Uşaqların ruhi və fiziki sağlamlığını qoruyaq!

Bu günlərdə şəhər 5 saylı tam orta məktəbdə Tərtər Rayon Polis Şöbəsinin, Təhsil Sektorunun təşkilatçılığı, polis əməkdaşlarının, rayon mərkəzi xəstəxanasının pisxoloqunun, məktəbin şagird və müəllim kolektivinin, valideynlərin iştirakı ilə narkomaniya və erkən nikahla mübarizə mövzusuna həsr olunmuş tədbir hər kəsin fəallığı şəraitində keçdi. Xüsusən də valideynlərin çoxluğu məktəbdə həmin mövzular ətrafında ciddi düşünməyin aktuallığından xəbər verirdi.

Həm məruzədə, həm də çıxışlarda qeyd olundu ki, nakomanlıq insanı ruhi cəhətlə yanaşı, fiziki cəhətdən də şikəst edir. Əlbəttə, heç kim bilə-bilə ömrünü qısaltmaq istəməz. Halbuki erkən yaşlarından narkotik aludəçisi olan şəxslərin ömrü 35-40 yaş arası təşkil edir.

Bəs, uşaqlar, yeniyetmələr bu yola niyə qədəm qoyurlar? Polis şöbəsinin rəisi, polis polkovniki Elçin Qasımov, Təhsil Sektorunun müdiri Oqtay Sarıkişiyev, psixoloq Hətəm Nuruzadə narkotikdən qorunmağın ən optimal yolları barədə şagirdləri maarifləndirməklə yanaşı, həm də valideynlərə mesaj verdilər. Araşdırmalar göstərir ki, narkotik maddələrdən istifadə edən gənclərin valideynləri əksər hallarda övladlarına lazımi qədər diqqət, qayğı, sevgi göstərməyən ana-atalardır. Ata-ananın övladına düzgün nümunə olmaması da belə problemlərin yaranmasına səbəb olur. Elə erkən nikahın törətdiyi fəasadların başlanğıcında övladının  “xoşbəxtliyini” istəyən valideynlər dayanmırmı? Daha ətraflı »

Birinci Qarabağ müharibəsində itkin düşmüş və şəxsiyyəti müəyyənləşdirilən şəhidlərdən olan Əliyev Ədalət Veysəl oğlu Tərtərdə dəfn edilib. Ədalət naməlum şəhid kimi Gəncə şəhərindəki Şəhidlər Xiyabanında dəfn olunmuşdu.

Tərtər şəhərindəki Şəhidlər Abidə-Kompleksində Tərtər və Kəlbəcər Rayon İcra hakimiyyətlərinin, hüquq-mühafizə orqanlarının əməkdaşlarının, şəhidlərin ailə üzvlərinin, qazilərin, veteranların, idarə, müəssisə, təşkilat kollektivlərinin, təhsil, səhiyyə, mədəniyyət işçilərinin və ictimaiyyət nümayəndələrinin iştirakı ilə vida mərasimi keçirilib.
Vida mərasimində Qafqaz Müsəlmanlar İdarəsinin səlahiyyətli nümayəndəsi, Tərtər Cümə Məscidinin imamı Sadiq Cəfərov şəhidin ruhuna dualar oxuyub. Sonra Tərtər Rayon İcra Hakimiyyətinin başçısı Müstəqim Məmmədov və Kəlbəcər Rayon İcra Hakimiyyətinin başçısı Azər Qocayev çıxış edərək şəhidlərimizə Allahdan rəhmət, yaxınlarına səbr diləyiblər. Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində hərbçilərimizin göstərdiyi rəşadətdən danışaraq, qazanılan tarixi qələbə ilə şəhidlərimizin qanının yerdə qalmadığını vurğulayıblar.
Cənazə namazından sonra şəhid Tərtər şəhər məzarlığında torpağa tapşırılıb.
Qeyd edək ki, Əliyev Ədalət Veysəl oğlu Birinci Qarabağ müharibəsində Kəlbəcər uğrunda gedən döyüşlərdə iştirak edib. 1994-cü ilin fevralında Kəlbəcərdə Murovdağ istiqamətində itkin düşmüş hesab olunurdu.

Cəfərov Anar Qəzənfər oğlu

1982-ci il yanvar ayının 1-də Tərtər şəhərində anadan olub. 1997-ci ildə 1 saylı tam orta məktəbin 9-cu sinfini bitirdikdən sonra Tərtər şəhərindəki Texniki peşə məktəbinə daxil olub. 2000-ci ildə həmin peşə məktəbini geniş profilli traktorçu-maşınçı, təmirçi-çilingər və avtomobil sürü-cüsü ixtisası üzrə bitirib. Yenidən 2003-cü ildə 96 nömrəli texniki peşə məktəbinin rabitə və elektrik montyoru, 2006-cı ildə “meyvə-tərəvəz” ustası ixtisasları üzrə bitirib.
2000-ci ildə həqiqi hərbi xidmətə çağırılıb. Hərbi xidmətini başa vurduqdan sonra 2005-2007-ci illərdə Elektromexanika zavodunda gözətçi işləyib. 2008-ci il iyulun 6-dan müddətdən artıq hərbi xidmət qulluqçusu kursuna daxil olub. 2008-ci il oktyabrın 13-dən 703 saylı hərbi hissədə motoatıcı alayında komandir vəzifəsində işləyib. İşlədiyi müddətdə komandanlıq tərəfindən təşəkkür alıb.
2011-ci il dekabrın 6-da vəzifə borcunu yerinə yetirərkən başından ağır yaralanıb. Bakıdakı hərbi hospitala aparılsa da, dekabrın 20-də xəstəxanada şəhid olub. Tərtər şəhər qəbiristanlığında dəfn olunub. Daha ətraflı »

Akif Lalayev I Qarabağ müharibəsi qazisi, şəhid atasıdır. Respublika Günü münasibətilə onunla görüşüb söhbət etdik. Şəhid atası dedi:

–Şərqdə ilk demokratik respublika 28 may 1918-ci ildə qurulub. Bu, bizim milli bayramımız, hamımız üçün əziz gündür. İlk respublikamızın ömrü cəmi 23 ay oldu. Müasir dövrdə dünyaya günəş kimi doğan Azərbaycanın ömrü isə əbədidir. Müstəqilliyimizi dönməz və əbədi edən Ulu Öndər Heydər Əliyevdir.
Bu vəzifənin yerinə yetirilməsinə Ümummilli Lider hələ Sovet imperiyasının mövcud olduğu illərdə başlamışdı. Cəmşid Naxçıvanski adına hərbi liseyin açılması, azərbaycanlı gənclərin SSRİ-nin nüfuzlu ali məktəblərinə oxumağa göndərilməsi bu istiqamətdə atılan mühüm addımlar olmuşdur.
Həmin gənclərdən biri də mənəm – Qarabağ qazisi, Vətən uğrunda gözünü qırpmadan canını qurban verən 3-cü dərəcəli “Rəşadət” ordenli şəhid Ruslan Lalayevin atası. Daha ətraflı »

Tərtər Rayon İcra Hakimiyyətində rayon icra hakimiyyətinin və FHN-nin Aran Regional Dövlət Yanğın Nəzarəti İdarəsinin birgə təşkilatçılığı ilə meşə, yaşıllıq və əkin sahələrində baş verə biləcək yanğınlara qarşı qabaqlayıcı tədbirlərin səmərəliliyinin artırılması, bu sahədə birgə əməkdaşlığın genişləndirilməsi mövzusunda tədbir keçirilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, FHN-nin Aran Regional Dövlət Yanğın Nəzarəti İdarəsinin rəisi Aqil Mustafayev, idarə, müəssisə, təşkilat rəhbərləri, inzibati ərazi dairələri üzrə nümayəndələr, bələdiyyə sədrləri və fermerlər iştirak ediblər.
Tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov biçilmiş taxıl zəmilərinin, o cümlədən həmin sahələrin yüksək gərginlikli hava elektrik ötürücü xətlərinin mühafi-zə zonalarında yerləşən hissələrinin şumlanması, habelə meşə yanğınlarına qarşı mineral zolaqların çəkilməsi, məişət və sənaye tullantılarının həmin ərazilərə atılmaması barədə əhali arasında, ilk növbədə fermerlər və torpaq mülkiyyətçiləri ilə geniş izahat işlərinin aparılmasının vacibliyini qeyd etdib, bu istiqamətdə qarşıda duran məsələlərdən danışıb. Bilərəkdən yanğın hadisəsi törədərək təbiətə və torpağın münbit qatına ziyan vuran şəxslərin müəyyən edilərək barələrində inzibati qaydada tədbirlərin görüləcəyini bildirib. Daha ətraflı »

“Yeni Tərtər” qəzetinin 90 illik yubiley tədbiri ilə bağlı qeydlər

Tərtər rayonu Zaqataladan yetəri qədər uzaqda yerləşir. Lakin bu uzaqlıq “Yeni Tərtər” qəzetinin dəvətini qəbul edib, qəzetin 90 illik yubileyində iştirakımıza əngəl ola bilməzdi. O gün həm də hava bir az yağışlı idi. Olsun, dedik, may ayının yağışı təbiətə bir az da təravət verir, gözəl Azərbaycanımızın gözəlliklərini bir daha seyr etmək imkanı qazanmış olarıq, deyərək yola çıxdıq. Nə yaxşı da etdik, bu səfər zamanı nəinki yol boyu seyr etdiyimiz gözəlliklərdən zövq aldıq, ən əsası rayon qəzetlərinin belə ağrılı vaxtında, qayğıdan uzaq düşdüyü, yaşamaq üçün son gücü və imkanları ilə mübarizə apardığı, işini tam dayandırmaq məcburiyyətini yaşadığı bir vaxtda Tərtərdə başqa bir mənzərə ilə qarşılaşdıq və bundan böyük zövq aldıq. Sən demə, Tərtərdə “Yeni Tərtər” qəzeti elə bir qayğı ilə əhatə olunub ki, buna ancaq həsəd aparmaq olar.

“Yeni Tərtər” rayon icra hakimiyyətinin təsisçiliyindən çıxıb, Media İnkişaf Agentliyindən reyestrdən keçərək müstəqil qəzet kimi fəaliyyət göstərir. Lakin burada İcra Hakimiyyəti ilə o qədər gözəl münasibətlər qurulub ki, bunu sözlə ifadə etmək çox çətindir. Hər ikisinin məqsədi, məramı birdir – Tərtərin dirçəlməsinə, çiçəklənməsinə xidmət etmək, tərtərlilərin həyatını günü-gündən yaxşılaşdırmaq. Müharibə Tərtərə o qədər ziyan vurmuşdu ki, bu dağıntının aradan qaldırılması, erməni vəhşiliyinin izlərini həm görüntü olaraq, həm də mənən təmizləmək üçün Tərtərdə bü-tün qurumların vahid işbirliyi təmin edilmişdi. Bu birlikdə mətbuat işçiləri ilə əlaqə, onların işləməsi üçün şəraitin yaradılması da əsas fəaliyyət istiqamətlərindən biri kimi götürülmüşdü. “Yeni Tərtər” qəzeti mütəmadi olaraq ayda 3 dəfə çıxır, qəzetin saytı demək olar ki, hər gün yenilənir. Bütün bunları görmək tədbirdə iştirak edən rayon qəzetlərinin redaktorları üçün həqiqətən çox xoş idi. Daha ətraflı »

Biz doğma evimizdəyik!

Üçüncü aydır ki, Laçın şəhərində, doğma evimizdə yaşayırıq. Erməni cəlladları malımızı, əşyalarımızı talan edib aparmışlar, ancaq evimiz, pis vəziyyətdə olsa da, dururdu.
Prezident İlham Əliyevin qayğısı sayəsində dövlətimiz onu əvvəlkindən də yaxşı təmir edib. İndi burada rahat şəraitdə yaşayırıq. İşlə də təmin olunmuşam. Bərbər işləyirəm.
Mayın 18-də Laçının işğalının ildönümü idi. Artıq biz bu tarixi göz yaşları ilə deyil, sevinc hissi ilə qeyd edirik.
Doğma Laçınımızın havası, suyu, dağları məcburi didərginlik həyatının ağrı-acılarını azaltsa da, başımıza gələn müsübətləri heç zaman unutmayacağıq. Belə ki, anam bu günləri görmədən dünyasını dəyişdi və 44 günlük Vətən müharibəsində erməni faşistləri Bərdə şəhərini raket atəşinə tutduqları zaman, həyat yoldaşım Kəmalə də orada olmuş və ciddi zədələr almışdı. İndi gözdən əlildir.
Detirlər, doğma evin divarları da məlhəmdir. Bu, həqiqətən də belədir. Biz uzun illər Tərtər rayonunda kirayələrdə yaşamışdıq. Sonralar Şıxarx qəsəbəsində qaçqın və köçkünlər üçün tikilmiş qəsəbədə bizə ev vermişdilər. Ancaq heç yerdə özümüzü doğma evimizdəki kimi rahat hiss etməmişik. Daha ətraflı »

Vətənim Azərbaycandır!

Azərbaycan qədim dövlətçilik ənənələrinə malik ölkələrdən biridir. 1918-ci ildə Şərqdə ilk demokratik, hüquqi və dünyəvi dövlət yarandı.
Bu dövlət xarici siyasətdə uğurlu addımlar atdı. Lakin cəmi 23 ay yaşadı və süquta uğradı. 1991-ci ildə yenidən öz dövlətçiliyimizi bərpa etdik.
Artıq biz müstəqil dövlətin azad vətəndaşlarıyıq. Bizim ölkəmizdə uşaqların təhsil hüququ, istirahət hüququ, sağlamlıq hüququ var. Azərbaycan Respublikası Konstitusiyasının 42-ci maddəsi təhsil hüququna aiddir.
Biz xoşbəxt uşaqlarıq ki, vətənimiz Azərbaycandır.
Ali Baş Komandanın “Dəmir yumruq” siyasəti sayəsində müzəffər Ordumuz 30 il işğalda olan torpaqlarımızı azad etdi. İndi keçmiş məcburi köçkünlər öz yurdlarına qayıdırlar. Xalq şairi Süleyman Rüstəm öz şeirində qeyd edir:
Ey Vətən, torpağın əzizdir mənə,
Mən səndə tapmışam səadətimi.
Bəli, bu torpaq, bu vətən bizə çox əzizdir. Əbədi müstəqilliyin mübarək, Azərbaycanım!

Məhəmməd KƏRİMLİ,
Aslan Kərimov adına şəhər
3 saylı məktəbin şagirdi

Böyük problemlərin həlli kiçik məsələlərə münasibətdən başlayır

Ölkəmiz mötəbər beynəlxalq məclisə – COP29-un keçirilməsinə hazırlaşır. Dünyanın müxtəlif yerlərindən bu tədbirdə iştirak edəcək insanlar iqlim dəyişikliyi ilə əlaqədar planetimizi gözləyən problemləri müzakirə edəcək, çıxış yolları müəyyənləşdirəcəklər.
Əlbəttə, hər bir böyük problemin həlli kiçik məsələlərdən başlayır. O cümlədən də planetimizin yaşıl örtüyünün qorunması, havanın çirklənməsinin qarşısının alınması indi hər birimizi düşündürən məsələdir.
Bu məqsədlə kəndimizdə ağacların sayını artırmağa çalışırıq. Yaz mövsümündə kəndarası yolların kənarında, məktəblərin və idarələrin həyətlərində xeyli dekorativ ağac əkmişik. Həmçinin kəndin ərazisində təmizliyin qorunmasını unutmuruq. Yerli bələdiyə bu işi iməcilik yolu ilə sakinlərin iştirakı ilə aparır.
Yaşadığımız planet, ölkə, şəhər və kənd bizim evimizdir. Hər kəs bunu anlasa, yəqin ki, ümumi işimizin xeyrinə olar.

Nazim Xəlilov,
Azadqaraqoyunlu kənd İƏD
üzrə icra nümayəndəsi

2024-cü ilin yanvar-mart aylarında Tərtər rayonunda 66 milyon 951.4 min manat həcmində və ya 2023-cü ilin müvafiq dövrünə nisbətən 15.9 faiz çox ümumi məhsul istehsal edilmiş və xidmətlər göstərilmiş. Ümumi məhsul buraxılışının həcmində istehsal sahələrinin xüsusi çəkisi 72.3 faiz, xidmət sahələrinin xüsusi çəki-si 27.7 faiz təşkil edir.
İstehsal edilmiş ümumi məhsul və göstərilmiş xidmətlərin həcmi sənayedə 7 milyon 941.9 min manat (11.9 faiz), kənd təsərrüfatı, meşə təsərrüfatı və balıqçılıqda 12 milyon 52.5 min manat (18.0 faiz), tikintidə 28 milyon 378.9 min manat (42.4 faiz), nəqliyyat və anbar təsərrüfatında 496.8 min manat (0.7 faiz), informasiya və rabitədə 205.8 min manat (0.3 faiz), ticarət, nəqliyyat vasitələrinin təmiri sahəsində 17 milyon 875.5 min manat (26.7 faiz) təşkil etmişdir.
Ümumi məhsul buraxılışı sənayedə 16.9 faiz, kənd təsərrüfatında 6.2 faiz, tikintidə 37.3 faiz artmışdır.

Tərtər Rayon Statistika İdarəsi