Dövlət Qaçqınkomun Tərtər rayonu üzrə baş məsləhətçisi Möhlət Nəzərovun verdiyi məlumata görə, hal-hazırda rayonumuzda Laçından olan 416 ailə, 1570 nəfər məskunlaşıb. Bunlardan 5 ailə, 20 nəfər Zabuxdan, 24 ailə, 78 nəfər Laçın şəhərinin özündəndir.

Növbəti ad gününü Zabuxda qeyd edəcəklər

Zabuxdan olan Əlövsət Əliyevin ailəsindəyik. Laçından didərgin düşəndən sonra onlar çox ünvan dəyişiblər. Əvvəl Cəbrayılda, sonra Bakıda, rayonumuzun Çaylı kəndində məskunlaşıblar. Nəhayət, yaşamaq üçün Evoğlu kəndini seçiblər. Bu kənddə xoş münasibət görüblər, dolanışıqları da pis olmayıb. Ancaq uzun illər ərzində heç vaxt buranı daimi yaşayış yeri hesab etməyiblər. Fikirləri, arzuları daim qoyub gəldikləri yerlərdə olub.
Bu barədə bizə ailənin ağsaqqalı Əlövsət kişi danışdı.
Dağ kimi vüqarlı, həyatın bütün çətinliklərinə səbrlə dözən, böyük bir ailənin qayğısını çəkən Əlövsət kişi Zabuxdan danışanda, göz yaşlarını saxlaya bilmədi. Ayağa qalxıb, bir az aralaşdı. Sonra yenidən qayıdıb, söhbətini davam etdirdi:
– Zabuxdan çıxanda 35 yaşım vardı. Üç övlad atasıydım. Özümüzə təzə ev tikdirmişdik. Gələndə, ata-anamla gəlmişdik.Yaşlı adamlara yurd həsrətinə dözmək daha çətindir. Onlar da dözə bilmədilər. Vətəni görməyib dünyalarını dəyişdilər. Bərdə rayonunda dəfn eləmişik. Daha ətraflı »

İlkin Paşayev Laçının Zabux kəndindən gənc yaşlarından çıxıb. Deyir ki, atasının məzarı Laçındadır, anasını isə Bakıda dəfn ediblər. Dövlətimiz tərəfindən qayğı görsələr də, 30 ildə yurd nisgili onlara rahatlıq vermirdi.
– Sevincimizin həddi-hüdudu yoxdur, – deyir İlkin Paşayev. – Sağ olsun cənab İlham Əliyevi, bizə bu günləri görmək nəsib oldu. Kəndimizdən 30 il əvvəl çıxsam da, gözü bağlı gedib öz evimizin yerini taparam.
O, Tərtərdə ailə qurub. Həyat yoldaşı Laləzar rayonumuzun Evoğlu kəndindəndir. 4 övladları var, 3 oğlan, 1 qız.
İlkin Paşayev deyir ki, Zabuxa böyük ailəsi ilə, baba kimi qayıdacaq. Övladlarına, nəvələrinə doğma yurdun gözəlliklərini göstərməyə çox tələsir.
Sağlıq olsun, artıq həmin gün uzaqda deyil.

Laçın şəhərinin ermənilərdən təmizlənməsi təkcə laçınlıları deyil, bütün Azərbaycan xalqını ürəkdən sevindirdi. Möhtərəm Prezidentimiz İlham Əliyevin bu münasibətlə xalqımızı təbrik etməsi hər bir ailədə toy-bayram kimi qarşılandı.
Belə ailələrdən biri də Laçın şəhərinin sakini Ayaz Həsənovun ailəsidir. Onlar Laçından çıxanda iki körpə uşaqları vardı. Biri 8 aylığında, biri iki yaşında. Ev tikdirib payızda köçmüşdülər. Evin xanımı yeni ocaqlarını minbir həvəslə, zövqlə bəzəmişdi. Ayaz müəllim özü Şuşada Kənd Təsərrüfatı texnikumunu bitirmişdi, yaxşı iş-gücü vardı. Həyat yoldaşı Gülgəz xanım isə xalçaçılıq sexində işləyirdi, toxuduğu xalçalar təkcə laçınlıları deyil, Bakıdan gələn qonaqları da heyran edirdi.
Payızda evlərinə köçmüşdülər, yazda illərlə halal zəhmətlərilə qurub-yaratdıqları hər şeyi qoyub, hərəsi uşağın birini qucağına alıb, qapıdan çıxdılar.
Düz 30 il gözləri yolda, qulaqları səsdə qaldı. Nəhayət, bu il avqust ayının 26-da yuxuları çin oldu, Vətənə qayıdacaqları barədə xəbəri eşitdilər. Daha ətraflı »

Sentyabrda doğulan tərtərli
Vətən müharibəsi şəhidləri

Məmmədli Sənan Səlim oğlu

Sənan Məmmədli 1997-ci il sentyabr ayının 4-də Tərtər rayonunun Qaradağlı kəndində anadan olub.
Vətən müharibəsi zamanı Füzulinin azadlığı uğrunda gedən döyüşlərdə savaşıb. Sənan Məmmədli oktyabrın 19-da Füzuli döyüşləri zamanı şəhid olub. Tərtər rayonunun Qaradağlı kəndində dəfn olunub.
Azərbaycan Respublikasının Prezidenti İlham Əliyevin Sərəncamına əsasən Məmmədli Sənan ölümündən sonra 3-cü dərəcəli “Vətənə xidmətə görə” ordeni, “Vətən uğrunda” və “Xocavəndin azad olunmasına görə” medalları ilə təltif edilib.

Qənbərli Qənbər Bəhruz oğlu

Qənbər Qənbərli 1993-cü il sentyabrın 10-da Tərtər rayonunun Kəngərli kəndində anadan olub.
Vətən müharibəsi zamanı Murovdağ istiqamətində gedən döyüşlərdə savaşıb. Qənbər Qənbərli sentyabrın 27-də Murovdağ döyüşləri zamanı şəhid olub. Uzun müddət nəşi tapıla bilməyib. 22 may 2021-ci ildə nəşi tapılıb və ailəsinə təhvil verilib. Tərtər rayonunun Kəngərli kəndində dəfn olunub.
Azərbaycan Respublikasının Prezidenti İlham Əliyevin Sərəncamına əsasən Qənbər Qənbərli ölümündən sonra 3-cü dərəcəli “Rəşadət” ordeni, “Vətən uğrunda” medalı ilə təltif edilib. Daha ətraflı »

Zirehli tank xidmətinin rəisi

İlkin Abbasov 44 günlük Vətən müharibəsinin ilk günündən Qələbə gününədək cəbhədə döyüşən müəllimlərimizdəndir. O, Köçərli kənd tam orta məktəbində riyaziyyat və informatika fənlərini tədris edir.
Bu günlərdə İlkin müəllimi redaksiyamıza dəvət etdik. O, hər günü tariximizə qızıl hərflərlə yazılan müharibə barədə söhbət etdi.
İlk növbədə bildirdi ki, müharibəni heç kim istəməsə də, həmyaşıdları, eləcə də o özü bu savaşın başlamasını ruh yüksəkliyi ilə qarşılamışdı. Çünki 30 ildən artıq bir müddətdə erməni qonşularımızdan daimi olaraq zərbələr alınmışdı.
Odur ki, Ali Baş Komandan, Azərbaycan Respublikasının Prezidenti İlham Əliyevin çağırışı ilə bütün xalq “dəmir yumruq” ətrafında birləşərək, düşmənlə mübarizəyə atıldı.
İlkin müəllim deyir: Daha ətraflı »

SƏHNƏMİZİN BALACA NURU

Nur Babayeva hələ balacadır. Cəmi 6 yaşı var. 5 saylı uşaq bağçasının yetirməsidir. Bu ildən isə artıq məktəbə qədəm qoyacaq, digər uşaqlar kimi parta arxasında əyləşərək, elmin sirlərinə yiyələnəcək.
Bəs, Nuru digər uşaqlardan fərqləndirən nədir? Bu sualla biz 5 saylı uşaq bağçasının musiqi müəllimi Nəzrin Fərəcovaya müraciət etdik. Nəzrin müəllim dedi:
– Nur bağçamıza körpə vaxtlarından gəlir. Elə ilk günlərdən də biz onun çox istedadlı uşaq olduğunu görüb, ciddi məşğul olmağa başladıq.
Az bir müddətdə Nur bir çox mahnı və rəqs öyrəndi, əvvəlcə elə bağçada keçirilən tədbirlərdə çıxış etməyə başladı. Həm uşaqlar, həm də böyüklər tərəfindən sevildi. Bundan sonra rayon tədbirlərində bir-birindən uğurlu çıxışları ilə tamaşaçıları valeh etdi. Hansı səhnə olursa-olsun, Nur burada özünü sərbəst aparır, eyni zamanda oxuyur və rəqs edir. Səhnədə onu uşaq bağçasının digər balaca fidanları müşayiət edirlər. Daha ətraflı »

Jurnalistikaya aparan yol

İş yoldaşımız Ülviyyə xanımı qızı Səbinənin Naxçıvan Dövlət Universitetinə jurnalistika ixtisası üzrə daxil olması münasibəti ilə ürəkdən təbrik edirik!
Xeyli vaxt idi ki, onun yaşadığı həyəcana biz də şərik olurduq. Nəhayət, cavablar açıqlandı və hamımız rahat nəfəs aldıq. Səbinə öz arzusuna qovuşdu, ana ürəyi isə rahatlıq tapdı. Bu sevincdən hər birimizə pay düşdü.
Qeyd etmək istəyirəm ki, Səbinə vaxtilə Tərtərdə rayon qəzeti redaksiyası mətbəəsinin əsasını qoyan Mirməhəmməd Babayevin nəticəsidir. Babası, rəhmətlik Akif Hüseynov da iş yoldaşımız olub, mətbəənin linotipçisi idi.
Ona görə təsadüfi deyil ki, tələbə qızımızı jurnalistikaya aparan yol elə bizim rayon qəzetindən başlayıb, ilk məqaləsi “Yeni Tərtər”in səhifələrində çap olunub.
Səbinə atasını itirəndə V sinif şagirdiydi. Bu gün tələbə kimi onun məzarını ziyarət edib, verdiyi vədi yerinə yetirdiyini söylədi.
Əminik ki, gələcəkdə o, gözəl bir jurnalist kimi xalqımıza xidmət edəcək.

Svetlana Bağırova

ƏZİLƏN VƏ SEVİLƏN ŞAİR

Diqqət eylə, yaxşı tanı, gör necə bəşər mənəm,
Ələsgərdən dərs almışam, sinəsi dəftər mənəm.

Borsunlu Məzahir Daşqın yaradıcılığı ilə yaxından tanış olan hər bir kəs şairi bu iddiada haqlı sayır.
Mükəmməl şeir sənətkarı olan şair rəvan təbiylə, inci tək düzdüyü misraların sığalıyla, hər mövzuya uyğun ifadə seçimiylə, hikmətli ustad tövsiyəli deyimləriylə xalqın qəlbində silinməz xatirəyə dönüb, ruhlara hopmuşdur.
Şairin yaradıcılığı yalnız Vətən və məhəbbət şeirləriylə kifayətlənmir. Yaşadığı dövrdə baş verən hər bir hadisəni – müharibəni, kəskin repressiyaları, ədalətsiz qanunları tarixə çevirməyi özünə vətəndaşlıq borcu bilən Məzahir Daşqın şeirlərinin çoxunda gileyi, narazılığı xüsusi olaraq fələyin hökmü ilə bağlayır.
Deyim tərzindən aydın görünür ki, taleyinə məşəqqətli illər yazılan şairin gəncliyi istedadların və vətənpərvərlərin “xalq düşməni” kimi ağır ittihamla ləkələnməsini, sonralar həyatı boyunca bu təqiblərin müxtəlif variantlarla davam etdirilməsindən yorularaq zalımların, qəddarların, repressiya cəlladlarının surətini “Fələk” obrazında göstərmişdir. Daha ətraflı »

Dərs ilinin başlanmasına sayılı günlər qalıb. İndi şəhərimizin küçələrində, alış-veriş məkanlarında, fotoatelyelərdə xüsusi bir qələbəlik var. Tələbələr qəbul olduqları universitetlərə getməyə hazırlaşır, valideynlər məktəblilər üçün şagird geyimləri, dərs ləvazimatları alırlar.
Belə bir vəziyyətdə covid infeksiyasının mövcudluğunu unutmaq lazım deyil. Xüsusilə gigiyenik qaydalara ciddi əməl etmək, insanların sıx toplaşdıqları yerlərdən uzaq olmaq lazımdır. Diqqətli olmalıyıq ki, yeni dərs ili hər bir ailəyə sevinc gətirsin.

“Yeni Tərtər”

Gənclərin İnkişaf və Karyera Mərkəzinin Tərtər Nümayəndəliyinin təşkilatçılığı ilə filoloq Fəridə Süleymanovanın təqdimatında “Dilimiz sərvətimizdir” mövzusunda  təlim baş tutub.

Təlim zamanı Fəridə xanım dilimizin zənginliyi, arxaik, dialekt və şivələrin dilimizdə istifadəsi , həmçinin orfoqrafik və orfoepik qaydaların pozulması haqqında gənclərə məlumat verib.