2021-2022- ci tədris ilində Tərtər rayonu üzrə 647 nəfər şagird tam orta məktəblərin XI sinfini bitirib. Onlardan 440 nəfəri universitetlərə sənəd verib. Abituriyentlərdən 6 nəfəri 600-dən yuxarı, 22 nəfəri 500-dən yuxarı bal toplayıb. Tələbə adını qazanan bütün gəncləri təbrik edirik!

600-dən YUXARI BAL TOPLAYANLAR

Qədim Qədimli– 631 bal

Qaradağlı kənd tam orta məktəbinin əlaçı şagirdlərindəndir. Əsrimiz kompüter-internet əsri olduğu üçün, onun bu sahəyə marağı daha çoxdur. Bunun nəticəsidir ki, zəhməti öz bəhrəsini verib, o, I qrupda imtahan verərək ali məktəbə qəbul zamanı yüksək bal toplayıb və rayonumuzun birincisi olub. Qədim həm də rayonumuzun ümumtəhsil məktəblərinin məzunları arasında məktəbi fərqlənmə ilə bitirənlərdəndir.

Günel Cəfərova – 626 bal

Evoğlu kənd tam orta məktəbinin məzu-nu Günel Cəfərovanın, onun valideynlərinin və müəllimlərinin sevinci hədsizdir. Günel onların etimadını doğruldaraq, I ixtisas qrupuna imtahan verib və 626 bal toplayıb.
O deyir ki, riyaziyyat fənnini ona sevdirən hal-hazırda təqaüddə olan Efdibidə müəllimdir. XI sinifdə isə riyaziyyatı onlara Nüşabə müəllim tədris edib.

Murad Qarayev–610,7 bal

Mamırlı kənd tam orta məktəbində təhsil alıb. O, rayonumuzun təhsildə uğur qazanan şagirdlərindəndir. Coğrafiya fənni üzrə keçirilən olimpiadada iştirak edərək, 2-3-cü yerlərin qalibi olub. O, təkcə orta məktəbdə oxuduğu dərslərlə kifayətlənməyib, həm də onlayn dərslərə qatılıb. İndi həm təhsil aldığı Mamırlı kənd tam orta məktəbini xüsusi nümunəli attestatla bitirib, həm də ikinci qrupda ali ixtisas məktəblərinə qəbul imtahanında 600-dən yuxarı bal toplayaraq Azərbaycan İqtisad Universitetinin iqtisadiyyat fakültəsinə qəbul olub. Daha ətraflı »

Xavər Xuduzadə–501 bal

Qaradağlı kənd tam orta məktəbində təhsil alıb. Hər bir şagird kimi onun da arzusu ali məktəbə qəbul olmaq olub. Odur ki, orta məktəb müəllimlərindən elmlərin açarı olan fənləri – Azərbaycan dilini, riyaziyyatı, tarixi və sair fənləri mükəmməl öyrənməyə çalışıb. Üstəlik müəllim yanında fərdi hazırlaşıb. Artıq həyəcanlı günlər arxada qalıb. I qrupda imtahan verərək, Bakı Dövlət Universitetinə qəbul olub. Gələcəkdə savadlı riyaziyyat müəllimi kimi tanınması üçün tələbəlik illərində daha mükəmməl çalışmağa, elmin sirlərini dəqiq öyrənməyə, oxuduğu məktəbin və valideynlərinin etimadını doğrultmağa söz verib.

Fidan Allahverdiyeva–506,1 bal

Şəhər 1 saylı tam orta mək-təbin qa-baqcıl ənənələrini davam etdirərək, IV ixtisas qrupu üzrə imtahandan 506.1 bal toplayıb. Arzusu həkim olmaqdır. Orta məktəb müəllimlərinin hamısından razıdır, xüsusilə də riyaziyyatı sinif rəhbəri Günay müəllimdən, dil-ədəbiyyatı isə anası Nuranə müəllimdən öyrəndiyini söyləyir.
Fidan deyir ki, həkimlik çətin olduğu qədər, həm də şərəfli peşədir. O, həmişə bu peşənin şərəfini qoruyacaq. Daha ətraflı »

Ölkəmizdə gənclərin təhsil səviyyəsinin yüksəldilməsi, dünyagörüşlərinin artırılması məqsədi ilə bir sıra proqramlar həyata keçirilir. Onlardan biri də yay və qış düşərgələrinin təşkilidir. Hazırda yay düşərgələrinin keçirilməsi davam etdirilir. Bu günlərdə Umudlu kənd tam orta məktəbinin şagirdləri Nilufər Zeynalzadə, Bəhram Məmmədli və Nərgiz Məmmədova təhsil üçün “Əl-ələ” yay düşərgəsindən xeyli təəssüratlarla geri dönmüşlər. Bununla əlaqədar Nilufər Zeynalzadə ilə görüşüb söhbət etdim.

Nilufər 9-cu sinfi bitirib . Dərs əlaçısıdır. Buraxılış imtahanlarından yüksək nəticə göstərdiyi üçün Təhsil Nazirliyi tərəfindən fərqlənmə attestatına layiq görülüb. Onunla söhbətimizdən öyrəndim ki, gələcəkdə savadlı, qanunlarımızın ke-şiyində dayanan hüquqşünas olmaq arzusu ilə yaşayır. Mükəmməl bir hüquq işçisi olmaq üçün təkcə dərslərinə fikir vermir, həm də fənn olimpiadalarında iştirak edir, sosial bacarığını artırmağa çalışır. Elə Təhsil Nazirliyi tərəfindən Azərbaycan və Böyük Britaniya Məzunları İctimai Birliyinin (AUKAA) dəstəyi ilə təşkil olunmuş yay düşərgəsində keçirilən təlimlər bu məqsədlə təşkil olunmuşdur.
Nilufər düşərgədən razılıq hissi ilə söz açırdı. Bildirdi ki, Böyük Britaniya Səfirliyinin dəstəyi ilə keçirilən layihə əsasən on rayonun kənd məktəblərinin şagirdləri üçün təşkil olunmuşdu. “Lebraff” kitabxanasında, ölkəmizin tanınmış universitetlərində, parlamet binasında və başqa görkəmli yerlərdə keçirilmiş ekskursiyalar hər birində xoş təəssüratlar yaratdı, sosial sahəyə maraqlarını artırdı. Ən əsası burada əldə olunan biliklər xaricdə təhsil almaq arzusunda olan gənclərə qarşılaşacaqları çətinlikləri uğurla dəf etməyə köməkdir. Daha ətraflı »

İyunun 14-də rayonun 34 tam, 10 ümumi orta məktəbində “Son zəng” çalındı. Bu il rayon üzrə 647 nəfər şagird XI sinfi, 899 nəfər şagird isə IX sinfi bitirir. Son zəng tədbirlərində Tərtər Rayon İcra Hakimiyyətinin əməkdaşları, şəhid ailələri, qazilər, veteranlar, məktəb kollektivləri, valideynlər və ictimaiyyət nümayəndələri iştirak ediblər.

Tədbirlər Dövlət himninin səsləndirilməsi ilə başlayıb.
Tərtər şəhər 1 saylı, 5 saylı, 6 saylı tam orta məktəblərində və 2 saylı məktəb-liseydə təşkil olunan son zəng tədbirlərinə qatılan Tərtər Rayon İcra Hakimiyyətinin başçısı Müstəqim Məmmədov əvvəlcə tədbir iştirakçılarını salamlayıb. Müstəqil həyata qədəm qoyan məzunlara uğurlar, dövlətimiz üçün layiqli vətəndaş, ailələri üçün layiqli övlad olmalarını arzulayıb, gələcək işlərində uğurlar diləyib. Azərbaycan Respublikasının Prezidenti cənab İlham Əliyevin və Birinci-vitse prezident Mehriban xanım Əliyevanın ölkədə təhsilin səviyyəsinin artırılmasına, təhsil müəssisələrinin əsaslı təmirinə, yeni məktəblərin və məktəbəqədər müəssisələrin tikintisinə, onların lazımi avadanlıqlarla təminatına və təhsil işçilərinə həmişə diqqət və qayğı göstərdiklərini bildirib. Rayonumuzda təhsil sahəsində əldə edilən uğurlardan və görülən işlərdən ətraflı danışıb. 44 günlük Vətən müharibəsində Ali Baş Komandan, möhtərəm Prezidentimiz İlham Əliyevin rəhbərliyi ilə torpaqlarımızın işğaldan azad olunduğunu, şəhidlərin qanının yerdə qalmadığını qeyd edib, 44 günlük Vətən müharibəsində qazanılan Böyük Qələbənin tarixi əhəmiyyətindən danışıb. Çıxışının sonunda rayon rəhbəri bir daha məzunları təbrik edərək, gələcək həyatlarında uğurlar arzulayıb.

Tərtər Rayon Polis Şöbəsinin təşkilatçılığı ilə rayonun Hacıqərvənd kənd tam orta məktəbində şagidlərin iştirakı ilə narkomaniya əleyhinə maarifləndirmə tədbiri keçirilib.
Əvvəlcə tədbir iştirakçıları Vətən uğrunda canından keçmiş şəhidlərimizin əziz xatirələrini bir dəqiqəlik sükutla yad ediblər.
Daha sonra məktəbin iclas zalında davam etdirilən maarifləndirmə tədbirində çıxış edən Tərtər RPŞ-nin rəisi, polis polkovniki Elçin Qasımov narkotik asılılığının törətdiyi fəsadlarla bağlı geniş məlumat verib. Tədbirdə həmçinin şəhid Rəşad Mirzəlinin anası Afidə Mirzəyeva, narkoloq həkim Rima Axundova, məktəbin psixoloqu Vəfa Abbasova və başqaları çıxış edərək şagirdlərə öz tövsüyələrini veriblər.
Sonda şagirdlər narkotiklərin törətdiyi fəsadlardan bəhs edən səhnəcik göstəriblər və iştirakçıları maraqlandıran suallar cavablandırılıb.

“Yeni Tərtər”

Arzuların gerçək olduğu təhsil ocağı

Hər bir gəncin uşaqlıq illərindən gələcək üçün qurduğu planlar, həyata keçirmək istədiyi arzuları olur. Kimi ailəsinin seçdiyi sənət üzrə mütəxəssis, kimisi də özünün ürəyincə olan ixtisasa sahib olmaq üçün çalışır. Düşünürəm ki, bu iki düşüncənin ikisinə də sahib biriyəm. Həm uşaqlıq arzusu olan, həm də valideynlərimin istədiyi mükəmməl bir ixtisası, jurnalistikanı seçmişəm. Jurnalistika ixtisasını mənə sevdirən–“Yeni Tərtər” qəzetinin müxbiri olan, jurnalist babam Əvəz Nəsirov olub. Uşaq yaşlarında, hələ orta məktəbin aşağı siniflərində oxuyanda dərsdən çıxandan sonra babamın yanına–redaksiyaya gedirdim. Çox maraqlı gəlirdi bu iş mənə. Maraqlı, bir o qədər də məsuliyyətli olan bir ixtisas.
İnsan hər zaman xəyallarının arxasınca getməyi bacarmalıdır. Mən də məhz bu cür etmişəm. Hal-hazırda oxuduğum ali təhsil ocağı–Naxçıvan Dövlət Universiteti haqqında çox eşitmişdim. Amma eşitdiklərimdən daha yaxşı olduğuna burda bir daha şahid oldum. Universitetimizdə bütün ixtisaslar üçün çox yaxşı şərait yaradılıb. Daha ətraflı »

Tərtər Rayon İcra Hakimiyyətinin başçısı Müstəqim Məmmədov məktəblilərin respublika fənn olimpiadasının rayondan olan qalibləri ilə görüşüb.  Tədbirdə coğrafiya fənni üzrə 2-ci yerə layiq görülmüş Mamırlı kənd tam orta məktəbinin 11-ci sinif şagirdi Murad Qarayev, tarix fənni üzrə 3-cü yerə layiq görülmüş Köçərli kənd tam orta məktəbinin 11-ci sinif şagirdi Xədicə Qəmbərova, qaliblərin müəllimləri də iştirak ediblər.

Görüşdə rayon rəhbəri respublika olimpiadasında öz bilik və istedadları ilə uğur qazanan məktəblilərə xoş arzularını bildirib, onları təbrik edib. O, respublika Prezidenti cənab İlham Əliyevin, Birinci vitse-prezident Mehriban xanım Əliyevanın təhsilə göstərdiyi diqqət və qayğıdan danışıb. Qeyd olunub ki, son illərdə Tərtər rayonunda 5 modul tipli məktəb quraşdırılıb. Prezidentin Sərəncamı ilə hazırda 432 şagird yerlik Xoruzlu kənd tam orta məktəbi tikilir. 360 yerlik şəhər 5 saylı tam orta məktəbinin tikintisinə də başlanılıb. Rayonda 3 yeni məktəbəqədər təhsil müəssisəsi istifadəyə verilib, 2 körpələr evi-uşaq bağçası isə əsaslı təmir olunub. Dövlət tərəfindən təhsil müəssisələrinin əsaslı təmir edilməsi, yenilərinin tikilməsi, onların maddi-texniki bazasının möhkəmləndirilməsi sahəsində görülən işlər təqdirəlayiqdir.  İcra başçısı bütün bunların Azərbaycanın xoşbəxt gələcəyi naminə edildiyini diqqətə çatdırıb.

Sonra olimpiada qaliblərinə və onların müəllimlərinə rayon rəhbəri tərəfindən təşəkkürnamə təqdim olunub.

Azərbaycanın xalq şairi Vahid Əzizin “Param-parça illər” kitabı bir xalqın tarixindən səhifələri özündə əks etdirir. Qarabağ müharibəsində Azərbaycan xalqının yaşadığı ağrı-acıları bu savaşda Azərbaycan oğullarının qanı, canı bahasına qazanılan Zəfərin sevinci, qüruru, xalqın öz Prezidentinə inamı Vahid Əziz qələmi ilə öz poetik ifadəsini tapıb.

Vahid Əziz Dərələyəzdə doğulsa da, Tərtərdə böyüyüb, Tərtər şəhər 1 saylı tam orta məktəbini bitirib. Tərtər ziyalıları, eləcə də oxuduğu məktəbin kollektivi onun “Param-parça illər” kitabının Elm, texnika, memarlıq, mədəniyyət və ədəbiyyat üzrə Dövlət Komissiyası tərəfindən 2022-ci ilin Dövlət mükafatına təqdim olunması xəbərini böyük sevinclə qarşılayıb. Vaxtilə oxuduğu şəhər 1 saylı tam orta məktəbdə Vətən müharibəsində düşmən üçün alınmaz qalaya çevrilmiş Tərtərin şair oğlu Vahid Əzizin “Param-parça illər”inin, sonu zəfərlə bitən ağrılı-acılı illərdə və qələbədən sonra yazdığı şeirlərinin müzakirəsi keçirilib.

Tədbiri giriş sözü ilə məktəbin direktoru İntiqam Nuriyev açaraq sözü “Əməkdar müəllim” Fazilə Kərimovaya verib. Fazilə müəllim Vahid Əzizin həyat və yaradıcılığı haqqında məlumat verərək “Param-parça illər” kitabında toplanmış şeirlərindən danışıb, şagirdlər kitabdan “Zəfər nəğmələri”ni söyləyiblər. Daha ətraflı »

Əminəm ki, siz Azərbaycan xanımları ailə dəyərlərimizin bundan sonra da layiqincə yaşadılmasına çalışacaq, gənc nəslin Vətənə, torpağa məhəbbət, müstəqil dövlətçiliyə və azərbaycançılıq məfkurəsinə sədaqət ruhunda tərbiyəsinə böyük diqqət yetirəcək, ölkəmizin davamlı yüksəlişi naminə töhfələrinizi əsirgəməyəcəksiniz.
                                                                                             İlham Əliyev, Azərbaycan Respublikasının Prezidenti

Nuranə Abdullazadə, rayon təhsil şöbəsinin müdir əvəzi vəzifəsini icra edən

Nuranə xanım 1993-cü ildə Bakı şəhərində anadan olub. Bakıdakı 53 saylı orta məktəbi bitirib. 2011-ci ildə BDU-nun Coğrafiya fakültəsinə, 2015-ci ildə magistraturaya qəbul olub və oranı fərqlənmə diplomu ilə biti-rib.
2018-ci ildə dövlət qulluğuna imtahan verib və Tərtər rayon Təhsil Şöbəsində aparıcı məsləhətçi vəzifəsinə qəbul edilib. 2019-cu il onun həyatında xüsusilə yaddaqalandır. O, AMEA-nın Coğrafiya İnstitutunun dissertanturasına qəbul oldu və hazırda orada təhsilini davam etdirir.
2021-ci ilin avqust ayından Nuranə xanım rayon təhsil şöbəsinə rəhbərlik edir.
O, ailəlidir, rayonumuzun Qaradağlı kəndində yaşayır. Bir qız övladı var.
Nuranə xanımın qısa, lakin çox zəngin tərcümeyi-halı ilə tanış olduqca, bir məsələ məni düşündürdü. Vaxt vardı ki, kənd qızları şəhərdə yaşayan oğlanla ailə qurmağı özləri üçün böyük şans hesab edirdilər, şəhər qızları isə çox az hallarda kəndə gəlirdilər.
– Bəs, Nuranə xanımın bu barədə fikri nədir? – deyə sual verdim.
– Azərbaycanın hər qarışı mənim üçün doğmadır. Qaradağlı kəndini xüsusilə sevirəm. Bir də ki, şəhər və kəndin fərqi haqqında əvvəllər danışmaq olardı. Daha ətraflı »

                                                                    Müəllim kimdir?

Gəlin sizə ən şərəfli peşələrdən olan, müəllimlik sənəti haqqında söz açım. Bəli, müəllimlik müqəddəs və şərəfli peşədir. Çünki, vətən üçün övlad, cəmiyyət üçün şəxsiyyət yetişdirirlər. Həyatı anlayıb başa düşmək üçün bizə dəstək olurlar. Müəllim valideynlərimizdən sonra bizə ən doğma şəxsdir. O, bizə oxumağı, gələcəkdə ali savadlı bir şəxsiyyət kimi ayaqda durmağı, valideynlərimizin üzünə ağ olmamağı, həyatda hər zaman yardımsevər və tərbiyəli olmağı öyrədir. Buna görə də hər bir insan onları böyük ehtiram və hörmətlə xatırlayır.
Bu peşə sahibləri cəmiyyətin memarlarıdır desək, yəqin ki, səhv etmirik. Danılmaz bir həqiqətdir ki, hər kəsin layiqli vətəndaş kimi formalaşmasında təhsil işçilərinin əvəzsiz xidmətləri vardır. Valideynlə bərabər, bəlkə də, onlardan daha çox uşağın hər cür şıltaqlığına, əziyyətinə dözmək, kədəri ilə kədərlənib, sevinci ilə sevinmək müəllimlərin üzərinə düşən ağır yükdür. Hazırda dövlətimizin müstəqilliyinin möhkəmlənməsində fəal iştirak edən insanlar məhz müəllim əməyinin yetirmələridir.
Keçmişini bilməyən gələcəyə addım ata bilməz. Məktəbdə bizə keçmişimizi öyrədirlər. Dərsə gəldiyimiz ilk günlərdən himnimiz, bayrağımız haqqında məlumat verir, keçmişdə olan hadisələrin mahiyyətini öyrətməyə başlayırlar. Azərbaycanın igid oğulları, Qarabağda canından keçmiş şəhidlər haqqında söhbətlər edirlər. Daha ətraflı »