Bu yaxınlarda Elm və Təhsil Nazirliyinin xətti ilə regionların ümumtəhsil məktəblərinin Azərbaycan dili və ədəbiyyatı və ibtidai sinif müəllimlərinin sertifikasiyası keçirilib. Rayonumuzun təhsil sektorundan 262 nəfər müəllim həmin sertifikasiyaya cəlb olunmuşdu. Onlardan 53 nəfər 50 baldan yüksək nəticə əldə edib. Bununla əlaqədar Tərtər rayon Təhsil sektorunun rəhbəri Oqtay Sarıkişiyevlə əlaqə saxladıq. Bildirdi ki, müəllimlərimiz region məktəbləri arasında yüksək nəticəyə nail olaraq fərqləniblər.
Həmin müəllimlərdən bir neçəsinin təəssüratlarını oxucularımıza təqdim edirik.

Özümə güvənirdim

Mən Goranboy rayonunun Tapqaraqoyunlu kəndində anadan olmuşam. Hal-hazırda Köçərli kənd tam orta məktəbində işləyirəm. Keçirilən sertifikasiya imtahanında 59 bal toplamışam. Bu nəticəni gözləyirdim, çünki çalışmışdım və özümə güvənirdim. Sertifikasiya imtahanının keçirilməsini alqışlayıram. Ona görə ki, bu imtahanda biz şagirdlərimizin gələcəyini düşünürük. Suallar çox asan idi. Mən belə asan olacağını gözləmirdim. Bu cür suallara cavab verə bilməyən müəllimlərin bugünkü gündə şagirdlərimizə dərs keçməyə haqqı yoxdur, düşünürəm. Biz bir şəxsiyyət olaraq öncə şagirdlərimizin gələcəyini düşünməliyik. Mən də gələcək fəaliyyətimdə şagirdlərimin daha savadlı, vətənpərvər, tərbiyəli bir şəxsiyyət kimi formalaşmasında səylə çalışacam.
Yüksək bal toplayan bütün müəllimlərimizi təbrik edir, gələcək fəaliyyətlərində uğurlar arzulayıram.

Vüsalə BALAKİŞİYEVA,
Köçərli kənd tam orta
məktəbində ibtidai sinif müəllimi

İmtahanın təşkili çox gözəl idi

Elm və Təhsil Nazirliyinin təşkil etdiyi müəllimlərin sertifikasiya imtahanı, mənim fikrimcə, təhsil sisteminin inkişafı və gələcək nəslin daha yaxşı təhsil ala bilməsi üçün çox önəmli və mütərəqqi bir ideyadır.
İmtahanla bağlı fikirlərim, təəssüratlarım çox yüksəkdir. Ümumiyyətlə, imtahanın təşkili çox gözəl idi. Müəllimlərin rahatlığı və təhlükəsizliyi ilə bağlı bütün tədbirlər görülmüşdü.
Mən 1984-cü ildə Tərtər rayonunun Kəngərli kəndində anadan olmuşam. Hazırda Tərtər şəhərində yaşayıram. Orta təhsilimi Kəngərli kənd tam orta məktəbində almışam. 2007-ci ildə isə Azərbaycan Müəllimlər İnstitutunun Qazax filialını Azərbaycan dili və ədəbiyyatı ixtisası üzrə bitirmişəm. Daha ətraflı »

Əziz müəllimim, dediyin hər söz
Qəlbimdə silinməz bir yadigardır.
Yuxusuzam deyib süzülən bir göz
Zəhməti itməzsə, nə bəxtiyardır!
Hörmətli müəllimlərim, işlərimi N. Nərimanov adına Tibb İnstitutuna vermişəm. Çalışacağam ki, sizin etimadınızı doğruldum. Sizi yada saldıqca həyəcanlanıram. “Əla” qiymət ala biləcəyəmmi?!
Bu sətirlər şəhər 2 nömrəli orta məktəbini bu il gümüş medalla bitirmiş Sona Əsgərovanın müəllimlərinə yazdığı məktubdandır. Sona şəhər 2 nömrəli orta məktəbini medalla bitirən ilk şagirddir. O, birinci sinifdən başlayaraq bütün sinifləri “əla” qiymətlərlə bitirmişdir. Sona oxuduğu müddətdə dəfələrlə məktəb və rayon komsomol komitəsinin Fəxri Fərmanları ilə təltif edilmişdir. 1965-ci ildə respublika kimya olimpiadasının, 1966-cı ildə riyaziyyat olimpiadasının iştirakçısı olmuşdur. 1966-cı ilin avqust ayında məktəb tərəfindən Moskvaya ekskursiyaya göndərilmişdir. Daha ətraflı »

Tərtər rayon İcra Hakimiyyətinin başçısı Müstəqim Məmmədov məzunları təbrik etdi

Tərtər rayonunun 34 tam, 10 ümumtəhsil məktəbində “Son zəng” tədbirləri təşkil olunub.
“Son zəng” tədbirlərində Tərtər Rayon İcra Hakimiyyətinin başçısı Müstəqim Məmmədov, rayon polis şöbəsinin rəisi Elçin Qasımov, rayon Təhsil Sektorunun müdiri Oqtay Sarıkişiyev, idarə, müəssisə, təşkilat rəhbərləri, şəhid ailələri, qazilər, veteranlar, məktəb kollektivləri, valideynlər və ictimaiyyət nümayəndələri iştirak ediblər.
Tədbirlər Dövlət himninin səsləndirilməsi ilə başlayıb. Tədbir iştirakçıları əvvəlcə Ümummilli Lider Heydər Əliyevin və torpaqlarımızın ərazi bütövlüyü uğrunda canlarından keçən şəhidlərimizin xatirəsini bir dəqiqəlik sükutla yad ediblər.
Bu il rayonun ümumtəhsil məktəblərində 668 nəfər şagird 1 sinfi, 998 nəfər şagird IV sinfi, 919 nəfər şagird IX sinfi, 666 nəfər şagird isə XI sinfi bitirir.
Tərtər Rayon İcra Hakimiyyətinin başçısı Müstəqim Məmmədov Tərtər şəhər 1 nömrəli, 5 nömrəli, 6 nömrəli, Şıxarx qəsəbə 2 nömrəli, Xoruzlu kənd tam orta məktəblərdə, 2 saylı məktəb-liseydə və rayon ərazisində yerləşən Laçın rayon Nərimaniya kənd tam orta məktəbində təşkil olunan “son zəng” tədbirlərində iştirak edib, tədbir iştirakçılarını salamlayıb. 2023-cü ilin Azərbaycan Respublikası Prezidenti cənab İlham Əliyevin 29 sentyabr 2022-ci il tarixli Sərəncamı ilə “Heydər Əliyev ili” elan olunduğunu, belə bir tarixi ildə məzunların müstəqil həyata qədəm qoyduqlarını vurğulayıb. Daha ətraflı »

BİZ BURANI TANIDIQ VƏ SEVDİK

Azərbaycan çox qədim tarixi köklərə əsaslanan bir çox inzibati ərazilərə malikdir. Bu səbəbdən Azərbaycanın region və şəhərlərini daha yaxşı analiz etmək üçün mənim kimi həvəskar bir qrup gənc bir sıra layihələr, düşərgələr və ekskursiyalar təşkil edir və birbaşa iştirak edirik. Bu düşərgələrdən biri qədim yaşayış məskənlərimizdən olan Tərtər rayonuna idi. Bu düşərgə zamanı bizim məqsədlərimizdən biri də regionumuzu daha yaxşı tanımaq və analiz edə bilmək idi. Biz “Tərtər Olimpia Kompleksi”ndə dörd gün keçirərək bir sıra yeni məlumatlar və faktlar öyrəndik. Düşünürəm ki, bunlar çox gözəl təcrübə idi. Daha ətraflı »

Cari dərs ilinin son günlərində Sarıcalı kənd tam orta məktəbində çox maraqlı, xatirələrdə uzun müddət yaşanacaq bir görüş keçirildi. Müəllim və şagird kollektivi məktəbin fəxri məzunlarını-ehtiyatda olan polkovnikleytenant, təhlükəsizlik üzrə ekspert İlham İsmayılı və bacarıqlı pedaqoq, işlədiyi illər ərzində yüzlərlə şagirdin ürəyinə vətənpərvərlik və ədəbiyyata məhəbbət toxumları səpmiş Bəsti İsmayılovanı gül-çiçəklə qarşıladılar. Görüşdə Tərtər Təhsil Sektorunun nümayəndəsi Müsaməddin Qurbanov və “Yeni Tərtər” qəzetinin baş redaktoru Svetlana Bağırova da iştirak edirdilər.
Qonaqları salamlayan məktəbin direktoru Vəsilə Mehdiyeva bildirdi ki, qədim Sarıcalı eli özünün məşhur insanları ilə seçilir. Bu görüşün keçirilməsində məqsəd böyüyən nəsli kəndin, eləcə də təhsil aldıqları və cari ildə özünün 90 illiyini qeyd edəcək məktəbin tarixi və məzunları ilə tanış etməkdir. Daha ətraflı »

Aişə Bayramlı şəhər 1 saylı tam orta məktəbin şagirdidir. O, hələ şagird partasında əyləşsə də, bugündən öz gələcəyini qurmağa çalışır və buna çox gözəl nail olur. Aişənin nailiyyətlərini oxucularımıza onun öz dilindən təqdim edirik.

Mən 3D oyun dizayneri və sahibkaram. 2023-cü ildə Dövlət İmtahan Mərkəzi tərəfindən keçirilən 9-cu sinif buraxılış imtahanında 270.1 bal toplayaraq Tərtər üzrə 1-ci oldum. Lakin bundan əlavə bir çox beynəlxalq və yerli müsabiqələrdə iştirak etmiş və qalib olmuşam.
2021-ci ildə Tərtər-Bərdə-Ağdam rayonlarının ilk ingiliscə gender bərabərliyi mövzusunda tamaşalarında (Drammer) oynamış və fərqlənmişəm. PolyUp Azərbaycan qalibiyəm.
Qlobal istiləşmə probleminin həll olunması məqsədi ilə layihə hazırlamış və Stanford Universiteti tərəfindən mükafatlan-ırılmışam. Layihəm isə Stanford tərəfindən 2021-ci ilin ən yaxşı layihələrindən biri olaraq elan olunmuşdur.
Azərbaycan Uşaqlarının V Ümumrespublika Forumuna əsas Tərtər təmsilçisi seçilmiş və forumda iştirak etmişəm.
Mərkəzi Amerikada yerləşən Let’sMOD şirkətinin məsləhət şurasındakı 2 şagirddən biriyəm. 3 ilə yaxındır ki, Let’s-MOD şirkətində fəaliyyət göstərirəm və Let’sMOD Azərbaycan İcmasının lideriyəm.
2022-ci ildə keçirilmiş “Global Let’sMOD Competition”un qalibiyəm. Let’sMOD-ı yuxarı səviyyədə bildiyim üçün şirkət tərəfindən onlayn yay düşərgəsinə dünyanın fərqli ölkələrindən şagirdlərə 3D modelləşdirmə, riyaziyyat, dizayn və s. kimi mövzularda ingiliscə dərslər keçmək üçün dəvət olunmuşdum. Həmçinin “2022 Summer Camp” müsabiqəsində dünya üzrə 1-ci yerə layiq görülmüşəm. Daha ətraflı »

59 il bundan əvvəl rayonumuzda peşə məktəbinin açılması həm Tərtərimizin, həm də ətraf rayonların həyatında əlamətdar hadisə oldu. Çünki bütün dövrlərdə öz peşəsini sevən və yaxşı bilən kadrlara ehtiyac olub.
Bu illər ərzində məktəbdə minlərlə gənc müxtəlif peşələrə yiyələnərək kənd təsərrüfatında, sənayedə, xidmət sahələrində uğurla çalışıb, ölkəmizin inkişafına öz töhfələrini veriblər. Məktəbin məzunları həm I Qarabağ, həm də 44 günlük Vətən müharibəsində fəal iştirak ediblər. Onlardan şəhidlik zirvəsinə ucalanlar var. Müəllim və tələbə kollektivi şəhidlərin xatirəsini daim uca tutur, keçirilən tədbirlərdə onları yada salırlar.
Lakin 59 il ərzində məktəb heç zaman əsaslı təmir olunmauşdu. Xüsusən erməni işğalı nəticəsində yurd-yuvalarından didərgin düşən soydaşlarımız məktəb binasında məskunlaşandan sonra, burada vəziyyət daha acınacaqlı olub, yardımçı binalar köhnə tikililər olduğundan böyük əksəriyyətində uçmaq təhlükəsi yaranıb.
44 günlük Vətən müharibəsindəki şanlı Zəfərimizdən sonra həyatımızın bütün sahələrində olduğu kimi, bu məktəbin həyatında da mühüm dəyişikliklər baş verib.
Uzun illərdən sonra burada təmir işlərinə başlanılıb.
Artıq Elm və Təhsil Nazirliyinin xətti ilə “FH” MMC şirkəti məktəbdə əsaslı təmir işlərinə başlayıb və bu işlər sürətlə davam etdirilir. Daha ətraflı »

Ş-ərəf, U-ğur, Ş-əhadət, A-zadlıq və daha nələ-nələr yaza biləcəyimiz ecazkar şəhər.
İgid oğullarımızın şərəflə uğur qazanmaq üçün şəhadət şərbəti içib azadlığa qovuşdurduğu qədim şəhər. Adı çəkilən zaman izahı olmayan qürur bürüyür insanın qəlbini, ruhunu. Necə də gözəl, necə də fərəhlidir azad Şuşadan yazmaq.
2023-cü ilin Şuşanın Türk Dünyasının Mədəniyyət paytaxtı elan olunması ilə əlaqədar təhsil müəssisələrində keçirilən tədbirlərə məktəbimiz də özünəməxsus şəkildə qoşuldu. Fərqli və maraqlı formatda təşkil olunmuş tədbirimizdə Şuşaya – o füsünkar diyara xəyali səyahətə yollandıq. Vacibdir ki, səyahət edəcəyimiz yerin tarixi, iqlimi, mədəniyyəti, mətbəxi, tanınmış şəxsiyyətləri haqqında məlumatlı olaq. Elə bu səbəbdən də məktəbimizin fənn müəllimləri səyahətimizə bələdçilik etdilər. Belə ki, məktəbimizin tarix müəllimi Yavər Abbasova Şuşanın tarixi, yaranması, işğalı və azad edilməsi haqqında tədbir iştirakçılarına əhatəli və dolğun məlumat verdi.
Bizə bu səyahətdə bələdçilik edən məktəbimizin biologiya müəllimi Raya Əliyeva Şuşanın flora və faunası haqqında geniş və maraqlı məlumatları iştirakçıların diqqətinə çatdırdı. Daha ətraflı »

Bakı Dövlət Universitetinin və Tərtər Rayon İcra Hakimiyyətinin birgə təşkilatçılığı ilə mənim doğma Tərtərimdə Ümummilli Lider Heydər Əliyevin 100 illik yubileyinə həsr olunmuş konfransın keçirilməsi hər bir tərtərli kimi məni də çox qürurlandırdı. Universitet müəllimlərinin, görkəmli alimlərin orta məktəblərdə, “Gənclər Mərkəzi”ndə şagirdlərlə, gənclərlə keçirdikləri görüşlər mənə orta məktəb illərimi xatırlatdı. O illərdə cəbhəyanı bir kəndin – Qapanlı kənd məktəbinin şagirdi olsam da, çox fəal idim və dəfələrlə müxtəlif bilik yarışmalarında, olimpiadalarda qalib olub mükafatlandırılmışdım. Bundan sonra Bakı Dövlət Universitetində bakalavr, sonra isə magistr pilləsini müvəffəqiyyətlə bitirdim.
2018-2019-cu illərdə BDU-nun Fizika fakultəsində “Fizika müəllimliyi” ixtisası üzrə əlavə təhsil aldım.
Həmin diplomu mənə BDU-nun indiki rektoru Elçin Babayev təqdim etmişdi.
Hal-hazırda AMEA-nın Neft-Kimya Prosesləri İnstitutunun “Üzvi birləşmələrin və neft məhsullarının spektral üsullarla tədqiqi” laboratoriyasında elmi işçi vəzifəsində çalışıram. 2021-ci ildə “Neft kimyası” ixtisası üzrə dissertanturaya qəbul olmuşam.
Mənə elə gəlir ki, BDU-nun çoxhörmətli professor-müəllim heyətinin qəhrəman Tərtərdə keçirdikləri tədbir, Ümummilli Liderimizin həyat və fəaliyyəti ilə bağlı oxuduqları mühazirələr neçə-neçə gəncin qəlbində elmə maraq oyadacaq və mənim kimi onların yolu da bu elm məbədindən keçəcək.

Nərgiz Orucova

Xoş sözlər deyildi, nəğmə və şeir çələngi səsləndirildi

Şəhid Aslan Kərimov adına 3 saylı orta məktəbdə keçirilən növbəti tədbir “Heydər Əliyev ili”nə həsr edilmişdir.Tədbirdə məktəbin müəllim və şagird kollektivi, şəhid ailələri, qazilər və ictimaiyyət nümayəndələri iştirak edirdilər.
Öncə Azərbaycanın Dövlət himni səsləndirildi. Ulu Öndər Heydər Əliyevin və Qarabağımız uğrunda canından keçən şəhidlərin ruhu bir dəqiqəlik sükutla anıldı. Sonra məktəbin tarix müəllimi Kifayət Kərimova Heydər Əliyev fenomenindən və onun Azərbaycanın inkişafındakı rolundan danışdı. Dahi şəxsiyyət Heydər Əliyevin əvəzolunmaz bir insan olduğunu vurğuladı.
Tədbirdə şəhid valideynləri və qazilər çıxış etdilər. Çıxış edənlər Ulu Öndərin layiqli davamçısı İlham Əliyevə və dövlətimizə öz minnətdarlıqlarını bildirdilər.
Tədbirə məktəbin şagirdlərinin hazırladıqları şeir və nəğmə çələngi xüsusi rəng verdi. Şagirdlərdən Ayla Quluzadə, Zeynəb Nəsirli və başqaları söylədikləri seirlərlə diqqət çək-dilər.
Tədbirin hazırlanıb keçirilməsində müəllimlər Lə-man Qasımova və Nigar Sultani xüsusi fəallıq göstəriblər.

“Yeni Tərtər”