“TÜRK DÜNYASI BİRLİYİ”

Həbib Hüseynov adına Mamırlı kənd tam orta məktəbində coğrafiya fənn müəllimi Səbuhi Kərimov VII sinifdə “Türk dünyası birliyi” mövzusunda açıq dərs keçib.
Əvvəlcə şagirdlər Azərbaycan Respublikasının Dövlət Himnini oxuyublar. Sonra Ulu Öndər Heydər Əliyevin, Azərbaycan Respublkasının ərazi bütövlüyü və suverenliyi uğrunda şəhid olan qəhrəman oğullarımızın və vaxtıilə məktəbdə çalışıb dünyasını dəyişən müəllimlərin əziz xatirəsi bir dəqiqəlik sükutla yad edilib.
Proyektorda Ulu Öndər Heydər Əliyevin və ölkə Prezidenti İlham Əliyev cənablarının türk dünyasında gördükləri misilsiz xidmətlər barədə videoçarx izlənilib.
Açıq dərs geniş resurslarla təqdim olunub. Türk dünyasını əks etdirən müxtəlif şəkillər nümayiş etdirilib. Sonra şagirdlər qrup işlərini təqdim ediblər. Dərsin bütün mərhələləri uğurla yerinə yetirilib.
Sonda qiymətləndirmə mərhələsi müəllimlər tərəfindən aparılıb. Daha ətraflı »

Tam (11 illik) orta təhsil səviyyəsi üzrə martın 2-də keçirilmiş buraxılış imtahanının nəticələri elan olunub.

İmtahan iştirakçıları arasında 300 bal toplamaqla ən yüksək nəticə göstərən abituriyentlərdən biri də Tərtər rayon Rövşən Kərimov adına Sarov kənd tam orta ümumtəhsil məktəbinin XI sinif şagirdi Quliyeva Çinarə Rəşad qızıdır.

Çinarə Quluyeva 3-cü ixtisas qrupuna hazırlaşır. Hədəfi 700 bal toplamaqdır.

Xatırladaq ki, tam (11 illik) orta təhsil səviyyəsi üzrə martın 2-də keçirilmiş buraxılış imtahanında 23 nəfər 300 bal toplamaqla ən yüksək nəticəni göstərib.

Tərtər Rayon İcra Hakimiyyəti adından Çinarə Quliyevanı təbrik edir, gələcək təhsilində uğurlar arzulayırıq.

Müəllimlik missiyası

2020-ci ilin sentyabr ayı idi. Tərtər şəhəri və ətraf kəndlər dayanmadan düşmən tərəfindən atəşə tutulurdu. Həm cəbhədən, həm də elə mülki sakinlərdən şəhidliklə bağlı xəbərlər gəlirdi. Ancaq bu faciələrin, qəlbüzücü hadisələrin içində bir işıq seli də vardı. Ordumuz irəliləyirdi, qəhrəman əsgərlərimiz, ermənilərin dərsini verirdilər.
Hamının fikri, istəyi bir idi: mümkün qədər bu qələbənin əldə olunmasına kömək etmək!
Həmin günlərdə Sarıcalı kənd tam orta məktəbinin həyətində qəribə bir mənzərə vardı. Ocaqlar qalanır, odun üstündə qazanlar qaynayırdı. Ancaq ocağın ətrafındakılar şagirdlər deyildi. Bunlar məktəbin müəllimləriydi. Onlar əsgərlərimizə yemək bişirib göndərirdilər, həm yaralılara, həm də cəbhənin özünə. Ona görə yox ki, hərbçilərimizin nədənsə korluğu vardı. Yox, bu istək hər kəsin qəlbindən gəlirdi. Qadınların yanında hündürboylu, yaraşıqlı bir qız dayanırdı. Bu, məktəbin direktoru Vəsilə Mehdiyeva idi.
Vəsilə müəllim 44 günlük Vətən müharibəsilə bağlı xatirələrini bizə danışdı:
–O unudulmaz günlərdə düşmən heç nəyə məhəl qoymadan rayonumuzun mülki obyektlərini – məktəbləri, yaşayış evlərini, uşaq bağçalarını atəşə tuturdu. Bilirdik ki, məktəbə gəlmək çox təhlükəlidir. Ancaq heç birimiz evdə qalmaq istəmirdik. Sanki hamı bir güclü yumruğa çevrilmişdi, qorxu yox, qürur, sevinc, sonsuz fərəh hissləri keçirirdik. Ordumuz irəlilədikcə, bizlər də gücümüzün artdığını görürdük. Qadın müəllimlərimizin məhəbbətlə, ürəklərinin hərarətilə hazırladıqları bu xörəklər bəlkə hansısa bir yaralı əsgərə ana əllərinin sevgisini xatırlatmışdısa, biz özümüzü xoşbəxt hiss edirdik. Daha ətraflı »

Ümummilli Lider Heydər Əliyev müəllim əməyini yüksək qiymətləndirərək deyirdi: “Mən yer üzündə müəllimdən yüksək ad tanımıram. Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı naminə vicdanla işləməyi müdrikliklə və səbirlə bizə öyrətmiş və öyrədir. Hər birimizin öz müəllimi vardır və biz bütün ömrümüz boyu onun xatirəsini hörmətlə, minnətdarlıqla qəlbimizdə yaşadırıq”.
Ulu Öndər hesab edirdi ki, təhsilin səviyyəsini yüksəltmək üçün onun maddi-texniki bazası möhkəmləndirilməli, müəllimlərin maddi durumu yaxşılaşdırılmalıdır. Odur ki, Ümummilli Lider bu istiqamətdə əməli tədbirlər görür, konkret addımlar atırdı. Mən 1999-cu ildə orta məktəbi bitirərkən, bizim 100 yaşlı məktəbimiz köhnə uçuq binada yerləşirdi. 2003-cü ildə isə doğma məktəbimizdə –Tərtər şəhər 1 saylı tam orta məktəbdə biologiya müəllimi kimi fəaliyyətə başlayanda artıq məktəbimiz üçün müasir üslubda yeni bina tikilmişdi. Əlbəttə, belə şərait həm müəllimlər, həm də şagirdlər üçün olduqca fərəhli idi. Beləcə, təhsilə qoyulan sərmayə, göstərilən qayğı və diqqət tezliklə nəticəsini verməyə başladı. Azərbaycanda savadlı, müasir dünyagörüşlü, vətənpərvər gənc nəsil yetişdi.
Ulu Öndərin yolunu uğurla davam etdirən Prezident İlham Əliyev də ölkədə təhsilin inkişafında böyük uğurlara imza atır. Hazırda həm dövlət hesabına, həm də Heydər Əliyev Fondunun dəstəyilə Azərbaycanın ən ucqar kəndlərində belə müasir standartlara cavab verən məktəb binaları tikilir. Müəllimlərin bilik səviyyəsinin yüksəldilməsi, onların öz üzərlərində daha ciddi işləməsi üçün ardıcıl tədbirlər həyata keçirilir. Bu, zamanın tələbidir. Həyatımız sürətlə dəyişdiyi kimi, təhsilimiz də inkişaf etməli, yenilənməlidir. Bunu tədris etdiyim biologiya fənnində də görürəm. İndiki biologiya bir neçə il bundan əvvəl bildiyimiz fənn deyil, burada nə qədər yeniliklər baş verir. Fənlərin inteqrasiyası da çox sürətlə gedir. Əgər əvvəllər biologiyanı tədris etmək üçün yalnız bu fənnə aid dərslikdəki mövzuları bilməliydiksə, indi biologiya müəllimi riyaziyyata, digər elmlərə bələd olmadan şagirdlərinə mükəmməl bilik verə bilməz. Odur ki, təhsil sahəsindəki islahatları vaxtı çatmış məsələ kimi qəbul edirik. Daha ətraflı »

Bu işıqdan neçə-neçə ömrə pay düşüb

Təqaüdçü müəllim Baba Aslanovun 85 illik yubileyinə həsr olunmuş tədbirdə yubilyarın doğmaları ilə birlikdə rayon icra hakimiyyətinin, YAP rayon təşkilatının, ”Yeni Tərtər” qəzetinin əməkdaşları, məktəbin pedaqoji kollektivi, məktəbin məzunları da iştirak ediblər.
Tədbirin ssenari müəllifi və aparıcısı Ağdam Dövlət Dram Teatrının rejissoru, Baba müəllimin şagirdi Elmir Hümbətov olub.
Tədbirdə əvvəlcə torpaqlarımız uğrunda canından keçmiş şəhidlərin, dünyasını dəyişmiş müəllimlərin və təyyarə qəzasında həlak olanların xatirəsi bir dəqiqəlik sükutla yad edilib.
Sonra aparıcı uzun illər ömrünü-gününü şagirdlərinin təhsili yolunda şam kimi əridən Aslanov Baba Allahverdi oğlunun həyat və fəaliyyəti barədə danışıb.
Tərtər Rayon İcra Hakimiyyətinin əməkdaşı Svetlana Əzizova, YAP rayon təşkilatının əməkdaşı Əli Paşayev, “Yeni Tərtər” qəzetinin redaktoru Svetlana Bağırova, vaxtı ilə Baba müəllimlə birgə işləmiş müəllimlərdən Cümşüd Həsənov, Bəsti Məmmədova, Həmayıl Bayramova, İlyas Hümbətov, Fatma Əhmədova, Məlahət Zeynalova çıxış edərək Baba müəllimi təbrik edib, ona sağlıqlı ömür arzulayıblar. Çıxışlarda Baba Aslanovun müəllimlik fəaliyyəti dövründən maraqlı, yaddaqalan xatitələr dilə gəlib, onun aktyorluq istedadından, səhnələşdirdiyi tamaşalardan, musiqi istedadından–kamançada etdiyi gözəl ifalardan da danışılıb.
Baba müəllimin ziyası işığına toplaşmış keçmiş şagirdləri – şair Xəqani Abbasov, şairə Səidə Əşrəf qızı, Ədalət Nuriyev, Xəlil Məmmədov, Pərviz Ağayev sevimli müəllimlərini təbrik ediblər, məktəbin şagirdləri müəllim ömrünə həsr olunmuş şeirlər söyləyiblər, maraqlı səhnələr göstərilib. Daha ətraflı »

TARİX FƏNNİNİ SEVDİRƏN MÜƏLLİMLƏRİM VƏ HƏYAT ÖZÜ OLUB

Müəllim əməyilə tanışlığım ötən əsrin 90-cı illərinin əvvəlində başlayıb. 1991-ci ildə hazırda 100-dən çox yaşı olan Tərtər şəhər 1 saylı orta məktəbinin birinci sinfinə getmişəm. İki addımlığımızda nankor qonşularımız vardı. Şəhərimiz və ətraf kəndlər daimi olaraq atəşə tutulurdu. Valideynlər uşaqları məktəbə gətirib geri qayıtmağa qorxurdular. Daimi olaraq başımızın üzərindəki təhlükədən heç kim sığortalanmamışdı. Ermənilərin atdıqları “Alazan” raketləri bizi evdə də, məktəbdə də tapa bilərdi və tapırdı da.
Belə bir şəraitdə şagirdlərin titrək barmaqlarından tutub onlara ilk hərfləri öyrətmək, müəllim peşəkarlığı ilə yanaşı, böyük ürək, vətənpərvərlik, bəlkə kiməsə şişirdilmiş görünsə də, igidlik tələb edirdi. O, belə bir insan idi – bizim ilk müəllimimiz Roza Muxtarova.
Sinfimiz təhlükəsiz adaydı, müəllimimiz isə qoruyucu mələk. Onun sakit, təmkinli səsi bizi addım-addım irəli aparır, gələcək uğurlarımıza yol açırdı. Yadımdadır, bir dəfə gündüz saatlarında düşmən tərəfindən atılan raket məktəbin yaxınlığında partlamışdı, hamı həyəcan içindəydi, biz isə sakitcə oturub valideynlərimizi gözləyirdik. Çünki müəllimimiz yanımızdaydı. Uşaq qəlbimizlə inanırdıq ki, raketlər bizi tapa bilməz.
Birinci Qarabağ müharibəsinin ağır illərini birlikdə yaşadıq. Bu gün, çox illər keçəndən sonra, demək istəyirəm: ”Əziz müəllimim! Siz o çətin illərdə həyatımızın bir parçasına çevrildiniz. Hər bir şagirdiniz adından peşənizə olan sədaqətə, sevgiyə, yorulmazlığınıza görə dərin təşəkürümüzü bildirirəm”.
Ulu Öndər Heydər Əliyev deyirdi: “Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı naminə vicdanla işləməyi müdrikliklə və səbrlə bizə öyrətmiş və öyrədir”. Mən bu sözlərə layiq olan və təəssüf ki, çox tez həyatdan köçən tarix müəllimi Qələndər Quliyevi dərin hörmət hissi ilə xatırlamaq istəyirəm. O müəllimi ki, onun bütün həyatı, amalı, məqsədi tədris etdiyi fənni şagirdlərə sevdirmək və onları əsl vətənpərvər kimi tərbiyə etmək olub. Qələndər Quliyev (Səlimoğlu) Tərtərin Qapanlı kəndindən idi. Yaxınlıqdakı ermənilər yaşayan Seysulan kəndi ilə Qapanlının arası cəmi 1-2 kilometr olardı. Həm müharibə zamanı, həm də atəşkəs dövründə Qapanlı camaatı nankor qonşulardan çox zərbələr almışdı. Qələndər müəllim baş verənləri ürəyindən keçirərərk hələ o zaman, dərsliklərdə bir çox hadisələrin düzgün işıqlandırılmadığı dövrdə, şagirdlərinə əsl vətənpərvərlik dərsi keçir, hər kəlməsi ilə onları düşmənlə mübarizəyə hazırlayırdı. Bu gün, möhtərəm Prezidentimiz İlham Əliyevin rəhbərliyi altında Azərbaycan Ordusu Şanlı Zəfər qazandığı zaman, biz Qələndər müəllimi və onun kimi minlərlə peşəsinin, Vətəninin vurğunu, fədaisi olan müəllimləri xatırlamaya bilmərik. Məhz buna görə də dövlətimizin başçısı deyib ki, heç vaxt Qarabağı görməyən gənclər Qarabağ uğrunda ölümə getməyə hazır idilər. Bu, ailədə və məktəbdə onların aldığı tərbiyənin, Qarabağ sevgisnin nəticəsiydi.
Azərbaycanın hər bir bölgəsi mənim üçün doğma və əzizidr. Daha ətraflı »

Əsəd Məmmədov adına şəhər 1 saylı tam orta məktəb nəinki Tərtər rayonunda, eləcə də respublikamızda ən qədim təhsil müəssisələrindən biridir. Cari ildə 121 yaşı tamam olan bu təhsil ocağının məzunları arasında elm xadimləri, generallar, xalq şairi, vətən yolunda canından keçən əbədiyaşar şəhidlərimiz var.
Məktəbin pedaqoji kollektivi bu gün də ötən illərin ənənələrinə sadiq qalaraq, gənc nəslin təlim-tərbiyəsində yeni uğurlara imza atır. Buna misal olaraq cari tədris ilində burada Polis Akademiyasında təhsil almaq arzusunda olan şagirdlərin xüsusi fənlər üzrə hazırlanması məqsədilə fəaliyyət göstərən xüsusi təyinatlı sinifin yaradılmasıdır. Həmin sinfə tədris göstəriciləri, dünyagörüşü və fiziki hazırlıq səviyyəsi ilə fərqlənən, ilkin olaraq daxili işlər orqanında xidmətə və təhsilə yararlı olan X sinif şagirdləri qəbul edilmişlər. Sinif təşkil edilərkən şagirdlərə və onların valideynlərinə xüsusi təyinatlı ali təhsil müəssisəsi olan Polis Akademiyasında ali hüquq təhsili almağın üstünlükləri və Akademiyaya qəbul qaydaları barədə ətraflı məlumat verilmişdir.
Bu günlərdə Tərtər Rayon Polis Şöbəsinin rəisi, polis polkovniki Elçin Qasımov və Tərtər rayonu üzrə Təhsil Sektorunun müdiri Oqtay Sarıkişiyev məktəbdə olarkən, xüsusi təyinatlı sinfin şagirdlərilə görüşüb, onların əldə etdikləri uğurlarla tanış oldular. Məktəbin direktoru Amil Hüseynov məlumat verdi ki, az müddət keçməsinə baxmayaraq, şagirdlər həm təhsildə, həm də davranışlarında, dünyagörüşlərinin formalaşmasında gözəl nəticələr əldə ediblər. Onların təhsildəki göstəricilərinə, nizam-intizamlarına məktəblə yanaşı, Polis Akademiyasının özündən də nəzarət olunur. Bu barədə vaxtaşırı Akademiyaya məlumat verilir. Bu isə öz növbəsində uşaqların məsuliyyətini artırır. Daha ətraflı »

Azərbaycanın inkişafının müasir mərhələsində Prezident İlham Əliyevin diqqəti və məqsədyönlü göstərişləri əsasında atılan addımlar, qəbul edilən Dövlət Proqramları təhsilin, eləcə də peşə təhsilinin səviyyəsinin yüksəlməsinə xidmət edir. Xüsusən də 44 günlük Vətən müharibəsində əldə etdiyimiz möhtəşəm Zəfərdən sonra doğma Qarabağ torpaqlarında bərpa və quruculuq işlərinin aparılması, burada ağıllı kənd və şəhərlərin inşası savadlı, peşəkar kadrlara olan tələbatı daha da artırıb.
Məlumdur ki, Azərbaycanın gələcəyini böyük uzaqgörənliklə düşünən Ulu Öndər Heydər Əliyevin təşəbbüsü və rəhbərliyi ilə təhsilin təkmilləşdirilməsinə, inkişafına dair strategiya hazırlanmış və uğurla həyata keçirilmişdir. Ümummilli Liderin zəngin irsinin layiqli davamçısı Prezident İlham Əliyev öz növbəsində ölkədə təhsilin inkişafı ilə bağlı bir sıra mühüm addımlar atıb. Ölkə başçısının fərman və sərəncamları ilə 2016-cı ildə Azərbaycan Respublikasında peşə təhsili və təliminin inkişafına dair Strateji Yol Xəritəsi təsdiq edilib, Peşə Təhsili üzrə Dövlət Agentliyi yaradılıb, 2018-ci ildə Peşə təhsili haqqında Qanun qəbul edilib. Elə həmin ildə Dövlət ilk peşə-ixtisas təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin dərs yükünün və əmək haqlarının, idarəetmə və təlim fəaliyyəti ilə məşğul olan işçilərin isə əməkhaqlarının artırılması dövlətin Peşə Təhsili və Təliminə diqqət və qayğısının bariz nümunəsidir. Daha ətraflı »

“BİZ TƏKCƏ ELM ÖYRƏTMİRDİK, UŞAQLARA VƏTƏNPƏRVƏLİK DƏRSİ KEÇİRDİK”

Elə bir insan tapılmaz ki, ilk müəlliminin adı çəkiləndə duyğulanmasın, uşaqlığına qayıtmasın. Bəzən deyirlər ki, biz hətta xasiyyətcə də ibtidai sinif müəllimlərinə bənzəyirik. Sakit, təmkinli pedaqoqların şagirdləri də belə olur, çılğın, səsli-küylü siniflər isə eynən müəllimləri kimidirlər.
Məktəb mövzusu çox aktual olduğu üçün, uzun illər tanıdığım və hazırda təqaüddə olan bir müəllim haqqında danışmaq istəyirəm.
Roza Muxtarova. Onun bütün həyatı şəhər 1 saylı tam orta məktəblə bağlı olub. Bu məktəbdə orta təhsil alıb, sonradan texnikumu bitirib doğma məktəbində ibtidai sinif müəllimi kimi fəaliyyətə başlayıb, işləyə-işləyə təhsilini artırıb və ali təhsilli pedaqoq kim həyatını uşaqların savadlanmasına, tərbiyəsinə həsr edib.
Ulu Öndər Heydər Əliyev deyib: “Ömrünü müəllimliyə həsr etmiş insan ən şərəfli insandır”. Ümummilli Lider hesab edirdi ki, vətənpərvərliyi gənclərə aşılamaq üçün müəllimlərin özləri gərək vətənpərvər olsunlar.
Müəllimlərimizin vətənpərvər olduğunu və onların belə bir nəsil yetişdirdiyini 44 günlük Vətən müharibəsi göstərdi. Azərbaycan Respublikasının Prezidenti, müzəffər Ali Baş Komandan İlham Əliyevin dediyi kimi, “Elə bir gənc nəsil yetişdi ki, Qarabağ uğrunda, Vətən uğrunda, milli ləyaqət uğrunda ölümə gedirdilər.” Daha ətraflı »

Tərtər Rayon İcra Hakimiyyətinin başçısı Müstəqim Məmmədov Tərtər Peşə Məktəbində müəllim, istehsalat təlimi ustaları və tələbələrlə görüşüb, təlim və tədris üçün onlara yaradılan şəraitlə tanış olub, kollektivə yeni dərs ilində uğurlar arzulayıb.
Rayon rəhbəri bildirib ki, bu gün ali təhsillə yanaşı, peşə təhsilinin inkişafı istiqamətində də ardıcıl tədbirlər görülür. Yaradılan şərait pedaqoji heyətin qarşısında mühüm vəzifələr qoyur. Məktəbdə tədris olunan ixtisaslar üzrə peşəkar kadrların hazırlanması daim diqqət mərkəzində saxlanılmalı, tədris prosesi günün tələbləri səviyyəsində qurulmalıdır.
Qeyd olunub ki, Tərtər Peşə Məktəbi 1960-cı ildən fəaliyyət göstərir.
Məktəbin 5 mərtəbəli tədris binası heç vaxt əsaslı təmir edilmədiyindən yardımçı binalar köhnə tikililər olduğundan böyük əksəriyyəti qəzalı vəziyyətdə idi. Uzun illər məktəbdə məcburi köçkünlər məskunlaşdığı üçün məktəb öz görkəmini tamamilə itirmişdi. Daha ətraflı »