Azərbaycan Respublikasında 2025-ci ilin “Konstitusiya və Suverenlik İli” elan edilməsi, ölkəmizin dövlətçilik tarixində mühüm hadisə kimi qiymətləndirilir. Bu qərar, həm hüquqi dövlət quruculuğu prinsiplərinin möhkəmləndirilməsi, həm də xalqımızın milli suverenlik uğrunda apardığı mübarizənin əbədiləşdirilməsi baxımından dərin məna daşıyır. Prezident İlham Əliyevin 28 dekabr 2024-cü il tarixli sərəncamı ilə bu ilin belə bir ad altında elan edilməsi, həm tarixi hadisələrin qeyd olunması, həm də gələcəyə yönəlmiş hüquqi və siyasi mesajlar baxımından böyük əhəmiyyət daşıyır.
Azərbaycan Respublikasının ilk müstəqil Konstitusiyası 1995-ci il noyabrın 12-də ümumxalq səsverməsi ilə qəbul edilmişdir. Bu sənəd müasir Azərbaycan dövlətçiliyinin hüquqi əsasını təşkil edir. Konstitusiyanın qəbulu ilə Azərbaycan hüquqi, demokratik və dünyəvi dövlət kimi öz inkişaf yolunu müəyyən etmişdir.
Eyni zamanda, ölkəmiz suverenliyini bərpa etdikdən sonra bir çox çətinliklərlə üzləşmişdir. 1990-cı illərin əvvəllərində torpaqlarımızın 20 faizinin işğal altında qalması suverenliyimizin tam təmin olunmasına maneə törədirdi. Lakin 2020-ci ildə baş vermiş 44 günlük Vətən Müharibəsi, Azərbaycan Ordusunun parlaq Qələbəsi nəticəsində torpaqlarımız işğaldan azad olundu, dövlətimizin suverenliyi və ərazi bütövlüyü bərpa edildi. Bu, müasir tariximizin ən şanlı səhifələrindən biridir. Daha ətraflı »

Hər il 20 oktyabr tarixində dünya ölkələri Ümumdünya Statistika Gününü qeyd edir. Bu əlamətdar gün BMT tərəfindən 2010-cu ildə təsis olunmuşdur və statistik məlumatların cəmiyyətin inkişafında oynadığı mühüm rolu vurğulamaq məqsədi daşıyır. Statistika – təkcə rəqəmlər toplusu deyil, həm də düzgün qərarların qəbul olunması üçün əsas vasitədir.
Azərbaycan Respublikasında da rəsmi statistika sistemi daim inkişaf edir. Dövlət Statistika Komitəsi və onun regional qurumları, o cümlədən Tərtər Rayon Statistika İdarəsi, sosial-iqtisadi göstəriciləri mütəmadi olaraq toplayır, təhlil edir və ictimaiyyətə təqdim edir.
Müasir dövrdə etibarlı və şəffaf statistik məlumatlar dövlət siyasətinin planlaşdırılmasında, sahibkarlığın inkişafında və əhalinin rifah halının qiymətləndirilməsində həlledici rol oynayır. Statistika həm də ictimai nəzarətin gücləndirilməsinə, vətəndaş cəmiyyətinin məlumatlı olmasına xidmət edir.
Tərtər rayonunda həyata keçirilən sosial-iqtisadi islahatların nəticələrinin qiymətləndirilməsi də məhz statistik göstəricilər vasitəsilə mümkün olur. Əhalinin məşğulluq səviyyəsi, kənd təsərrüfatının inkişafı, infrastruktur layihələrinin icrası və digər sahələr üzrə toplanan məlumatlar gələcək planlaşdırmalar üçün əsas mənbədir.
Statistika – keçmişi anlamaq, bu günü dəyərləndirmək və gələcəyi planlamaq üçün əvəzolunmaz vasitədir. Bu gün statistik xidmətlərin keyfiyyətinin artırılması və rəqəmsallaşma proseslərinin sürətləndirilməsi dövlət siyasətinin əsas istiqamətlərindəndir.

Rəis müavini İradə Rəfiyeva
05.09.2025-ci il

Böyük qələbəmizə doğru ilk addımın atıldığı gün xalqımızın yaddaşından heç zaman unudulmayacaq. Qəhrəmanlıqları ilə dastana çevrilmiş Azərbaycan övladlarının Vətən savaşındakı şücaəti, əzmkarlığı nəsillərə örnək olacaq. Şəhidlərimizin əziz xatirəsi hər zaman anılacaq, onların igidlik hekayələri dillərdə dolaşacaq.

Xalqımız sentyabrın 27-də Ermənistan silahlılarının növbəti təxribatına cavab olaraq ordumuza hücum əmri verən və bununla regionda yeni bir reallıq yaradan Ali Baş Komandan İlham Əliyevin qətiyyəti, əsgər və zabitlərimizlə birgə Vətənə bəxş etdiyi tarixi Qələbə ilə daim qürur duyacaq.

Son bir neçə əsrlik tariximizdə buna bənzər zəfər olmayıb!

Prezident İlham Əliyev iki əsr ərzində yeganə ağır problemimiz olan Qarabağ münaqişəsini həll edə bildi. Yoluna qoyulması mümkün olmayan, hər dəfə yenidən alovlananda minlərlə insanın, ailənin faciəsi ilə nəticələnən, regionun bu günü və gələcəyi üçün ən böyük təhdid kimi qalan bu münaqişəni “dəmir yumruğ”un zərbəsi ilə cəmi 44 gündə həll etdi.Bu, qürurun, fəxarətin iztirablara üstün gəldiyi, xalqımızın keçmişinə boylanaraq öz böyüklüyünü bütün əzəməti ilə dərk etdiyi gündür.

Xalqımızın and yerinə çevrilən doğma torpaqlarımızın 30 il ərzində düşmən əsarətində qalması illərdən bəri qəlbimizdə dərin izlər yaratmışdı. Öz liderinin ətrafında sıx birləşən xalqımız bu həsrətə 27 sentyabr 2020-ci il tarixdə son qoydu. Bu əlamətdar gün xalqımızın çoxdan gözlədiyi Zəfər yolunun başlanğıcı kimi Azərbaycan tarixinə qızıl hərflərlə yazıldı. Dövlət başçımız, Ali Baş Komandan İlham Əliyevin rəhbərliyi ilə 44 gün davam edən Vətən müharibəsi ordumuzun qüdrətini, döyüş ruhunu, eləcə də xalqı­mızın sarsılmaz birliyini, doğma yurdu, torpağı uğrunda mübarizə əzmini bütün dünyaya nümayiş etdirdi. Daha ətraflı »

200 ildən çox davam edən düşmənçilik siyasətinə döyüş meydanında cavab verildi

Azərbaycan Respublikasının Prezidenti, Müzəffər Ali Baş Komandan İlham Əliyev deyib: “Əziz həmvətənlər, Anım Günündə bütün şəhidlərimizin xatirəsi qarşısında, Birinci və İkinci Qarabağ müharibələrinin şəhidlərinin ruhu qarşısında bir daha baş əyir, onlara Allahdan rəhmət diləyirəm. Onların yaxınlarına, qohumlarına deyirəm ki, mən demişdim, onların qanı yerdə qalmayacaq və qalmadı. Biz onların qanını aldıq! Mən demişdim ki, biz onların qisasını döyüş meydanında alacağıq, belə də oldu. Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir. Onların qəhrəmanlığı, onların şücaəti, fədakarlığı artıq dastana çevrilib.”

Rəsmi İrəvan Azərbaycana qarşı uzun illər ərzində düşmənçilik siyasəti aparırdı. Tarixi Azərbaycan torpağı olan Qarabağa ermənilərin çar Rusiyası zamanı köçürüldüyü dövrdən etibarən xalqımıza qarşı başlamış düşmənçilik siyasəti 200 ildən çox davam edirdi. Ermənilər Azərbaycan ərazisində məskunlaşdıqları dövrdən etibarən xalqımızın toponimlərini dəyişməyə başlamış, münbit əraziləri ələ keçirməyə çalışmış və əksəriyyət təşkil etdikləri yaşayış məntəqələrində azərbaycanlıları sıxışdırmışlar.

Daşnaksutyun siyasəti İfrat millətçilik üzərində qurulmuşdur. Rusiya inqilablarının yaratdığı şəraitdən sui-istifadə edərək erməni qəsbkarları 1905-1907-ci və 1918-ci illərdə yüz minlərlə soydaşımızı vəhşicəsinə qətlə yetirmişlər. 1918-1920-ci illər isə xalqımızın yaddaşında erməni silahlı quldur dəstələrinin xüsusi qəddarlığı ilə yadda qalmışdır. Həmin illərdə İrəvanda, Dərələyəzdə, Zəngəzurda, Göyçədə, Tiflisdə, Naxçıvanda, Bakıda, Gəncədə, Şamaxıda, Qubada, Lənkəranda, Qarabağda, Muğanda, Göyçayda on minlərlə dinc azərbaycanlı əhali soyqırımına məruz qalmış, yaşadıqları yerlərdən qovulmuş, onlara işgəncələr verilmiş, yüzlərlə yaşayış məntəqəsi dağıdılıb yerlə yeksan edilmişdir. Daha ətraflı »

Azərbaycanda Xankəndi, Xocalı, Xocavənd və Ağdərə şəhərləri günü artıq ikinci ildir ki, qeyd olunur. Prezident İlham Əliyevin 2024-cü il sentyabrın 18-də imzaladığı Sərəncama əsasən, hər il sentyabrın 20-də Xankəndi, Xocalı, Xocavənd və Ağdərə günü təntənəli şəkildə qeyd edilir.
Bu əlamətdar günün təsis olunması uzun və məşəqqətli 30 il, minlərlə azərbaycanlı igidin canları və qanları bahasına başa gəlmişdir. Bu günün təsis edilməsi həmçinin Ermənistanın və qondarma Dağlıq Qarabağın terrorçu silahlı dəstələrinin tör-töküntülərinin tərk-silah edilərək ərazilərimizdən birdəfəlik çıxarılması ilə bağlıdır.
Azərbaycan Prezidenti, Silahlı Qüvvələrin Ali Baş Komandanı İlham Əliyev 2023-cü il oktyabrın 15-də Xankəndi, Xocalı, Xocavənd və Ağdərə şəhərlərində Azərbaycan Respublikasının Dövlət Bayrağını ucaltdı.
“Bu gün tarixi bir gündür. Bu gün Xankəndi şəhərinin mərkəzi meydanında Azərbaycan Bayrağı qaldırıldı. Bu münasibətlə bütün Azərbaycan xalqını ürəkdən təbrik edirəm.
Düz 20 il bundan əvvəl Azərbaycan xalqı mənə böyük etimad göstərərək prezident seçkilərində prezident vəzifəsinə seçmişdir. O vaxt doğma xalqıma müraciət edərək söz vermişdim ki, Azərbaycan xalqının və Azərbaycan dövlətinin milli maraqlarını müdafiə edəcəyəm, Azərbaycanın ərazi bütövlüyünü qoruyacağam. Konstitusiyaya və “Qurani-Kərim”ə əl basaraq and içmişdim. Şadam ki, son 20 il ərzində verdiyim bütün vədlər, qarşıma qoyduğum bütün vəzifələr icra edildi.
Bu gün bütün Azərbaycan xalqı ürəkdən sevinir, bütün Azərbaycan xalqı “Allaha şükür” deyir. Bu günü biz 30 ildən çox gözləmişdik. Ancaq hər birimiz, əminəm və inanırdıq ki, bu gün gələcək.
İyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır” – deyə Prezident İlham Əliyev çıxışında bildirib. Daha ətraflı »

“Allah bütün şəhidlərimizə rəhmət eləsin! Biz onların ruhu qarşısında baş əyirik. Biz Azərbaycan xalqı olaraq onlara əbədi borcluyuq… Azərbaycan əsgəri, zabiti əsl qəhrəmanlıq, vətənpərvərlik, fədakarlıq göstərmişdir. Biz Ordumuzla, Silahlı Qüvvələrimizlə fəxr edirik, onlar bizim qürur mənbəyi-mizdir. Təkcə Azərbaycan vətəndaşları yox, əminəm ki, dünyada yaşayan on milyonlarla azərbaycanlı Azərbaycan əsgəri və zabiti ilə, Azərbaycan dövləti ilə haqlı olaraq fəxr edir.”
                                                                                                                       İlham Əliyev, Azərbaycan Respublikasının Prezidenti

Fəxr edirik ki, Azərbaycan xalqı öz müstəqil dövlətinə sahibdir

Azərbaycan Respublikasının Prezidenti İlham Əliyevin 19 sentyabr 2024-cü il tarixli Sərəncamı ilə hər il sentyabrın 20-si Azərbaycan Respublikasında Dövlət Suverenliyi Günü kimi qeyd edilir. Sərəncamda deyilir: “Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, mərhumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir.”
Suverenliyimizin, ərazi bütövlüyümüzün bərpa edildiyi günü 30 ildən çox bir müddətdə gözləmişdik! Nə BMT-nin 4 qətnaməsi, nə ATƏT-in Minsk qrupu bu məsələnin həllində bizə kömək etmədi. Çünki dünyada ikili standartlar var.
Ulu Öndər Heydər Əliyevin hakimiyyətə gəlişi ilə sönməkdə olan ümidlərimiz gücləndi. Xalq öz xilaskarına inandı və ona güvəndi.
Ümummilli Liderin siyasi varisi, müzəffər sərkərdə ilham Əliyevin ətrafında “dəmir yumruq” kimi birləşən xalq, “Ya Qarabağ”, ya “ölüm” deyərək savaşa başladı və 44 gün ərzində erməni mifi darmadağın oldu, düşmən kapitulyasiya aktını imzaladı. Bu-nunla da Azərbaycan öz torpaqlarını işğaldan azad edərək ərazi bütövlüyünün bərpasına və BMT Təhlükəsizlik Şurasının qətnamələrinin yerinə yetirilməsinə nail oldu.
2023-cü il sentyabrın 19-da Qarabağda Azərbaycanın Suveren hüquqlarının bərpa edilməsi məqsədilə antiterror əməliyyatına başlanmışdır. Cəmi 23 saat davam etmiş əməliyyat nəticəsində Azərbaycan Ordusu növbəti parlaq qələbə qazanmış və Azərbaycan Respublikasının suverenliyi tam bərpa edilmişdir.
Qürurverici haldır ki, indi ölkəmizin bütün ərazilərində Azərbaycan bayrağı qürurla dalğalanır.
Suverenlik günümüz mübarək!

“YENİ TƏRTƏR”

Uzun illər ərzində intiqam gününü bütün xalq gözləyirdi. Xocalıda insanlığa sığmayan vəhşiliklərlə üzləşənlər, övladları şəhidlik zirvəsinə ucalanlar, ev-eşiklərini qoyub didərginlik həyatı yaşayanlar belə bir günün gələcəyinə inanırdılar. İnanırdılar, çünki müzəffər Ali Baş Komandan İlham Əliyev demişdi ki, “Nəyi, necə, nə vaxt etmək lazımdır, bunu mən bilirəm”.
5 il əvvəl sentyabrın 27-si intiqamı-mızın başlanğıc günü oldu. Diplomatiyanın, beynəlxalq təşkilatların öhdəsindən gələ bilmədiyi bu məsələni Azərbaycan Respublikasının Prezidenti İlham Əliyevin rəhbərliyi altında şanlı Azərbaycan Ordusu 44 gün ərzində həll etdi.
Müharibə özü ilə bərabər fəlakət gətirsə də, torpaqlarımızın işğaldan azad edilməsi uğrunda döyüş əməliyyatlarını xalqımız ruh yüksəkliyi ilə qarşıladı.
Hamı bir yumruq kimi Prezidentimizin ətrafında bilrləşdi.
Həmin günlərdə Tərtər də həm ağır, həm də qürurverici anlar yaşadı. Müharibənin elə əvvəlindən şəhidlərimizi qarşılamağa başladıq. Göydən mərmi yağışı yağırdı, tərtərlilər isə öz igid oğullarını böyük hörmətlə, izdihamla son mənzilə yola salırdılar.
Hərbçilərimizlə yanaşı, mülki insanlar da şəhid olurdular. Ölümcül silahlar onları küçədə, öz həyətlərində, evlərində tapırdı. Bizim bir gözümüz ağlayır, o biri gözümüz gülürdü. Cəbhədən gələn xəbərlər ümidlərimizi artırır, hamını səfərbər edirdi. Şəhidini qarşılayan ailələr, evi dağılan insanlar, hamı “Vətən sağ olsun!”, deyib, düşməndən intiqam alınması haqqında xəbərlərdən ruhlanırdı.
Bəli, biz düşməndən intiqamımızı döyüş meydanlarında aldıq. Hər qarışı müqəddəs olan torpaqlar işğaldan azad edildi və ötən beş il ərzində dünyanı heyran qoyan quruculuq işləri başladı. Xalqımızın illərlə həsrətində olduğu dədə-baba yurdlarına Böyük Qayıdışı insanların sonsuz sevincinə səbəb oldu. Daha ətraflı »

SUVERENLİYİMİZ UĞRUNDA ŞƏHİD OLDULAR

Azərbaycan Respublikası Konstitusiyasının qəbul edilməsinin 30-cu ildönümü və 27 sentyabr–Anım Gününün beşinci ildönümünün qeyd olunması ilə bağlı Tərtər Rayon İcra Hakimiyyətnin başçısı Müstəqim Məmmədov Evoğlu kəndində Vətən Müharibəsi şəhidləri Ceyhun Hacızadənin atası İfrayil Hacıyev, anası Qətibə Hacıyeva, Fuad Məhərrəmlinin atası Habil Məhərrəmov, anası Elza Məhərrəmova, Mürşüd Əhmədzadənin nənəsi Çiçək Əhmədova, Məftun Əhmədzadənin atası Seymur Əhmədov, anası Pərvanə Əhmədova, Rəşad Vəlizadənin anası Bəsti Həşimova və üçüncü dərəcəli Vətən Müharibəsi əlilləri Məhəbbət Niftalıyev, Nurlan Məhərrəmli ilə görüşüb.
Görüşdə YAP Tərtər Rayon Təşkilatının sədri Eldar Əsədov, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Pərviz Hüseynov, Mərkəzi Aran Regional Enerji Təchizatı və Satışı İdarəsi Tərtər Elektrik Şəbəkəsinin rəisi Vilayət Qafarov, Tərtər Regional Qaz İstismarı İdarəsinin Tərtər Xidmət Sahəsi üzrə rəis müavini Bilal Musayev, Tərtər Su Meliorasiya Sistemlərinin İstismarı İdarəsinin rəisi Murad Zeynalov, Əmək və Əhalinin Sosial Müdafiəsi Nazirliyinin yanında Dövlət Məşğulluq Agentliyinin Tərtər Rayon Xidmət şöbəsinin rəisi Ağamoğlan İsmayılov, İƏD üzrə nümayəndə və bələdiyyə sədri iştirak ediblər.
Görüşdə rayon rəhbəri tərəfindən şəhid ailələri və qazilər diqqətlə dinlənilib, onların qaldırdıqları məsələlərin tez bir zamanda həll olunması üçün aidiyyəti şəxslərə müvafiq tapşırıqlar verilib.
* * *
Rəşad Vəlizadənin anası Bəsti Həşimova deyib:
– Rəşad dünyaya gələndə arzu etdik ki, xeyirli övlad olsun. Onu bu istəklə böyütdük. Bilirdik ki, ümidlərimizi doğruldacaq. Ancaq bilmirdik ki, təkcə ailəmiz üçün yox, Vətənimiz, xalqımız üçün xeyirli övlad olacaq bizim Rəşad! Daha ətraflı »

20 sentyabr – Azərbaycan Respublikasının Suverenliyi Günü və 27 sentyabr – Anım Günü ərəfəsində Tərtər Rayon İcra Hakimiyyətinin Başçısı Müstəqim Məmmədov Kəngərli kəndində Vətən müharibəsi şəhidləri Səbuhi Məmmədovun atası Zahid Məmmədov, anası Günay Məmmədova, Elmin Quluzadənin atası Şəmsi Quluyev, Qənbər Qənbərlinin atası Bəhruz Qasımov, Elşad Abbaszadənin atası Raqub Abbasov və ikinci dərəcəli müharibə əlili Elşad Məmmədovla görüşüb. Görüşdə YAP Tərtər rayon təşkilatının sədri Eldar Əsədov, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Pərviz Hüseynov, xidmət təşkilatlarının rəhbərləri, mətbuat nümayəndələri iştirak ediblər.
Əvvəlcə tədbir iştirakçıları kənddə şəhidlərin xatirəsinə ucaldılmış abidəni ziyarət edib, önünə gül dəstələri düzüblər.
Görüşdə çıxış edən rayon rəhbəri Müstəqim Məmmədov bütün şəhidlərimizə Allahdan rəhmət diləyib və bildirib ki, biz onların ruhu qarşısında baş əyirik. Bugünkü xoşbəxt həyatımıza, suveren və müstəqil Azərbaycanın vətəndaşları olduğumuza görə onlara əbədi borcluyuq. Azərbaycan Respublikasının Prezidenti, müzəffər Ali Baş Komandan İlham Əliyev daim öz çıxışlarında göstərir ki, “Azərbaycan əsgəri , zabiti əsl qəhrəmanlıq, vətənpərvərlik, fədakarlıq göstərmişdir. Biz ordumuzla, Silahlı Qüvvələrimizlə fəxr edirik, onlar bizim qürur mənbəyimizdir.”
Azərbaycanın Birinci vitse-prezidenti Mehriban xanım Əliyevanın şəhid vali-deynlərinə, onların həyat yoldaşlarına, qazilərimizə münasibəti hər kəsə nümunədir. Daha ətraflı »

Xalqımızı azadlığa, suverenliyə qovuşduran, torpaqlarımızın işğaldan azad olunması ilə nəticələnən 44 günlük Vətən müharibəsinin başladığı tarixdən 5 il ötür. Bu illər ərzində şəhid ailələrinin həyatında həm kədərli, həm sevincli hadisələr çox olub. Kiminin övladı ali məktəbə qəbul olub, kimininki ilk dəfə əlinə çanta alıb 1-ci sinfə gedib, hansısa ailədə yas mərasimi düşüb… Bütün bu hallarda şəhid valideynləri, onların yoldaşları tək olmayıblar. Prezident İlham Əliyevin, ölkənin Birinci vitse-prezidenti Mehriban xanım Əliyevanın bir vəzifə olaraq qarşıya qoyduqları tapşırıqları və hər kəsin qəlbindən gələn bir istəklə rayon rəhbəri Müstəqim Məmmədov, YAP rayon təşkilatının sədri Eldar Əsədov, rayonun idarə və müəssisə rəhbərləri daim xeyirdə də, şərdə də onların yanında olub, narahatçılıq, problem yarananda aradan qaldırıb, kömək əllərini uzadıblar.
Bütün bunlar barədə rayon rəhbəri Müstəqim Məmmədovun Qaynaq və Yuxarı Qapanlı kəndindən olan şəhid ailələri və qazilərlə keçirilən görüşdə söhbət gedib. Görüşdə rayon rəhbəri ilə birlikdə YAP Tərtər Rayon Təşkilatının sədri Eldar Əsədov, Mərkəzi Aran Regional Enerji Təchizatı və Satışı İdarəsi Tərtər Elektrik Şəbəkəsinin rəisi Vilayət Qafarov, Tərtər Regional Qaz İstismarı İdarəsinin Tərtər Xidmət Sahəsi üzrə rəis müavini Bilal Musayev, Tərtər Su Meliorasiya Sis-temlərinin İstismarı İdarəsinin rəisi Murad Zeynalov, Əmək və Əhalinin Sosial Müdafiəsi Nazirliyinin yanında Dövlət Məşğulluq Agentliyinin Tərtər Rayon Xidmət şöbəsinin rəisi Ağamoğlan İsmayılov, “Yeni Tərtər” qəzetinin redaktoru Svetlana Bağırova, İƏD üzrə nümayəndə və bələdiyyə sədri iştirak ediblər.
Əvvəlcə tədbir iştirakçıları kənddə şəhidlərin xatirəsinə ucaldılmış abidəni ziyarət edib, önünə gül dəstələri düzüblər.
İcra başçısı Qaynaq kəndində Vətən Müharibəsi şəhidləri Rüstəm Hacıyevin atası Firqani Hacıyevi, Elməddin Əliyevin anası Samirə Əliyevanı, həyat yoldaşı Səadət Əliyevanı, Cahangir Surxayzadənin atası Hətəm Əliyevi, anası İltifat Qaraşovanı, Həsən Məmmədovun anası Xanım Məmmədovanı və üçüncü dərəcəli müharibə əlili Ümid Müzəffərlini diqqətlə dinləyib. Qaldırdıqları məsələlərin tez bir zamanda həll olunması üçün aidiyyəti şəxslərə müvafiq tapşırıqlar verilib.
* * *
Bu görüş zamanı diqqət çəkən məqamlardan biri şəhid Cahangir Surxayzadənin ailəsindəki iki uşaq oldu. Onlar şəhidin qardaşı uşaqları idi. Biri Cahangirin adını daşıyır və inşallah, böyüyüb əmisi kimi vətənpərvər oğul olacaq. Fatimə isə 44 günlük Vətən müharibəsi zamanı erməni faşistləri Bərdəni atəşə tutduğu gün bu şəhərdəki xəstəxanada dünyaya gəlib. Müharibənin yaşıdıdır. Adını da Cahangir özü qoyub. Söz verib ki, dinc insanlara qarşı törədilən bu vəhşiliyin intiqamını alacaq. Sözünə şərəflə əməl edib.