Mayın 4-də Azərbaycan Respublikası Səhiyyə Nazirliyi “Respublika Qan Bankı” Publik Hüquqi Şəxsi və Tərtər Rayon İcra Hakimiyyətinin birgə təşkilatçılığı ilə Tərtər Rayon İcra Hakimiyyətində Azərbaycan Respublikasının Birinci vitse-prezidenti Mehriban xanım Əliyevanın Azərbaycanda “Talasemiyasız həyat naminə” proqramı çərçivəsində Talasemiyadan əziyyət çəkən uşaqlara qan toplamaq məqsədilə qanvermə aksiyası keçirilib.

Aksiyada Tərtər Rayon İcra Hakimiyyətinin başçısı Müstəqim Məmmədov, məhkəmələrin və hüquq-mühafizə orqanlarının rəhbərləri, rayonda fəaliyyət göstərən idarə, müəssisə və təşkilatların kollektivləri, hüquq-mühafizə orqanlarının əməkdaşları, şəhid ailələri, qazilər, ictimaiyyət nümayəndələri, gənclər, ümumilikdə minlərlə rayon sakini könüllü olaraq iştirak edib.

Qanvermə aksiyasında iştirak edənlər əvvəlcə müayinədən keçib, onlardan qan analizi götürülərək sağlam olub-olmamaları müəyyənləşdirilib. Aksiyada 201 nəfər qan verib.

Aksiyada iştirak edən rayon icra hakimiyyətinin başçısı Müstəqim Məmmədov bildirib ki, qanvermə aksiyasının məqsədi hemofiliya və talassemiya xəstəliklərindən əziyyət çəkən insanlara, xüsusən də uşaqlara yardım etmək və onlar üçün tədarük olunan qan ehtiyatını artırmaqdır.

Talassemiya və digər irsi qan xəstəliklərindən əziyyət çəkən xəstələrin həyatı kütləvi surətdə qanvermə aksiyalarından asılıdır. Bu məqsədlə 2005-ci ildə Azərbaycan Respublikasının Birinci vitse-prezidenti və Heydər Əliyev Fondunun prezidenti Mehriban xanım Əliyevanın təşəbbüsü və qayğısı ilə başlanılmış “Talassemiyasız həyat naminə” proqramı çərçivəsində mütəmadi olaraq qanvermə aksiyaları keçirilir. Könüllü qan vermə aksiyalarından toplanan qan irsi qan xəstəliklərindən əziyyət çəkənlərin müalicəsinə sərf olunur.

Mərkəzi Qan Bankının əməkdaşları tərəfindən toplanan qan ehtiyacı olan xəstələrin müalicəsində istifadə olunacaq.

Problemlərin aradan qaldırılması vətəndaş məmnunluğunu yaradıb.

Buruc kəndində subartezian quyusunun yanmış nasosu dəyişdirilərək yenisi ilə əlavə olunub. Rayon icra hakimiyyəti başçısının tapşırığı əsasında bu iş Tərtər Su Meliorasiya Sistemləri İstismarı İdarəsi tərəfindən yerinə yetirilib.

İlxıçılar kəndində sakinlərin müraciəti əsasında kəndin Üzeyir Həcıbəyov, Mübariz İbrahimov küçələrinə çınqıl verilərək hamarlanıb. Bu iş Azad Qaraqoyunlu İƏD üzrə nümayəndəlik və Azad Qaraqoyunlu Bələdiyyəsi tərəfindən həyata keçirilib.

Kəngərli kəndində keçirilən səyyar qəbul-görüşdən sonra sakinlərin müraciəti əsasında buradakı yararsız elektrik dirəkləri və naqilləri yenisilə əvəz olunub. Tərtər Elektrik Şəbəkəsinin əməkdaşları məsələnin operativ həllini təmin ediblər. Daha ətraflı »

Uca Tanrı insanı çox güclü yaradıb. Ona zəka və qüvvət verib. Təəssüf ki, çox zaman bunlar onun özünə qarşı çevrilir, odur ki, dünyada müharibələr, münaqişələr səngimir, günü-gündən daha da alovlanır. Azərbaycan xoşbəxt ölkədir ki, ərazisində terrora, işğala son qoya bildi, torpaqlarımızı bütövləşdirdi, suveren və müstəqil ölkə kimi dünyaya nümunə oldu.
Lakin insanlar yalnız müharibələr zamanı ölmür, minlərlə insanın məhvinə, ailələrin faciəsinə səbəb olan başqa bir bəla da var– onun adı narkomaniyadır. Müharibədən fərqli olaraq, burada düşmənlə üzbəüz mübarizə aparmırsan, o, gözləmədiyin halda, aldadıcı xoş sifətlə gəlir. Narkomanların toruna ən çox düşən isə yeniyetmələr və gənclər olur.
Narkomaniya ilə mübarizədə dövlət səviyyəsində bir çox tədbirlər görülsə də, təəssüf ki, bu bəla nəinki azalmır, hətta onun yaşı cavanlaşır. Yəni daha çox azyaşlılar narkomanların və digər dələduzların toruna düşürlər. Ona görə ki, bu, qonşu ölkələrdəki bəzi dairələrin marağına uyğundur. Daha ətraflı »

10 mart 2026-cı il tarixində YAP Tərtər rayon təşkilatının inzibati binasında təşkil olunan görüşdə Tərtər rayon İcra Hakimiyyətinin başçısı Müstəqim Məmmədov, YAP Tərtər rayon təşkilatının sədri Eldar Əsədov və partiya veteranları – Tərtərçay Hidroqovşağı İstismarı İdarəsi ərazi partiya təşkilat sədri Nəbiyev Əbilfəz Salman oğlu, Borsunlu ərazi partiya təşkilat sədri Orucov İlqar Məmməd oğlu və Partiya veteranı Əliyev Eldəniz Hüseyn oğlu iştirak ediblər .

Tərtər Rayon İcra Hakimiyyətinin başçısı Müstəqim Məmmədov Yeni Azərbaycan Partiyasının veteranların dövlətə sadiqliyini yüksək qiymətləndirərək, onların rayonun ictimai-siyasi həyatındakı aktivliyinin vətəndaş-partiya münasibətləri üçün mühüm dayaq olduğunu bildirmişdir.

Partiya veteranları Partiyanın yaradıldığı illərdən, keçdikləri şərəfli yoldan bəhs etmişlər. Göstərilən diqqətin onlara böyük mənəvi ruh verdiyini vurğulayıblar.

Sonra YAP Tərtər rayon təşkilatının sədri Eldar Əsədov yubilyarları təbrik edib, onların mənalı ömür yolu və rayonun ictimai-siyasi həyatındakı xidmətlərindən bəhs edib. Yeni Azərbaycan Partiyasının ən çətin dövrlərində fədakarlıq göstərən bu insanların təcrübəsinin gənclər üçün böyük örnək olduğunu qeyd etmişdir.

Görüşün sonunda yubilyarlara qiymətli hədiyyələr təqdim edilmiş və xatirə şəkli çəkilmişdir.

Azərbaycan Respublikasının Prezidenti cənab İlham Əliyevin müvafiq Sərəncamı ilə 2026-cı ilin ölkəmizdə “Şəhərsalma və Memarlıq İli” elan edilməsi respublikamızın hər yerində olduğu kimi, Tərtər rayonunda da böyük ruh yüksəkliyi ilə qarşılanıb. Bu mühüm sənəddən irəli gələn vəzifələrin icrası məqsədilə Tərtər Rayon İcra Hakimiyyəti tərəfindən təsdiq edilmiş Tədbirlər Planına uyğun olaraq, rayon ərazisində genişmiqyaslı abadlıq-quruculuq və yaşıllaşdırma işləri uğurla davam etdirilir.

Növbəti belə tədbir bu gün Tərtər şəhərinin Heydər Əliyev prospektində təşkil olunan ağacəkmə aksiyası ilə gerçəkləşib. Aksiyada Tərtər Rayon İcra Hakimiyyətinin başçısı Müstəqim Məmmədov, 9 saylı Regional Ekologiya və Təbii Sərvətlər İdarəsinin və 9 №li Avtomobil Yollarının Yaşıllaşdırılması MMC-nin əməkdaşları fəal iştirak ediblər.

Aksiyada çıxış edən Rayon İcra Hakimiyyətinin başçısı Müstəqim Məmmədov bildirib ki: “Möhtərəm Prezidentimiz tərəfindən 2026-cı ilin ‘Şəhərsalma və Memarlıq İli’ elan olunması şəhərlərimizin estetik görünüşünün modernləşdirilməsi və ekoloji mühitin sağlamlaşdırılması istiqamətində atılan tarixi bir addımdır. Bu il çərçivəsində keçirdiyimiz aksiyanın əsas məqsədi Tərtərin simasını daha da gözəlləşdirmək, ekoloji tarazlığı bərpa etmək və gələcək nəsillərə daha təmiz, yaşıllıqlar içində bir şəhər miras qoymaqdır. Bizim hər bir əkdiyimiz ağac həm təbiətə töhfə, həm də şəhərsalma mədəniyyətimizin tərkib hissəsidir. Tərtər hər zaman öz yaşıllığı və səliqəsi ilə seçilməli, müasir memarlıq tələbləri ilə təbiətin harmoniyasını özündə birləşdirməlidir.”

Aksiya zamanı Heydər Əliyev prospektində rayonun iqlim şəraitinə uyğun olan 200 ədəd Eldar şamı əkilib. Yeni əkilən tinglər suvarılıb, ərazidəki mövcud ağacların dibi yumşaldılaraq onlara aqrotexniki qaydada qulluq göstərilib. Eyni zamanda, küçə boyunca təmizlik işləri aparılıb.

Qeyd edək ki, “Şəhərsalma və Memarlıq İli” çərçivəsində Tərtər rayonunda yaşıllaşdırma və abadlıq işləri il boyu davam etdiriləcək.

“Dünya cənnətə dönsə də,
qəhrəman Tərtərin əvəzi yoxdu”

Mehriban Abdullayeva Azərbaycanın həm coğrafi, iqtisadi və həm də qədimliyi ilə fərqli olan Tərtər rayonunda zəhmətkeş ailəsində anadan olub. Bir müddət Moskva şəhərində yaşayıb. 8 Mart Qadınlar bayramı ərəfəsində Mehriban xanımla əlaqə saxlayıb özü haqqında danışmasını xahiş etdik. O dedi:
–Hal-hazırda Azərbaycanda məskən salmağa çalışıram. Dünya cənnətə dönsə də, Qəhrəman Tərtərin əvəzi yoxdur. Fəxr edirəm ki, Azərbaycanlıyam! Fəxr edirəm ki, Qəhrəman Tərtərin bir zərrəsiyəm!
Babalarım və ana nənəm əslən Qərbi Azərbaycanın Qarakilsə rayonunda dünyaya göz açmışlar. Babala-rımın nəsil səcərəsi Urud və Comədli kəndlərini, ana nənəmin nəsil səcərəsi isə Comərdli və Darabas kənd-lərini əhatə edir. Ata tərəfdən nənəm isə Şuşa bəylərindən olan Mirzə Əliyar bəyin nəslindəndir.
Babalarım yağılar tərəfindən dəfələrlə depressiyaya məruz qalmış, doğma el-obasından didərgin düşmüşlər. İnqilabdan əvvəl Bakıda neft buruqlarında çalışan babalarım sovet hakimiyyəti illərində rayonlara kolxoz quruculuğuna göndərilmişlər. Ana babam Tərtərdə (Mirbəşir), ata babam isə Şəkidə çalışmışlar.
Ana babam Niftalı Həsənov Tərtərdə son illərə qədər Narçılıq sovxozu kimi fəaliyyət göstərən kəndləri əhatə edən 5-6 kənddə, xüsusilə, Leninabad kəndində (indiki Ələsgərli) tanınır, cəsarətlə deyə bilərəm ki, Ələsgərli kəndində təməl daşı qoymuş şəxsiyyətlərdən biri kimi tanınır. Babamın sağlığında Qərbi Azərbaycandan gələnlərin böyük əksəriyyəti onun evində qonaq olarmış. Daha ətraflı »

Problemlərin operativ həlli məmnunluqla qarşılanır

Tərtər Rayon İcra Hakimiyyətinin başçısı Müstəqim Məmmədovun rayonumuzun kəndlərində və şəhərdə keçirdiyi səyyar qəbul-görüşlərin hər biri problemlərin həll olunması, operativ tədbirlərin görülməsi ilə sakinlərin yaddaşında qalır.
Belə ki, Zolgəran, Hacıqərvənd və Köçərli kəndlərində keçirilən qəbullardan sonra sakinlərin müraciətləri əsasında Tərtər Su Meliorasiya Sistemləri İstismarı İdarəsi tərəfindən xüsusi texnikalar vasitəsilə bu kəndlərdən keçən suvarma arxları təmizlənərək qaydaya salınıb. Bu isə öz növbəsində əkinlərin suvarılmasını daha operativ həyata keçirməyə və sudan qənaətlə istifadə edilməsinə şərait yaradıb.
Qəbula gələn şəhər sakini Ətlas Quliyeva isə qəzalı vəziyyətdə olan su borusunun təmir olnmasını xahiş etmişdir. Rayon rəhbərinin tapşırığı əsasında Tərtər Su Meliorasiya Sistemlərinin İstismarı İdarəsi tərəfindən həmin müraciət qısa müddətdə həllini tapıb.
Seydimli kənd sakinlərinin xahişi ilə 3000 metr məsafədə kəndin daxili yollarına çınqıl verilərək hamarlanıb.
Həyat varsa, problemlər də olur, nöqsanlar da. Əsas məsələ bunlara yanaşmadır. Vətəndaşların rayon rəhbəri ilə görüşləri zamanı onların qaldırdıqları məsələlərə həsas münasibət göstərilməsi məmnunluqla qarşılanır.

“YENİ TƏRTƏR”

Tərtər şəhərinin şəhid Maarif Mustafayev küçəsində asfalt örtüyünün salınması işlərinə başlanılıb

2026-cı ilin ilk günlərindən etibarən, “Şəhərsalma və Memarlıq İli” çərçivəsində Tərtər şəhərinin infrastrukturunun müasirləşdirilməsi, abadlıq və quruculuq tədbirləri geniş vüsət alıb. Hazırda şəhər daxilində yol infrastrukturunun yenilənməsi, küçə işıqlandırılması sistemlərinin bərpası və yol kənarlarında yeni yaşıllıq zolaqlarının salınması istiqamətində kompleks işlər həyata keçirilir.
Bu tədbirlər çərçivəsində şəhərin şəhid Maarif Mustafayev küçəsində yeni asfalt örtüyünün salınması prosesinə başlanılıb. İşlərin ilkin mərhələsində yol yatağı qum-çınqıl qarışığı ilə doldurularaq xüsusi texnikalar vasitəsilə kipləşdirilir və hamarlanır. Hazırlıq mərhələsindən sonra küçəyə ümumilikdə 3150 kvadratmetr sahədə yeni asfalt örtüyü döşənir. Layihənin əsas üstünlüklərindən biri də odur ki, asfaltlanma ilə paralel olaraq küçədəki mövcud elektrik, qaz, su və telekommunikasiya xətləri də yenilənərək qaydaya salınır.
Yaxın günlərdə şəhərin yol-nəqliyyat strukturunun təkmilləşdirilməsi məqsədilə Elman Mehdiyev, Polad Ərəbov və Hüseyn Cavid küçələrində, eləcə də Cavanşir küçəsinin 3-cü, Elman Səfərov küçəsinin isə 1, 2, 3, 4 və 5-ci döngələrində də asfaltlanma işlərinə başlanılması nəzərdə tutulub. Görülən bu işlər şəhərin estetik görünüşünün yaxşılaşdırılması ilə yanaşı, sakinlərin gediş-gəlişinin və gündəlik həyat şəraiti-nin daha da rahatlaşmasına xidmət edir.

Tərtər Rayon İcra Hakimiyyətinin təsdiq etdiyi Tədbirlər Planına uyğun olaraq Tərtər Rayon İcra Hakimiyyətinin təşkilatçılığı ilə Tərtər şəhəri ərazisində növbəti iməcilik aksiyası keçirilib.
İməcilikdə Tərtər Şəhər Kommunal Təsərrüfatı İdarəsinin və DOST İş Mərkəzinin işçiləri fəal iştirak ediblər.
Aksiya zamanı ərazi süpürülərək məişət tullantılarından, qurumuş yarpaq və budaqlardan təmizlənib, toplanmış tullantılar xüsusi qaydada daşınaraq ərazidən uzaqlaşdırılıb. Həmçinin ağaclar suvarılıb, alaq otları biçilib, ətrafda səliqə-sahman yaradılıb və ümumi abadlıq işləri görülüb.

Tərtər Rayon İcra Hakimiyyətinin başçısı Müstəqim Məmmədov rayon polis şöbəsinin qərərgah rəisi Ruslan Allahverdiyev, YAP Tərtər Rayon Təşkilatının sədri Eldar Əsədov, rayon Ağsaqqallar şurasının sədri Faiq Məmmədov, birlikdə 177 şagirdin təhsil aldığı Qaraağacı kənd tam orta məktəbində mövcud şəraitlə tanış olub.

Məktəbdə tədris və təlim-tərbiyə prosesinin təşkili, maddi-texniki baza və yaradılmış şəraitlə bağlı rayon rəhbərinə məlumat verilib. İcra başçısı məktəbin pedaqoji və şagird kollektivi ilə görüşüb, onların qayğıları ilə maraqlanıb.

Rayon rəhbəri tədris prosesinin səmərəliliyinin artırılması məqsədilə müvafiq tövsiyələr verib, şagirdlərin dərsdən yayınma hallarına yol verilməməsinin, valideynlərlə əlaqələrin gücləndirilməsinin, valideyn komitələrinin bu işə cəlb olunmasının vacibliyini qeyd edib. Eyni zamanda gündəlik sanitar-gigiyenik qaydalara riayət olunmasının əhəmiyyəti vurğulanıb.

Görüş zamanı 44 günlük Vətən müharibəsində Azərbaycan Ordusunun qazandığı Qələbə və ölkəmizin ərazi bütövlüyü uğrunda şəhidlik zirvəsinə ucalan qəhrəmanların xatirəsi yad edilib. Şəhidlərin həyat və döyüş yolunun gənc nəslin vətənpərvərlik ruhunda tərbiyəsində mühüm rol oynadığı bildirilib.

Sonda məktəbin pedaqoji kollektivi təhsilin inkişafına göstərilən dövlət qayğısına görə Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya minnətdarlıqlarını bildiriblər.