Suqovuşanda Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “ZƏFƏR” Şəhid Ailələrinə Dəstək İctimai Birliyinin təşkilatçılığı ilə şəhid polkovnik-leytenant Soltan Məmmədovun anım gününə həsr olunmuş “Təki Vətən Yaşasın” adlı tədbir keçirilib.

Əvvəlcə Tərtər rayon İcra Hakimiyyətinin başçısı Müstəqim Məmmədov gələn qonaqları, şəhid ailələrini, qaziləri, veteranları qəbul edib, onlarla səmimi söhbət aparıb.

Tədbirdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin İcraçı direktoru Aygün Əliyeva, Tərtər RİH-nin başçısı Müstəqim Məmmədov, “Zəfər” İB-nin sədri Sevinc Alızadə, Millət vəkilləri İlham Məmmədov, Müşfiq Məmmədli, Sahib Alıyev, şəhid polkovnik-leytenant Soltan Məmmədovun həyat yoldaşı Tünzalə Məmmədova, şəhidin ailə üzvləri, yazıçı-publisist Həmid Herişçi, Şəhid polkovnik-leytenant Soltan Məmmədovun xatirəsinə həsr olunmuş “Yuxuda görmüsən” kompozisiyasının müəllifi, Bakı Musiqi Akademiyasının professoru, şəhid polkovnik-leytenant Rəşad Atakişiyevin xanımı Könül Hüseynova, şəhidin döyüş yoldaşları, vətən müharibəsi qaziləri, şəhid ailələri və media nümayəndələri iştirak ediblər. Daha ətraflı »

BUNLAR XATİRƏ DEYİL…

Bir ana əllərini göylərə açıb dayanmadan dua edir. Onun baxışlarında yalvarış, məhəbbət, həyəcan, qorxu hissləri var. Kimdir bu ana? Nə istəyir Uca Yaradandan?
Başının üstündən keçən mərmilərin dəhşətli səsi qadını diksindirir. Ancaq o, yenə də yerindən tərpənmir. Mərmilər onu yaralaya bilər, öldürər, ana bunlardan qorxmur, o, bütöv bir Azərbaycan xalqı üçün, qüdrətli Ordumuz üçün, bu Ordunun tərkibində cəsarətlə döyüşən iki oğlundan ötrü dua edir, Allahdan onların hifz olunmasını istəyir.
Bütün analar kimi, o da müharibə arzulamırdı. Çünki ömrünün elə yarısını mü-haribə şəratində yaşamışdı. Ömür-gün yoldaşını müharibəyə göndərib, gecəni-gün-düzə qatıb, yolunu gözləmişdi. Uşaqların atası yaralanıb üstünə gələndə, əvvəlcə özünü itirmişdi, lakin sonradan başa düşmüşdü ki, acizliklə erməni adlı bir bəladan yaxa qutarmaq olmaz. Odur ki, otuz illik atəşkəs dövründə özü də, həyat yoldaşı da düşmənin nə qədər təhlükəli olduğunu övladlarına çatdırmağa çalışmışlar.
Bu ana rayonumuzun Səhlabad kəndində yaşayır. Adı isə Səadət xanımdır. Onun həyat yoldaşı Bayram İbrahinov I Qarabağ müharibəsi iştirak-çısı, II qrup əlildir. Torpaqlarımızın müdafiəsi sahəsində fəaliyyətinə görə “Hərbi xidmətlərə görə” medalı ilə təltif olunub.
Bəs nəyə görə bu yazımıza məhz Səadət ananın duaları ilə başladıq? Ona görə ki, Qarabağ döyüşçüsünün ailəsində böyüyən iki oğul övladı da atasının nümunəsində məhz hərb yolunu seçmişlər. Onlar-dan biri–Vətən müharibəsi iştirakçısı Səbuhi İbrahimov deyir: Daha ətraflı »

ÖLÜMÜN BİR ADDIMLIĞINDA…

Kamil Şirinov rayonumuzun Sarov kənd tam orta məktəbinin fiziki tərbiyə müəllimidir. Gənc müəllim Vətən müharibəsi iştirakçısıdır. Cəbhədə 44 günlük çətin və şərəfli yol keçib. 30 yaşını müharibə başlayan gün – sentyabrın 27-də əlində silah qeyd edib.
Kamil Şirinov 1990-cı il sentyabrın 27-də Goranboy rayonunun Safıkürd kəndində anadan olub. Orta təhsilini Naftalan şəhərindəki 2 saylı tam orta məktəbdə alıb. Məktəbi 2009-cu ildə bitirib və elə həmin il Gəncə Dövlət Pedaqoji Universitetinə daxil olub, 2013-cü ildə Universiteti bədən tərbiyəsi və idman ixtisası üzrə bitirib.
2013-cü ildə hərbi xidmətə çağırılıb və müddətli həqiqi hərbi xidmətini Naxçıvan Muxtar Respublikasında “N” saylı hərbi hissədə keçib. Manqa komandiri vəzifəsində çalışıb.
2017-ci ildə müəllimlərin işə qəbulu üzrə imtahandan müvəffəqiyyətlə keçərək, Sarov kəndində əmək fəaliyyətinə başlayıb. Kamil müəllim həm də Naftalan şəhərində uşaq-gənclər məktəbində məşqci müəllim işləyir.
Kamil müəllimin dediklərindən: Daha ətraflı »

Üstünlüyümüz haqq işi uğrunda döyüşməyimiz idi

Onların hər sözü-söhbəti bir tarixdir. Bu tarixi qələmə alanlardan isə böyük məsuliyyət və dəqiqlik tələb olunur. Buna gö-rə qazi İnqilab Qayıbovdan yazarkən çalışdım ki, qəlbindən keçənləri, yaşadıqlarını oxucularımıza özü danışdığı kimi çatdıra bilim.
İlk dəfə İnqilab Qayıbovun adını Əskipara kəndindən olan şəhidimiz Ayşad Əzizovun ailəsində eşitdim. Dedilər ki, İnqilabla Ayşadı möhkəm dostluq telləri bağlayırmış. Həm də bir yerdə döyüşüblər. İnqilab onun son döyüşünün şahididir.
İnqilabı redaksiyamıza dəvət etdik. Öyrəndik ki, onun ailəsi məcburi köçkündür. Əvvəlcə Bərdə rayonunun Yenidaşkənd kəndində yaşayıb, 2014-cü il-dən isə Tərtərdə məskunlaşıb. 2016-cı ildən müddətdən artıq hərbi qulluqçu kimi Azərbaycan Ordusunda xidmət edib və müharibə başlayan gündən döyüş əməliyyatlarına qatılıb. Daha ətraflı »

Tərtər Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin Tərtər rayon şöbəsinin birgə təşkilatçılığı ilə Prezident, Müzəffər Ali Baş Komandan İlham Əliyevin müvafiq sərəncamlarına əsasən ərazilərimizin işğaldan azad olunması uğrunda aparılan hərbi əməliyyatlarda iştirak edərək igidlik və şücaət göstərmiş, vəzifə borcunu ləyaqətlə və vicdanla, dö-yüş tapşırıqlarını uğurla yerinə yetirərək Vətən müharibəsi zamanı şəhidlik zirvəsinə yüksəlmiş tərtərli igidlərin ailələrinə və Vətən müharibəsi iştirakçılarına medalların təqdimetmə mərasimi keçirilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, Səfərbərlik və Hərbi Xidmətə Çağırış Üzrə Dövlət Xidmətinin Tərtər rayon şöbəsinin rəisi Elşən Abdullayev, şəhidlərin ailə üzvləri, qazilər, Qarabağ Müharibəsi veteranları və ictimaiyyət nümayəndələri iştirak ediblər.
Rayon rəhbəri Vətənə layiqli oğullar verdiklərinə görə şəhid ailələrinə, vətən üçün öz sağlamlıqlarını itirən qazilərimizə minnətdarlığını bildirib.
Azərbaycan Prezidenti, Müzəffər Ali Baş Komandan İlham Əliyevin sərəncamları ilə təltif olunmuş 3 nəfər tərtərli şəhidin medalları ailə üzvlərinə, 33 nəfər müharibə iştirakçısının medalları isə özlərinə təqdim olundu.
Şəhid ailələri və Vətən müharibəsi iştirakçıları onlara göstərilən dövlət qayğısına görə Prezident, Müzəffər Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

Məktəbimizdə Vətən Müharibəsi şəhidlərinin xatirəsi həmişə əziz tutulur, ehtiramla yad edilir. Onların həyat yolunun və döyüş fəaliyyətinin daha yaxından öyrənilməsi məqsədi ilə artıq bir neçə sinfə şəhidlərimizin adları verilib. Belə ki, siniflərdən biri məktəbimizin məzunu Qubad Hacıyevin, biri isə əslən Qubadlı rayonundan olan Fərrux Həşimovun adını daşıyır. Bu yaxınlarda isə 4 “v” sinfinə Aprel şəhidi Nicat İskəndərovun adı verilib.
Bu münasibətlə keçirilən tədbirdə şəhidlərin valideynləri, qazilər, veteranlar, ictimaiyyət nümayəndələri iştirak ediblər.
Nicat İskəndərovun anası Maya xanım məktəbin müəllim və şagird kollektivinə minnətdarlığını bildirib. O deyib ki, ölkəmizdə şəhid ailələrinə, qazilərimizə daim böyük diqqət və qayğı göstərilir. Rayonumuzda da şəhidlərimizin hər birinin xatirəsinin əbədiləşdirilməsi məqsədilə ardıcıl işlər görülür. Bu səbəbdən də şəhid ailələri heç zaman özlərini tək hiss etmirlər. Əgər əvvəllər bizim övladlarımız yalnız bir ailənin oğlu idisə, indi xalqın övladlarıdır. Biz bunu hər addımda görür və övladlarımızla qürur duyuruq. Arzu edirik ki, bu sinfin və ümumiyyətlə Yer üzünün bütün uşaqları sülh və əmin-amanlıq şəraitində böyüsünlər, yaxşı oxusunlar, həyatda qazandıqları uğurları ilə valideynlərini sevindirsinlər.
Məktəbin direktoru İntiqam Nuriyev, 4 “v” sinfinin müəllimi Aliyə Balakişiyeva və başqaları çıxış edərək şəhidin qısa, lakin mənalı həyat yolu barədə danışıblar.
Şagirdlərin ifasında şəhidlərimizə həsr olunan şeirlər səsləndirilib.

Ziyafət Rüstəmova,
şəhər 1 saylı tam orta məktəbin direktor
müavini

                                                VƏTƏN MÜHARİBƏSİNİN TƏRTƏR ŞƏHİDLƏRİ

3 gündə 3 düşmən tankını məhv etdi

Baş çavuş Aslan Hüseynov 1988-ci ilin oktyabr ayının 6-da Rusiyanın Orenburq vilayətində dünyaya göz açıb. Sonradan ailə yenidən Azərbaycana qayıdıb. O zaman artıq ermənilərin azərbaycanlılara qarşı torpaq iddiaları başlamışdı. Onun bütün uşaqlığı bu dövrə təsadüf etmişdi.
2006-cı ildə Qaradağlı kənd orta məktəbini bitirən Aslan həmin il hərbi xidmətə yollanır və əsgərliyini Bakı şəhərində keçir. Komandirləri onun hərbiyə olan marağını yüksək qiymətləndirir və bu sahədə hazırlığını artırmağı tövsiyə edirlər. 2008-ci ildə həqiqi hərbi xidmətini başa vuran gənc 2014-cü ildə yenidən orduya qayıdır və öz qərarını valideynlərinə belə izah edir:
– Torpaqlarımız işğal altındadır. Bu işğala son qoymaq üçün hər birimiz çalışmalıyıq. Mən bilirəm ki, hərbi sahədə Vətənimə daha çox xeyir verəcəyəm.
O, yalnız xidmət etmirdi, həm də öz üzərində ciddi çalışır, müxtəlif kurslarda hərbi biliklərini artırırdı. Bununla bağlı evlərində sertifikatlar, təşəkkürnamələr qorunub saxlanılır. Deyirlər ki, Aslan xüsusilə Spayk raket kompleksi üzrə kursu bitirməsi ilə fəxr edirdi. İsraildə istehsal olunan bu qurğunu mükəmməl idarə etməyi bacaran hərbçilər çox az idi. Onlardan biri həm kursda bir yerdə oxuduğu, həm də Aprel döyüşlərində birgə iştirak etdiyi Ələsgərli kəndindən olan Ruslan idi. Aslan hərbi biliklərini artırdıqca, onları yalnız təlimlər zamanı deyil, həm də canlı döyüşlərdə düşmənə qarşı tətbiq etmək, torpaqlarımızın işğaldan azad olunmasında vuruşmaq istəyi ona rahatlıq vermirdi.
Aprel döyüşləri bu arzusunun reallaşması üçün fürsət oldu. Həmin vaxt Vətən Müharibəsi Qəhrəmanı adına layiq görülmüş Mirdaməd Bağıyev onun komandiri idi. Daha ətraflı »

Elmin Quluzadə 1998-ci il noyabrın 1-də Tərtər rayonunun Kəngərli kəndində anadan olub. Ailədə üç qardaş idilər.
Qarabağ müharibəsi iştirakçısı olan Şəmsi kişi oğlanları ilə fəxr edirdi. Əmin idi ki, vaxtilə özünün və yoldaşlarının bacara bilmədiklərini Ali Baş Komandan İlham Əliyevin rəhbərliyi altında bu gənclər edəcək və erməni işğalına son qoyulacaq.
Ailənin böyüyü Murad 4 il idi ki, müddətdən artıq hərbi qulluqçu kimi xidmət edirdi. Elmin isə müharibəyə könüllü getmişdi. Şəmsi kişi deyir ki, müharibədə müvəqqəti atəşkəs olduğu günlərdə kiçik oğlu ilə Elminin yanına getmişdi: “Ağdam istiqamətindəydi. Əhval-ruhiyyəsi də çox yaxşıydı. Zarafat elədim. Dedim, gəlsənə mən qalıb sənin yerinə döyüşüm, sən isə qayıt evimizə. Bu sözləri zarafatca desəm də, o, ürəyimdəki nigarançılığı hiss etdi. Axı Murad da döyüşdəydi. Dedi, ata, sən nə danışırsan, biz sənə söz vermişdik ki, bu torpaqların alınmasında iştirak edəcəyik. Hər dəfə kəndlərimizi geri qaytardıqca, səni gözlərim önünə gətirir və sevinirəm ki, bundan sonra sən də rahat yaşayacaqsan. Oğlum haqlı idi. 30 ilə yaxın bir müddətdə mən televizora baxıb rayonlarımızın işğalı tarixlərini, bu yerlərin dağıdılması haqqında xəbərləri eşidəndə, sanki özümü günahkar hesab edirdim. İndi başımız ucadır. Bu ucalığı şəhidlərimiz öz qanları ilə bizə bəxş etdilər”. Daha ətraflı »

Şəhid valideynləri… Mənə elə gəlir ki, onların arasındakı münasibətlərə ilahi bağlılıq da demək olar. Çünki ən yaxın qohumlar arasında bu qədər doğmalıq mümkün deyil. Onlar eyni düşünür, eyni ağrı-acı yaşayır, eyni qürur hissi keçirirlər.
Bu yaxınlarda şəhid valideynləri arasında belə bir görüşün şahidi oldum. Dəmirçilər kəndindən şəhidimiz Şamil İsmayıllının valideynləri məcburi köçkün, kəlbəcərli şəhidimiz Elşən Məmmədovun valideynlərinin qonağıydılar.
Hər iki gənc bir yerdə döyüşüb, eyni vaxtda şəhidlik zirvəsinə ucalıblar. Onların üçüncü dostu da olub. Evoğlu kəndinin şəhidi Fuad Məhərrəmli.
Görüş Elşənin atası Dağıstan kişinin rayonumuzda məcburi köçkünlər üçün tikilmiş yeni qəsəbədəki evindəydi.
Əlbəttə, söhbət yalnız şəhidlərdən gedirdi. Ana və ataların xatirələri bir-birini əvəz edir, hər bir kəlmələrində sonsuz kədərlə yanaşı qürur hissi duyulurdu. Bu gənclər Vətən müharibəsində Suqovuşan istiqamətində gedən döyüşlər zamanı tank əleyhinə mina partlaması nəticəsində həlak olublar. Hər biri haqqında ayrı-ayrılıqda qəzetimiz üçün material hazırlayacağıq. Bu yazıda isə toxunmaq istədiyim məqam unuda bilmədiyim o ilahi bağlılıqdır.

Svetlana Bilalqızı

İş planına uyğun olaraq rayonumuzdakı “Vətən bağı”ndan yazmalı idim. Bunun üçün Rayon İcra Hakimiyyəti Başçısı Aparatının Vətən Müharibəsi İştirakçıları və Şəhid Ailələri ilə işin təşkili şöbəsinin müdiri Ülvi Nəcəfova müraciət etdim. O, bəzi məlumatları verməklə yanaşı, “Vətən bağı”nı görmək üçün ora getməyə kömək etdi.

Maşın Tərtər-Ağdərə istiqamətində hər iki tərəfdən şam və küknar ağacları əkilmiş asfalt yolla irəliləyir. Düşünürəm kaş bu yolla Umudlu və digər kəndlərimizə gedəydim. Axı, bu yollarda uşaqlığımın, atalı-analı günlərimin xatirələri yaddaşımda yaşayır. Dağların döşündəki müxtəlif meyvə ağacları ilə əhatə olunmuş meşəlik, yol qırağındakı sərin bulaqlar, yolun sol tərəfində qaya daşlarından tikilmiş evlərə aşırımlardan mələşə-mələşə qaçışan mal-heyvan, kənd uşaqlarının tozun-torpağın içində oynamağı, daha nələr, nələr gözlərim önündən keçdi. Nəhayət, “Vətən bağı” deyilən məkana çatıb maşından düşdük. Əvvəlcə dayanıb bir an ətrafa nəzər yetirdim. Murov dağından əsən mehdən nəfəs dolusu uddum.
Üç tərəfə ayrılan yolun tən ortasında ermənilərin özləri tərəfindən tikilən və Qarabağa gəlmə olduqlarını bildirən “Marağa-150” abidəsi diqqət çəkir. Abidənin sağ tərəfində isə möhtəşəm Zəfər və birlik rəmzi olan “Dəmir yumruq”, simvolik “Xarı bülbül” və “Xatirə bulağı” insana gəl-gəl deyir. Daha ətraflı »