Məşhur alim və hər kəsin qayğısını çəkən doğma insan

Bizim Tərtər rayonu Qarabağın gözəl, əsrarəngiz guşələrindən olmaqla bərabər, həm də qədim insan məskənlərindən biridir. Keçmiş zamanlardan bəri yurdumuzun ab-havası, təmiz suyu, zəngin təbii sərvətləri bir çox məşhur sərkərdələrin, şairlərin, filosofların diqqətini cəlb etmiş, onlar Tərtər sahillərində köç salmış, qonaq qalmış, ya da rayonun kəndlərində yaşayaraq burada işləmişlər. Bunlardan Əmir Teymurun, Molla Pənah Vaqifin və digərlərinin adlarını çəkə bilərik.
Ancaq Tərtəri şöhrətli edən yalnız bunlardımı? Hamı-mız bilirik ki, rayonumuzun ən böyük sərvəti, onu tanıdan, şöhrətini bütün dünyaya yayan çox savadlı, xeyirxah, alicənab insanlarıdır.
Bu gün biz fəxr edirik ki, Vaqif Abbasov kimi şöhrətli alim rayonumuzda dünyaya göz açıb, burada ilk təhsilini alıb. Onu böyük elmə aparan cığır da elə buradan başlayıb.
Kimya üzrə elmlər doktoru, akademik, Azərbaycan Milli Elmlər Akademiyasının həqiqi üzvü, AMEA-nın akademik Yusif Məmmədəliyev adına Neft-Kimya Prosesləri İnstitutunun direktoru Vaqif Məhərrəm oğlu Abbasov 1952-ci il oktyabr ayının 5-də rayonumuzun Cəmilli kəndində müəllim ailəsində anadan olub. Cəmilli kəndinin tarixi vaxtilə Qubadlıdan bura köç etmiş Cəmil bəyin və onun qardaşlarının adı ilə bağlıdır. Bu kəndin təməlini onlar qoyublar. Burada məskunlaşan insanların Cəmil bəyə olan hörmətinin əlaməti olaraq, kənd əvvəlcə Cəmilbəyli, sonralar isə Cəmilli adlandırılıb. Daha ətraflı »

Ta qədimdən böyük sözünü, ağsaqqal, agbirçəklərimizin öyüdünü eşitmək, onların xeyir-duası ilə yaşamaq, işləmək bir ənənəyə çevrilib. Böyüklərin məsləhəti ilə gördüyümüz işdən xeyir tapanda özümüz də sevinmişik, böyüklərimiz də fərəhləniblər. Belə böyüklərimizdən biri də hamımızın ağsaqqalı, böyüyü sandığımız Məhyəddin Kərimovdur. O, ağıllı kəlamları ilə həm ailədə, həm də camaat arasında özünə hörmət qazanan ağsaqqallarımızdandır. Bu günlərdə sosial şəbəkələrin birində nəvəsi Səbuhi Kərimovun köməkliyi ilə bir neçə müdrik fikirləri yayımlanmışdı.: “ Birinci Al-lahı tanı, ikinci ata-ananı, üçüncü sənə elm, bilik verən müəllimi, dördüncü yer üzünün hökümətini – yəni dövlət başçısını, rəhbəri tanı”. Sonra deyir ki, “qaçağın evi, qumarbazın pulu, oğrunun çörəyi, mərdima-zarın isə məclisdə yeri olmaz”. Bu müdrik kəlamlar, ibrətamiz fikirlər gənclərimiz üçün çağırışdır.
Məhyəddin Kərimov ömrünün ən müdrik çağlarını yaşayır. 96 yaşlı Məhi baba oğul, qız, gəlin, nəvə-nəticə qayğısı ilə əhatə olunub. Ailədə hər kəsin məsləhət yeridir Məhi baba. Doğrudur, həmişə həyat yoldaşı Əfruz nənənin yoxluğunu hiss etsə də, ətrafında ona qayğı göstərənlərə şükür edir, öz nikbin xasiyyəti ilə hərəni bir cür mehribanlıqla dindirir. Məhi baba Kərimovlar ailəsinin ən çox istənilən, yolu hörmətlə saxlanılan böyüyüdür.
Məhyəddin Kərimov dövlətlə, xalqla qürurlanan bir insandır. O, ölkəmizin hər bir müvəffəqiyyətini alqışlayır, söz düşəndə qürurla öz fikrlərini bildirir. Bu yaxınlarda mənə zəng etmişdi. Ordumuzun 44 günlük Vətən müharibəsində qazandığı uğurdan, zabit və əsgərlərimizin göstərdiyi şücaətlərdən qürur hissi ilə danışdı. Hətta onu da bildirdi ki, Şuşanın alınması məni nə qədər sevindirdisə, Fərrux yüksəkliyinin alınması da ikiqat sevindirdi. Sözünə davam edən ağsaqqal dedi: Daha ətraflı »

Tərtərin qəhrəmanlıq salnaməsini yazan mətbu orqan

Qəzetimizin yaşının üstünə daha bir yaş gəldi. Ahıl yaşına, 88-ə çatdı. “Kolxozçuların varlanması yolunda” adı ilə çıxan kiçik bir qəzetdən, bugünkü müasir texnologiyalar əsasında buraxılan “Yeni Tərtər”ə qədər yol keçdik.
Çoxları ilə yol yoldaşı oldu qəzetimiz. Gəldilər, hərə bir iz qoyub getdi. Bir il əvvəl keçmiş redaktorumuz Zöhrab Məmmədovun dünyasını dəyişməsi xəbərini eşitdik. Az müddət işləsə də, o zamankı “Qızıl bayrağ”a yeni nəfəs gətirmişdi. Çox sevdirmişdi onu oxucularına. Gəncləri ətrafına toplamağı bacarmışdı. Odur ki, unudulmur, hər zaman minnətdarlıqla xatırlanır.
Ötən ilin axırlarında isə qəzetimiz 16 il birgə addımladığı Tofiq Yusifi itirdi. Rayon qəzetinin “Yeni Tərtər” adı ilə bölgə mətbuatı sırasında tanınmasında onun böyük zəhməti var. Ötən illərin qəzet qovluqlarında bir-birindən maraqlı bədii, publisistik, satirik yazıları yaşayır.
Gənclik illərində birgə çalışdığım redaktorlardan Zahid İsmayılovun, Aydın Məmmədxanovun, Hilal Bayramovun, Təvəkkül Nəcəfovun adlarını da çəkmək istəyirəm. Hər birindən öyrənərək qəzetçiliyin çətin yollarında addımlamışam. Daha ətraflı »

Nə yaxşı görüşdük, nə yaxşı yenə…”

Hər dəfə tətillərdən, istirahət günlərindən qayıdanda, Əvəz Nəsirov hər birimizi bu sözlərlə qarşılayırdı. Bizə də elə gəlirdi ki, həmişə belə olacaq…
Ancaq günlərin bir günü özü işdən çıxmaq qərarını verdi… Əvəz müəllimi daim ailəsinin, övladlarının, nəvələrinin qayğıları ilə yaşayan zəhmətkeş insan, məsuliyyətli qəzet işçisi kimi xatırlayırıq.
Sovet dönəmində qəzetin kənd təsərrüfatı şöbəsində işlədiyi üçün, xəbər janrını xüsusilə sevirdi. Redaktor hansı işi tapşırsa, mütləq yarıdırdı.
Heç birimiz bu həyatda daimi deyilik. Əgər yada düşəcəyiksə, deməli, hədər yerə yaşamamışıq. İş yoldaşımız Əvəz Nəsirov kimi.

“Yeni Tərtər”

Bismillahir Rəhmanir Rəhim.
Mehriban və bağışlayan Allahın adı ilə!
Uca rəbbimiz insanları xəlq edəndən bəri onları kitabsız buraxmadı. Və insanların xoşbəxtliyi naminə göndərdiyi saysızhesabsız ayinlərdən biri də oruc tutmaq tövsiyəsi oldu.
İslam dininin müqəddəs kitabı Qurani Kərimdə Bəqərə surəsinin 183-cü ayəsində Rəbbimiz bütün islam ümmətinə oruc tutmağı əmr edir. Hicri təqvimin 9-cu ayı olan Ramazan ayı Allah qatında çox əzəmətli bir aydır.
Bu ay insanların həm cismi və həm də mənəvi pəhrizkarlıq ayı olmaqla yanaşı, eyni zamanda əzəmətli Quranın sevimli Peyğəmbərimizə (s) nazil olduğu bir aydır. Qədr surəsində bu barədə deyilir. Və hətta həmin gecə, yəni Qədr gecəsi 1000 aydan daha əfzəl tutulur. Bu ay Allah qatında elə əzəmətli və şərəflidir ki, hədisdə deyilir: “Kim bu ayda günahlarını yumağı və özünü bağışlatmağı bacarmırsa, sair aylardan əlini üzsün!”. Daha ətraflı »

Təbiətin oyanışının, varlığın yenidən canlanmasının müjdəsini verən Novruz bayramı ən qədim zamanlardan bəri həyat və məişətimizə daxil olmuş, insanlara aydın və işıqlı sabaha, xoşbəxt gələcəyə inam duyğusu bəxş etmişdir.
                                                                                                                           Heydər Əliyev, Ümummilli Lider

Bu gün yerin, göyün öz sevinci var…

Yazın gəlişini, gecə ilə gündüzün bərabərləşdiyini bildirən Novruz bayramı ta qədimdən xalqımız tərəfindən böyük təmtəraqla, el şənlikləri ilə qeyd olunub. Artıq ikinci ildir ki, bayram tonqalları işğaldan azad edilmiş ərazilərimizdə də qalanır və bu, Novruz əhval-ruhiyyəsinə xüsusi bir sevinc qatır.
Azərbaycan Respublikasının Prezidenti İlham Əliyevin rəhbərliyi altında qısa müddətdə bu torpaqlarda xarüqələr yaranır, ermənilərin viran qoyduqları şəhər və kəndlər yenidən tikilir, qurulur, infrastruktur təzələnir, yeni yollar çəkilir. Əsas məsələ isə, əlbəttə, ərazilərin minalardan təmizlənməsidir. Daim öz vətəndaşlarının təhlükəsizliyi qayğısına qalan dövlətimiz, bu işlərin sürətlə aparılmasını təmin edir.
30 ildən artıq bir müddətdə dədə-baba yurdlarından ayrı düşmüş soydaşlarımız o yerlərə dönəcək və onların ayaq səslərinə həsrət qalmış torpaqlarda yenidən həyat qaynayacaq, zəhmət dolu günlər yaşanacaq.
Xalqımızın milli adət-ənənələri, keçdiyimiz tarixi yol Novruzun ruhunda öz əksini tapıb. Bu, eyni zamanda birlik, həmrəylik bayramıdır.
Ona görə Azərbaycan xalqı hətta qadağan olunduğu vaxtlarda belə Novruzu unutmayıb, hər bir ailədə onu müxtəlif formada qeyd ediblər. Bu, xüsusən də uşaqların ən sevimli bayramlarından biri olduğu üçün, adət-ənənələrimiz nəsildən-nəsilə ötürülüb.
Ölkəmiz Sovet İttifaqının tərkibində olduğu zaman, Novruza dini don geyindirərək, onun keçirilməsini qadağan edirdilər. Həmin dövrdə Ulu Öndər Heydər Əliyev bu bayramın respublika səviyyəsində geniş qeyd olunmasına və xalq arasında yaşadılmasına nail olmuşdur.
Bu gün xalqımızın milli-mənəvi dəyərlərinin qorunması və gələcək nəsillərə ötürülməsi Prezident İlham Əliyevin həyata keçirdiyi siyasətin mühüm istiqamətidir. Bayramda Azərbaycanın hər yerində qalanan gur tonqallar insanları birliyə, qardaşlığa, sülhə səsləyir. Müasir dünyamızda, planetimizin müxtəlif yerlərində müharibə ocaqları alaovlandığı bir vaxtda, bu çağırışlar xüsusilə əhəmiyyətlidir. Onu da qeyd etmək lazımdır ki, Vətən Müharibəsində qazanılan Böyük Qələbədə Prezident İlham Əliyevin müdrik siyasəti, Ordumuzun gücü ilə yanaşı, həm də xalqımızın birliyi, insanlarımızın öz Prezidentləri ətrafında sıx birləşməsi misilsiz rol oynamışdır. Daha ətraflı »

Rayonumuzda ilaxır çərşənbə yüksək əhval-ruhiyyə ilə qarşılanıb.Bayram münasibəti ilə Mərkəzi Meydanda çatılan tonqalı Tərtər Rayon İcra Hakimiyyətinin Başçısı Müstəqim Məmmədov alovlandırıb. Rayon rəhbəri sakinləri təbrik edərək, onlara xoş arzularını çatdırıb.
Qeyd edib ki, bu çərşənbə xalq arasında “Axır çərşənbə”, “Torpaq çərşənbəsi” kimi də tanınır. Torpağın oyanışını tərənnüm edən ilaxır çərşənbə təkcə təbiətin deyil, həm də insanlarda yeni arzuların yaranmasının, niyyətlərin saflaşmasının göstəricisi hesab olunur.
Sonra Tərtər Rayon Mədəniyyət Mərkəzinin hazırladığı konsert proqramı təqdim olunub.

Axır çərşənbə günüdür. Hava isə qışı xatırladır. Narın qar yağır. Bunun özü də bərəkət rəmzidir.
İlk dəfədir ki, kollektivimiz Novruzu yeni ünvanda qarşılayır. Adətdir, axır çərşənbədə yalnız yaxşı əhval-ruhiyyədə olmalı, dualar etməlisən. Bizim kiçik kollektivimizin üzvləri də hərə öz ürəyində Tanrıdan arzularının gerçəkləşməsini istəyir, ötən ildə qəzetimizin müntəzəm çıxmasına kömək edən insanlara, eləcə də abunə yazılan oxucularımıza cansağlığı arzulayırlar.
Redaksiyamızla üzbəüz olan qonşularımızın həyət darvazası açılır və milli geyimdə, əlində bayram xonçası tutmuş uşaq bizə tərəf gəlir. Sevincimizin həddi-hüdudu yoxdur. Milli adətlərimizi yaşadan, hal-hazırda Novruzu ailəsi ilə deyil, Şuşa polisinin sıralarında bu gözəl şəhərdə qarşılayan Səbuhi Şirinova və onun ailəsinə “əhsən!” deyirik.
Malikin kiçik əllərində ehtiyatla gətirdiyi bu bayram xonçası bizim üçün birliyimizin, mehribançılığımızın, sülhün, adət-ənənələrimizin unudulmamasının rəmzidir.
Əminik ki, bu Novruz bizlərə sülh, cansağlığı gətirəcək. Qəzetimizin abunəsi daha da artacaq və təbii ki, maaşlarımız da yüksələcək.
Bayramınız mübarək, əziz tərtərlilər!

“Yeni Tərtər”

ZƏFƏR ƏTİRLİ NOVRUZ

Hər bir xalqın özünəməxsus adət-ənənələri olduğu kimi, Azərbaycan xalqının da nəsildən-nəsilə ötürülmüş adətləri vardır. Zaman dəyişsə də, bu adətlər dəyişməyərək insanlar tərəfindən qorunub saxlanılmışdır. Bunların içərisində milli bayramımız olan Novruzun tarixi xüsusilə qədimdir. Tarixə nəzər salanda, bu bayramın 505-ci ildə yarandığı məlum olur. Dünyəvi şairlərin əsərlərində Novruzun özəllikləri aydın şəkildə əks etdirilir.
Novruz bayramı 2009-cu ildə YUNESKO tərəfindən qeyri-maddi mədəni irs siyahısına daxil edilmiş, 2010-cu ildə isə BMT Baş Assambleyasının 64-cü sessiyasının iclasında 21 mart tarixi “Beynəlxalq Novruz Günü” elan edilmişdir.
Novruz təbiətin canlanması, yeni fəslin gəlişi ilə əlaqəli dünyəvi bir bayramdır. Ona görə də gecə ilə gündüzün bərabərləşdiyi 21 mart tarixində qeyd olunur. Lakin bu bayrama kimi 4 həftə ardıcıllıqla çərşənbələr keçirilir: Su, Od, Yel və Torpaq çərşənbələri.
İlk çərşənbə olan su çərşənbəsi adətən havaların yavaş-yavaş isinməyə başladığı, çaylardakı buzların əridiyi, od çərşənbəsi günəşin torpağı daha çox qızdırmağa başladığı, insanların həyətlərdə təmizlik işləri apardığı vaxta, Yel çərşənbəsi ağacların çiçəklədiyi, külək vasitəsi ilə tumurcuqların tozlandığı, ilaxır çərşənbəsi olan Torpaq çərşənbəsi isə əkin yerlərində işlərin daha da artdığı, çoxaldığı vaxta təsadüf edir.
Novruz bayramının illərdən bəri qeyd olunan adət-ənənələri nəsildən-nəsilə keçərək bugünümüzə gəlib çıxmışdır. Papaq atmaq, qulaq falı, tonqaldan tullanmaq, üzük falı, səməni əkib göyərtmək, yumurta boyamaq, döyüşdürmək və sair bu kimi adətlər bu gün də həvəslə davam etdirilir. Daha ətraflı »

Ulu Öndər Heydər Əliyev Azərbaycan xalqının milli adət-ənənələrinin bir parçası olan Novruz bayramına yüksək dəyər verir və deyirdi:  “Gün o gün olacaq ki, Novruz bayramını bir dəfə Şuşada, o biri il Laçında, o biri il Kəlbəcərdə, Ağdamda, Füzulidə, Cəbrayılda, Zəngilanda, Qubadlıda keçirəcəyik. Əminəm ki, belə də olacaqdır. Mən buna inanıram və bu inamla yaşayıram, bu inamla işləyirəm və bu inamla da Azərbaycan xalqına rəhbərlik edirəm.”

Azərbaycan Respublikasının Prezidenti, Müzəffər Ali Baş Komandan İlham Əliyev Ümummilli Liderin vəsiyyətini və Azərbaycan xalqının arzularını reallaşdırdı. Ali Baş Komandanın rəhbərliyi altında müzəffər Azərbaycan Ordusu doğma torpaqlarımızı işğaldan azad etdi və biz artıq həmin ərazilərdə Novruz bayramını qeyd edirik.

Vaxt vardı ki, Novruz bayramına dini don geyindirərək, onun keçirilməsinə qadağalar qoyurdular. Azərbaycanın Birinci vitse-prezidenti, Heydər Əliyev Fondunun prezidenti, UNESCO və ISESCO-nun xoşməramlı səfiri Mehriban xanım Əliyevanın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs üzrə Reprezentativ siyahısına daxil edilib. 28 sentyabr – 2 oktyabr 2009-cu ildə Birləşmiş Ərəb Əmirliklərinin Abu-Dabi şəhərində keçirilmiş UNESCO-nun Qeyri-Maddi Mədəni İrs üzrə Hökümətlərarası Komitəsinin 4-cü Sessiyası çərçivəsində qəbul edilmiş qərara əsasən, Novruz çoxmillətli (Azərbaycan, Hindistan, İran, Qırğızıstan, Pakistan, Türkiyə, Özbəkistan) nominasiya kimi UNESCO-nun Qeyri-Maddi Mədəni İrsin Reprezentativ siyahısına salınıb. Daha ətraflı »