01-07 may 2025-ci il tarixlərdə Tərtər Rayon İcra Hakimiyyətinin, Qarabağ Regional Gənclər və İdman İdarəsinin və Qarabağ Regional Təhsil İdarəsinin birgə razılaşdırılmış tədbirlər planına əsasən Tərtər rayonunun ümumtəhsil məktəblərinin X-Xl sinif şagirdlərindən ibarət komandaları arasında minifutbol idman növü üzrə rayon turniri keçirilmişdir. Maraqlı mübarizə şəraitində davam edən yarışa 27 məktəb komandası qatılmışdır.

Turnirin bağlanış mərasimində Tərtər Rayon İcra Hakimiyyətinin başçısı Müstəqim Məmmədov, YAP Tərtər rayon təşkilatının sədri Eldar Əsədov, Qarabağ Regional Gənclər və İdman İdarəsinin rəisi vəzifəsini icra edən Anar Əsgərov, Qarabağ RTİ-nin Tərtər və Ağdərə rayonları üzrə Təhsil sektorunun müdiri Oqtay Sarıkişiyev, Azərbaycan Təhsil İşçiləri Azad Həmkarlar İttifaqının Tərtər rayon komitəsinin sədri Niyaməddin Aslanov və rayonun ümumtəhsil məktəblərinin direktorları iştirak etmişdir.

Olimpiya sistemi əsasında yekun vurulan yarışda şəhər 5 saylı tam orta məktəbin komandası l yeri, şəhər 1 saylı tam orta məktəbin komandası ll yeri, Qaradağlı kənd tam orta məktəbin komandası isə lll yerin qalibi olmuşdur.

Yekunda qalib komandalar Azərbaycan Təhsil İşçiləri Azad Həmkarlar İttifaqının Tərtər rayon komitəsi tərəfindən kubok və toplarla, Qarabağ RGİİ-nin isə diplomları ilə təltif edilmişlər.

May ayının 6-da Tərtər Rayon İcra Hakimiyyətinin, YAP rayon təşkilatının və Tərtər-Ağdərə rayonları üzrə Təhsil sektorunun təşkilatçılığı ilə Tərtər Uşaq Gənclər İdman Şahmat məktəbində “Konstitusiya və Suverenlik İli” çərçivəsində  Ümummilli Liderin anadan olmasının 102-ci ildönümünə həsr edilmiş məktəblilər arasında şahmat üzrə rayon turnirinin qaliblərinə rayon icra hakimiyyətinin başçısı Müstəqim Məmmədov Tərtər Uşaq Gənclər İdman Şahmat məktəbinin təltiflərini təqdim edib.

Müxtəlif yaş qrupları üzrə Cavidan Rzayev, Sultan Cavidan, Tahir Tahirli, Ramin İsazadə birinci yerə çıxdıqları üçün  fəxri fərman və medalla təltif olunublar.

2 və 3-cü yerlərə layiq görülən şahmatçılara isə fəxri fərman təqdim olunub.

Tərtər Rayon İcra Hakimiyyəti, YAP rayon təşkilatı, Qarabağ Redional Gənclər və İdman İdarəsi və Tərtər–Ağdərə rayonları üzrə Təhsil sektorunun təşkilatçılığı ilə Tərtər rayon Gənclər Evində Ümummilli Lider Heydər Əliyevin anadan olmasının 102-ci ildönümü münasibəti ilə “Əbədiyaşar dahi şəxsiyyət–Heydər Əliyev” adlı gənclərin iştirakı ilə konfrans keçirilib.

Konfransda əvvəlcə Dövlət Himni səsləndirilib. Sonra Ümummilli Liderin və torpaqlarımızın suverenliyi uğrunda canlarını qurban vermiş şəhidlərin xatirəsi bir dəqiqəlik sükutla yad edilib.

Tədbirdə Qarabağ Regional Gənclər və İdman İdarəsinin rəis vəzifəsini müvəqqəti icra edən Anar Əsgərov, rayon icra hakimiyyəti başçısı aparatında İctimai-siyasi və humanitar məsələlər şöbəsinin müdir müavini Zabil Paşayev, YAP rayon təşkilatının əməkdaşı  Gündüz  Alıkişiyev, Qarabağ Regional Gənclər və İdman İdarəsinin Gənclərlə iş sektorunun müdiri Orxan Fəxrəddinov, Azərbaycan Respublikası Mədəniyyət  Nazirliyi yanında  Mədəni İrsin Qorunması, İnkişafı və Bərpası üzrə Dövlət Xidmətinin baş mütəxəsisi Kəmalə Abbaszadə, Qarabağ Regional Gənclər və İdman İdarəsinin İnzibati -Təşkilat sektorunun müdiri Anar Şahbazov, Qarabağ qazisi Bayram İbrahimov, Tərtər Peşə məktəbinin tələbəsi  Fəxriyyə Budaqova çıxış ediblər.

Çıxışlarda Ulu Öndərin həyat və fəaliyyətindən ətraflı bəhs olunub. Bildirilib ki, müstəqil Azərbaycanın yaradıcısı olan Ümummilli Liderin  adı və xidmətləri Azərbaycanın yarım əsrlik tarixi ilə üzvi surətdə bağlıdır. O, bütün həyatı boyu daim dövlətini, xalqını düşünüb, ölkəmizin çiçəklənməsi və dünyanın aparıcı dövlətlərindən birinə çevrilməsi istiqamətində tarixi addımlar atıb. Diqqətə çatdırılıb ki, Ümummilli Lider hələ 1967-ci ildə kommunist ideologiyasının sərt dövrlərində, Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsində çalışarkən milli təfəkkürlü, Azərbaycançılıq ideologiyasına sahib kadrları qoruyub saxlayıb və xalqımızı gələcək dövlət müstəqilliyinə hazırlayıb. Ulu Öndər Heydər Əliyev 1982-ci ildə Sovet İttifaqı Kommunist Partiyası Mərkəzi Komitəsinin Siyasi Bürosunun üzvü seçilməsi ilə Azərbaycan xalqının zəngin dövlətçilik və idarəetmə qabiliyyətinə malik olduğunu bütün dünyaya göstərmiş oldu. Daha ətraflı »

Tərtər rayon Mədəniyyət Mərkəzində görkəmli oftalmoloq-alim, akademik Zərifə xanım Əliyevanın anadan olmasının 102 illiyinə həsr edilmiş “Zərifə Əliye-va: Əbədi işıq mücəssəməsi” mövzusunda konfrans keçirilib.
Qərbi Azərbaycan İcmasının Qadınlar Şurası, Ağsaqqallar Şurası, İcbari Tibbi Sığorta Dövlət Agentliyi, TƏBİB və Tərtər Rayon İcra Hakimiyyətinin təşkilatçılığı ilə keçirilən konfransın iştirakçıları əvvəlcə Ümummilli Lider Heydər Əliyevin abidəsini ziyarət edərək önünə tər güllər qoyub, Zərifə xanım Əliyevaya həsr edilmiş fotosərgiyə baxış keçiriblər.
Ümummilli Lider Heydər Əliyevin, akademik Zərifə xanım Əliyevanın və şəhidlərin xatirələri bir dəqiqəlik sükutla yad edilib. Sonra akademik Zərifə xanım Əliyevaya həsr olunmuş film təqdim edilib.
Konfransın moderatoru, Milli Məclisin deputatı, Qərbi Azərbaycan İcmasının Qadınlar Şurasının sədri Məlahət İbrahimqızı görkəmli oftalmoloq-alim, tanınmış səhiyyə təşkilatçısı, nüfuzlu ictimai xadim, akademik Zərifə xanım Əliyevanın ömür yoluna toxunub, yüksək nailiyyətlərindən, öz peşəsinə sevgisindən bəhs edib. Bu gün keçirilən tibbi humanitar aksiyanın önəmindən danışıb.
Milli Məclisin deputatı, Səhiyyə komitəsinin sədri, İcmanın Ağsaqqallar Şurasının sədri akademik Əhliman Əmiraslanov bildirib ki, akademik Zərifə xanım Əliyeva Azərbaycan səhiyyəsinin inkişafında silinməz iz qoymuş alimdir. Onun adına həsr olunmuş tədbirin Tərtərdə, Qərbi azərbaycanlıların yaşadığı ərazidə keçirilməsi böyük mənəvi dəyər daşıyır. Eyni zamanda, Tərtərdə həyata keçirilən tibbi humanitar aksiya da onun xidmətlərinə bir ehtiram nümunəsidir. Daha ətraflı »

Bu bahar günlərində qəhrəman Tərtər şəhərində, böyük şəxsiyyət, dünyaşöhrətli alim, qayğıkeş və mehriban həyat yoldaşı və ana Zərifə xanım Əliyevaya həsr olunmuş tədbirin keçirilməsi rayon sakinləri üçün, xüsusilə vaxtilə Zərifə xanım Əliyeva ilə eyni dövrdə yaşamış insanlardan ötrü olduqca xoş oldu.
Qonaqlarımızın da qeyd etdiyi kimi, müzəffər Ali Baş Komandan, Azərbaycan Prezidenti İlham Əliyevin rəhbərliyi altında əldə olunan zəfərimizdən sonra tərtərlilərin həyatı və rayonumuzun siması tamamilə dəyişib. Hər kəsin, xüsusilə qadınlarımızın ən çox arzuladığı sülh və əmin-amanlıq bərqərar olub. İnsanlar rahatdırlar, sabahkı günə əminlik var. Ulu Öndərimizin, Zərifə xanımın ruhları şad olsun, Allah Prezidentimizi qorusun, torpaqlarımız uğrunda canından keçən şəhidlərimizə Allah rəhmət eləsin.
Zərifə xanım Əliyevanın adı çəkiləndə, ilk olaraq fikrimizə gələn sözlər nurdur, işıqdır. Təkcə ona görə yox ki, o, insanların gözünə nur bəxş edirdi. Zərifə xanım yaşadığı şərəfli ömrü ilə xal-qımızın həyatını günəş kimi isidirdi, işıqlandırırdı və o günəş bu gün də parlamaqdadır.
Əsl Azərbaycan qadını, neçə-neçə nəsil qadınlarımıza gözəl nümunə, örnək olan Zərifə xanımın həyatının hansı bir tərəfinə nəzər salsaq, böyük fədakarlığın, yorulmazlığın, sadəliyin, humanizmin şahidi olarıq.
Hamımız yaxşı bilirik ki, ən dahi şəxsiyyətlərin həyatda uğur qazanmasının böyük ağırlığı onun yanında olan qadının çiyinlərinə düşür. Azərbaycan xalqı xoşbəxtdir ki, Ulu Öndərimizin ömür-gün yoldaşı məhz Zərifə xanım Əliyeva olub. Bu ailədəki hüzur, mehribançılıq, bir-birinə qarşı qayğıkeşlik onları həm ailədə, həm cəmiyyətdə xoşbəxt edib və Ümummilli Liderimizə tale tərəfindən yazılmış nəhəng missiyanı şərəflə yerinə yetirməyə kömək olub.
Azərbaycanda ailə bağları həmişə müqəddəs hesab edilib. Ulu Öndərimizin ailəsi bunun ən gözəl nümunəsidir.
Təsadüfi deyil ki, hamımızın fəxri, qüruru olan müzəffər Ali Baş Komandan, Azərbaycan Respublikasının Prezidenti cənab İlham Əliyev məhz belə bir ailədə dünyaya gəlib, böyüyüb və valideynlərinin yolu ilə gedərək, ümumxalq məhəbbətini qazanıb. Azərbaycan xalqının belə bir Liderinin olması Zərifə xanımın ən böyük xidmətlərindən biri, bir valideyn kimi onun xoşbəxtliyin ən yüksək zirvəsinə çatmasıdır. Daha ətraflı »

Qərbi Azərbaycan əsilli şəxslərin siyahısının dəqiqləşdirilməsi ilə əlaqədar yaradılmış işçi qrupunun üzvləri ilə görüş keçirilib

Tərtər Rayon İcra Hakimiyyətinin başçısı Müstəqim Məmmədov Qərbi Azərbaycan əsilli şəxslərin, habelə əvvəlki dövrlərdə köçürülmüş ailələrin nümayəndələrinin müəyyən edilməsi, onların adlı siyahılarının dəqiq tərtib olunması, eyni zamanda Ermənistan SSR tərəfindən həmin şəxslərə və ailə üzvlərinə verilmiş sənədlərin surətlərinin toplanması işinin təşkili ilə əlaqədar yaradılmış işçi qrupunun üzvləri ilə görüş keçirib.
Görüşdə YAP rayon təşkilatının sədri Eldar Əsədov, rayon polis şöbəsinin xidmət üzrə rəis müavini vəzifəsini icra edən Ruslan Allahverdiyev, statistika, qeydiyyat və arxiv idarələrinin, Qaçqınların və Məcburi Köçkünlərin İşləri üzrə Dövlət Komitəsinin, İqtisadiyyat Nazirliyi yanında Əmlak Məsələləri Dövlət Xidmətinin yerli strukturlarının əməkdaşları, Qərbi Azərbaycan İcmasının özəkləri, habelə icra nümayəndələri və bələdiyyə sədrləri iştirak ediblər.
Rayon rəhbəri çıxış edərək bildirib ki, tarixin müxtəlif mərhələlərində ermənilər tərəfindən azərbaycanlılara qarşı törədilən soyqırım və deportasiya cinayətləri nəticəsində yüz minlərlə soydaşımız Azərbaycana pənah gətirərək ölkəmizin müxtəlif yaşayış məntəqələrində, o cümlədən Tərtər rayonunda məskunlaşmışdır.
Azərbaycanlılara qarşı 1905-1906-cı illərdə törədilən qırğınların, 1918-1920-ci illərdə soyqırımın, 1948-1953-cü illərdə deportasiyanın, 1987-1991-ci illərdə etnik təmizləmənin izlərini bu gün daha dərindən araşdırmaq və dün-ya ictimaiyyətinin diqqətinə çatdırmaq, baş verən cinayətlərin miqyasını daha dəqiq öyrənmək, eləcə də onların pozulmuş hüquqlarının bərpası istiqamətində beynəlxalq səviyyədə tədbirlər görmək məqsədilə ölkəmizdə aidiyyəti qurumlar tərəfindən müvafiq tədbirlər həyata keçirilir. Daha ətraflı »

Tərtər Rayon İcra Hakimiyyətinin başçısı Müstəqim Məmmədov YAP Tərtər rayon təşkilatının sədri Eldar Əsədovla birlikdə Dəmirçilər kəndində şəhid Fikrət Rzayevin ailəsində olub, atası Əhliyyət Xudabəndəyevi 85 illik yubileyi münasibəti ilə təbrik edərək, ona rayon icra hakimiyyətinin təşəkkürnaməsini təqdim edib.
Rayon rəhbəri şəhid və qazilərin qəhrəmanlıqlarından söz açıb və bildirib ki, bu gün onların qanı-canı bahasına torpaqlarımız işğaldan azad olub, suverenliyimiz bərpa edilib.
Qeyd edək ki, Şəhid Rzayev Fikrət Əhliyyət oğlu 1972-ci il avqust ayının 30-da Kəlbəcər rayonunun Şurtan kəndində anadan olub. Sonralar ailələri ilə birlikdə Tərtər rayonunun Dəmirçilər kəndinə köçüblər. Həmin kəndin orta məktəbində natamam orta təhsil aldıqdan sonra 183 nömrəli Texniki Peşə Məktəbində təhsil alıb. 1990-cı ilin noyabr ayında keçmiş Sovet Ordusu sıralarına həqiqi hərbi xidmətə çağrılıb. Daha ətraflı »

Tərtər rayonundan olan Vətən müharibəsi şəhidi Elşən Məmmədovun qardaşı Zamin Məmmədovun toy mərasimi keçirilib. Toy şənliyində ailə üzvləri ilə bərabər Tərtər Rayon İcra Hakimiyyətinin Başçısı Müstəqim Məmmədov, Tərtər rayon məhkəməsinin sədri Tahir Qubadov, hüquq mühafizə orqanlarının əməkdaşları, Tərtər Cümə məscidinin imamı Sadiq Cəfərov, şəhid ailələri, Vətən müharibəsi qaziləri, veteranları iştirak ediblər.
Tərtər rayon İcra Hakimiyyətinin başçısı Müstəqim Məmmədov toy mərasimində çıxış edərək yeni ailə quran gəncləri təbrik edib, onlara xoşbəxtlik, firavan həyat arzulayıb. Sonra icra başçısı Azərbaycan Respublikasının Ali Baş Komandanı cənab İlham Əliyevin rəhbərliyi altında bizə qələbə sevincini yaşadan şəhid Elşən kimi oğlulların sayəsində torpaqlarımızın işğaldan azad edildiyini bildirib. Qeyd edib ki, şəhidlərimizin keçdiyi döyüş yolu gənclərimizə bir örnəkdir.
Rayon rəhbəri şəhidlərə Ulu Tanrıdan rəhmət, qazilərə cansağlığı, diləyib, vətənpərvər oğullar böyütdükləri üçün şəhid valideynlərinə öz minnətdarlığını bildirib.
Rayon rəhbəri dövlət başçısı cənab İlham Əliyevin və Birinci vitse-prezident Mehriban xanım Əliyevanın daim şəhid və qazi ailələrinin yanında olduqlarını, onların problemlərinə diqqət və qayğı ilə yanaşdıqlarını və möhtərəm Prezidentin bütün dövlət qurumlarının qarşısında bu həssas təbəqəyə aid olan insanların problemlərinin həllini bir nömrəli vəzifə kimi müəyyən etdiyini vurğulayıb. Şəhid ailələrinə, qazilərə və veteranlara göstərilən diqqət və qayğının dövlət siyasətinin prioritetlərindən olduğunu qeyd edib. Daha ətraflı »

Giriş qapısı təmir olundu

Hər bir yaşayış məntəqəsi haqqında ilk təsəvvür onun girişindən, yolundan yaranır. Ona görə də deyirlər ki, yol mədəniyyətdir, giriş qapısı isə həmin yerin vizit kartıdır.
Bir neçə il əvvəl kəndimizin yoluna asfalt örtüyü çəkilib. Yəni gediş-gəlişimiz rahatdır. Ancaq həm kəndimizin giriş qapısı yarasız vəziyyətdəyd, həm də avtomobil yolunun kənarlarındakı alaq otları və vətəndaşlar tərəfindən tökülmüş məişət tullantıları xoşagəlməz mənzərə yaradırdı.
Rayon icra hakimiyyətinin başçısı Müstəqim Məmmədov kəndimizdə səyyar qəbul-görüş keçirəndə, bizi narahat edən məsələ ilə bağlı müraciət etdik.
Artıq mənzərə tamamilə dəyişib. Kəndin giriş qapısı təmir olunub, alaq otları biçilib və ərazi məişət tullantılarından təmiz-lənib.
“Görülən işdən gül ətri gələr,” – deyiblər. Biz də görülən işlərdən razıyıq. Bu işdə əməyi olan hər kəsə təşəkkür edirik.

Bayram Məmmədov,
Cəmilli kəndinin sakini

Bu gün kəndlərimizin hər birinin müasir infrastrukturu var. Xüsusən də elektrik enerjisinin gündəlik həyatımızda əhəmiyyəti böyükdür.
Bizim kəndimizdə olan 100 kilovatlıq transformator köhnə olduğundan, elektrik təchizatında müəyyən problemlər yaranır, bu isə əhalini narahat edirdi. Rayon rəhbəri kəndimizdə əhali ilə görüş keçirərkən, vəziyyəti bildirdik və kənd sakinləri adından bizə köməklik göstərilməsini xahiş etdik.
Müraciətimizdən sonra kəndin ərazisində olan köhnə transformator yenisi ilə əvəz olunub. İndi fasiləsiz olaraq elektrik enerjisindən istifadə edirik. Rayon rəhbərinə və “Azərişıq” ASC-nin Tərtər elektrik şəbəkəsinin işçilərinə öz təşəkkürümüzü bildiririk.

Almaz Qasımova,
Sarov kəndinin sakini