyişib. Hər şeyin bitdiyini düşündüyü halda, yeni-dən uzaqda bir işıq görüb, bu işıqdan güc alıb və məqsədinə doğru addımlayıb.
1961-ci ildə Soyulan kəndində doğulan Əskinaz əmək fəaliyyətinə pambıqçı kimi başlayıb. Kənd Təsərrüfatı Texnikumunu, İqtisad Universitetini bitirib. Uzun müddət o zamankı Soyulan kənd Sovetində katib, sonra isə icra nümayəndəliyinin mühasibi vəzifəsində çalışıb.
Səhhətində yaranmış problemlərdən, keçirdiyi əməliyyatlardan sonra bəlkə çoxları həyatdan əlini üzərdi. Ancaq Əskinaz xanım bunlardan da qalib çıxdı. Səhhətini də bərpa elədi, övlad, nəvə sahibi də oldu. Sahibkarlıqla məşğul olmağa başladı. Arı saxladı. Bu barədə o, belə deyir:
– Arılar mənim yaşam səbəbim oldu. Onları artırıb 150 pətək etdim. Erməni qəsbkarlarının rayonumuza qadağan olunmuş bombalar atması nəticəsində, havanın çirklənməsindən arılarım da zəhərlənib məhv oldu. Bu zərbə çox ağır idi və mən yenidən xəstələndim. Daha ətraflı »

Qızlar arasında birinci

İdmanın kinqboksinq növü ilə məşğul olan Banuçiçək Vəlizadənin adı nəinki rayonumuzda, ondan kənarda da çoxlarına tanışdır. Dəfələrlə regionlararası və respublika yarışlarında iştirak edərək qalib olub, hətta 2022-ci ildə yeniyetmələr arasında keçirilən yarışda Azərbaycan çempionu adını qazanıb. Bu il isə Bakıda keçirilən və Xocalı qurbanlarının xatirəsinə həsr olunmuş “Xocalıya ədalət!” adlı turnirdə I yerə çıxıb.
Banuçiçəyi idmana gətirən yol haradan başlayıb? Bu sualı onun özünə verdik. İdmançı qız dedi:
– Ailəmizdə idmanı hamı sevir. İlk olaraq özümdən böyük qardaşım kinqboksinqlə məşğul olmağa başladı. Mən də onunla birlikdə məşqlərə getdim. Qardaşım etiraz etmirdi. Az müddətdə kinqboksinqi elə sevdim ki, Yavər müəllim mənə idmanın bu növü ilə ciddi məşğul olmağı təklif etdi. O vaxtdan 5 il keçib. Hazırda məşqçim Şamxal Rzazadədir.
“Qız üçün idmanla məşğul olmaq çətin deyil ki?” – sualını isə Banuçiçək belə cavablandırdı: Daha ətraflı »

Milli Qəhrəman Elman Hüseynovun əziz xatirəsinə həsr edilmiş kikboksinq idman növü üzrə açıq Tərtər birinciliyi keçirilib
Tərtər Olimpiya İdman Kompleksində Qarabağ Regional Gənclər və İdman İdarəsi ilə Azərbaycan Kikboksinq Federasiyası tərəfindən təsdiqlənmiş əsasnaməyə uyğun olaraq Milli Qəhrəman Elman Hüseynovun əziz xatirəsinə həsr edilmiş kikboksinq üzrə açıq Tərtər birinciliyi keçirilmişdir.
Tədbir başlamazdan öncə Ulu Öndər Heydər Əliyevin və Vətən uğrunda canından keçən şəhidlərimizin əziz xatirəsi bir dəqiqəlik sükutla anılmışdır.
Tədbirin açılış mərasimində Tərtər Rayon İcra Hakimiyyətinin, Qarabağ Regional Gənclər və İdman İdarəsinin, Azərbaycan Kikboksinq Federasiyasının(AKF) nümayəndələri, Milli Qəhrəman Elman Hüseynovun övladı Emin Hüseynov, rayonun idman ictimaiyyəti və qaziləri iştirak etmişdir.
Açıq Tərtər birinciliyində cəmi müxtəlif rayonları təmsil edən 15 komandadan 150-dək idmançı iştirak etmişdir.
Qaliblər medal, kubok və Qarabağ RGİİ-nin diplomları ilə mükafatlandırılmışlar.

Ənənəyə sadiq qalan Tərtər şəhər 1 nomrəli tam orta məktəbin rus bölməsinin 8”v” sinif şagirdləri sinif rəhbəri Təranə müəllimlə birlikdə şəhid Vasif Rüstəmovun anasi Şövkət müəllimi “ANALAR GÜNÜ” münasibətilə ziyarət ediblər. Onlar eyni zamanda 2 il öncə əkdikləri ağaclara qulluq ediblər.
Təranə müəllim bildirib ki, 44 günlük Vətən müharibəsi zamanı Vasif Rüstəmov hə-yatını təhlükəyə ataraq, çətin günlərdə öz iş yerini tərk etməmiş, tərtərlilərə və mağazaya gələn hərbçilərə xidmət göstərmişdir. Bu mağazadan bir nəfər də ümidsiz geri dönməmişdi. Xeyirxah insan pulu olanı da, olmayanı da lazımi ərzaqla təmin edir və bununla da rahatlıq tapırdı. O, işini raket, mərmi partlayışları altında yerinə yetirirdi.
Şəhidin əziz xatirəsi qəlblərdə əbədi yaşayacaq. Allah anasına və doğmalarına səbr versin.

“Yeni Tərtər”

Rəbbimiz bütün oruc və ibadətlərimizi qəbul eləsin!

Bismilləhir Rahmənir Rahim!
Mehriban və Bağışlayan Allahın adı ilə!
“Ey iman gətirənlər! Oruc tutmaq Sizdən əvvəlki ümmətlərə vacib buyrulduğu kimi, Sizə də vacib edildi. Bəlkə Allahdan qorxasınız deyə”. Bəqərə surəsi, ayə 183
Nəfslərə aramlıq, könüllərə rəhmət aşılayan, bədənlərə sağlamlıq vəsiləsi olan əzəmətli bir ayın başlanğıcındayıq. Bəli, bu, on bir ayın sultanı olan, insanların böyük cihadının carçısı sayılan Ramazan ayıdır. Hədislərdə gəlib ki, ağır bir döyüşdən qayıdan müsəlmanları Hz. Peyğəmbərimiz (s) belə salamlayır: “Kiçik cihaddan gələnlərə salam olsun”. Deyirlər, Ya Rəsulallah (s), çox ağır çarpışma oldu, əksəriyyətimiz yaralanıb. Peyğəmbərimizin onlara cavabı belə olur ki, ox atmağa, qılınc tutmağa nə var ki? Ən böyük cihad insanın öz nəfsinə, öz tamahına sahib çıxmasıdır! Bəli, həqiqətən də ramazanı digər aylardan fərqli edən də məhz elə bu keyfiyyətidir. Quran və hədislərə rəğmən bu ay çox hikməti özündə cəm edib. Bu ayda müsəlmanlar Allahın razılığını əldə etmək üçün sübh azanından xeyli əvvəl oyanıb oruc olmağa hazırlaşarlar. Daha ətraflı »

Göyçə sərvətlərimizdən)

Budur ana təbiətin oyanış fəsli olan baharın – folklorçuların əzbərində, aşıqların sazının tellərində, xanəndə və müğənnilərin avazında vəsf olunan, neçə-neçə qədim ənənələriylə cavanların əhvalına şuxluq qatan nazlı baharın mübarək qədəmlərinin sədaları duyulmaqdadır. Gəlişiylə təbiətə gözəllik, ürəklərə hərarət, zəhmətkeş insanlara həvəs gətirən baharın, zaman-zaman yaradıcı aşıq və şairlər tərəfindən şəninə sayagəlməz qədər biri-birindən gözəl şeirlər söylənən, nəğmələr oxunan baharın sədalarıdır bu sədalar.
İlıq nəfəsiylə təbiəti canlandıran yazın tərənnümündə Göyçə ədəbi mühitində yetişmiş ustad sənətkarların da zövqləri oxşayan inci düzümləri az olmamışdır. Onlardan biri də qüdrətinə, istedadına, nüfuzuna, şöhrətinə “savadsızlığına” xeyli “savadlıların” həsəd apardığı Dədə Ələsgərdir. Onun yaradıcılığı kamil ustad və müdrik ağsaqqal olmasından xəbər verir.
Ancaq biz onun şeirlərində baharı vəsf edən bəzi məqamları bu baharın gəlişinə töhvə olaraq istəkli oxucuların diqqətinə təqdim edirik:
Bahar fəsli, yaz ayları gələndə,
Süsənli, sünbüllü, lalalı dağlar,
deməklə, əsasən baharın zinətlərindən zövq alan aşıq qoynunda boya-başa çatdığı dağların, gəzdiyi yaylaqların tərənnümündən doymazmış.
Ələsgər köynəkdən çıxarsın sazı,
Yenə cuşa gəlsin eşqi, avazı.
Tərifləsin allı-yaşıllı yazı,
Unutma bu böyük kamalı, yaylaq, Daha ətraflı »

10 mart 2020-ci il tarixində VI çağırış Azərbaycan Respublikası Milli Məclisinin ilk iclasında çıxış edən dövlət başçısı bildirmişdir ki, qanunvericilik hakimiyyətinin fəaliyyətinin təkmilləşdirilməsi və sağlam siyasi münasibətlərin bərqərar olunması üçün sistemli islahatlar aparılmalıdır. Növbədənkənar seçkilərin keçirilməsinin əsas səbəbi ölkədə aparılan sistemli islahatları dərinləşdirmək və Milli Məclisin fəaliyyətini daha təkmil şəkildə təşkil etmək idi.

Avropa İttifaqı seçkilərin keçirilməsi ilə əlaqədar obyektiv bəyanat vermişdir. Belə ki, Avropa İttifaqı tərəfindən verilmiş “Avropa İttifaqı yeni seçilmiş deputatlarla, Azərbaycan parlamenti ilə işləməyə hazırdır” – kimi qiymət, seçkilərin tanınması deməkdir.

Altıncı çağırış Milli Məclis çoxpartiyalı məclisdir, bu mənada siyasi sistemin təkmilləşdirilməsi işində Milli Məclisin böyük rolu vardır. Bütün siyasi qüvvələr rəqabət mühitində keçirilmiş seçkilərdə iştirak etmişlər.

Müxalifət partiyalarının nümayəndələri altıncı çağırış Milli Məclisin rəhbərliyində və komitələrin rəhbərliyində təmsil olunur. Sözügedən fakt Azərbaycanda siyasi sistemi möhkəmləndirmək, siyasi münasibətləri sağlam zəmində gücləndirmək üçün böyük əhəmiyyətə malikdir.

Diqqətə çatdırılıb ki, qanunvericilik sahəsində də siyasi sistemin təkmilləşdirilməsi üçün Milli Məclis tərəfindən lazımi addımlar atılacaq.

Ölkədə aparılan islahatlar həm konseptual xarakter, həm də struktur xarakteri daşıyır. Kadr islahatları aparılır.

Bildirilib ki, islahatların dərinləşməsi prosesi parlamentdən yan keçə bilməzdi. Yeni tərkibdə formalaşmış Milli Məclis islahatlara yeni təkan verəcəkdir. Deputatlar qarşısında böyük vəzifələr durur, ilk növbədə, qanunvericilik sahəsində. Daha ətraflı »

Azərbaycan qadınları Şərqin ilk demokratik respublikası olan Azərbaycan Xalq Cümhuriyyəti dövründə seçib-seçilmək hüququ qazanaraq ölkəmizin ictimai-siyasi həyatında yaxından iştirak etməyə başlamışlar.

Sürətlə maariflənən qadınlarımız yüz illərdən bəri formalaşmış milli dəyərlərə sadiq qalmaqla ana dilimizin, mədəniyyətimizin və mənəviyyatımızın ən etibarlı dayağı olmuşlar. Keçmişimizin unudulmaz səhifələrindəki möhkəm iradəyə malik görkəmli qadın şəxsiyyətlərimizin yüksək ləyaqətinin, ağbirçək analarımızın müdrikliyinin daşıyıcıları kimi müasir Azərbaycan xanımları öz dərin zəkaları və tükənməz daxili potensialları ilə bu gün də xalqa və cəmiyyətə fədakarcasına xidmət edirlər. Dünyanın bir çox ölkələrinin qadınlarından əvvəl seçib-seçilmək hüququ əldə etməsi, elm, mədəniyyət və digər sahələrdə qazandığı uğurlar Azərbaycan qadınının mədəni və intellektual potensialından xəbər verir. Daha ətraflı »