Redaksiyamizin qonağı sabirabadlı Rüstəm Məmmədovdur. Sabirabadlı olsa da, şəhərimizdə Rüstəm müəllimi bəzi yerli sakinlərdən daha yaxşı taniyırlar. Adını hörmətlə çəkirlər. “Nəyə görə?” sualının cavabını isə onunla söhbətimiz zamanı aydınlaşdırdıq. Öyrəndik ki, Rüstəm Məmmədov 1963-cü ildə Sabirabad rayonunda doğulub. İnşaat Mühəndisləri İnstitutunun məzunudur. İlk iş yeri Muğan su Tikinti Trestində iş icraçısı olub. Hazırda Tərtər rayonunda su və kanalizasiya sistemlərinin yenidən qurulmasını həyata keçirən şirkətdə sahə rəisi vəzifəsində çalışır.
Bu layihənin icrasına 2015-ci ilin iyun ayında başlanıb və cari ilin dekabrında işlər yekunlaşmalıdir.

– Rüstəm müəllim, bir ildən çoxdur ki, rayonumuzdasınız. Tərtər və tərtərlilər haqqında fikrinizi bil-mək maraqlı olardı.
– Bu rayona gələnədək respublikamızın müxtəlif regionlarında yeni su və kanalizasiya sistemlərinin çəkilişində çalışmışam. Azərbaycanın bütün bölgələri gözəldir, insanlar hər yerdə qonaqpərvərdilər. Amma, mən bunu səmimi deyirəm, Tərtərdəki kimi isti münasibəti heç yerdə görməmişik. Bu, birinci növbədə rayon rəhbərinə aiddir. İlk günlərdən rəhbərlik bu layihənin müvəffəqiyyətlə icra olunmasından ötrü bizə bütün lazımi şəraiti yaratdı. Bu gün də rayon icra hakimiyyətinin başçısı Müstəqim Məmmədovun diqqətini hiss edir və onun köməyinə arxalanırıq. Daha ətraflı »

Itnən pişik, pişiknən siçan, tülküynən xoruz “dostluq” edə bilirsə, bəs niyə polisnən oğru, müstəntiqlə cinayətkar “dostluq” etməsin? Əgər belə “dostluq” olmasaydı, əvvəllər iki dəfə məhkumluq həyatı yaşamış, sonralar dəfələrlə ağır cinayət əməlləri törətmiş Tərtər şəhərinin sakini Kərimova Sevinc Sultan qızı Tərtər Rayon Polis Şöbəsinin İstintaq Qrupunun müstəntiqi Firuz Nuriyevin və Bərdə Rayon Polis Şöbəsinin İstintaq Bölməsinin müstəntiqi Rəhim Ağamalıyevin sayeyimərhəmətindən indi azadlıqda gəzib, öz dələduzluq cinayət əməllərini davam etdirməz, “qaz vurub qazan doldurmaz”, həbsxananın bir küncündə dizlərini qucaqlayıb oturardı, öz hərəkətlərinin peşimançılığını çəkərdi.
Bu hadisə barədə dəfələrlə yazmışıq–mətbuatda çoxlu sayda məqalələr dərc olunub, Respublikanın Ədliyə Nazirliyinə, Məhkəmə Hüquq Şurasına, Daxili İşlər Nazirliyinə, Baş Prokurorluğa, Bərdə Rayon Prokurorluğuna yazılı müraciətlər olunub… Lakin dələduz Sevinc Kərimovanın “xətrinə heç kim dəyməyib”, ona “gözün üstə qaşın var” deyən olmayıb. Belə-belə “xiyar əyri bitib”, cinayətkara kömək olunub, ona münbit şərait yaradılıb. Cəzasızlıq mühitində isə, əlbəttə, cinayətkarlıq törəyib artır, kriminal durum həddindən çox gərginləşir. “Çanaq” bircə Tərtər Məhkəməsinin sabiq hakimi Həsən Qəniyevin “başında çatladı”–onun iş yerini Kəlbəcər Məhkəməsinə dəyişdilər.
Sevinc Kərimova tərəfindən son zamanlar törədilmiş cinayət əməllərinin qısa məzmunu belədir: Daha ətraflı »

Azərbaycanda Sovet hökuməti qurulmamışdan öncə Zolgörən kəndi Abbas bəyin mülkü olmuşdur. Ərazisinin mərkəzində üçmərtəbəli otuz mənzilli bina, iki kərpic zavodu, ərzaq və sənaye dükanları, kəhriz quyusu və s. tikinti obyektləri olmuşdur. Zolgörən sözü düz görmə mənasını verir. Zolgörən kəndində olan bina diqqəti cəlb edərək, burada elmi işlər aparılmasına işarə verir. 1993-cü ildə Tərtər rayonunun Zolgörən kəndində Moskvanın göstərişi ilə Azərbaycan Dövlət Seleksiya Stansiyası deyilən bir idarə yaradılır və idarəetmə Moskva tərəfindən aparılır. El arasında bu söz “seleksonnı” kimi işlədilirdi. Burada elmi müəssisənin yaradılmasından öncə rus dilində yeddiillik məktəb, körpələr evi-uşaq bağçası, səhiyyə məntəqəsi, radioqovşağı, gecələr elektrik işığı verilməsi üçün xüsusi bina, yaşayış üçün ictimai binalar tikilir. Bu işlər başa gəldikdən sonra Rusiyadan ziyalı ailələr Zolgörən həndinə köçürülür. 1933-1957-ci ilədək idarəetmə Moskva tərəfindən həyata keçirilirdi. 1957-ci ildən Azqosselekstansiya sözü ləğv olundu və əvəzində Azərbaycan Elmi-Tədqiqat Əkinçilik İnstitutunun təcrübə bazası yaradıldı.
Tərtər BTS-də aparılan elmi işlər nəticəsində alınan yeni dənli bitkilər, buğda və arpa növləri təkcə Azərbaycanda deyil, SSRİ məkanında da öz şöhrətini tapmışdır.
Eləcə də bura alimlərin yetişməsinə də öz töhfəsini vermişdir. Belə ki, bir çox alimlərin–Abdullla Abdullayev, Yolçu Bayramov, Bəyiş Mirzəyev, Valeh Paşayev, Əmir Quliyev, Vəli İbadov, Abdin Abdullayev, Şirin Sarıyev, Tofiq Məmmədov, Mehman Babayev, Fərman Qurbanov kimi insanların elmə yolu buradan keçmişdir. 1983-cü ildə Tərtər Bölgə Təcrübə Stansiyasının 50 illik elmi yubleyi dövlət tərəfindən ən yüksək səviyyədə Zolgörən kəndində qeyd olundu. Daha ətraflı »

Folklor araşdırıcılarının qənaətinə görə, sözün yaranması ilə yaranıb folklor nümunələri. Ilk folklor nümunələri olan laylalar, müxtəlif növ bayatılar, oxşamalar, sayacı sözlər məhz qadınlara aiddir. M. Seyidovun “Sözün yaranması tarixi” kitabı da bunu təsdiq edir.
Azərbaycanın folklor tarixində Aşıq Bəsti, aşıq Nabat, aşıq Minayə, aşıq Sənəm, aşıq Pəri və başqaları olub. Aşıq Pəri XIX əsrin birinci yarısında yaşaıb. Rus şairi Adolf Berjenin yazdığına görə, 1829- cu ildə 18 yaşında Şuşaya gələn Pəri hesablamaya görə, 1811-ci ildə Cəbrayıl rayonunun Maralyan kəndində anadan olub. Deyilənə görə, bu azərbaycanlı xanım olduqca yaraşıqlı, gözəl və cazibadar olub. Pəri cox istedadlı, ağıllı, hafizəli imiş. Valideynləri onu qoca bir varlı kişiyə vermək istədiyindən o, gizlicə yolla Maralyandan qaçıb. Şuşada böyük bir ziyalı mühitlə rastlaşan qız Cəfərquluxan nəvvab, Məhəmməd bəy aşıq, Mirzəcan Mədətov, şair Adolf Berje və başqalarından mükəmməl dərs alıb. Bu iti zehinli qız, saz çalmağı, oxumağı da tezliklə mənimsəyir.
Berjenin yazdığına görə aşıq Pəri Molla Pənah Vaqifə (1717-1798) ən böyük nəzirə yazır. Daha ətraflı »

Bizim hər birimiz həyatda bədbəxt hadisələrdən sığortalanmamışıq. Həyat bəzən çox qəddar olur, kimsə atasını, anasını, yaxud digər doğmasını itirir. Əlbəttə, çox acınacaqlı haldır ki, ailədə uşaq anasız, yaxud atasız böyüyür.
Ancaq müşahidə etdiklərimizdən belə bir qənaətə gəlmişəm ki, əsl insan odur ki, üzləşdiyi faciələr onu qəddarlaşdırmasın, həyata inamını qırmasın. Əgər belə olarsa, bu, böyük bir bəladır. Mənim zənnimcə, həyatın zərbələri doğmaları bir-birindən ayırmalı deyil, əksinə birləşdirməlidir. Hər kəs dərk etməlidir ki, təkcə özü üçün deyil, həm də ailəsi üçün, cəmiyyət üçün yaşayır və gərəkli olmaqdan ötrü bütün çətinliklərə tab gətirmək lazımdır. Əlbəttə, heç nə yaddan çıxmır, o cümlədən yaxınlarımızın həyatdan getməsi də. Ancaq yenə də bahar gələcək, çiçəklər açacaq. Bu, həyatın fəlsəfəsidir.

Könül Quluyeva

 Bakı Beynəlxalq Multikulturalizm Mərkəzinin (BBMM) indiyədək həyata keçirdiyi çoxsaylı əhəmiyyətli layihələrindən biri də mütəmadi olaraq təşkil edilən beynəlxalq multikulturalizm qış və yay məktəbləridir.

Sözügedən layihə BBMM-in “Azərbaycan multikulturalizmi fənninin xaricdə və ölkə universitetlərində tədrisi” layihəsinin məntiqi davamıdır. Tədris layihəsi çərçivəsində hazırda dünyanın 13, Azərbaycanın 28 nüfuzlu ali təhsil ocağında Azərbaycan multikulturalizmini öyrənən tələbələr üçün təşkil olunan qış və yay məktəblərinin məqsədi həmin gənclərin nəzəri şəkildə öyrəndikləri multikultural və tolerant dəyərlərimizi ölkəmizdə öz gözləri ilə görüb şahid olmalarına şərait yaratmaqdır.

Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, akademik Kamal Abdullayevin qeyd etdiyi kimi, mütəmadi olaraq təşkil edilən beynəlxalq multikulturalizm yay və qış məktəbləri vasitəsilə artıq  Azərbaycana olan maraq məhəbbətə çevrilib. Həmin yay və qış məktəbinin əcnəbi iştirakçılarının timsalında artıq xaricdə Azərbaycanı sevən, haqq işini dəstəkləyən lobbi formalaşıb, yeni əməkdaşlıqlar və dostluqlar yaranıb. Daha ətraflı »

Zəngin tarixi və mütərəqqi ənənələrə malik Azərbaycan mətbuatı bu gün hüquqi dövlət və vətəndaş cəmiyyəti quruculuğunda demokratiyanın mühüm vasitəsi kimi çıxış edir. Cəmiyyətdə aşkarlığın və şəffaflığın təmin edilməsində, aktual ictimai problemlərin ümumxalq müzakirəsinə çıxarılmasında mətbuatın xüsusi rolu vardır. Bu baxımdan Ümummilli Lider Heydər Əliyevin 1998-ci il avqustun 6-da imzaladığı “Azərbaycanda söz, fikir və məlumat azadlığının təmin edilməsi sa-həsində əlavə tədbirlər haqqında” Fərmanı xüsusilə qiymətlidir. Həmin fərmanla Azərbaycanda milli mətbuatın demokratik inkişafına dövlət qayğısının əsası qoyulmuşdur.
Sonrakı dövrdə bir çox demokratik ölkələrdə olduğu kimi, ölkəmizdə də Mətbuat Şurası yaradılmış və “Mətbuat haqqında” qanun qəbul edilmişdir.
2000-ci ildə Ümummilli Lider Heydər Əliyevin, 2005, 2010 və 2015-ci ildə Prezident İlham Əliyevin sərəncamları ilə milli mətbuatımızın 125, 130, 135 və 140 illik yubileyləri ölkə miqyasında geniş qeyd edilmişdir. Milli Mətbuatımızın 140 illik yubileyi münasibətilə təltif olunanlar arasında “Yeni Tərtər” qəzetinin redaktoru Tofiq Yusif də olmuşdur.
Bu gün “Yeni Tərtər” qəzetinin rayonumuzun həyatında özünəməxsus yeri vardır. Ictimai-siyasi, mədəni həyatımızda baş verən bütün yeniliklər haqqında sakinlər yerli qəzet vasitəsilə tanış olurlar. Həmçinin gənc nəslin milli vətənpərvərlik şüurunun yüksəldilməsində, xalqımızın gözəl adət və ənənələrinin təbliğində “Yeni Tərtər”in xüsusi xidmətləri var.
Milli mətbuat günü hər birimizin bayramıdır. Odur ki, “Yeni Tərtər” qəzetinin kollektivi ilə yanaşı bütün tərtərliləri bu əlamətdar gün münasibəti ilə səmimi-qəlbdən təbrik edirəm. Mətbuat işçilərinə cansağlığı, yeni-yeni yaradıcılıq uğurları arzulayıram. Qələminiz iti, sözünüz kəsərli olsun!

Prezident İlham Əliyevin sədrliyi ilə Nazirlər Kabinetinin 10 iyul 2016-cı il tarixli iclasındakı nitqindən irəli gələn vəzifələr və 2016-cı ilin birinci yarısında Tərtər rayonunda sosial-iqtisadi inkişafın yekunlarına həsr olunan iclas keçirilib. Iclasda Tərtər Rayon İcra Hakimiyyətinin Başçısı Müstəqim Məmmədov məruzə ilə çıxış edib. O, bildirib ki, Azərbaycan Prezidenti İlham Əliyev Nazirlər Kabinetinin iclasındakı giriş nitqində göstərib ki, aprel ayında təmas xəttində Ermənistanın törətdiyi təxribatın qarşısı ordumuz tərəfindən igidliklə alınmış, əks hücum əməliyyatları nəticəsində 2000 hektar ərazi, eləcə də strateji əhəmiyyətli bir neçə yüksəklik düşməndən azad edilmişdir. Rayon rəhbəri qeyd edib ki, aprel ayında ermənilərin törətdikləri silahlı təxribatdan sonra Prezidentin öz xanımı ilə birgə rayonumuza səfəri, rayon ərazisində yerləşən hərbi hissədə əsgər və zabit heyəti ilə görüşləri, şəhərin özündə və Qapanlı kəndində ermənilərin artilleriya hücumları nəticəsində dağılmış evlərə baş çəkmələri tərtərlilərin əhval-ruhiyyəsini yüksəltmiş, ölkə rəhbərinə inamını daha da artırmışdır.
Səfərdən sonra möhtərəm Prezidentimiz müharibənin rayona vurduğu zərərin aradan qaldırılması üçün prezidentin ehtiyat fondundan 3 milyon manat pul ayırmışdır. Daha ətraflı »

Azərbaycan Milli Mətbuatının 141 yaşı tamam olur. Həsən bəy Zərdabinin yaratdığı və redaktoru olduğu “Əkinçi” qəzeti ilə əsası qoyulan Azərbaycan jurnalistikası müxtəlif dövrlərdə ağır sınaqlara məruz qaldı. Amma milli dilin, milli ənənənin yaşaması naminə hər çətinliyə dözdü.
Bu gün mətbuatımız yeni inkişaf mərhələsini yaşayır. Bu inkişafın təməli isə Azərbaycanda ikinci dəfə hakimiyyətə gələn Ulu Öndər Heydər Əliyev tərəfindən qoyulub. Medianın cəmiyyətdəki rolunu çox yüksək qiymətləndirən Ümummilli Lider demişdir: “Mətbuat demokratiyanı dərinləşdirən, siyasi inkişafa təkan verən qüdrətli vasitədir… O, həyatın güzgüsü, həqiqətin carçısı olmalıdır, insanları yüksək ideallar uğrunda mübarizəyə səsləməli və səfərbər etməlidir”.
Hazırda müstəqil mətbuatın formalaşması və inkişafına xidmət edən siyasət Prezident İlham Əliyev tərəfindən uğurla davam etdirilir.
Prezident İlham Əliyevin 31 iyul 2008-ci il tarixli sərəncamı ilə “Azərbaycan Respublikasında KİV-lərin inkişafına dövlət dəstəyi konsepsiyasının” təsdiq edilməsi, 3 aprel 2009-cu ildə Prezident yanında Kütləvi İnformasiya Vasitələrinə Dövlət Dəstəyi Fondunun yaradılması azad medianı inkişaf etdirmək, mətbuatın maddi-texniki bazasını möhkəmləndirmək, jurnalistlərin sosial vəziyyətinin yaxşılaşdırılması məqsədilə atılan mühüm addımlar olmuşdur.
Bu qayğı və diqqətin nəticəsidir ki, ölkə başçısı “Jurnalistlərin dostu” mükafatına layiq görülmüşdür. Daha ətraflı »

Tərtər rayonunda Azərbaycan Milli Mətbuatının 141 illiyinə həsr olunmuş konfrans keçirilib. Azərbaycan Mətbuat Şurasının Tərtər Rayon İcra Hakimiyyəti ilə birgə düzənlədiyi konfransın iştirakçıları öncə Ulu Öndər Heydər Əliyevin rayon mərkəzində ucaldılmış abidəsini ziyarət ediblər.
Tədbiri giriş sözü ilə Tərtər Rayon İcra Hakimiyyətinin başçısı Müstəqim Məmmədov açaraq rəhbərlik etdiyi rayonda həyata keçirilən quruculuq işlərindən söz açıb. Tərtərin ölkəmizin ictimai fikir tarixində oynadığı rolu önə çəkən icra başçısı onu da bildirib ki, cəbhəyanı bölgə olan rayon mühüm strateji məntəqədir. Burada baş verən proseslərin ölkə ictimaiyyətinə doğru-dürüst çatdırılması son dərəcə mühüm əhəmiyyət daşımaqdadır. Belə obyektiv rəyin formalaşması isə əsası Həsən bəy Zərdabinin «Əkinçi» qəzeti ilə qoyulmuş milli mətbuatımızın ənənələrinə sadiqliklə mümkündür. Çünki Həsən bəy jurnalistlik fəaliyyəti göstərməklə yanaşı, həm də böyük vətənpərvər ziyalı idi. Bu gün onun varisləri olan jurnalistlər də vətənpərvərlik dəst-xəttini qoruyub yaşatmalıdırlar. Daha ətraflı »