Dünya Azərbaycanlılarının Həmrəyliyi Günü və Yeni il münasibətilə Tərtər şəhərinin mərkəzi meydanında ümumrayon bayram tədbiri keçirilib. Tədbir iştirakçıları əvvəlcə meydanda Ulu Öndərin abidəsi önünə gül dəstələri qoyaraq onun xatirəsini ehtiramla yad ediblər.
Tədbirdə çıxış edən rayon icra hakimiyyətinin başçısı Müstəqim Məmmədov tərtərliləri əlamətdar bayramlar münasibətilə təbrik edib, Ümummilli Liderimiz Heydər Əliyevin milli həmrəyliyin möhkəmləndirilməsi sahəsində əvəzsiz xidmətlərindən, 2016-cı ildə qazanılan uğurlardan, insanların rifah halının yüksəldilməsi istiqamətində həyata keçirilən tədbirlərdən danışıb. Bildirib ki, bu gün Ulu Öndərin adını daşıyan meydanda 31 dekabr–Dünya Azərbaycanlılarının Həmrəylik Günü və Yeni İl bayramını qeyd edirik. Dekabrın əvvəlində isə bu meydanda Sizinlə birgə Azərbaycan Respublikasının möhtərəm Prezidenti cənab İlham Əliyevi və xanımı Mehriban Əliyevanı qarşıladıq. Daha ətraflı »

Hörmətli tərtərlilər! Əziz bacı və qardaşlarım!
İllərin qovuşuğunda biz həmişə gördüyümüz işlərə yenidən nəzər salır, gələcəklə bağlı arzularımızı gerçəkləşdirmək üçün qüvvələrimizi səfərbər edirik. Hər ilin son gününü Dünya Azərbaycanlılarının Həmrəyliyi Günü kimi böyük bir coşqu və sevinclə qeyd edir, dünyada yaşayan 50 milyon azərbaycanlının həmrəyliyini özündə ehtiva edən mərasimlər keçiririk. Biz beynəlxalq aləmə Azərbaycanın yeni tolerantlıq və multikulturalizm modelini təqdim edirik.
Arxada qoyduğumuz 2016-cı il olduqca əhəmiyyətli, tarixi bir dövr oldu. İllər uzunu Azərbaycan xalqının gözlədiyi məqam yetişdi, Ermənistan-Azərbaycan, Dağlıq Qarabağ münaqişəsində dönüş yarandı. Aprel ayında ermənilərin törətdikləri növbəti təxribata Azərbaycan Silahlı Qüvvələrinin tutarlı cavabı onları növbəti dəfə öz havadarlarının ətəyindən yapışmağa məcbur etdi. Bəli, məhz arxada qoyduğumuz 2016-cı ildə bütün Azərbaycan xalqı ilə birlikdə tərtərlilər qələbə sevincini yaşadılar, 2000 hektardan çox erməni tapdağında olan ərazi işğaldan azad edildi, mühüm strateji yüksəklik olan Lələtəpədə Azərbaycan bayrağı dalğalandı. Daha ətraflı »

Xoruz ili, 2017-ci ilin 28 yanvar tarixində Meymun ilini əvəz edəcək. İşıq və oyanış xüsusiyyətlərini daşıyan bu il, 2017-ci ildə də orijinal və enerji ilə dolu olacaq.
Bu günə qədər düzgün və dəqiq idarə olunan layihələr ən böyük mükafatlarını məhz bu il əldə edəcəklər.
Xoruz ilində doğulan insanların xüsusiyyətləri:
Xoruz illəri: 1933 – 1945 – 1957 – 1969 – 1981 – 1993 – 2005 – 2017 – 2029…
Uğurlu rəqəmləri: 5, 7 və 8
Uğursuz rəqəmləri: 1, 3 və 9
Uğurlu rəngləri: qızılı, qəhvəyi və sarı
Uğursuz rəngləri: ağ və yaşıl
Güclü xüsusiyyətləri: Azad, istiqanlı, qabiliyyətli.
Zəif xüsusiyyətləri: Səbrsiz, həssas, gözlənilməz reaksiya, eqoist.
XARAKTERİ:Xoruz, ev heyvanlarının lideri olduğu üçün, bu ildə doğulan insanlar çox qürurlu, özündən əmin və təkəbbürlüdürlər. Şüarları sədaqətlikdir. Səmimidirlər. Hər zaman həqiqəti deyər və verdikləri sözləri tutarlar. Daim qarşılıqlı hörmət gözləyən bu ilin sahibləri mənfi cəhətlərinin ortaya çıxmasından utanar və çəkinərlər. Daha ətraflı »

Daha bir il tarixə qovuşdu. Tərtərlilər üçün bu il xüsusilə yaddaqalan oldu. Aprel ayında baş verən hadisələr bizi bir daha sınağa çəkdi. Qəhrəman Tərtərin adı planetimizin hər bir guşəsində fəxrlə səsləndi. Dünyanın sülhsevər insanları dinc əhalini artilleriya atəşinə tutan, mülki əhalinin ölümünə səbəb olan, evlərini dağıdan erməni faşistlərini növbəti dəfə pislədilər. Tərtərə ayaq basan xarici jurnalistlər hadisələrin həqiqi gedişini dünya ictimaiyyətinə olduğu kimi çatdıraraq, bu əməllərin beynəlxalq hüquq normalarına, müharibənin qayda-qanunlarına zidd olduğunu təsdiqlədilər.
2016-cı il rayonumuzun tarixinə həm də quruculuq ili kimi daxil oldu. Düşmənlə üz-üzə dayanan şəhərdə görülən işlər, tikilən binalar, abadlaşan küçələr böhran içində yaşayan Ermənistan üçün həm göz dağı, həm də vurulan zərbədir.
Tərtərlilər bütün bu işləri güclü Azərbaycan Ordusuna arxalanaraq görürlər. Ötən il ordu ilə xalqın birliyi daha da möhkəmləndi.
2016-cı ili həm də bir növ “ağ qızıllı” tarlalara qayıdış ili adlandırmaq olar. Prezident İlham Əliyevin çağırışına ürəkdən cavab verən rayon sakinləri pambıq əkini sahələrini xeyli genişləndirdilər və uzun müddətdən sonra bu sahədə ilk uğurlarını qazandılar. Bu uğurların davamlı olması isə gələcəkdə kəndlilərin daha yaxşı yaşaması deməkdir.
Qarşıdan 2017-ci il gəlir. Xalqımız Yeni ili böyük ümidlərlə, arzularla qarşılayır. Arzularınız çin olsun, əziz tərtərlilər!

“Yeni Tərtər”

Yeni İl bayramı ( Milad) böyük və qədim tarixə malik olsa da, şam ağacının bu bayramın atributu olma adət-ənənəsi orta əsrlərdə Almaniyaya təsadüf edir. Lakin bu atribut 19-cu əsrdən etibarən Rusiyada məşhurlaşmışdır ki, bundan sonra bütün dünyada şam ağacı Yeni İl bayramının atributu olaraq qəbul edilmuşdur. Onu da qeyd edək ki, Milad şam ağacı ilə Yeni İl şam ağacının bəzədilməsi və dekoru ilk əvvəl seçilsə də, daha sonra bu fərq götürülmüşdür və şam ağacı Yeni İl ilə xristian dünyasında qeyd olunan Milad bayramının atributu olaraq qəbul olunmuşdur. Şam ağacı Yeni İlin atributu olaraq dünyanı fəth etdikcə insanlar bu atributu öz adət-ənənələrinə, dəyərlərinə, həyat tərzlərinə uyğun bəzəməyə başladılar. İnsanlar, millətlər, fikirlər nə qədər müxtəlifdirsə, insanların ümidləri, gözləntiləri də bir o qədər müxtəlifdir. İnsanlar şam ağacından arzularının çin olmasını yox, bir növ bunu etməklə bu arzularının çin olacağına əmin olurlar və özlərində güvən, həyat eşqi yaradırlar ki, bundan da gözəl heç bir şey yoxdur. Əgər insanların ümidləri, gözəl arzuları varsa, deməli, dünyamızda sevgi də var, dəyər də var, həyat da var! Bayramlar insanları birləşdirir onlara paylaşmağı, sevməyi və ümid etməyi öyrədir ki, bəlkə də dünyamızın indiyədək qalmasıının səbəbi məhz həmin bayramlardır və insanlarda olan bayram əhval-ruhiyyəsidir.

Y“Vətəndən uzaqda vətənlə yaşamaq biz azərbaycanlıların ən ümdə vəzifəsidir. Dünyanın harasında oluruqsa, olaq, ən önəmli vəzifəmiz Azərbaycanın və azərbaycanlıların adına layiq yaşamaqdır”.
Bu sözləri Ümumrusiya Azərbaycanlıları Konqresinin Saxalin regional bölməsinin sədri, qubernatorun millətlərarası məsələlər üzrə məsləhətçisi, Ümumrusiya Xalqlar Assambleyasının və Veteranlar Şurasının üzvü Nazir Hətəmov məzunu olduğu Tərtər rayonunun Qapanlı kənd tam orta məktəbində onunla keçirilən görüşdə deyib.
Cari ilin noyabr ayında Moskvada keçirilən Ümumrusiya Azərbaycanlıları Konqresinin Mərkəzi Şurasının iclasında çıxış edən həmyerlimiz bu fikri bir qədər də genişləndirərək söyləyib ki, diaspor üzvlərinin hər biri nəinki Azərbaycanın adına layiq yaşamalı, həm də ölkəmizin problemlərinin, o cümlədən Ermənistan-Azərbaycan, Dağlıq Qarabağ münaqişəsinin həllinə öz köməyini göstərməlidir. Daha ətraflı »

Salam, əziz “Yeni Tərtər” qazetinin əməkdaşları.
Mən Rişad Rzayev sizə Astanadan məktub göndərirəm. Əlavə məlumat lazım olarsa, çox şad olub göndərərəm.
Salam, əziz həmvətənlilərim!
Mən Rzayev Rişad İlqar oğlu sizi Qazaxıstanın paytaxtı Astana şəhərindən salamlayır, qarşıdan gələn Yeni İl və Dünya Azərbaycanlıların Həmrəliyi Günü münasibətləriylə təbrik edirəm.
Taleh elə gətirib ki, mən 3 aprel 1992-ci ildə Qazaxıstanın Astana şəhərində doğulmuşam və Qazaxıstanın vətəndaşıyam. Qazaxıstan mənə və həmçinin hər bir vətəndaşına milliyətindən asılı olmayaraq çox gözəl imkanlar yaradır və onları hər bir sahədə dəstəkləyir. Amma buna baxmayaraq mənim qəlbim həmişə Ana Vətənim Azərbaycanım üçün döyünüb. Bəli, mənim iki Vətənim var, Azərbaycanda doğulmasam da, Azərbaycan mənim Vətənimdir və mən onunla həmişə qürur duyuram. Demək olar ki, hər il Azərbaycana gəlirəm, və orda keçirdiyim hər bir gün mənim üçün ən gözəl, yaddaqalan və sevincli günlərdir. Daha ətraflı »

BAYRAMIN MÜBARƏK, VƏTƏN OĞLU!

Tariximizin yeni ili–2017-ci il yurdumuza qədəm qoyur. Bütün dünya xalqları bu bayramı gözəl əhval-ruhiyyə ilə qeyd edir. 31 dekabr həm də Dünya Azərbaycanlılarının Həmrəliyi Günüdür. Ölkəmizdə həmin gün ikiqat bayram edilir. Kimisi evində, kimisi səyahətdə, kimisi də iş başında. Lakin bayram günü sərhədlərimizin keşiyində dayanan, şaxtalı, soyuq səngərlərdə düşmən fitnəsinə və hiyləsinə sinə gərən oğullarımız var ki, onların bayramı süfrə başında qeyd etməyə vaxtları və imkanları yoxdur. Amma onların hər biri mənən evlərimizin sakini, süfrələrimizin qonağıdır.
Vətənimin hərbiçi oğlu!
Sən əlində silah ölkəmizin sərhədlərinin keşiyini çəkirsən ki, torpağına, elinə zaval gəlməsin. Avtomatını, pulemyotunu daim hazır saxlayırsan ki, düşmənə yenilməyəsən, yağının başının üstünü bir göz qırpımında alasan. Vətən oğlu biz də sənə arxalanıb rahat ocaqlarımızda yaşayırıq. Sən yurd sevginə, silahına, gücünə, iradənə arxalan! Biz də sənə arxalanaq, Vətən oğlu! Daha ətraflı »

GƏRGİN VƏ ŞƏRƏFLİ PEŞƏ SAHİBLƏRİ

Yeni il ərəfəsində Tərtər Rayon Dövlət Yanğından Mühafizə hissəsində olduq. Hissənin rəisi daxili xidmət polkovnik-leytenantı Mübariz Əliyevlə iş yerində görüşdük. Söhbət zamanı rəis bildirdi ki, heyətimizin tərkibində 5 yanğınsondürən maşın var. Onlardan birinin su tutumu 8 ton, birininki 6 ton, digərininki isə 5 ton, 3,3 ton və 2,5 tondur.
Burada çalışan işçilərin sayı 50 nəfərdir. Onların 6 nəfəri zabit, qalan 44 nəfəri isə sıravidir. Sutka ərzində 14 nəfər növbə çəkir.
Söhbətimiz zamanı hissənin rəisi Mübariz Əliyev bildirdi ki, rayonumuzun ucqar yaşayış məntəqəsi olan Bəyim-sarov kəndində 1 yanğınsöndürən maşın və 4 nəfər şəxsi heyət növbə çəkir. 6 aydan çoxdur ki, Bəyimsarov və ona yaxın olan kəndlərdə 9 yanğın hadisəsi baş verib. Qeyd edim ki, yanğın zamanı Tərtərdən həmin əraziyə yanğınsöndürən maşınlar 20-27 dəqiqəyə çatdığı halda, Bəyimsarov kəndində olan yanğınsöndürən maşın hadisə yerinə 3-5 dəqiqəyə çatır, bu da baş verən yanğının genişlənməməsinə və itkinin azalmasına səbəb olur. Daha ətraflı »

Azərbaycan Prezidenti İlham Əliyev dekabrın 6-da “Tərtər şəhərində çoxmənzilli binaların əsaslı təmiri ilə bağlı tədbirlər haqqında” Sərəncam imzalayıb.
Tərtərdə abadlıq-quruculuq işlərinin davam etdirilməsi, habelə şəhərin mənzil fonduna daxil olan 24 çoxmənzilli bi-nanın əsaslı təmiri işlərinin həyata keçirilməsi üçün 2016-cı il dövlət büdcəsində nəzərdə tutulmuş Prezidentin ehtiyat fondundan Tərtər Rayon İcra Hakimiyyətinə 3 milyon manat ayrılıb.