Tərtər Rayon İcra Hakimiyyətinin başçısı Müstəqim Məmmədov Dövlət Təhlükəsizlik Xidmətinin Tərtər rayon şöbəsinin rəisi Rəşad Nadirov, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Pərviz Hüseynov və YAP rayon təşkilatının sədri Eldar Əsədovla birlikdə rayonun Qazyan kəndində Birinci Qarabağ müharibəsinin üçüncü dərəcəli əlili Məmmədov Camal Zeynal oğlunu evində ziyarət edib, onun və ailəsinin qayğıları ilə maraqlanıb.
Rayon rəhbəri şəhid və qazilərin qəhrəmanlıqlarından söz açıb və bildirib ki, bu gün onların qanı-canı bahasına torpaqlarımız işğaldan azad olub, suverenliyimiz bərpa edilib.
Qeyd edək ki, Camal Məmmədov Birinci Qarabağ müharibəsinin ilk vaxtlarından Ağdərə istiqamətində gedən döyüşlərə qatılmışdır. O, 1994-cü il yanvar ayının 8-də düşmənin atdığı mərmi nəticəsində yaralanmış və ehtiyata buraxılmışdır.
Camal Məmmədova müharibə zamanı aldığı xə-sarətlərə görə üçüncü dərəcəli əlillik təyin edilmişdir.

Bəşəriyyətin mübarizə apardığı arzuolunmaz yoluxucu xəstəlik, sağlamlığın və mənəviyyatın qənimi

Narkotik adətən beyin və sinir sisteminə təsir edən və istifadə edildikdə fiziki və psixoloji asılılıq yaradan maddələrə verilən ümumi addır. Bu maddələrdən əvvəlcə əyləndirici məqsədlərlə istifadə olunur, amma bu, onların sağlamlığa zərərli təsirini aradan qaldırmır. Narkomaniya insanların düçar olduğu çıxılmaz bataqlıqdır. Onu haqlı olaraq “ağ ölüm” də adlandırırlar.
Ümumdünya Səhiyyə Təşkilatının məlumatına görə, bu gün dünya əhalisinin 270 milyonu planetimizin ən qlobal problemlərindən birinə çevrilən, insanları ölümün ağuşuna atan, genofonda sarsıdıcı zərbələr endirən bu ağır bəlanın əzabını yaşamaqdadır. Narkomanlıq və narkotiklərin qanunsuz dövriyyəsi ən ciddi və təhlükəli qlobal problemlərdən biri olmaqla, cəmiyyətin mənəvi və əxlaqi dəyərlərinə böyük zərbə vurur, cinayətkarlığın artmasına səbəb yaradır, eyni zamanda, terrorizmin maliyyə mənbəyi olmaqla, beynəlxalq təhlükəsizliyə ən ciddi təhdidlərdən biri kimi çıxış edir.
Məhz bunlara görə Ümummilli Liderimiz Heydər Əliyev narkomaniyanı cəmiyyətin “sosial bəlası” adlandırmışdır. Ulu Öndər Heydər Əliyevin 15 iyul 2000-ci il tarixli Fərmanı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığın yayılmasına qarşı mübarizə üzrə Milli Proqram (2000-2006-cı illər)” müstəsna əhəmiyyətə malik oldu. Bu istiqamətdə mübarizə məhz bu sənədə əsaslanmaqla aparılırdı və həmçinin xüsusi Dövlət Komissiyası yaradıldı.
Dünya dövlətlərinin əksəriyyəti narkomanlığa və narkotik vasitələrin qeyri-qanuni dövriyyəsinə qarşı səmərəli mübarizəni təşkil etmək üçün birgə yollar axtarırlar. Azərbaycan Respublikası da narkotiklərin qanunsuz dövriyyəsinə qarşı mübarizəni tənzimləyən beynəlxalq hüquq normalarını tam, hərtərəfli və sistemli şəkildə əks etdirən Birləşmiş Millətlər Təşkilatının Konvensiyalarına, o cümlədən 1972-ci il protokolu ilə edilmiş düzəlişlərlə “Narkotik vasitələrə dair 1961-ci il Vahid Konvensiyasına”, “Psixotrop maddələr haqqında” 1971-ci il Konvensiyasına və “Narkotik vasitələrin və psixotrop maddələrin qanunsuz dövriyyəsi ilə mübarizə haqqında” 1988-ci il Konvensiyasına qoşulmaqla, bu cinayətlərə qarşı mübarizədə öz üzərinə mühüm vəzifələr götürmüşdür. Daha ətraflı »

ÖLÜMƏ MEYDAN OXUYAN İGİD

Müharibə çox anaları oğulsuz, bacıları qardaşsız, körpələri atasız qoyub. Bütün Azərbaycanı bürüyən bu qara kabus Allahverdi dayının ailəsindən də yan keçmədi. Onun tək oğlu Etibar Əliyev öz ölümü ilə şəhidlik zirvəsinə ucaldı. Ailənin yeganə ümidi olan Etibar Koroğlu əzəmətli, Babək cüssəli, gözəllikdə tayıbərabəri olmayan oğlan idi. Öz ağlı, tərbiyəsi, savadı ilə hamının rəğbətini qazanmışdır. O, orta məktəbi bitirən ili Xalq Təssərrüfatı İnstitutunun Bank əməliyyatı fakültəsinin axşam şöbəsinə qəbul olmuşdu.
İkinci kursa keçəndə əsgəri xidmətinə çağırılmış və Mingəçevir şəhərində hərbi hissələrin birində arxa cəbhədə saxlanmışdı. Bu zaman ön cəbhədən həyəcanlı xəbərlər eşidən Etibar bunlara dözə bilmir və ön cəbhəyə getməyi qərara alır. O da vətəninin qeyrətli oğulları kimi yalnız döyüşə can atırdı. O, 1994-cü ildə hərbi hissədən çıxdıqdan sonra Tərtər rayonuna gəlir və könüllü olaraq döyüşlərə qoşulur. Rayonda yaşayan bibilərinin yalvarışlarına baxmayaraq o, “mən də kişiyəm, mən də bu torpağın suyunu içir, havasını uduram” deyə inadından dönmür. Mənim atamın yurdu, babamın qəbri ermənilərin tapdağı altındadır. Mən kəndimizin düşmənlərdən təmizlənməsində iştirak edəcəm.”İnşallah babamın qəbri üstündə görüşərik” deyərək bibiləri ilə vidalaşır və döyüşə yola düşür. Sən saydığını say, gör fələk nə sayır.
Aprelin əvvəllərində ermənilər Tərtərə üç istiqamətdə hücum edirlər. Bu vaxtı Etibar Qapanlı kəndi uğrunda gedən döyüşlərdə böyük igidliklər göstərir. Düşmənin ciddi müqavimətinə tab gətirməyən ordu geri çəkilən zaman başından və kürəyindən yaralanaraq partlayış nəticəsində böyük bir ağacın altında qalan döyüş dostu Pərvizi xilas etməyə çalışır. Bu zaman üç-dörd erməni azərbaycanca danışa-danışa ona yaxınlaşır. Gələnlərin erməni olduğunu guman etməyən Etibarın qəfləti əl-qolunu bağlayıb əsir götürürlər. Bu hadisənin ertəsi günü mayın 12-də cəbhədə atəşkəs elan olunur. Daha ətraflı »

Azərbaycan Respublikası Prezidentinin 4 aprel 2022-ci il tarixli, 3199 nömrəli Sərəncamı ilə təsdiq edilmiş “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planında əks etdirilmiş kompleks tədbirlərin icrası ölkəmizdə korrupsiyaya qarşı mübarizə sahəsində həyata keçirilən məqsədyönlü və qətiyyətli fəaliyyətin tərkib hissəsi kimi, şəffaflığın artırılmasına, dövlət orqanları (qurumları) tərəfindən göstərilən xidmətlərin keyfiyyət etibarilə yaxşılaşdırılmasına, ictimai nəzarətin təşkilində və korrupsiyanın ifşa edilməsində vətəndaş cəmiyyəti institutlarının rolunun artırılmasına xidmət edir. Dövlət sektorunda idarəetmə mexanizmlərinin təkmilləşdirilməsi, yerli özünüidarəetmədə aşkarlığın və ictimai iştirakçılığın təmin edilməsi, özəl sektorda beynəlxalq standartlar əsasında antikorrupsiya standartlarının formalaşdırılması, müvafiq istiqamətlərdə qanunverici bazanın mütərəqqi beynəlxalq təcrübə əsasında təkmilləşdirilməsi korrupsiyaya qarşı mübarizə sahəsində qarşıya qoyulmuş əsas prioritet istiqamətlər və məqsədlərdir.
“Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”nın icrasına dair Tərtər Rayon İcra Hakimiyyətində tədbirlər planı hazırlanmış və bu istiqamətdə müvafiq işlər aparılır. Antikorrupsiya davranış modelinin formalaşdırılması ilə bağlı işlərin gücləndirilməsi, cəmiyyətdə məlumatlılığın artırılmasına yönəlmiş maarifləndirmə, tədris və digər tədbirlərin səmərəliliyinin yüksəldilməsi məqsədilə tədbirlər keçirilir, bu sahəyə daim nəzarət edilir. “Korrupsiyanın qarşısının alınması” mövzularında seminarlar və treninqlər keçirilərək maarifləndirmə işləri aparılması təmin olunur. Korrupsiyaya qarşı mübarizə tədbirləri ilə əlaqədar tədbirlərin keçirilməsi, müzakirələrin və video konfransların təşkil edilməsi və əhali arasında təbliğat işlərinin aparılması təmin olunur. Bu Fəaliyyət Planı ölkəmizdə açıqlıq, şəffaflıq və hesabatlılıq prinsiplərinin tətbiqinin daha da genişləndirilməsi məqsədilə həyata keçirilən islahatların tərkib hissəsi olmaqla, burada nəzərdə tutulan tədbirlər dövlət xidmətlərinin təkmilləşdirilməsi, vətəndaş cəmiyyəti üzvlərinin fəaliyyətinin dəstəklənməsi, ictimai nəzarətin gücləndirilməsi, korrupsiyanın qarşısının alınması, maliyyə şəffaflığının artırılması, həmçinin informasiya əldə edilməsinin təmin olunması sahələrində mühüm töhfə verəcəkdir.
Həmçinin Milli Fəaliyyət Planının 6.9-cu yarımbəndinin icrasını təmin etmək məqsədilə korrupsiyaya qarşı mübarizə tədbirləri ilə əlaqədar Tərtər Rayon İcra Hakimiyyəti tərəfindən bukletlər hazırlanaraq, onların əhali arasında geniş yayılması təşviq edilir.

“MƏNİM HƏYAT ROMANIM”

(Əvvəli ötən sayımızda)
Belə hallarla qarşılaşanda, xahişlərini eşidib söhbətlərinə qulaq asanda, qəbulunda olarkən müdirik rəhbər Heydər Əliyevin mənə verdiyi çox qiymətli məsləhətləri səslənirdi qulaqlarımda: “…Tərcümeyi-halınızdan görürəm ki, kasıb ailədən çıxmısınız. Heç kəsin köməyi olmadan özünüz özünüzə yol açan adam olmusunuz. Amma unutmayın ki, bundan sonra dostlarınız da, qohumlarınız da çox olacaq. Çünki, vəzifəli adamların qohumları çox olur. Axı, vəzifəli adamdan müəyyən məqsədlərlə, istədiyi kimi istifadə etməyə çalışanlar hər şeydən əvvəl, qohumluq münasibətlərini bildirərək deyirlər ki, sən demə, atalarımız da, babalarımız da, dost doğmaca qohum imişlər. Çox olacaq belə deyənlər. Elələrinin sözlərinə inanmayın. Ancaq özünüzə, düzgün yolunuza, yaxşı işlərinizə güvənin”.
Qulağımda səslənən bu sözlər əsl cavab idi məndən kömək gözləyib cavab almaq istəyənlərə. Amma söz yox ki, o sözləri xatırlada bilməzdim onlara. Üzümdən gəlməzdi, çəkinirdim. Sadəcə olaraq onların hər birinə ayrı-ayrılıqda: “İnciməyin, mənim bacardığım iş deyil bu, mən belə işlərə baxmıram” deməklə kifayətlənirdim.
Bu sözlərdən sonra da “yaxın qohumlarım” elə bil ki, düşmənə çevrilib düşmən nəzəri ilə baxırdılar mənə. Hətta ardımca dedikləri: “təkcə özü üçün yaşayan adamdı, iş düzəldən, kara gələn adam deyil, fərsizin, bivecin biridi” kimi giley dolu sözləri də çatırdı qulaqlarıma… Daha ətraflı »

Xatirəsi hörmətlə anılır

Dəmirçilər kənd tam orta məktəbində şagirdlərin təhsili ilə yanaşı, onların vətənpərvərlik tərbiyəsinə böyük diqqət göstərilir. Bu məqsədlə vaxtaşırı olaraq müxtəlif tədbirlər keçirilir. Belə tədbirlər zamanı şagirdlər şanlı Zəfər tariximizlə tanış olur, bu tarixi yazan igidlərin həyatını və döyüş yolunu öyrənirlər.
Məktəb vaxtilə burada təhsil alan I Qarabağ müharibəsi şəhidi Azər Məmmədovun adını daşıyır. Azər Məmmədov 1992-ci ildə könüllü olaraq torpaqlarımızın işğaldan azad edilməsi uğrunda mübarizəyə qatılıb. Xidmət etdiyi hərbi hissənin tərkibində Ağdərə bölgəsində döyüşlərdə iştirak edib. Şişqaya yüksəkliyi uğrunda gedən döyüşlərdə şəhid olub.
Məktəbdə Azərin xatirəsi daim minnətdarlıq hissi ilə anılır, qardaşı və digər qohumları keçirilən tədbirlərə dəvət olunur. Belə görüşlər məktəblilərə Azər Məm-mədov və onun kimi qəhrəmanlar haqqında daha çox bilgi toplamağa kömək edir.

Oktay Məmmədov,
veteran müəllim

2025-ci ilin gəlişi bizim üçün düşərli oldu. Belə ki, yeni ilin elə ilk günlərindən şəhərimizin küçələrinin asfaltlanması işlərinə başlanıldı.
Bu iş ilk olaraq bizim yaşadığımız Üzeyir Hacıbəyli küçəsində aparıldı. Bundan sonra Vüqar Həsənov, Füzuli Rüstəmov və Mehman Dadaşov küçələrinə asfalt örtük salındı. Şəhərimizin küçələrinin abadlaşdırılması işləri sürətlə davam etdirilir. Bu günlərdə Səməd Vurğun, Aysənan Abbasov, Məftun Abbaszadə küçələrinin sakinləri də sevinmişlər. Hər bir küçədə əvvəlcə yolun yatağı qum-çınqıl tökülərək xüsusi texnikalar vasitəsi ilə hamarlanıb, daha sonra asfalt örtüyü çəkilib. Əlavə olaraq işıq, qaz, su və telekommunikasiya xətləri də qaydaya salınıb.
Görülən işlər nəticəsində piyadalırın və avtomaşınların gediş-gəlişi rahat olub, həm də şəhərin gözəlliyi artıb.
Elman Səfərov küçəsində isə şəhid və qazi ailələri üçün inşa edilmiş yaşayış binalarının həyətində abadlıq işləri həyata keçirilib, söhbətgah quraşdırılıb, yeni asfalt örtüyü salınıb, yaşıllıqlar səliqəyə salınıb.
Bu işdə əməyi olan hər kəsə təşəkkürümüzü bildiririk!

Emin Əmiraslanlı,
şəhərin Üzeyir Hacıbəyli
küçəsinin sakini

Gələcəyini parlaq gördüyüm, gələcəkdə cəmiyyətimizdə büyük uğurlar əldə edəcəyinə inandığım Aygün Bayramlı Aslan Kərimov adına şəhər 3 saylı orta məktəbin 3- cü sinfində təhsil alır. Bu balaca qız yaşına görə böyük uğurlar əldə edib. Beynəlxalq olimpiadalardan biri olan Future İntellegence Students Olympıad (FİSO) məntiq olimpiadasına ilk dəfə qatılsa da, respublika turunda bürünc medala layiq görülərək, 13-17 iyun tarixlərində Dubayda keçiriləcək final turuna vəsiqə qazanıb. Bundan başqa, KİNG Beynəlxalq Olimpiadasının KİNG LİQASINDA iştirak edərək, ingilis dili və Riyaziyyat fənləri üzrə 2 qızıl medal və dərəcə sertifikatı əldə edib.
Aygün böyüyəndə həkimlik peşəsinə yiyələnərək, cərrah olmaq arzusundadır. Əminəm ki, o, bu arzusuna çatacaq və cərrah olaraq xalqımıza xidmət edəcək, gələcəyimizin parlaq gənclərindən biri olcaq.

Əsmər Yusifli

ÇƏRƏZLƏRİN GİZLİ QALAN FAYDALARI

Çərəzlər-zəngin tərkibi baxımından orqanizmin gündəlik vitamin və mineral tələbatını, eyni zamanda beyinin təbii yağlara olan ehtiyacını ödəyir. Tərkibindəki lif, vitamin, mineral və antioksidantlar bir çox xəstəliyə qarşı qalxan rolunu oynayır.
Qovrulan zaman qidalılıq dəyərinin azalması, tərkibindəki yağların trans yağlara çevrilməsi ehtimalı yüksək olduğu üçün onların qovrulmamış və ya çox az qovrulmuş halda istehlakı tövsiyə olunur.
Qoz-orqanizmin ehtiyacı olan bitki tərkibli Omega-3 yağ turşusunu təmin edən tək çərəz olmaqla, yağ, zülal, karbohidratlar, C vitamini, B qrup vitaminləri, maqnezium, manqan, sink, fosfor, E vitamini və alfalinolenik turşusu kimi komponentlərlə zəngindir.
Qoz sinir sisteminə müsbət təsir göstərir, damarların kirəcləşməsinin qarşısını alır, xolesterol səviyyəsi və qan şəkərinin stabilləşməsinə kömək edir. Eyni zamanda lif, protein sayəsində Alzheymer xəstəliyi və şəkərli diabetin yaranmasını ləngidir, sümüklərin güclənməsi və dəri hüceyrələrinin cavan qalmasını təmin edir.
Fındığn tərkibində olan yağların 96 % orqanizm üçün faydalı olan doymamış turşular – olein və linolindən ibarətdir. Həmçinin zülal, karbohidrat, doymamış yağlar, E və B qrupu vitaminləri, yüksək miqdarda kalium, kalsium və natriumla zəngindir. Fındıq immun sistemini gücləndirir, sinir sistemi, bağırsaq üşün faydalıdır, diabet riskini azaldır, xərçəngə qarşı orqanizmi qoruyur, beyin fəaliyyətini və zehni qabiliyyəti yaxşılaşdırır, əzələləri gücləndirir, hüceyrələri yaşlanmaqdan qoruyur, toxluq hissini artırır.
Tərkibi lif, fosfor, kalium, E, C, A və B qrup vitaminləri, yağ və proteinlə zəngin olan fıstıq həzm prosesinin yaxşılaşması, qan təzyiqinin tənzimlənməsi, immun sisteminin gücləndirilməsi, qanazlığı zamanı faydalıdır. Daha ətraflı »