Tədbirdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, YAP rayon təşkilatının, rayon Ağsaqqallar Şurasının sədrləri, şəhid ailələri, qazilər, veteranlar, idarə, müəssisə, təşkilatların kollektivləri və ictimaiyyət nümayəndələri iştirak ediblər.

Tədbir iştirakçıları əvvəlcə Ümummilli Liderin 101-ci ildönümünə həsr edilmiş kitab sərgisinə, məktəblilərin əl işlərindən və rəsmlərindən ibarət sərgiyə baxıblar.

Sonra Ümummilli liderin abidəsi ziyarət olunaraq, gül dəstələri düzülüb.

Gülqoyma mərasimindən sonra rayon icra hakimiyyətinin başçısı Müstəqim Məmmədov hüquq mühafizə orqanlarının rəhbərləri ilə birlikdə Heydər Əliyev Mərkəzində Ulu Öndərin həyat və fəaliyyətini əks etdirən eksponatlara baxıb və Ulu Öndərin 101-ci ildönümü münasibəti ilə keçirilən rəsm müsabiqəsində yer tutan məktəblilər rayon rəhbəri tərəfindən fəxri fərnanla təltif ediliblər.

“Yeni Tərtər”in 90 illik yubileyi təntənəli şəkildə qeyd olunub

May ayının 3-də – Dünya Mətbuat Azadlığı Günündə “Yeni Tərtər” qəzetinin 90 illik yubileyi təntənəli şəkildə qeyd olunub.
Yubiley tədbirində qəzetin kollektivi ilə yanaşı rayon icra hakimiyyətinin başçısı Müstəqim Məmmədov, Milli Məclisin deputatı Sahib Alıyev, Azərbaycan Mətbuat Şurasının sədri Rəşad Məcid, Bakı Dövlət Universitetinin Jurnalistika fakültəsinin dekanı Vüqar Əliyev, unversitetin Redakisiya – nəşriyyat işi kafedrasının dosenti, həmyerlimiz Rasim Süleymanov, Tarix fakültəsinin elmi işlər üzrə dekan müavini Kəmalə Nəcəfova, Ahıl Jurnalistlər Birliyinin sədr müavini Əminə Yusifqızı, “Vətən Müharibəsi Qəhrəmanı”, şəhid polkovnik-leytenant Anar Əliyevin atası Vaqif Əliyev, yolu “Yeni Tərtər” qəzetindən keçən, imzası hər yerdə tanınan, hər birinin öz söz tribunası olan Qarabağ və Şərqi Zəngəzur üzrə “Azərbaycan” qəzetinin bölgə müxbiri Lazım Quliyev, İlham İsmayıl, Səbuhi Rəhimli, Təbriz Vəfalı, Bərdə, Zaqatala, Goranboy, Ağdam, Ağcabədi rayonlarının bolgə qəzetlərinin redaktorları, respublikanın tanınmış həkimi, həmyerlimiz, şəhid bacısı Məhəbbət Paşayeva, qəzetin keçmiş işçiləri, ştatdankənar müxbirləri, rayon ziyalıları iştirak ediblər.
Tədbir iştirakçıları öncə Ulu Öndərin Abidəsini ziyarət edib, önünə gül dəstələri düzüblər. Sonra redaksiyanın tarixini əks etdirən foto stendlərə, redaksiya əməkdaşlarının kitablarından ibarət sərgilərə baxıb, qəzetin müxtəlif illərdə nəşr olunmuş nömrələri ilə tanış olublar.
Yubiley tədbiri rayon icra hakimiyyətinin akt zalında davam etdirilib.
Əvvəlcə Dövlət Himni səsləndirilib. Sonra öz hakimiyyəti dövründə həmişə jurnalistlərin dostu olmuş Ümummilli lider Heydər Əliyevin, torpaqlarımızın işğaldan azad edilməsi uğrunda canlarından keçmiş şəhidlərin və vaxtı ilə “Yeni Tərtər”də işləyib, dünyasını dəyişmiş əməkdaşların ruhu bir dəqiqəlik sükutla yad edilib.
Tədbirin aparıcısı – 25 il rayon qəzetində çalışmış ”Qızıl Qələm” Mükafatı Laureatı Svetlana Əzizova qəzet, onun kollektivi haq-qında məlumat verərək, məruzə etmək üçün sözü “Yeni Tərtər”in redaktoru, Tərtərin ilk ali təhsilli qadın jurnalisti, fəaliyyəti ilə hər kəsə nümunə olan, 2 kitab müəllifi, ”Qızıl Qələm” Mükafatı Laureatı Svetlana Bağırovaya verib.
Qəzetin redaktoru rayon qəzetinin keçdiyi mənalı və qürurverici tarixindən danışıb. Qeyd olunub ki, 1934-cü ildə Tərtərdə nəşr olunmağa başlayan qəzet “Kol-xozçuların varlanması yolunda” adlanıb. Tərtər rayon MTS-in siyasi şöbəsinin orqanı idi. Həftədə bir dəfə kiçik tirajla çıxıb.
Qəzetin “Qızıl Bayraq” adı 1991-ci ildə dəyişdirilərək “Tərtər” qoyulub. Qəzet həftədə üç dəfə 5500 nüsxə tirajla nəşr edilib.
1998-ci ildən 2005-ci ilədək qəzetin fəaliyyəti müvəqqəti ola-raq dayandırılıb.
2005-ci ildən isə qəzet “Yeni Tərtər” adı ilə nəşr olunub.
Svetlana Bağırova qəzetin I Qarabağ və 44 günlük Vətən müharibəsi dövründəki fəaliyyətindən də söhbət açıb. Bunun nəticəsi olaraq rayon rəhbərinin redaktorluğu və maddi dəstəyi ilə “Tərtərin tarix yazan oğulları” kitabının ərsəyə gəldiyini bildirib. Daha ətraflı »

Beynəlxalq Avrasiya Mətbuat Fondu prezidenti Umud Mirzəyev ispaniyalı fotomüxbir Qervasio Sançez Fernandezlə bugünlərdə 90 yaşı tamam olan “Yeni Tərtər” qəzeti redaksiyasının qonağı olublar.

­­­­­­­Uzun illərdən bəri ANAMA ilə Tərtərdə müxtəlif layihələr gerçəkləşdirən BAMF-ın rəhbəri rayonda çıxan “Yeni Tərtər” qəzeti ilə sıx əməkdaşlığın mina maarifləndirməsində önəmli rol oynadığını söylədi. Umud Mirzəyev ərazidə mina təhlükəsizliyinə verdiyi informasiya dəstəyinə görə redaksiya kollektivini Azərbaycan Mətbuat Şurası adından təbrik edərək, yubilyar nəşrə BAMF-ın diplomunu təqdim etdi. O, yarım əsrdən artıq bu qəzetdə çalışan baş redaktor Svetlana Bağırovanın bölgə mediasının tanınmış, cəfakeş qələm sahiblərindən olduğunu söylədi.
İspaniyalı fotomüxbir Sançez Fernandez də “Yeni Tərtər” qəzetini yubiley münasibətilə təbrik edərək bildirdi ki, o özü də yerli qəzetdə çalışıb. Qonaq qeyd etdi ki, Qarabağ həqiqətləri, Azərbaycanın mina problemi ilə bağlı kitab hazırlayır. Qarabağa sə-fəri zamanı BAMF və ANAMA ilə yanaşı, “Yeni Tərtər” qəzetinin də bu köməyindən faydalanacaq.
Baş redaktor Svetlana Bağırova bölgə mediasının çətinliklərlə üzləşdiyinə baxmayaraq yerli qəzetin yaşadılmasına çalışdıqlarını bildirdi, Mətbuat Şurasının və Avrasiya Fondunun dəstəyini razılıqla xatırladı.

T.Rüstəmli, Xalq qəzeti

Telefonum zəng çalır. “Yeni Tərtər” qəzetinin redaktoru Svetlana Bağırova idi. Bu barədə bir qədər sonra söz açacağıq…

Medianın İnkişafı Agentliyinin (MİA) ötən ilin son günlərindən birində media nümayəndələrinin, əsasən də region mediasının təmsilçilərinin Şuşa səhərinə təşkil etdiyi media turu zamanı rayon qəzetlərinin redaktorları daha da yaxınlaşmış, Şuşa şəhərində xeyli dərdləşmiş, düşdüyümüz bu çıxılmaz vəziyyətdən çıxış yolu axtarmağa çalışmışdıq. Düzdür, mən redaktor deyil, redaktor müavini olsam da, sağ olsun MİA, məni də dəvət etmişdi.
Şuşanı gəzdikcə həmkarlarla dərdləşməyimiz niskilimizi daha da artırdı, Vətəni tərənnüm etmənin ən gözəl vaxtında rayon qəzetlərinin mütəmadi çıxa bilməməsi, nəinki əməkhaqqı, heç çap xərcini belə ödəmə qabiliyyətində olmaması qəlbimizi çox incidirdi.
Hamımız eyni dərddə idik. Buna baxmayaraq, MİA-ya çox minnətdar idik, adımızı anmış, xatırlamışdılar ki, bunlar da Azərbaycan mediasının təmsilçiləridirlər.
Burada bir fransız jurnalistinin “Əkinçi” haqqında dediyi sözlər yadıma düşdü. O, “Əkinçi”nin maliyyə vəziyyəti ilə maraqlanarkən çox təəccüblənərək demişdi: “Bizim Fransada belə az maliyyə ilə heç kəs qəzet çıxartmaz”. Bu, ötən əsrdə yox, ondan da əvvəlki əsrdə deyilmiş fikirlərdir. Yəni, ən azından 140 il olar. Bu 140 il ərzində dəyişə bilmişikmi? Əsla yox! Münasibət eynən qalır. Biz də sələfimiz, “mənəvi atamız” Həsən bəydən heç nə ilə fərqlənmirik, onun taleyini yaşayırıq.
Zərdabini daha yazmasın deyə Zərdaba sürgün etdlər. Kür qırağının qamış basmış, əldən-ayaqdan uzaq, insanların haqqı-ədaləti tapdalanan, sanki bu dünyadan xəbərsiz bir əyalətə gələn Həsən bəy üçün bu yerlər heç də yad yerlər deyildi. Onun doğulub boya-başa çatdığı bir torpaq idi. Zərdabi bütün məhrumiyyətlərə baxmayaraq, oradan ardı-arası kəsilmədən “Kaspi” qəzetinə məqalələr yazdı. Çünki o, bir işıq idi, bir nur idi, millətini cəhalətdən, gerilikdən qurtarmaq üçün Tanrı tərəfindən göndərilmişdi. Daha ətraflı »

VEDİBASARDAN BAŞLAYAN YOL

(Zülfüqar Fərəcov)

Öz xatirələrində Zülfüqar müəllim yazır: “Mənim uşaqlıq vaxtlarımın ilk çağları səfalı dağlar qoynunda keçib. Bu kənd kiçik olsa da öz gözəllikləri ilə, sərin, şır-şır axan bulaqları, meşələri, dadlı dağ meyvələri, güllü-çiçəkli düzləri, biçənəkləri ilə məşhur idi və indi də məşhurdur. Mən burada ancaq 6-7 yaşıma kimi olmuşam. Daşnakların qırğın saldıqları illərdə bir çox kəndlərlə birlikdə bizim kənd də yerlə-yeksan edildi, kəndlilərin mal-dövləti talan olundu, evləri yandırılıb külə döndərildi. Çoxlu qocalar, uşaqlar həlak oldu”.
Bundan sonra o bildirir ki, 7-8 yaşında anasını, 9-10 yaşla-rında isə atasını itirib. Əvvəl isə iki bacısı və bir qardaşı aclığa, əziyyətə tab gətirməyib ölüblər.
Zülfüqar müəllim və onun sağ qalan yeganə bacısı bir neçə kəndlisi ilə bir çox yeri gəzib dolaşdıqdan sonra Qarabağın ən böyük kəndlərindən olan Xındırıstan kəndinə gəlib çıxıblar.
Çəkdiyi bütün əzablara baxmayaraq, Zülfüqar Fərəcov savadının artırılması qayğısına qalıb, hətta 1952-ci ildə Azərbaycan KP MK yanında ikiillik partiya məktəbi yanında rəhbər partiya və sovet işçilərini hazırlayan doqquzaylıq kursları bitirib. Daha ətraflı »

­­(Aydın Məmmədxanov)

Aydın Məmmədxanov 1938-ci ildə rayonumuzun Borsunlu kəndində doğulub. Əvvəl Pedaqoji İnstitutu, sonradan Moskvada Ali Partiya məktəbini bitirib. 1966-1968 və 1970-1971-ci illərdə qəzetimizdə redaktor işləyib. Bu günlərdə Aydın müəllimlə görüşüb qəzetimizlə bağlı xatirələrini dinlədim.
O bildirdi ki, ötən əsrin 70-ci illərində rayon qəzeti redaksiyasında qonaqlar çox olurdu, xüsusən də məşhur yazıçılarımız, şairlərimiz. Tofiq Bayram, Rəfiq Zəka, Əlfi Qasımov, Əli Kərim, Allahverdi Hacıyev, Məzahir Daşqın və başqaları rayona hər səfərləri zamanı redaksiyaya gəlir, yerli ədəbiyyatsevərlərlə görüşür, onlara dəyərli məsləhətlər verirdilər. Bu isə o zamankı “Qızıl Bayrağ”ın nəzdnində fəaliyyət göstərən ədəbi birliyin fəaliyyətinə müsbət təsir göstərirdi.
Aydın müəllim sonralar uzun müddət təhsil sahəsində çalışıb. Hazırda təqaüddədir.

“Yeni Tərtər”

TƏRTƏRİN FƏDAİSİ

Qədim Qarabağın mərkəzində Tərtər çayının sağ və sol sahilində yerləşən Tərtərin yetirdiyi, Azərbaycan xalqının indiki və gələcək nəsillərə nümunə olacaq şəxsiyyətləri arasında İmamqulu Əkbər oğlu Süleymanovun xüsusi yeri vardır. O, 1916-cı ildə Tərtər rayonunun (Cavanşir qəzası) Düyərli kəndində anadan olmuşdur. Atasını erkən itirən İmamqulu böyük qardaşı Qulu Əkbər oğlunun və anası Həcər təbiətli Güllü nənənin tərbiyəsi ilə böyümüş və təhsil almışdır.
2000-ci ildə Fərman Tərtərlinin “Ozan” nəşriyyatı tərəfindən nəşr olunmuş “Qəhrəman Tərtər” kitabında “Xatirələrdə yaşayan el ağsaqqalı” yazısında İmamqulu Əkbər oğlu belə xarakterizə olunur: “El arasında həqiqətpərəstliyi, səmimiyyəti, işgüzarlığı, təşkilatçılıq bacarığı ilə seçilən və bü-tün Qarabağda böyük hörmətə malik ağsaqqal idi İmamqulu Əkbər oğlu”.
1936-1939-cu illərdə Ağdam kənd təsərrüfatının mexanikləşdirilməsi texnikumunda təhsil almış, texnikumu müvəffəqiyyətlə bitirmişdir.
1939-1942-ci illərdə Tərtər rayon komsomol komitəsinin birinci katibi vəzifəsində işlədiyi dövrdə bir çox gəncin formalaşmasına,onların Bakıda təhsil almalarına göndəriş və zəmanət verilməsini böyük həvəslə təmin edərdi.
Akademik Vahid Hacıyev 1997-ci ildə Bakı Dövlət Universitetinin rektoru professor Misir Mərdanovun iş otağında məni görərkən (o vaxt mən rektorun köməkçisi və magistratura pilləsinin rəhbəri vəzifəsini yerinə yetirirdim) xüsusi pafosla demişdir: “Atanız mənə və professor Seyfəddin Qəndilova Tərtər şəhər 1 №-li orta məktəbdə təhsil alarkən 1942-ci ildə komsomol bileti təqdim etmiş, çox cavan olmasına baxmayaraq vətənpərvərlik mövzusunda maraqlı tövsiyələr vermişdir. Həm də bizə hədiyyə təqdim etmiş və demişdir: Daha ətraflı »

Şəhər 1 saylı tam orta məktəbində X “a” sinfi Naxçıvan Əlahiddə Ümumqoşun Ordusunun Xüsusi Təyinatlı Bölməsinin komandiri, ikinci Qarabağ müharibəsi şəhidi, Vətən Müharibəsi Qəhrəmanı Anar Vaqif oğlu Əliyevin adını daşıyır. Sinifdə Azərbaycanın igid oğlunun əziz xatirəsinə həsr olunmuş guşə yaradılıb. Guşədə şəhid polkovnik-leytenant Anar Əliyevə və torpaqlarımızın bütövlüyü uğrunda canlarını fəda etmiş bütün şəhidlərimizə həsr olunmuş kitablar, şəkillər və digər sənədlər toplanıb.
X “a” sinfinin rəhbəri Kifayət Hüseynova deyir:
– Şəhidlər bizim qürur yerimiz, fəxrimizdir. Onların həyat yolu, Vətən sevgisi şagirdlərin tərbiyəsində, dünyagörüşlərinin formalaşmasında mühüm rol oynayır. Bu yaxınlarda sinfimizdə Anar Əliyevin atası Vaqif Əliyevlə unudulmaz görüş keçirdik. Məktəb rəhbərliyinin və hörmətli qazilərimizin iştirakı ilə keçirilən bu görüşdən hər birimiz çox təsirləndik.
Həmin görüş zamanı uşaqlar Azərbaycanın xoşbəxt gələcəyi, suverenliyi uğrunda canlarıından, sağlamlıqlarından keçən oğullarımıza həsr olunan şeirlər söylədilər, mahnılar oxudular.
Məktəbin direktoru Amil Hüseynov bildirdi ki, şəhidlər heç zaman unudulmur, onların əziz xatirəsi hər birimizin, o cümlədən böyüyən gənc nəslin qəlbində əbədi yaşayır.

“Yeni Tərtər”

Şəhər 5 saylı uşaq bağçasının yetirmələrinin qəzetimizin 90 illik yubileyindəki çıxışı hər kəsdə xoş duyğular oyatdı.Yəqin bu uşaqlar da həmin çıxışlarını uzun müddət unutmayacaq və xoş xatirə kimi yaşadacaqlar. Axı, uşaqlar gələcəyə yalnız yaxşı xatirələri aparırlar.
Qəhrəman Tərtərin övladları qəhrəman atalarına layiq böyüyürlər.
Gözəl təbrikə görə qəzetimizin əməkdaşları adından 5 saylı bağçanını kollektivinə təşəkkürümüzü bildiririk.

“Yeni Tərtər”

1875-ci ildə ”Əkinçi” qəzeti  ilə əsası qoyulan Azərbaycan milli mətbuatı ilk dəfə olaraq Ümummilli Lider Heydər Əliyevin 1998-ci il avqustun 6-da imzaladığı “Azərbaycan Respublikasında söz, fikir və məlumat azadlığının təmin edilməsi sahəsində əlavə tədbirlər haqqında”  Fərmanı ilə birdəfəlik senzuradan azad edildi. Beləliklə də azad sözün rolunu həmişə yüksək qiymətlənditən Ulu Öndər milli mətbuatımızın inkişafında yeni mərhələnin başlanğıcını qoydu. Daha ətraflı »