DOSTLUQ VƏ QARDAŞLIQ ƏLAQƏSİNİN BƏHRƏSİ

Türkiyə Respublikasının Gəncə şəhərindəki Baş Konsulu Recep Öztop və Türk Əməkdaşlıq və Koordinasiya Agentliyinin (TİKA) Bakı proqram koordinatoru Hayrettin Özçelik Tərtər Rayon İcra Hakimiyyətinin başçısı Müstəqim Məmmədov ilə görüşüblər.
Görüşdə rayon rəhbəri Türkiyənin həmişə Azərbaycanın yanında olduğunu vurğulayıb və “Bir millət, iki dövlət” prinsipi əsasında qurulan səmimi və qarşılıqlı dostluq münasibətlərinin daim mövcud olduğunu bildirib. Müstəqim Məmmədov həmçinin müxtəlif sahələrdə qardaş ölkənin dəstəyinin hər zaman hiss olunduğunu qeyd edərək, bu münasibətlərin gələcəkdə də uğurla davam etdiriləcəyinə əminliyini ifadə edib.
Qonaqlar iki ölkə arasındakı möhkəm dostluq və qardaşlıq əlaqələrindən danışaraq rayon rəhbərinə xatirə olaraq kitab hədiyyə ediblər.
Görüşdən sonra qonaqlar TİKA-nın dəstəyi ilə yenidən təmir olunmuş Tərtər şəhəri Heydər Əliyev adına parkda yerləşən “Açıq Hava Səhnəsi” ilə tanış olublar. Rayon Mədəniyyət Mərkəzi tərəfindən təşkil olunan konsert proqramında ilk olaraq hər iki dövlətin himnləri səsləndirilib, daha sonra yerli incəsənət ustalarının çıxışları təqdim olunub. Tamaşaçılar xoş və maraqlı anlar yaşayıblar.
Görüş və tədbir iki ölkə arasındakı dostluq, mədəni və humanitar əməkdaşlığın daha da gücləndirilməsinə xidmət edən mühüm addım kimi dəyərləndirilib.

Bu il tariximizə “Konstitusiya və Suverenlik ili” kimi daxil oldu. Xalqımız Azərbaycan Respublikası Konstitusiyasının qəbul edilməsinin 30 illiyini qeyd etdi. Bu yubiley ölkəmizin bütün suveren ərazilərində böyük qürurla keçirildi.
Bəli, igid oğullarımızın sayəsində artıq torpaqlarımız işğalçılardan tam təmizlənib. Bütün ərazilərimizdə Azərbaycan bayrağı dalğalanır. Şanlı Zəfərimizin 5 illik yubileyini keçirərkən xalqımız Vətən yolunda canından keçən hər bir övladının əziz xatirəsini yad etdi, onların ailələri ziyarət olundu, qazilərimizlə görüşlər keçirildi. Tərtər rayonunda bu ənənə illərdir davam edir. Şəhid ailələri yalnız doğum və anım günlərində deyil, daimi olaraq ziyarət edilir, onların qayğı və problemləri öyrənilərək, lazımi köməklik göstərilir. 2025-ci ildə də belə oldu. Rayon rəhbəri, ictimaiyyət nümayəndələri daim bizim yanımızda oldular. Şəhidlərimizin əziz xatirəsinin əbədiləşdirilməsi məqsədi ilə rayonda görülən işlər davam etdirildi. İndi şəhərimizin ən yaraşıqlı küçələri Vətən uğrunda canından keçən oğulların adlarını daşıyır. Bu küçələr abadlaşdırılıb, qəhrəmanların barelyefləri quraşdırılıb. Görülən işlər, göstərilən qayğı övladlarımızın əbədiyaşarlığını xatırladır.
Eləcə də işğaldan azad edilən ərazilərə insanların qayıdışı bizim üçün təsəllidir.
Hər dəfə illərin qovuşuğunda arzumuz torpaqlarımızın işğalına son qoymaq idi. İndi diləklərimiz çin olub. Arzu edirəm ki, bundan sonra da ölkəmizdə əmin-amanlıq olsun, Azərbaycan daha da qüdrətlənsin, böyüyən nəsil sülh şəraitində, xoşbəxt və firavan yaşasın!

Bəhruz İsgəndərov,
şəhid atası

RAYONUMUZDA EHSAN SÜFRƏSİ SADƏLƏŞDİRİLİB

Həyat elədir ki, bir gün gələn bir gün də bu dünyadan getməlidir. Bunu nə qədər dərk etsək də, insan üçün əzizinin, doğmasının itirilməsi ağır zərbə olur.
Belə zamanlarda yaxınların, dostların gəlib başsağlığı verməsi, ailənin yanında olması bir təsəllidir və bu, xalqımızın böyüklüyünü, humanistliyini göstərir.
Lakin yas mərasimlərinin dəbdəbəli məclislərə çevrilməsi, təmtəraqlı ehsan süfrələrinin açılması düz deyil və israfçılıq islam dinində də pislənilir.
Son zamanlar bu istiqamətdə rayonumuzda aparılan təbliğat işlərinin nəticəsidir ki, həm şəhərimizin özündə, həm də kəndlərimizdə ehsan süfrələri sadələşdirilib. Bu, əhali tərəfindən də müsbət qarşılanıb.
Ona görə ki, həqiqətən əzizini itirmiş bir şəxsin o vəziyyətdə ağır məclis üçün ehtiyat görməsi düz deyil. Çoxları belə məclislərdən sonra borc altında qalır, mənəvi zərbə ilə yanaşı, həm də maddi cəhətdən sıxıntılarla üzləşirdilər.
Rayon rəhbərliyinin, ağsaqqalların, ağbirçəklərin və Tərtər Cümə Məscidi dindarlarının apardıqları izahat işləri nəticəsində ehsan süfrələrinin sadələşdirilməsi olduqca təqdirəlayiqdir. Çünki biz o məclislərə təsəlli vermək, dərdə şərik olmaq üçün gedirik, bunu isə sadə çay süfrəsi arxasında etmək daha məqsədəuyğundur.
Qəhrəman tərtərlilər ən çətin günlərdə bir-birinə dayaq olublar. Bu, indi də belədir və hər kəs də ehsan verilməsi məsələsində eyni fikirdədir.

Sofiya Həsənova,
Tərtər şəhər sakini,
rayon Ağsaqqallar Şurasının üzvü

MÜƏLLİM ÖMRÜNÜN ZİRVƏSİ

Tərtər Rayon İcra Hakimiyyətinin başçısı Müstəqim Məmmədov uzun illər təhsil sahəsində çalışmış, gənc nəslin təlim-tərbiyəsi ilə məşğul olmuş dəyərli ziyalı, şəhid qardaşı Azad Abbasovu 70 illik yubileyi münasibəti ilə təbrik edib.
Azad müəllim 1955-ci ildə Ağdərə rayonunun Umudlu kəndində anadan olub. Kəndlərinin işğalından sonra ailəlikcə Tərtər şəhərinə köçüblər. Əvvəllər Umudlu kənd tam orta məktəbində müəllim, sonra direktor müavini, daha sonra isə uzun illər şəhər 6 nömrəli tam orta məktəbinin direktoru vəzifəsində işləyib. Elə həmin məktəbdən də təqaüdə çıxıb. O, həyat yoldaşı Zümrüd müəllimə ilə birlikdə 2 qız, bir ogul övladı böyüdüblər, artıq nəvə sahibidirlər.
Azad müəllimin özündən böyük qardaşı Abbasov Məmməd Salman oğlu 1991-ci il may ayının 25-də erməni işğalçılarının Umudlu kəndinə hücumu zamanı bu hücumun qarşısının alınmasında xüsusi fəallıq göstərmiş və döyüş zamanı qəhrəmancasına şəhid olmuşdur. O, doğulduğu Umudlu kəndinin qəbiristanlığında dəfn olunub.
Rayon rəhbəri Azad Abbasovu təbrik edərək, ona gənc nəslin təlim-tərbiyəsində göstərdiyi xidmətə görə təşəkkürnamə və hədiyyə təqdim edib.
Qeyd edək ki, Azad müəllimin oğlu Məmməd Azərbaycan Ordusu sıralarında xidmət edir. Valideynləri hərbçi övladları ilə qürur duyurlar.
Azad müəllim və onun ailə üzvləri təhsil işçilərinə, şəhid ailələri və qazilərə göstərilən diqqət və qayğıya görə Azərbaycan Res-publikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlığını bildiriblər.

“YENİ TƏRTƏR”

“ÜMUMMİLLİ LİDER HEYDƏR ƏLİYEV MÜSTƏQİL AZƏRBAYCAN KONSTİTUSİYASININ MÜƏLLİFİDİR”

Bu mövzuya həsr olunmuş tədbirdə Tərtər Rayon İcra Hakimiyyətinin başçısı Müstəqim Məmmədov, hüquq mühafizə orqanlarının rəhbərləri, YAP rayon təşkilatının sədri Eldar Əsədov, idarə, müəssisə, təşkilat rəhbərləri, İƏD üzrə nümayəndələr və bələdiyyə sədrləri iştirak ediblər.

Tədbir iştirakçıları əvvəlcə Ulu Öndər Heydər Əliyevin mərkəzi meydanda ucaldılmış abidəsini ziyarət edib, önünə gül dəstələri düzüblər.
Tərtər Rayon İcra Hakimiyyətinin iclas zalında davam edən tədbir Dövlət Himninin səsləndirilməsi ilə başlayıb. Sonra Ümummilli lider Heydər Əliyevin və torpaqlarımızın suverenliyi uğrunda canlarından keçmiş şəhidlərin xatirəsi bir dəqiqəlik sükutla yad edilib.
Tərtər Rayon İcra Hakimiyyətinin başçısı Müstəqim Məmmədov çıxış edərək, əvvəlcə qardaş Türkiyənin hərbi təyyarəsinin qəzaya uğraması nəticəsində şəhid olanların xatirəsini bir dəqiqəlik sükutla yad edilməsini təklif edib, onlara Ulu Tanrıdan rəhmət diləyib.
Rayon rəhbəri qeyd edib ki, Heydər Əliyevin ikinci dəfə siyasi hakimiyyətə gəlişi nəinki Azərbaycanı, bütöv bir xalqı məhv olmaq təhlükəsindən xilas etdi. 1993-cü ilin iyun hadisələrinə qiymət verməyi bacaran hər bir insan dərindən dərk edir ki, Ulu Öndər o dövrdə qardaş qırğınının, vətəndaş müharibəsinin qarşısını almağa həyatını təhlükəyə atmaqla, ölümdən çəkinməyərək nail oldu.
Heydər Əliyev demokratik hüquqi dövlət qurmaq, köklü islahatlar aparmaq üçün ilk növbədə ölkədə ictimai-siyasi sabitliyi, qanunçuluğu bərqərar etdi, cəmiyyətdə hökm sürən hərc-mərcliyə və özbaşınalığa birdəfəlik son qoydu. Daha ətraflı »

Milli strategiyanın regional dayağı

Mənim uşaqlıq illərim Tərtərin isti, həm də sərt ruhunda formalaşıb. Buranın torpağı strateji mövqeyi, milli yaddaşdakı simvolik çəkisi və insanlarının dözümlülüyü ilə Azərbaycanın siyasi xəritəsində xüsusi yer tutur. Uzun illər ön cəbhə xəttinə ən yaxın rayonlardan biri olan Tərtər, faktiki olaraq, ölkənin təhlükəsizlik buferi rolunu oynayıb. Elə bu səbəbdən də, burada gündəlik həyat heç vaxt sırf yerli səviyyədə məhdudlaşmayıb—hər evin pəncərəsindən milli təhlükəsizliyin sərhədlərinə baxmaq mümkün idi.
2020-ci ilin 44 günlük müharibəsi və ardınca Qarabağın tam suveren idarəçiliyə qaytarılması Tərtərin siyasi və strateji statusunu yeni mərhələyə daşıdı. Əvvəllər ön xəttdə yerləşən, daim artilleriya atəşinə məruz qalan bu bölgə indi tədricən dövlətin regional inkişaf siyasətinin mərkəzinə doğru irəliləyir. Artıq Tərtər post-müharibə dövründə həm təhlükəsizlik arxitekturasının, həm də sosial-iqtisadi yenidənqurmanın vacib həlqəsinə çevrilir. Daha ətraflı »

Tərtər şəhər İsmayıl Məmmədov adına 2 nömrəli məktəb-liseydə və Rafiq Nuriyev adına 6 nömrəli tam orta məktəblərdə keçirilən tədbirlərdə Tərtər Rayon İcra Hakimiyyəti Başçısı aparatında Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Rəvan Həsənov, “Uşaqların Gələcəyi Naminə” İB-nin sədri Könül Quliyeva, Milli Mədəniyyətin Təbliği İBnin sədri Jalə Cəfərova, 2 nömrəli məktəb-liseyin direktoru Gülarə Ələkbərova və 6 nömrəli tam orta məktəbin direktoru Rüfət İsmayılov, müəllim kollektivi, şagirdlər və valideynlər iştirak ediblər.
“Milli-mənəvi dəyərlərin araşdırılmasında məktəb və ailənin rolu” layihəsi haqqında məlumatlar, həmçinin tədbirin məqsədindən, milli-mənəvi dəyərlərin qo-runmasında uşaqlarımızın, yeniyetmələrimizin və gənclərimizin milli ruhda tərbiyə olunmasının rolundan, məktəb-ailə münasibətinin gücləndirilməsindən  danışılıb. Mövzu ətrafında müzakirələr aparılıb.
Tədbirin sonunda iştirakçıları maraqlandıran suallar cavablandırılıb.

Sadələşdirilmiş süfrə ehsanatını qorumağı tövsiyə edirik!

Son zamanlar Tərtər şəhərində və kəndlərində yas mərasimlərində ehsan verilməsi sadələşdirilib. Lakin bəzi kəndlərimizdə bu qaydalara əməl edilmir. Ümumiyyətlə, yas mərasimlərində ehsan verilməsinə dini baxımdan necə yanaşılır? Bu suala cavab almaq üçün Qafqaz Müsəlmanları İdarəsinin Tərtər rayonu üzrə səlahiyyətli nümayəndəsi, Tərtər Cümə Məscidinin imamı Sadiq Cəfərova müraciət etdik.
O bildirdi ki, müqəddəs İslam dinində istər ifrat, istərsə də təfrit müsəlmanlara və bütün bəşər övladlarına qadağan edilmişdir. Etiraf etmək lazımdır ki, son dövrlərdə yas mərasimlərində israfçılığa çox yol verilirdi. Bununla bağlı Qafqaz Mü-səlmanları Ruhani İdarəsi bir neçə il bundan əvvəl müsəlmanlara yas mərasimlərini sadələşdirməyi tövsiyə etmişdir.
Sadiq Cəfərov söylədi ki, bəzən “ehsan” sözünün mənasını səhv anlayırıq. “Ehsan” deyəndə nəzərimizə müxtəlif növ yemək və qida məhsulları gəlir. Əslində isə ehsan yaxşılıq deməkdir. Körpü salmaq, su çəkdirmək, bir yolu səliqəyə salmaq özü də ehsanatdır, ən bəyənilmiş yaxşı əməllərdəndir.
Təqdirəlayiq haldır ki, son illərdə ruhanilərimiz və rayon ağsaqqalları tərəfindən aparılan dini maarifləndirmə nəticəsində istər rayon mərkəzində, istərsə də kəndlərin böyük əksəriyyətində ehsan süfrələri sadələşdirilib və bu sahədə israfçılığın qarşısı alınıb.
Tərtər Cümə Məscidinin imamı onu da xatırlatdı ki, yaxın keçmişdə yas evinə qonşular və qohumlar yemək tədarük edib aparırdılar ki, yaxınını itirmiş ev sahibinin başı qarışıqdır, o, yemək hazırlaya bilməz. Bu, həm də uzaqdan baş-sağlığına gələn qonaqların qida ehtiyacının təmin olunmasına yönələn savab bir işdir. Onların ac qalmamıası üçün yeməklərin ailə üzvləri tərəfindən deyil, qonşular və yaxınlar tərəfindən təqdim olunması daha doğru sayılır. Daha ətraflı »

Bütün süni məhdudiyyətlərə rəğmən Ulu Öndər Heydər Əliyev ana dili məsələsində öz mövqeyini hər zaman çox qətiyyətlə qorumağa müvəffəq olmuşdur. Dövlət dili uğrunda ardıcıl mübarizə aparan Ümummilli Lider ziyalıları, xalqı ana dilinin dövlət dili kimi yaşamaq hüququ uğrunda mübarizəyə cəlb edərək bütün qüvvələri səfərbər etmişdir. Böyük tarixi şəxsiyyət SSRİ Konstitusiyası haqqında danışarkən öz nitqində xüsusi olaraq vurğulamışdır ki, Konstitusiya vətəndaşlara təhsil hüququ vermişdir. Bu hüquq ana dilində oxumaq imkanı ilə təmin olunur.

Ümummilli Lider Heydər Əliyevin Azərbaycan dilinə dövlət dili statusunun verilməsində əvəzsiz rolu olmuşdur. 1978-ci il aprelin 2-də IX çağırış Azərbaycan SSR Ali Sovetinin Azərbaycan Sovet Sosialist Respublikası Konstitusiyasının layihəsi və onun ümumxalq müzakirəsinin yekunlarına həsr olunmuş VII sessiyasında məruzə ilə çıxış edən Ulu Öndər Heydər Əliyevin təklifi ilə 73-cü maddəni aşağıdakı redaksiyada vermək təklif olunmuşdur: “Azərbaycan Sovet Sosialist Respublikasının dövlət dili Azərbaycan dilidir.” Daha ətraflı »

“Qərbi Azərbaycan irsi” kitabının təqdimatı və bütövlükdə bu irsin qorunması ilə bağlı mediamızın üzərinə böyük vəzifələr düşür. Möhtərəm Prezidentimiz cənab İlham Əliyev bu günlərdə III Şuşa Qlobal Media Forumundakı çıxışında deyib: “Bu gün Azərbaycan Mediası dövlət maraqlarını qorumağa qadirdir. Azərbaycana qarşı əsassız ittihamları arqumentlərlə, ciddi təhlillə və faktlar əsasında ifşa etməkdə də böyük uğurlar əldə edib. Bizim mediamız nəinki dövlət maraqlarını müdafiə edir, eyni zamanda lazım gəldikdə hücuma da keçir”.
“Qərbi Azərbaycan irsi”, I cild kitabının məqsədi də elə budur – bütün dünyaya mənfur ermənilərin əsl üzünü açıb göstərmək, onların bəd əməllərini ifşa etmək. Rayon qəzeti olaraq biz də bu vəzifəni fəaliyyətimizin əsas məqsədlərindən biri hesab edirik. “Yeni Tərtər”in saytının fəaliyyət göstərməsi də materiallarımızı daha geniş auditoriyaya çatdırmnaq imkanı yaradır.
Tərtər Qərbi Azərbaycandan müxtəlif illərdə zorla qovulmuş soydaşlarımıza ən çox qucaq açan rayonlardan biridir. Bunun bir səbəbi rayonumuzun gözəl iqlim şəraitidirsə, digər ən mühüm səbəb sakinlərimizin mehribançılığı və qonaqpərvərliyi olub. Beləliklə də ötən əsrin əvvəllərində burada İrəvanlı, Təzəkənd və digər kəndlərin təməli qoyulub, əsrin sonunda isə Qərbi Azərbaycandan deportasiya edilən insanlar Bəyimsarov kəndində məskunlaşıblar. Bundan başqa, hər bir kənddə və şəhərin özündə İrəvanlı məhəllələri var.
Rayon qəzetinin əməkdaşı olaraq uzun illər ərzində bu insanlarla görüşüb, qəzetimiz üçün materiallar hazırlamışıq. Hər dəfə də əmin olmuşuq ki, yurdundan uzaq düşən Qərbi azərbaycanlılar burada özləri üçün nə qədər yaxşı şərait yaratsalar da, ruhən hər zaman o dağlarda, doğulub boya-başa çatdıqları yerlərdə qalıblar. Ona görə də Qərbi Azərbaycana qayıdış onların mənəvi haqqı, milli hədəfin növbəti mərhələsidir.
Biz həmişə deyirdik ki, gün gələcək, Qarabağa dönəcəyik. Şükürlər olsun bu günü gördük. İndi də inanırıq ki, möhtərəm Prezidentimizin, dövlətimizin apardığı siyasət nəticəsində gün gələcək, Qərbi Azərbaycana soydaşlarımızın təhlükəsiz qayıdışı təmin ediləcək. Həyat göstərir ki, həqiqət hər zaman qalib gəlir. Allah bu günləri də görməyi bizə nəsib etsin.

“YENİ TƏRTƏR”