Bu günlərdə rayonumuzun Yuxarı Sarıcalı kəndinə mavi qaz yanacağı verilməsinin açılışı oldu. Tədbiri giriş sözü ilə kənd icra nümayəndəsi Ramiz Zeynalov açdı. Kəndə qaz çəkilişində əməyi olan insanlara minnətdarlığını bildirdi.
Sonra kənd ağsaqqalı Qənbər Babayev danışdı. Bildirdi ki, bu iş ən çox qadınlarımızın əməyini yüngülləşdirdi. Qeyd etdi ki, 6 kəndin 1 həkim məntəqəsi var, ona qaz çəkilməyib.
Daha sonra Sarıcalı kənd tam orta məktəbinin direktoru Sərxan Budaqov, kənd sakini Minarə Ağayeva çıxış edərək bu işdə əməyi olan insanlara “çox sağolun!” dedilər.
Tərtər Qaz İstismarı İdarəsinin baş mühəndisi Elməddin İbrahimov kənd sakinlərini təbrik etməklə yanaşı, onlara qazla ehtiyatlı davranmağı tövsiyə etdi.
Kəndə qaz çəkilişini “Alıbəylı UY” şirkəti həyata keçirib. Şirkətin icraçı drektoru Zaur Cəlilov bildirdi ki, 256 evə qaz xətti çəkilib, sayğac qoyulub, tənzimləyici quraşdırılıb.
Tədbirdə iştirak edən rayon icra hakimiyyəti başçısının birinci müavini Ramiz Şabanov kənd camaatına gözaydınlığı verdi. Bugünkü xoş günü də ölkə Prezidenti möhtərəm İlham Əliyevin Tərtərə və tərtərlilərə göstərdiyi qayğının bir nümunəsi kimi qiymətləndirdi. Bu işdə xüsusi əməyi olan AzəriQaz İstehsalat Birliyinin kollektivinə dərin təşəkkürünü bldirdi.
Qaz çəkilişində fərqlənən birliyin iki nəfər işçisinə rayon icra hakimiyyətinin fəxri fərmanları verildi.
Mirzə NƏSİR