Tərtər Rayon İcra Hakimiyyətinin başçısı Müstəqim Məmmədov YAP Tərtər Rayon Təşkilatının sədri Eldar Əsədovla birlikdə rayonun Seydimli kəndində şəhid İsmayılov Səfər İsbi oğlunun anası İsmayılova Şirin Əsəd qızını 80 illik yubileyi münasibəti ilə yaşadığı ünvanda ziyarət edərək, onu təbrik edib, şəhid ailəsinin qayğıları ilə maraqlanıb.
İcra başçısı bütün şəhid valdeyinlərinin baş tacımız olduğunu bildirib. Şəhid anasına rayon icra hakimiyyəti tərəfindən təşəkkürnamə və gül dəstəsi təqdim edib.
O, məğlubedilməz sərkərdə cənab İlham Əliyevin rəhbərliyi ilə ordumuzun Birinci Qarabağ müharibəsi şəhidlərinin də qisasını aldığını bildirib. Bu gün torpaqlarımızın işğaldan azad olması üçün şəhidlərə borclu olduğumuzu qeyd edib.
Qeyd edək ki, İsmayılov Səfər İsbi oğlu 1939-cu il iyun ayının 5-də Tərtər rayonunun Seyidimli kəndində anadan olmuşdur. Həmin kənd orta məktəbində təhsil almış və keçmiş Sovet Ordusu sıralarında həqiqi hərbi xidmətdə olmuşdur. Qarabağ hadisələri başlanan vaxt doğma kəndlərində N.Nərimanov adına kolxozda işləyirdi. 1992-ci il iyun ayının 19-da kolxozun mal-qarasını otararkən minaya düşərək həlak olmuşdur. Evli idi. Sevda, Sevil və Bəsdi adlı üç qızı, Baba və Ağa adlı iki oğlu var. Tərtər rayonu Seyidimli kənd qəbiristanlığında dəfn olunub.
Şəhid anası şəhid ailələrinə, qazilərə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezidenti Mehriban xanım Əliyevaya öz minnətdarlığını bildirib.

Tərtər Rayon İcra Hakimiyyətinin başçısı Müstəqim Məmmədov YAP Tərtər Rayon Təşkilatının sədri Eldar Əsədovla birlikdə Vətən Müharibəsi şəhidi İsaxlı Anar Rəsul oğlunun anası İsaxova Kəmalə Bəşir qızını 50 illik yubileyi münasibəti ilə təbrik edərək ona səmimi arzularını çatdırıb. Şəhid anasına rayon icra hakimiyyəti tərəfindən təşəkkürnamə və gül dəstəsi təqdim edib, ailənin qayğıları ilə maraqlanıb.
Azərbaycan Ordusunun müddətdən artıq xidmət keçən hərbi qullluqçusu İsaxlı Anar Rəsul oğlu 1997-ci il mayın 30-da Tərtər rayonunun Cəmilli kəndində anadan olub. Anar İsaxlı 2020-ci il sentyabrın 27-də başlanan Vətən müharibəsində vuruşub və yaralanıb. Buna görə də qısa müddətli məzuniyyətə göndərilib. Anar İsaxlı oktyabrın 20-də Ermənistan Silahlı Qüvvələrinin Tərtər rayonunu atəşə tutması nəticəsində şəhid olub. Tərtər rayonunda dəfn olunub. Şəhid İsaxlı Anar 44 günlük Vətən müharibəsində gedən döyüşlərdə göstərdiyi igidliyə görə Azərbaycan Respublikasının Prezidenti cənab İlham Əliyevin müvafiq sərəncamına əsasən ölümündən sonra “Vətən uğrunda” medalı ilə təltif olunub.
Şəhid anası onlara göstərilən diqqət və qayğıya görə təşəkkürünü bildirib.

Son dövrlərdə həyata keçirilən “Regionların sosial-iqtisadi inkişafı Dövlət Proqramları” çərçivəsində rayonumuzun kəndlərində görülən işlər sakinlərin həyatını tamamilə dəyişib. Artıq onlar üçün elektrik enerjisi, qaz, su problemləri yoxdur. Elə bunun nəticəsidir ki, kənddə yaşamağa maraq artıb. Buradan şəhərə köçmək meyilləri azalıb. Son illərdə insanlar özlərinə rahat, müasir evlər tikdiriblər.
Kənd sakinlərini ən çox düşündürən məsələlərdən biri də yol infrastrukturudur. Bu sahədə də Tərtərdə çox işlər görülüb, kəndləri birləşdirən magistral yollar yenidən qurulub. Bəzi kəndarası yollarda rast gəlinən problemlər isə əhalinin müraciətləri əsasında həll edilir.
Bu günlərdə Köçərli kəndinin bir qrup sakini rayon icra hakimiyyətinin başçısına müraciət edərək, kəndarası yollara çınqıl tökülərək hamarlanmasını xahiş etmişdilər.
Müraciət əsasında rayon rəhbərinin tapşırığına əsasən Hüsənli Bələdiyyəsi tərəfindən həmin yola çınqıl tökülərək hamarlanıb, yolun kənarları kol-kosdan təmizlənərək səliqə-sahmana salınıb. Kənd sakinləri görülən işdən razı qalıblar.

Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq, mütəmadi surətdə Tərtər Rayon İcra Hakimyyəti başçısı tərəfindən həm rayon icra hakimiyyətində, həm də yerlərdə vətəndaş qəbulları keçirilir. Keçirilən qəbullarda vətəndaşları narahat edən məsələlər yerində öyrənilir və onların rastlaşdıqları problemlər həll olunaraq, vətəndaş məmnunluğu təmin olunur.
Tərtər rayon İsmayılbəyli kənd sakini, Vətən müharibəsi şəhidi Əlizadə Elşən Faiq oğlunun atası Faiq Əliyev müraciət edərək yaşadığı küçəyə çınqıl verilərək hamarlanmasını xahiş etmişdir. Müraciət əsasında rayon icra hakimiyyəti başçısının tapşırığına uyğun olaraq Qaraağacı Bələdiyyəsinin köməkliyi ilə qeyd olunan yola çınqıl verilərək hamarlanmışdır.
Müraciətin operativ həll olunduğu üçün şəhid atası təşəkkürünü bildirib.

“YENİ TƏRTƏR”

19 yanvar 2026-cı il tarixində Türkiyə Respublikasının Prezidenti Rəcəb Tayyib Ərdoğanın oğlu Bilal Ərdoğan ailə üzvləri ilə birlikdə Tərtər rayonuna səfər edib.

Səfər çərçivəsində Bilal Ərdoğan Tərtər Rayon İcra Hakimiyyətinin başçısı Müstəqim Məmmədovla görüşüb. Daha sonra rayon rəhbəri ilə birlikdə Tərtər şəhəri, Elman Səfərov küçəsində Sahib İsmayılova məxsus, erməni separatçıları tərəfindən atılmış “Smerç” raketi nəticəsində dağıdılmış açıq hava şəraitində fəaliyyət göstərən ev-muzeyinə baxış keçirilib.

Ekskursiya zamanı rayon icra hakimiyyətinin başçısı qonaqlara 44 günlük Vətən müharibəsi dövründə erməni silahlı qüvvələrinin raket və artilleriya hücumları nəticəsində dinc əhaliyə və mülki infrastruktura vurulmuş ağır ziyan barədə ətraflı məlumat verib. Bildirilib ki, müharibə dövründə Tərtər şəhəri və onun yaşayış məntəqələrinə ümumilikdə 16 277 top, tank və “Qrad” mərmisi atılıb, 21 ədəd qadağan olunmuş raketdən istifadə edilib. Həmin raketlərdən biri – “Smerç” raketi bu gün ermənilərin mülki əhaliyə qarşı törətdiyi terrorun bariz nümunəsi kimi açıq hava muzeyi kimi qorunan Sahib İsmayılovun evinə düşərək tikilini tamamilə dağıdıb. Bu fakt erməni vəhşiliyinin və dinc sakinlərə qarşı törədilmiş terror aktlarının açıq sübutudur. Daha ətraflı »

İndi rayonun qarşısında duran vəzifələr də fərqlidir

      Bu gün hər birimiz azad və müstəqil, qalib və qüdrətli, firavan həyat və xoş güzəran üçün zəruri əsasların bərqərar olduğu, sabit, inkişaf edən, beynəlxalq aləmdə söz sahibinə çevrilən Azərbaycan adlı bir dövlətin vətəndaşı olmağımızla qürur duyuruq. Müstəqillik tariximizin son 20 ili xalqımızın Ümummilli Lideri Heydər Əliyev siyasi kursunun layiqli davamçısı İlham Əliyevin adı ilə bağlıdır.

Prezident İlham Əliyev bu illər ərzində dövlətin daxili və xarici siyasətini böyük müdriklik və siyasi uzaqgörənliklə yönəldərək bir zamanlar əlçatmaz hesab edilən siyasi və iqtisadi hədəfləri fəth etmiş, müzəffər sərkərdə qüdrəti ilə nankor qonşularımızın – Ermənistan silahlı qüvvələrinin 30 il işğal altında saxladığı Qarabağ və Şərqi Zəngəzuru azad edərək öz xilaskar adını tarixə qızıl hərflərlə yazmışdır.

Dövlət başçısı yeni ilin ilk yaddaqalan görüşünü jurnalistlərlə keçirərək yerli televiziya kanallarına geniş müsahibə vermişdir. Müxtəlif suallara verdiyi tutarlı cavablar, siyasətçi peşəkarlığı ilə apardığı təhlillər, dünyaya verdiyi mesajlar, sosial-iqtisadi inkişafımızın yeni istiqamətləri, Qarabağ və Şərqi Zəngəzurun bərpası və yenidən qurulması, uğurla reallaşan Böyük qayıdışın detalları ölkə daxilindəki ictimai rəydə, eləcə də beynəlxalq mediada gündəm effekti yaratmışdır. Daha ətraflı »

“2025-ci il arxada qaldı. Bu il də ölkəmiz üçün, xalqımız üçün uğurlu il olmuşdur. Azərbaycan xalqı sülh, təhlükəsizlik, əmin-amanlıq şəraitində yaşamışdır. Xalq-iqtidar birliyi bizim uğurlarımızın əsas amilidir. Əminəm ki, qarşıdan gələn 2026-cı il də ölkəmiz üçün uğurlu olacaq, ölkə qarşısında duran bütün vəzifələr həmişəki kimi uğurla icra ediləcəkdir.”

Azərbaycan Respublikasının Prezidenti İlham Əliyev

Yeni ildə şəhid ailələrinin
ilk qonaqları

Yeni ilin ilk günlərində Tərtər Rayon İcra Hakimiyyətinin başçısı Müstəqim Məmmədov ilk olaraq şəhid ailələrini ziyarət edib. YAP Tərtər rayon Təşkilatının sədri Eldar Əsədovla birlikdə o, Azadqaraqoyunlu kəndində şəhid İsax Rəhimovun anası Dürnisə Rə-himovanı 75, Səhlabad kəndində şəhid Mənsur Ağayevin anası Qəmzə Ağayevanı 90, Gülabatlı kəndində şəhid Haqverdi Məmmədovun atası Lətif Məmmədovu 85 illik yubileyləri münasibəti ilə təbrik edib, yubilyarlara rayon icra hakimiyyəti tərəfindən “Təşəkkürnamə” və gül dəstəsi təqdim edib.
Rayon rəhbəri hər üç ailənin qayğıları ilə maraqlanıb, şəhidlərin xalqın yaddaşında əbədi yaşadıqlarını diqqətə çatdırıb.

Bu işdə ailə, məktəb, səhiyyə
sistemi və cəmiyyət bir olmalıdır

Uşaqlar və yeniyetmələr hər bir cəmiyyətin ən dəyərli sərvətidir. Onların sağlam böyüməsi, təhsil alması və psixoloji cəhətdən düzgün inkişafı üçün yaradılan şərait sabahın güclü cəmiyyətinin təməlidir. Lakin müasir dövrdə gənclərimiz müxtəlif zərərli vərdişlərin təsiri altına düşürlər.
Narkomaniya, tütünçəkmə və erkən nikahlar bu problemin başında gəlir.
Narkomaniya səssiz təhlükədir. Yeniyetmələr arasında narkotik maddələrə marağın artması narahatedici haldır. Bu, yalnız tibbi deyil, sosial problemdir. Bir çox hallarda gənclər psixoloji boşluq, ailə nəzarətsizliyi və mənəvi dəstəyin ol-maması səbəbindən bu yola sürüklənirlər. Nar-kotiklər bədəndə və beyində dərin izlər buraxır, gəncin təhsildən və normal həyat tərzindən uzaqlaşmasına səbəb olur.
Pis vərdişlərin yayılmasının qarşısını almaq yalnız bir qurumun işi deyil. Bu, ailənin, məktəbin, səhiyyə sisteminin və cəmiyyətin birgə səy-ləri ilə mümkün ola bilər. Uşaqlarımıza sağlam mühit yaratmaq, düzgün informasiya vermək və onları qorumaq bizim birbaşa borcumuzdur. Daha ətraflı »

     Tərtər 2025-ci ili də yüksək göstəricilərlə yola salır

 2019-cu ildə pambıqçıların respublika müşavirəsində Azərbaycan Respublikasının Prezidenti İlham Əliyev demişdir: “Mən bir daha demək istəyirəm ki, Tərtərdə pambıqçılıqda əldə edilmiş təcrübə öyrənilməlidir. Doğrudan da, çox böyük işlər görülübdür, özü də nəzərə almalıyıq ki, bu, düşmənlə üz-üzə yerləşən rayondur və tərtərlilər həmişə öz qəhrəmanlıqlarını, vətənə bağlılıqlarını göstərmişlər”.

Həmin müşavirədə dövlət başçısı həmçinin qeyd etmişdir ki, pambıqçılıqdakı bu yüksək nəticə ağır vəziyyətdə əldə edilib və doğrudan da, yüksək qiymətə layiqdir. O illər bədnam qonşular rayonun suyunu kəsmişdilər. Tərtərlilərin sülh arzusu ilə yanaşı, bir böyük istəkləri də vardı – əkib-becərdikləri torpaq susuzluqdan yanmasın. Daha ətraflı »

Azərbaycan Respublikasının Prezidenti İlham Əliyev cənablarının 2025-ci ilin “Konstitusiya və Suverenlik İli” elan edilməsi ilə bağlı təşəbbüsləri dövlətçilik tariximizdə mühüm mərhələ kimi qiymətləndirilir. Bu çərçivədə irəli sürülən amnistiya təşəbbüsü isə ölkəmizdə hüquqi dövlət quruculuğu, humanizm, ədalət və sosial məsuliyyət prinsiplərinin bariz ifadəsidir.

Azərbaycan Respublikasının Konstitusiyası müstəqil dövlətimizin hüquqi-siyasi əsaslarını müəyyən edən ali hüquqi sənəd olmaqla yanaşı, insan və vətəndaş hüquq və azadlıqlarının təminatçısıdır.  Möhtərəm Prezidentimiz İlham Əliyev cənablarının rəhbərliyi ilə həyata keçirilən hüquqi islahatlar Konstitusiyanın real həyatda tətbiqini, hüququn aliliyinin möhkəmləndirilməsini və cəmiyyətin rifahının yüksəldilməsini hədəfləyir. “Konstitusiya və Suverenlik İli” çərçivəsində amnistiyanın gündəmə gətirilməsi də məhz bu məqsədlərə xidmət edir.

Amnistiya təşəbbüsü dövlətin cəza siyasətində humanist yanaşmanı ön plana çıxarır. Bu addım bir tərəfdən cəzaçəkmə müəssisələrində saxlanılan şəxslərin islah olunmasına stimul yaradır, digər tərəfdən isə onların cəmiyyətə reinteqrasiyasına şərait formalaşdırır. Xüsusilə ilk dəfə az ağır və ya ağır olmayan cinayətlər törətmiş şəxslərin, sosial həssas qruplara aid məhkumların amnistiya aktı ilə azadlığa buraxılması dövlətin insana verdiyi dəyərin göstəricisidir.

Möhtərəm Prezidentimizin amnistiya təşəbbüsü həm də Azərbaycan dövlətinin güclü və suveren mövqeyinin ifadəsidir. Tam bərpa olunmuş ərazi bütövlüyü və dövlət suverenliyi şəraitində həyata keçirilən bu təşəbbüs göstərir ki, Azərbaycan yalnız hərbi-siyasi gücü ilə deyil, eyni zamanda hüquqi və mənəvi üstünlükləri ilə də regionda nümunəvi dövlətdir. Dövlət güclü olduqda bağışlamağı bacarır və bu, yüksək siyasi mədəniyyətin göstəricisidir.

Amnistiya aktları Azərbaycanda artıq davamlı hüquqi ənənəyə çevrilib. Son illərdə qəbul edilən əfv və amnistiya qərarları minlərlə ailənin sevincinə səbəb olmuş, cəmiyyətdə sosial həmrəyliyi və dövlətə inamı daha da gücləndirmişdir. “Konstitusiya və Suverenlik İli” münasibətilə irəli sürülən amnistiya təşəbbüsü də bu humanist siyasətin davamı olaraq tarixə düşəcək.

Nəticə etibarilə, Prezident İlham Əliyevin amnistiyanın elan edilməsi ilə bağlı təşəbbüsü Konstitusiyanın ruhuna, müstəqil və suveren Azərbaycan dövlətinin dəyərlərinə tam uyğun olmaqla yanaşı, cəmiyyətdə ədalət, mərhəmət və hüquqa hörmət anlayışlarını daha da möhkəmləndirir.

Eldar Əsədov,

YAP Tərtər rayon təşkilatının sədri