Azərbaycan qadınının siyasət sahəsindəki rolu hər zaman dərin izlər buraxmış və cəmiyyətin inkişafına müstəsna töhfələr vermişdir. Bu gün Azərbaycanda qadınlar dövlət idarəçiliyində, parlamentdə, beynəlxalq arenada və sosial-siyasi platformalarda söz sahibi olan liderlərdir. Bu ilin 8 Mart – Beynəlxalq Qadınlar Günü münasibətilə Azərbaycan qadınının siyasətdəki mühüm yerini və qürur-verici yolunu nəzərdən keçirərkən qeyd edilməlidir ki, bu yolda ən parlaq nümunə Azərbaycan Respublikasının Birinci vitse-prezidenti, Heydər Əliyev Fondunun rəhbəri Mehriban Əliyeva kimi bir liderin fəaliyyətidir.
Mehriban Əliyeva yalnız Azərbaycanda deyil, dünyada da tanınan bir şəxsiyyət olub, qadınların siyasətdəki potensialını nümayiş etdirmişdir. Onun uzun illər ərzində apardığı sosial, mədəni, humanitar və diplomatik fəaliyyətlər Azərbaycanın beynəlxalq imicini yüksəltmiş, eyni zamanda qadınların liderlik mövqelərində möhkəmlənməsinə böyük dəstək vermişdir.
Mehriban Əliyeva Azərbaycanın birinci vitse-prezidenti olaraq, həm də Azərbaycan qadınının siyasi arenada təsirli rolunun ən yaxşı nümunəsidir. Mehriban Əliyevanın siyasi fəaliyyətinin əsas mərhələsi 2005-ci ildə Azərbaycan Respublikası Milli Məclisinə deputat seçilməsi ilə başlayıb. Parlamentdə olduğu müddətdə o, ölkədə sosial rifahın gücləndirilməsi, ailə dəyərlərinin qorunması və qadın hüquqlarının müdafiəsi sahəsində bir sıra təşəbbüslərlə çıxış edib.
2017-ci ildə Mehriban Əliyeva Azərbaycan Respublikasının Birinci vitse-prezidenti təyin olunaraq ölkənin ən yüksək dövlət idarəçilik strukturlarından birində fəaliyyət göstərməyə başladı. Bu təyinat qadınların dövlət idarəçiliyində mühüm rol oynaya biləcəyini bir daha sübut etdi. Mehriban Əliyeva vəzifəyə gəldikdən sonra sosial rifah siyasətinin gücləndirilməsi, əhalinin həssas təbəqələrinin müdafiəsi və dövlət proqramlarının effektiv icrası istiqamətində mühüm qərarlar qəbul edildi.
Mehriban Əliyevanın siyasətdəki aktivliyi təkcə siyasi sahə ilə məhdudlaşmır. O, ölkədəki qadın hüquqlarının müdafiəsi və təhsildəki gender bərabərliyinin təmin edilməsi sahəsində də müstəsna işlər görür. Onun rəhbərliyi ilə, müxtəlif xeyriyyəçilik layihələri həyata keçirilmiş, Azərbaycanda qadınların sosial-siyasi iştirakını dəstəkləyən bir çox təşəbbüslər həyata keçirilmişdir. Eyni zamanda, Mehriban Əliyeva müasir dövrün ən böyük beynəlxalq xeyriyyə təşkilatlarından biri olan Heydər Əliyev Fondunun prezidenti olaraq mədəniyyət və təhsil sahələrində genişmiqyaslı layihələr həyata keçirmişdir. Mehriban Əliyevanın təşəbbüsü ilə məktəblərin, uşaq bağçalarının, xəstəxanaların tikintisi və yenidən qurulması, aztəminatlı ailələrə, qaçqın və məcburi köçkünlərə dəstək layihələri ölkədə sosial rifahın yüksəlməsinə xidmət etmişdir. Fondun həyata keçirdiyi “Uşaq evləri və internat məktəblərinin inkişafı” proqramı minlərlə uşağın daha yaxşı təhsil və yaşayış şəraitinə qovuşmasına imkan yaradıb. Bununla yanaşı, “Yeniləşən Azərbaycana yeni məktəb” layihəsi çərçivəsində ölkənin müxtəlif bölgələrində yüzlərlə yeni məktəb binası inşa edilib ki, bu da Azərbaycanın təhsil infrastrukturunun inkişafına mühüm töhfədir. Daha ətraflı »

Ailə, Qadın və Uşaq Problemləri üzrə Dövlət Komitəsinin təşkilatçılığı ilə 8 Mart-Beynəlxalq Qadınlar Gününə həsr olunmuş tədbir keçirilib. Tədbir Azərbaycan Respublikasının Dövlət Himninin səsləndirilməsi ilə başlayıb.
Ərazi bütövlüyümüz uğrunda canından keçən Vətən övladlarının və AZAL-a məxsus təyyarənin qəzaya uğraması nəticəsində həlak olanların xatirəsi bir dəqiqəlik sükutla yad edilib.
Sonra Azərbaycan dövlətinin inkişaf tarixi, qadınların dövlətin ictimai-siyasi həyatında və cəmiyyətdə rolu barədə qısametrajlı film nümayiş etdirilib.
Tədbir Azərbaycan Respublikası Prezidenti Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyevanın Prezident cənab İlham Əliyevin qadınlara təbrik məktubunu səsləndirməsi ilə davam edib.
Açılış nitqi ilə çıxış edən Dövlət Komitəsinin sədri Bahar Muradova, ölkə Prezidenti cənab İlham Əliyevə Azərbaycan qadınlarına ünvanladığı təbrik məktubuna görə təşəkkürünü bildirib, 8 Mart – Beynəlxalq Qadınlar Günü münasibətilə bütün qadınları təbrik edib və bu əlamətdar günün qadınlarımızın dövlət və cəmiyyət həyatındakı rolunu, ailədəki əvəzsiz zəhmətini və fədakarlığını vurğulamaq üçün bir fürsət olduğunu qeyd edib. Daha ətraflı »

Prezident İlham Əliyev Şimali Makedoniya Respublikasının Prezidenti Qordana Silyanovska-Davkovanın Azərbaycana səfəri zamanı mətbuata bəyanat verib.

Dövlət başçısı deyib:

Şadam ki, ölkələrimiz arasında siyasi dialoq dinamik xarakter alır. Bizim xanım Prezidentlə ikinci görüşümüz qısa müddət ərzində bunun əyani sübutudur. Siyasi əlaqələrimizin inkişafı üçün əlavə tədbirlər görülməlidir, müvafiq dövlət qurumları təbii olaraq sıx təmasda olmalıdırlar. Eyni zamanda, iqtisadi sahədə, sərmayə qoyuluşu sahəsində imkanlar araşdırılmalıdır. Əfsuslar olsun ki, bu günə qədər ticari-iqtisadi sahədə o qədər böyük nəticələr əldə edilməyib. Ancaq ümid edirəm ki, Sizin rəsmi səfərinizdən və nümayəndə heyətlərinin təmaslarından sonra biz bu boşluğu da dolduracağıq.

Qeyd olunub ki, enerji sahəsində əməkdaşlıq inkişaf edir. Son ayların müsbət əlaməti də ondan ibarətdir ki, iki ölkə energetika sahəsində əməkdaşlığa başlamışdır. Azərbaycan qazı artıq Şimali Makedoniyanın bazarına çatdırılmışdır.

Avropa Azərbaycan qazına ehtiyac duyur.

Təxminən üç il bundan əvvəl Bakıda imzalanmış Avropa İttifaqı ilə Azərbaycan arasında energetika sahəsində strateji tərəfdaşlıq Bəyannaməsi bunun əyani təzahürüdür. Bu gün Azərbaycan qazı bir çox Avropa ölkəsinin enerji təhlükəsizliyini təmin edir və Avropadakı tərəfdaşlarımızın xahişlərinə biz hər zaman böyük diqqətlə yanaşmışıq. Yəni, energetika sahəsində ikitərəfli formatda əməkdaşlıq bizim üçün çox önəmlidir və mən ümid edirəm ki, bu praktiki əməkdaşlıq digər sahələrdə də əməkdaşlığa gətirib çıxaracaq.

Diqqətə çatdırılıb ki, xalqlarımızın humanitar sahədə əməkdaşlığına da böyük ehtiyac var. Prezident İlham Əliyev deyib: Daha ətraflı »

Tarixin bütün dövrlərində Azərbaycan qadını Vətənimizin müdafiəsində yaxından iştirak etmiş, siyasi və dövlət quruculuğu sahəsində əsl vətənpərvərlik nümunələri göstərmişdir. Azərbaycan xalq ədəbiyyatının ən qədim yazılı abidəsi olan “Kitabi-Dədə Qorqud” dastanında Azərbaycan qadınlarının savaş meydanında göstərdiyi şücaət, eyni zamanda Möminə Xatun, Sara Xatun, Nüşabə, Tomris, Nigar, Həcər, Tutu Bikə kimi qəhrəmanlıq nümunəsi olan lider qadınlarımız bunun bariz nümunəsidir.

Azərbaycan qadınları Şərqin ilk demokratik respublikası olan Azərbaycan Xalq Cümhuriyyəti dövründə seçib-seçilmək hüququ qazanaraq ölkəmizin ictimai-siyasi həyatında yaxından iştirak etməyə başlamışlar.

Sürətlə maariflənən qadınlarımız yüz illərdən bəri formalaşmış milli dəyərlərə sadiq qalmaqla ana dilimizin, mədəniyyətimizin və mənəviyyatımızın ən etibarlı dayağı olmuşlar.

Keçmişimizin unudulmaz səhifələrindəki möhkəm iradəyə malik görkəmli qadın şəxsiyyətlərimizin yüksək ləyaqətinin, ağbirçək analarımızın müdrikliyinin daşıyıcıları kimi müasir Azərbaycan xanımları öz dərin zəkaları və tükənməz daxili potensialları ilə bu gün də xalqa və cəmiyyətə fədakarcasına xidmət edirlər. Dünyanın bir çox ölkələrinin qadınlarından əvvəl seçib-seçilmək hüququ əldə etməsi, elm, mədəniyyət və digər sahələrdə qazandığı uğurlar Azərbaycan qadınının mədəni və intellektual potensialından xəbər verir. Daha ətraflı »

Təbrik mətnində deyilir:

Hörmətli xanımlar!

Sizi Beynəlxalq Qadınlar Günü münasibətilə ürəkdən təbrik edirəm. Hamınıza cansağlığı, səadət və işlərinizdə müvəffəqiyyətlər arzulayıram.

Azərbaycan qadınları hər zaman cəmiyyətimizin mənəvi dayağı olmuş, daim ülvi amallarla yaşamışlar. Çoxəsrlik mədəni-mənəvi sərvətlərimizin günümüzədək layiqincə qorunub saxlanılmasında nəcib və gözəl analarımızın misilsiz xidməti vardır. Onlar öz güclü iradələri, vətənpərvərlik və fədakarlıqları ilə yurdumuzun mübarizə salnaməsində silinməz izlər qoymuşlar.

Azərbaycan qadınlarının dünyanın bir sıra qabaqcıl ölkələrinin qadınlarından daha əvvəl seçib-seçilmək hüququ qazanmaları yeni dövr tariximizin əlamətdar faktlarındandır. Mədəniyyət, elm, təhsil və səhiyyənin ən müxtəlif istiqamətləri üzrə müsəlman Şərqinin qadınları arasında ilk addımları atmaları onların yüksək yaradıcı potensialının nəticəsidir. Təqdirəlayiq haldır ki, müasir gənc xanımlarımız bu ənənələrə ehtiram bəsləyir, nəsillərin mənəvi varisliyi prinsipini lazımınca qoruyur, öz maarifpərvər, ziyalı sələflərinin yolunu uğurla davam etdirirlər.

Ötən müddət ərzində milli dövlət quruculuğu prosesində yaxından iştirak edərək bütün sahələrdə əzmlə çalışan qadınlarımız Vətənimizin qüdrətinin artırılması, xalqımızın rifahının yüksəlməsi naminə dolğun və səmərəli fəaliyyət göstərmiş, sosial-iqtisadi və mədəni inkişafda mühüm nailiyyətlər əldə etmişlər.

Müqəddəs ailə dəyərlərimizə dərin sədaqət nümayiş etdirən qadınlarımız ölkəmizin ictimai həyatında böyük nüfuza malikdirlər. Əminəm ki, onlar gənc nəslin Vətənə və milli ideallara bağlılıq ruhunda yetişməsi üçün bundan sonra da qüvvələrini əsirgəməyəcək, həmçinin ictimai-mənəvi mühitimizi yeni töhfələrlə zənginləşdirəcəklər.

Əziz xanımlar!

Bayramınız mübarək olsun!

İlham Əliyev

Azərbaycan Respublikasının Prezidenti

Bakı şəhəri, 5 mart 2025-ci il

Azərbaycanın hər qarışı tarixlə yoğrulub, hər daşında, hər çınqılında bir keçmişin izi var. Amma elə torpaqlar var ki, onların adı sadəcə coğrafi məkan kimi yox, qəhrəmanlıq dastanının bir parçası kimi tarixdə əbədi həkk olunub. Bu torpaqlarda hər səs – küləyin uğultusu, çayın axışı, quşların nəğməsi – bir döyüşçünün pıçıltısına, bir şəhidin xatirəsinə çevrilib. Məhz belə rayonlardan biri də Tərtərdir – qəhrəmanlıq və dözüm simvolu, bir millətin məğrur dayanışmasının canlı sübutu. Bu yazını bir tərtərli olaraq qələmə alıram. Çünki bu torpaq təkcə bir məkan deyil, ruhumuzun bir parçasıdır. Burada doğulub böyüyən hər kəs bilir ki, Tərtər bir mübarizə məktəbidir. Onun hər küçəsində, dağında, çayında qəhrəmanlıq nəğməsi var.
Tərtər şəhidlərinin hər biri bir dastandır – onların qanı ilə sulanan bu torpaq indi azad nəfəs alır. Hər biri ölümə meydan oxuyaraq, Vətənin bütövlüyü uğrunda can verdi və indi azad səmanın altında yaşayan hər kəs üçün bir nur, bir qürur mənbəyinə çevrildi.
Tərtər birinci Qarabağ müharibəsində düşmənin amansız hücumlarına sinə gərən, lakin işğal olunmayan rayonlardan biridir. Burada hər daş, hər küçə, hər ev illər boyu yaşanan müharibənin izlərini daşıyır. İkinci Qarabağ müharibəsində isə Tərtər ən çox dağıntıya məruz qalan rayonlardan biri oldu –raketlər, mərmilər səssiz küçələri sarsıtdı, məktəbləri, evləri, məscidləri hədəfə aldı. Lakin bu rayonun insanları nə geriyə çəkildi, nə qorxdu, nə də ruhdan düşdü. Əksinə, onlar daha da gücləndi, daha da qürurlandı, daha da bir oldu.
1990-cı illərdə Ermənistanın təcavüzkarlığı Qarabağda amansız döyüşlərə səbəb oldu. Döyüşlər davam etdikcə, Tərtər ən çətin mərhələlərdən keçdi. Dəfələrlə Murovdağdan, Suqovuşan istiqamətindən gələn hücumlara baxmayaraq, rayon qəhrəmancasına müdafiə olundu. Məhz Tərtərin məğrur döyüşçülərinin sayəsində bu torpaqlar erməni işğalına məruz qalmadı. Ermənistan Silahlı Qüvvələrinin təzyiqlərinə baxmayaraq, rayon əhalisi ərazini tərk etmədi, torpaqlarını qorumağa davam etdi. Bu müqavimət Azərbaycan Ordusunun sonrakı uğurlu əməliyyatları üçün əhəmiyyətli bir istinad nöqtəsinə çevrildi. Daha ətraflı »

Rayonumuzun qadınları Məlahət İbrahimovanı yaxşı tanıyırlar (adı Məlahət olsa da, onu Gözəl deyə çağırırlar). Bəlkə ona görə Gözəl deyirlər ki, özü də gözəllik ustasıdır. 34 ildən çoxdur ki, sevimli peşəsi ilə qadınlarımızın xidmətindədir.
Məlahət xanım deyir:
–Mən Kəlbəcər rayonunun Nadirxanlı kəndində anadan olmuşam. Orta məktəbi bitirəndən sonra 1990-cı ildə Laçın şəhərində kollecdə təhsil alıb, dərzilik peşəsinə yiyələndim. Öz rayonumuzda məişət evində işləyirdim. 1992-ci ildə həyatımız dəyişdi. Ailəmiz məcburi köçkün kimi Tərtərə gəlib burada məskunlaşdı.
Çətin günlərdə dərzilik peşəsi Məlahət xanıma çox kömək oldu. Tezliklə tərtərli qadınlar onu tanıdılar və səliqə-səhmanına, xasiyyətinə, mülayim təbiətinə görə çox sevdilər. Ailə qurdu, iki övlad anası oldu. Hazırda isə 4 gözəl nəvənin nənəsidir.
Məlahət xanım deyir:
–Tərtər Qadın Resurs Mərkəzi ilə tanışlığım həyatımda dönüş nöqtəsinə çevrildi. Burada biznes təlimlərinə qoşuldum və tezliklə anladım ki, indiyədək sahibkarlıqla bağlı müəyyən biliklərim olmayıb. Ona görə də çətinliklərlə rastlaşmışam. Burada biznes-plan tərtib etməyi öyrəndim, digər zəruri biliklərə yiyələndim və qalib oldum. Daha ətraflı »

Azərbaycan Respublikasının Prezidenti İlham Əliyev Pakistan İslam Respublikasının Baş naziri Məhəmməd Şahbaz Şərif ilə görüşüb.

Prezident İlham Əliyevin Pakistanın Baş naziri Məhəmməd Şahbaz Şərif ilə geniş tərkibdə görüşü olub.

Qeyd edilib ki, səfər ölkələrimiz arasında qardaşlıq əlaqələrini gücləndirəcək.

Pakistan ilə Azərbaycan arasında bu cür qardaşlıq münasibətlərini görmək iki qardaş müsəlman ölkəsi arasında tərəfdaşlığın yaxşı nümunəsidir.

Prezident İlham Əliyev Pakistanın Baş naziri Məhəmməd Şahbaz Şərif ilə

görüşü çərçivəsində mətbuata bəyanatla çıxış edib.

Dövlət başçısı bildirib ki, bu dinamika ölkələrimiz arasında sıx münasibətləri əks etdirir.

Bu gün ikitərəfli gündəliyə aid çox mühüm məsələləri müzakirə etdik və ölkələrimiz arasında sıx tərəfdaşlığın vacibliyini bir daha qeyd etdik, ölkələrimiz, xalqlarımız və təmsil etdiyimiz regionlar üçün əməkdaşlığımızın strateji əhəmiyyətini bir daha vurğuladıq. İki qardaş ölkə olaraq beynəlxalq münasibətlərin bütün məsələlərində bir-birimizə dəstəyi davam etdirəcəyik. Ölkələrimizin suverenliyi və ərazi bütövlüyü məsələsində bir-birimizə qarşılıqlı surətdə dəstək veririk, beynəlxalq təsisatlarda fəal əməkdaşlıq edirik və iştirak etdiyimiz bütün beynəlxalq təşkilatlarda daim bir-birimizi dəstəkləyirik.

Beynəlxalq münasibətlərin cari gedişatı ilə bağlı mövqeyimiz və baxışlarımız tam üst-üstə düşür.

Prezident İlham Əliyev deyib ki, bu gün imzalanmış razılaşmalar yalnız indicə gördüyümüz mərasimlə məhdudlaşmır.

Bir çox sazişlər digər auditoriyalarda artıq imzalanmışdır. Beləliklə, cənab Baş nazirin səfəri zamanı imzalanmış sazişlərin ümumi sayı 10-dan artıqdır. Bir sözlə, onlar gələcək əməkdaşlıq üçün yaxşı bünövrə yaradacaq. Sərmayə planlarımız əsasında, əminəm ki, ticari dövriyyəmizin artımını da görəcəyik.

Diqqətə çatdırılıb ki, müzakirə etdiyimiz məsələlər arasında əsas hissə müdafiə, eləcə də müdafiə sənayesi sahələrində əməkdaşlığa həsr olunmuşdur. Daha ətraflı »

1992-ci ilin fevral ayının 25-dən 26-na keçən gecə Azərbaycan tarixinin ən dəhşətli səhifələrindən biri olan Xocalı soyqırımı aktı baş vermişdir.

Azərbaycanın Ümummilli Lideri Heydər Əliyev bu barədə deyib: “Bütövlükdə Azərbaycan xalqına qarşı yönəldilmiş Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktıdır. Bu soyqırımı, eyni zamanda, bütün bəşəriyyətə qarşı tarixi bir cinayətdir. Xocalı faciəsi – Ermənistanın millətçi, vəhşi qüvvələri tərəfindən Azərbaycana qarşı edilən soyqırımıdır – vəhşiliyin görünməmiş təzahürüdür”.

Faciə günü Xocalı şəhərini tərk edən əhali pusquya salındı və Naxçıvanlı, habelə Pircamal kəndləri yaxınlığında erməni hərbi postları tərəfindən ya atəşə tutularaq qətlə yetirildi, ya da əsir götürüldü. Hücum başladıqdan sonra şəhərdə qalan 2500-ə yaxın əhali azərbaycanlıların nəzarətində olan ən yaxın məkana çatmaq məqsədilə şəhəri tərk etməyə cəhd etdilər. Əsasən qadın və uşaqlardan ibarət əhalinin qalan hissəsi dağlarda təqibdən gizlənən zaman donvurma nəticəsində həlak oldular.

Azərbaycan Respublikasının Prezidenti İlham Əliyev soyqırım barədə deyib: “Xocalı faciəsi iki yüz ildən çox müddətdə erməni millətçilərinin xalqımıza qarşı apardığı soyqırımı siyasətinin qanlı səhifəsidir”.

Bu soyqırımı nəticəsində, rəsmi rəqəmlərə görə, 613 nəfər öldürülüb ki, onlardan 63 nəfəri uşaq, 106 nəfəri qadın, 70 nəfəri isə qoca idi.

İşğal nəticəsində Xocalı şəhəri xarabalığa çevrilmişdir.

“Bu soyqırımı, eyni zamanda, bütün bəşəriyyətə qarşı tarixi bir cinayətdir” – deyən Ulu Öndər Heydər Əliyevin təşəbbüsü ilə 1994-cü il fevralın 24-də Milli Məclis “Xocalı soyqırımı günü haqqında” qərar qəbul etdi. Daha ətraflı »

Bu gün Azərbaycan Respublikası xalqımızın milli maraqlarını rəhbər tutaraq, yeni reallıqlar şəraitində müstəqil siyasətini daha cəsarətlə, prinsipiallıqla davam etdirir, Konstitusiyanın tələblərinə və öz suveren hüquqlarına əsaslanaraq, qarşıda duran strateji hədəflərə doğru inamla irəliləyir.

İlham Əliyev,
Azərbaycan Respublikasının Prezidenti

İLHAM ƏLİYEV VƏ DÖVLƏTÇİLİK İRSİ

Azərbaycanın dövlətçilik ənənələri əsrlərin sınağından keçərək formalaşmış və müasir dövrdə yeni inkişaf mərhələsinə qədəm qoymuşdur. Sovet İttifaqının dağılması ilə Azərbaycan 1991-ci ildə yenidən müstəqilliyini bərpa etdi. Lakin müstəqilliyin ilk illəri siyasi və iqtisadi çətinliklərlə müşayiət olunurdu. Ölkə daxili çəkişmələr, iqtisadi böhran və xarici təhdidlər qarşısında idi. Hakimiyyətin qeyri-sabitliyi dövlət strukturlarının zəifləməsinə, sosial və iqtisadi problemlərin dərinləşməsinə səbəb olmuşdu. Bundan əlavə, Ermənistanın Azərbaycana qarşı təcavüzü və Dağlıq Qarabağda baş verən müharibə ölkəni daha da zəiflətdi. Belə bir mürəkkəb dövrdə xalqın təkidli tələbi ilə Heydər Əliyev hakimiyyətə qayıtdı və dövlət quruculuğunun əsasını qoydu. Onun uzaqgörən siyasəti nəticəsində siyasi sabitlik təmin edildi, iqtisadi dirçəlişə başlanıldı və beynəlxalq aləmdə Azərbaycanın mövqeyi gücləndi. 1994-cü ildə “Əsrin müqaviləsi” adlı neft kontraktı imzalandı və bu, ölkənin iqtisadi inkişafının əsasını qoydu. Azərbaycanın enerji resurslarından səmərəli istifadə etməsi qlobal enerji bazarında mühüm rol oynamasına və iqtisadiyyatının güclənməsinə səbəb oldu.
1995-ci ildə qəbul edilən Konstitusiya müasir Azərbaycan dövlətçiliyinin hüquqi əsaslarını müəyyən etdi. Bu dövrdən etibarən ölkədə iqtisadi, siyasi və hərbi sahələrdə köklü islahatlar aparıldı. Hüquq sistemi modernləşdirildi, dövlət idarəçiliyində şəffaflıq artırıldı və vətəndaş cəmiyyəti inkişaf etdirildi. Ordu quruculuğuna xüsusi diqqət yetirildi, müdafiə sənayesi gücləndirildi və müasir hərbi texnologiyaların ölkəyə gətirilməsi təmin olundu.
Azərbaycan dövlətçiliyi tarix boyu mürəkkəb sınaqlardan keçsə də, müasir dövrdə yeni bir inkişaf mərhələsinə qədəm qoyub. Bu gün Azərbaycan regionun lider dövlətlərindən biri kimi bölgə siyasətini formalaşdıran əsas aktorlardan sayılır. Xüsusilə, enerji diplomatiyası, nəqliyyat dəhlizləri və hərbi gücün artırılması istiqamətində aparılan siyasət dövlətçiliyin möhkəmlənməsinə töhfə verib.
Azərbaycanın müasir inkişafı və güclənməsi Prezident İlham Əliyevin uzaqgörən və çevik siyasəti ilə sıx bağlıdır. 2003-cü ildən etibarən onun rəhbərliyi altında həyata keçirilən islahatlar, strateji layihələr və beynəlxalq siyasətdə ba-lanslı yanaşma ölkənin regional və qlobal arenada mövqeyini gücləndirib. İlham Əliyevin liderliyi ilə Azərbaycanda siyasi sabitlik təmin olunub, iqtisadi inkişafın yeni mərhələsinə qədəm qoyulub və sosial rifahın artırılması istiqamətində ardıcıl addımlar atılıb. Onun təşəbbüsü ilə həyata keçirilən genişmiqyaslı iqtisadi islahatlar qeyri-neft sektorunun inkişafına təkan verib, kənd təsərrüfatı, sənaye və texnologiya sahələrində modernizasiya aparılıb.
Prezident İlham Əliyevin xüsusi diqqəti sayəsində Azərbaycan regionda və dünyada mühüm enerji mərkəzinə çevrilib. O, 1994-cü ildə Ümummilli Lider Heydər Əliyevin imzaladığı “Əsrin müqaviləsi”nin uğurlu davamçısı olaraq, ölkənin enerji resurslarının effektiv istifadəsini təmin edib və yeni qaz kəmərlərinin inşasına start verib. Onun təşəbbüsü ilə həyata keçirilən TANAP, TAP kimi enerji layihələri Azərbaycanın Avropanın enerji təhlükəsizliyindəki strateji rolunu artırıb. COP29-un Azərbaycanda keçirilməsi də məhz Prezident İlham Əliyevin ölkəni yaşıl enerji mərkəzinə çevirmək istiqamətində atdığı mühüm addımların nəticəsidir. Daha ətraflı »