| BU QURBAN OLDUĞUM VƏTƏN
Düşməndən dərs yükü alıb, Dərdinə daldığım Vətən… Qarabağda “iki” alıb, Sinifdə qaldığım Vətən.
Oğul-oğul çiçəkləndi, Şəhid-şəhid ləçəkləndi, Xocalıda çilikləndi Əlimdən saldığım Vətən…
Gedir, yad əldə can gedir, Can-can Azərbaycan gedir. Gör kimlərə qurban gedir Bu qurban olduğum Vətən!.. |
MƏNLİK DEYİL
Bu səngər haqq səngəridi, Zəhmində çox cəng əridi. Ləngərim söz ləngəridi, Yüngül hava mənlik deyil.
Öz göyüm var, öz mələyim, Öz xəttim var, öz lələyim. Öz məzarım, öz bələyim, Haram yuva mənlik deyil.
Davam nə can davasıdı, Nə də yorğan davasıdı. Azərbaycan davasıdı, Ayrı dava mənlik deyil.
Ramiz QUSARÇAYLI
|
BAĞIŞLA MƏNİ
Xeyli vaxtdır soruşmuram halını, Günahkar bəndəyəm, bağışla məni, Nə desən haqqın var, amma ki, qardaş, Sənsiz pis gündəyəm, bağışla məni.
Gəl, ay qardaş gəl yenidən barışaq, Bu dünyada bir yanaq, bir alışaq. Ömrün payızında nədən danışaq? Dumanda, çəndəyəm, bağışla məni.
Necə unudaq biz olub-keçəni? Büküb ürəyimə saxlaram səni. Yəqin unutmazsan sən də Mirzəni, Mən axı səndəyəm, bağışla məni.
Mirzə MƏMMƏDOV |
-
31MayƏdəbiyyat üçün şərhlər bağlıdır
-
31MayƏdəbiyyat üçün şərhlər bağlıdır
DÜNYA BİR BAZARDIR Dünya bir bazardır-köhnə bir bazar,
Alınıb-satılır adamlar burda.
Ya xeyirxah olsun, ya mərdimazar,
Hər cürə qiymətə adam var burda.
Çəkir ömürləri mizan-tərəzi,
Duzun duz, kəmin kəm hesabı gedir.
Süzgəcdən süzürlər hər birimizi,
Ayrıca haqq-hesab kitabı gedir.
Elə adam var ki, çıxdaşdır daha-
Piştaxta küncünə atılıb qalar,
Adamlar görmüşəm qızıldan baha,
Dəstəsi on qəpik olanlar da var.
Hər kəs qiymətini özü yazıbdır
Qiymət kağızına öz əlləriylə.
Kim nə dəyərdədir, nə qazanıbdır
Ölçülür-biçilir əməlləriylə.
Taparsan burada kimi dilərsən,
Bazar öz nırxını dəyişməz qəti,
Bu dünya bazardır, özün bilərsən,
Ya cəhənnəmi al, ya da cənnəti.
Tofiq YUSİF
BUYMUŞAM Məni əfəl görüb qına,
Buymuşam, fələk, buymuşam.
Bu daşı bu caynağımla
Oymuşam, fələk, oymuşam.
Qar ələndi, yol islandı,
Hardan olum istiqanlı?
Ürəyimi qanlı-qanlı
Soymuşam, fələk, soymuşam.
Gözüm o dağın yalında,
Gah sağında, gah solunda.
Bu canı haqqın yolunda
Qoymuşam, fələk, qoymuşam.
Mən düşdüyüm nə işiydi?
Yerim, yurdum dəyişikdi.
Bircə ölümüm əskikdi,
Doymuşam, fələk, doymuşam.
Nağıla düşdüm, nağıla,
Çətin bu yaram sağala.
Zirəddin kimi oğula
Qıymışam, fələk, qıymışam.
Zirəddin QAFARLI
DAŞ ÇIXARDIRAM Altmışımda gəlib ağıl üstümə,
Damağım yarılıb, diş çıxardıram.
Gün doğub təzədən mağıl üstümə,
Çilləm yol üstədi, qış çıxardıram.
Dodağım çatdıyır, dilim qabarır,
Sahilləri yuyur, selim qabarır,
Mən şeir yazanda əlim qabarır
Qayanı çapıram, daş çıxardıram.
Hərdən qızdırması, dondurması var,
Bəxtin olanımı sovurması var.
Kişmişi yerində, qovurması var,
Süfrəmə layiqli aş çıxardıram.
Gəldim, bu dünyanın dərdim dərdini,
Dərdim, ürəyimə verdim dərdini.
Dərdimnən ziyada gördüm dərdini,
Qəlbim qan ağlayır, yaş çıxardıram.
Bu qədər qəzəbin, kinin içində,
Bizim kara gəlməz minin içində.
Bu qədər şeytanın, cinin içində
Əlövsət, mənəm ki, baş çıxardıram
Əlövsət SALDAŞ
-
31MayƏdəbiyyat üçün şərhlər bağlıdır
DAHA HEÇ BİR KƏSƏ İNANMIRAM MƏN Səmti bəlli deyil əsən küləyin,
İblislər cildinə girir mələyin.
Tərsinə fırlanır çərxi fələyin,
Zaman da zövq alır fitnədən, feldən,
Daha heç bir kəsə inanmıram mən.
Göz yaşı da saxta, gülüş də saxta,
Gediş də saxtadı, gəliş də saxta.
Almaz da, qızıl da, gümüş də saxta
Necə ayırasan qızılı misdən,
Daha heç bir kəsə inanmıram mən.
Qardaş qardaşının üzünə durur,
Dost dediyin səni arxadan vurur,
Haqsızlar haqlıya məhkəmə qurur.
Kimə inanasan, kimə görəsən?
Daha heç bir kəsə inanmıram mən.
Qılınclar korşalıb qalır pasında,
Dəyişib adəti toyun, yasın da.
Gədalar allahlıq iddiasında,
İzahat istəyir qarışqa fildən,
Daha heç bir kəsə inanmıram mən.
Ülvi sevgi hanı, məhəbbət hanı?
Məhəbbət yolunda dəyanət hanı?
Düz ilqar, etibar, sədaqət hanı?
Aldanır sevilən, aldadır sevən,
Daha heç bir kəsə inanmıram mən.
Yalanlar dördnala çapır atını, Kəsir həqiqətin yeddi qatını.
Əsli nadürüstlər danır zatını,
Bədxahlıq səpilir torpağa dən-dən,
Daha heç bir kəsə inanmıram mən.
Qədir TƏRTƏRLİ
EHTİYAC
Təbiət dincəlib, torpaq yatanda
Göylərə əl açar qar ehtiyacı.
Təzədən bahara növbə çatanda
Oyadar bağları bar ehtiyacı.
Bu qayda, bu nizam gəlməzmi xoşa
Dağ-dağla yanaşı, gül-güllə qoşa.
Tək nəğmə insanı gətirməz coşa,
Duyular kamanla tar ehtiyacı
Ömür tez talanar tək yaşamaqdan,
Fikirdə, xəyalda baş qaşımaqdan.
Təklik ağır olar daş daşımaqdan,
Hər ömrün həmdəmə var ehtiyacı.
Bəşər çox keçinib qara çörəklə,
Demirəm çəkilək dara çörəklə.
Yaşamaq mümkündür para çörəklə,
Böyük eytiyacdır yar ehtiyacı.
Talıb MƏMMƏDLİ
-
31MayƏdəbiyyat TƏQDİM EDİRİK üçün şərhlər bağlıdır
Sadiq Tağızadə 1992-ci ildə Tərtərdə anadan olub. Şəhər 6 saylı tam orta məktəbini bitirib. Hazırda rayonumuzdakı qaz istismarı idarəsində nəzarətçi-çilingər işləyir.
Sadiq hələ məktəb illərindən poeziyaya maraq göstərib. Elə ilk şeirlərini də o zamanlar yazıb. Onun “Çinar” adlı şeiri bizim “Yeni Tərtər” qəzetində çap olunub.
Sadiq Tağızadənin yaradıcılığından daha bir nümunəni oxucularımıza təqdim edirik.KİTABLAR Bəzən otağımda darıxıram mən,
Fikrim kitabların yanında qalır.
Tənhalıq könlümü sıxan zamanlar
Hər kitab maraqlı bir adam olur.
Biri var, anama oxşayır sanki,
Şirin laylasıyla yatırır məni.
Biri işıq saçır xəyal dünyama,
Arzuya, diləyə çatdırır məni.
Vətən sevgisini, vətən eşqini Öyrətdi bu qalın kitablar mənə.
Hər kitab bir Dədə Qorqud timsalı,
Hər sətrin öyüdü, sözü var mənə.
Dünyaya kitabla yol salarsınız,
Su kimi həmişə olar gərəyin.
Nə zaman həyatda tək qalarsınız.
Yalnız kitablarla dostluq eləyin.
Sadiq TAĞIZADƏ
-
20MayDigər HEYDƏR ƏLİYEV-96 üçün şərhlər bağlıdır
XALQIN XİLASKARI
Azərbaycan xalqı tanınmış siyasətçi, dövlət xadimi ümummilli lider Heydər Əliyevə inanırdı və onunla fəxr edirdi. O, həyatı boyu vətəni və xalqı üçün çalışıb. Hakimiyyətə gəldiyi ilk gündən xalqın xoşbəxtliyi üçün bütün enerjisini, gücünü əsirgəmədi. Dövləti idarə etməyə Milli Orduda qayda-qanun yaratmaqdan, onu möhkəmləndirməkdən başladı. Azərbaycana yenidən prezidentliyə qayıdışı ilə xalqımızın həyatında qurtuluş baş verdi. Onun gəlişi ilə ölkəmizin daxili və xarici düşmənlərinin oxu daşa dəydi, arzuları gözlərində qaldı. Respublikamız məhv olmasından xilas edilərək, müstəqilliyimiz qorunub saxlanıldı.
Ulu öndərin müdrik siyasəti nəticəsində cəbhədə atəşkəs yarandı. Onun əməyi nəticəsində bizim haqq, ədalət və sülh tərəfdarı olduğumuz dünya ölkələrinə bəyan oldu. Qaçqınların xüsusi qayğı ilə əhatə olunması, Ermənistan tərəfindən zəbt olunan torpaqların qaytarılması, Azərbaycanın ərazi bütövlüyünün təmin edilməsi üçün var qüvvəsi ilə çalışdı. Daha ətraflı » -
20MayTərtər RİH-də TƏRTƏRDƏ ULU ÖNDƏR HEYDƏR ƏLİYEVİN ƏZİZ XATİRƏSİ YAD EDİLİB üçün şərhlər bağlıdır
Xalqımızın ümummilli lideri Heydər Əliyevin anadan olmasının 96-ci ildönümü Tərtər rayonunda təntənə ilə qeyd olunub.
Minlərlə tərtərli rayonun mərkəzi meydanında ulu öndərin xatirəsinə ucaldılmış abidə kompleksini ziyarət edərək, önünə tər gül-çiçək dəstələri düzüb, dahi rəhbərə öz hörmət və ehtıramını, ümümxalq məhəbbətini nümayiş etdiriblər.
Əvvəlcə meydana toplaşan insan izdihamı ilə birlikdə rayon icra hakimiyyətinin başçısı Müstəqim Məmmədov ümummilli lider Heydər Əliyevin abidəsini ziyarət edib, önünə tər gül dəstələri qoydu.
Sonra tədbir iştirakçıları meydanda rayon məktəblilərinin hazırladığı ulu öndərə həsr olunmuş rəsm, əl işləri və kitab sərgisinə baxdılar.“Yeni Tərtər”
-
20MayXəbərlər “DƏYİRMİ MASA” üçün şərhlər bağlıdır
Heydər Əliyev Mərkəzində keçirilən tədbirdə əvvəlcə iştirakçılar ulu öndərin büstü önünə gül-çiçək dəstələri qoydular, sonra dahi şəxsiyyətin həyat və fəaliyyətini əks etdirən eksponatlarla tanış oldular.
Tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov bildirdi ki, böyük siyasi xadim Heydər Əliyev Azərbaycan tarixinə Qurtuluş mübarizəsinin qalibi kimi daxil olub. Dünyanın tanınmış şəxsiyyətləri arasında xüsusi yeri olan, xalqını böyük xalqların, dövlətini böyük dövlətlərin cərgəsinə çıxaran Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb. Azərbaycanın dövlətçilik tarixində ən şanlı və parlaq səhifələr ulu öndər Heydər Əliyevin respublikamıza rəhbərlik etdiyi illərə təsadüf edir. İqtisadiyyatın yenidən qurulması, kənd təsərrüfatının dirçəlişi, peşəkar ordunun yaranması, təhsil, səhiyyə, mədəniyyət, incəsənət sahələrinin tərəqqisi, hüquqi dövlət quruculuğu onun adı ilə bağlıdır. Daha ətraflı » -
20MayXəbərlər SİLİNMƏZ İZLƏR üçün şərhlər bağlıdır
Tərtər Rayon İcra Hakimiyyətinin ümummilli lider Heydər Əliyevin anadan olmasının 96-cı ildönümü münasibəti ilə hazırlanmış tədbirlər planına uyğun olaraq YAP rayon təşkilatının iclas zalında rayon icra hakimiyyətinin və YAP rayon təşkilatının birgə təşkilatçılığı ilə “Heydər Əliyev müasir Azərbaycanın qurucusu və memarıdır” mövzusunda tədbir keçirildi.
Tədbiri giriş sözü ilə açan Tərtər Rayon İcra Hakimiyyəti başçısının birinci müavini, YAP rayon təşkilatının sədri Ramiz Şabanov ümummilli lider Heydər Əliyevin Azərbaycana rəhbərlik etdiyi bütün dönəmlərdə Azərbaycan gəncliyinin firavan həyatı, təhsili, sağlamlığı, vətənpərvər ruhda böyümələri üçün daim qayğı göstərməsindən danışdı və bu gün ölkəmizdə möhtərəm Prezident İlham Əliyevin ulu öndərin gənclər siyasətini davamlı olaraq həyata keçirdiyini qeyd etdi.
Məruzədə göstərildi ki, ulu öndərin istər birinci, istərsə də ikinci dönəmlərdə ölkəmizə rəhbərliyi dövründə həmişə gənclərin problemləri və onların həlli onun işinin əsas qayələrindən biri olub. Bildirildi ki, Heydər Əliyev müstəqillik dövründə də Azərbaycanın gələcəyinin gənclərə məxsus olmasını daim söyləyirdi. Bu gün gənclərimiz ümummilli lider, müasir Azərbaycan dövlətinin yaradıcısı Heydər Əliyevin bizlərə miras qoyduğu müstəqil Azərbaycan dövlətinin daha da inkişaf etdirilməsi, qüdrətlənməsi, müstəqilliyimizin əbədiliyinin təmin olunması üçün ölkə başçımız İlham Əliyevin işləyib hazırladığı daxili və xarici siyasətin müvəffəqiyyətlə həyata keçirilməsinə öz töhfələrini lazımi səviyyədə verməyə çalışırlar. Daha ətraflı » -
20MayXəbərlər KONSERT PROQRAMI üçün şərhlər bağlıdır
Tərtər Rayon İcra Hakimiyyətinin təşkilatçılığı ilə ümummilli lider Heydər Əliyevin anadan olmasının 96-cı ildönümünə həsr olunan konsert oldu. Ulu öndərin adını daşıyan parkda təşkil olunan konserti Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının, idarə, müəssisələrin rəhbərləri və minlərlə rayon sakini izlədi.
Respublikanın xalq artisti Şahnaz Haşımovanın və oğlu, əməkdar artist Tural Abdullayevin, Tərtər Rayon Mədəniyyət Mərkəzinin özfəaliyyət kollektivinin, uşaq-gənclər inkişaf mərkəzinin yetirmələrinin iştirakı ilə keçirilən konsert rayon sakinlərində xoş təəssürat yaratdı.
Ümummilli lider Heydər Əliyevin anadan olmasının 96-cı ildönümünə həsr olunan konsert proqramı möhtəşəm atəşfəşanlıqla başa çatdı.“Yeni Tərtər”
-
20MayTərtər RİH-də 2019-cu İLİN BİRİNCİ RÜBÜNÜN YEKUNLARINA HƏSR OLUNMUŞ HESABAT YIĞINCAĞI üçün şərhlər bağlıdır
Tərtər rayonunda 2019-cu ilin birinci rübünün yekunlarına və qarşıda duran vəzifələrə həsr olunmuş hesabat yığıncağı keçirilib.
Yığıncaqda hesabat məruzəsi ilə çıxış edən Tərtər Rayon İcra Hakimiyyətinin başçısı Müstəqim Məmmədov bildirib ki, ilin üç ayında rayonun sosial-iqtisadi inkişafının sürətləndirilməsi, iqtisadiyyatın daha da möhkəmləndirilməsi, infrastrukturun inkişaf etdirilməsi, sahibkarlığın dəstəklənməsi, əhalinin sosial-iqtisadi problemlərinin həlli, tikinti-quruculuq işləri və yaşayış məntəqələrinin abadlaşdırılması sahəsində tədbirlər uğurla davam etdirilib.
Dövr ərzində “Azərxalça”-nın Tərtər filialının tikintisi başa çatdırılıb, “Tərtər-Hindarx” avtomobil yolunun rayon ərazisindən keçən 19 kilometr hissəsində əsaslı təmir işləri aparılıb. Tərtər şəhərinin Mehdi Hüseynzadə küçəsində 0,5 kilometr, Vəzir Orucov küçəsində 0,3 kilometr asfalt örtük salınıb. Ekoloji tarazlığın qorunması məqsədilə 9 mindən çox müxtəlif növ ağac, 2 min ədəd gül, 500 min ədəd həmişəyaşıl kollar əkilib. Kovdadıq və Zolgəran kəndlərində “Modul” tipli məktəb binalarının quraşdırılması başa çatmaq üzrədir. Hazırda rayon icra hakimiyyətinin inzibati binasının, Bayraq muzeyinin, Olimpiya İdman Kompleksinin tikintisi, “Sarov-Borsunlu” kəndlərarası və Hacıqərvənd kəndarası avtomobil yollarının əsaslı təmiri davam etdirilir.
2019-cu ilin birinci rübündə 3 milyon 257,1 min manatlıq tikinti-quraşdırma işləri aparılıb, 780,6 min manat dəyərində əsas fondlar istifadəyə verilib.
Ümumi məhsul buraxılışının həcmi keçən illə müqayisədə 0,6 fazi artaraq, 28,7 milyon manat olub. Keçən ilin müvafiq dövrünə nisbətən kənd təsərrüfatı məhsulunun həcmi 1,1 faiz, sənaye məhsulunun həcmi 5,8 faiz, informasiya və rabitə xidmətlərinin həcmi 13.7 faiz, nəqliyyat xidmətlərinin həcmi 8,6 faiz, nəqliyyat sektorunda yükdaşımaların həcmi 2,2 faiz, sərnişin daşımalarının həcmi 1,6 faiz, pərakəndə ticarət dövriyyəsinin həcmi 1,2 faiz, iaşə dövriyyəsinin həcmi 1 faiz, əhaliyə göstərilən ödənişli xidmətlərin həcmi 1,6 faiz artıb.
Bütün maliyyə mənbələri hesabına əsas kapitala 3 milyon 612,7 min manat investisiya yönəldilib. 278-i daimi olmaqla, 728 yeni iş yeri açılıb. Daha ətraflı »
Yeni ismarıclar