Qapanlı kəndi Tərtər rayonunun düşmənlə təmas xəttində yerləşən yaşayış məntəqəsidir. Ölkənin hər yerində olduğu kimi, burada da sosial-iqtisadi inkişaf öz axarı ilə davam etməkdədir.
Qapanlı kəndi rayon mərkəzindən 14 km, düşmənlə təmas xəttindən 200 metr məsafədə yerləşir. Əhalisi 753 nəfərdən, 101 evdən, 128 təsərrüfatdan ibarətdir. 433 hektar ərazinin 281,06 hektarı əkin sahəsidir. Son illərdə aparılan islahatlar Qapanlı kəndinin simasını və onun əhalisinin maddi rifah halının yaxşılaşmasına səbəb olub.
2016-cı ilin məlum Aprel hadisələrindən sonra ölkə Prezidenti İlham Əliyevin birinci xanımı Mehriban Əliyeva ilə birlikdə Tərtərə və Qapanlı kəndinə səfəri sakinlərin ruh yüksəkliyini qat-qat artırdı. Bu gün deyə bilərik ki, Qapanlı kəndi inkişaf etmiş müasir kəndlərdən biridir. Aprel hadisələrindən sonra kənddə bütün evlər təmir olundu. Mübariz Bayramovun evi isə uçduğu üçün yenidən tikildi. Daha ətraflı »

DÖVLƏT QAYĞISININ ƏYANİ TƏZAHÜRÜ

Ermənistan–Azərbaycan –Dağlıq Qarabağ münaqişəsi zamanı təkcə torpaqlarımızı itirmədik, həm də qız-gəlinlərimizin mənliyi tapdalandı, uşaqlarımız müalicəsi olmayan xəstəliklərə tutuldu, ər oğullarımız sağlamlıqlarını itirərək yarımcan oldular. Bütün bunlar tariximizə yazılmış qanlı səhifələrdir. Bədənlərdəki əzalar doğrandı, canlar itirildi, qantuziyalar nəticəsində yaddaşlar zəiflədi. Lakin vətən sevgisi azalmadı, lakin vətəndaşlıq borcu unudulmadı. Dizində taqəti, ürəyində təpəri olan hər kəs Vətən uğrunda savaşa qalxdı.
Dövlətimiz bu cür insanların zəhmətini, fədakarlığını unutmur. Hazırda yüzlərlə Qarabağ müharibəsi əlili var ki, onların sağlamlığı, sosial şəraiti ölkə və rayon rəhbərliyinin diqqət mərkəzində saxlanılır.
Belə insanlarımızdan biri–1-ci qrup Qarabağ müharibəsi əlili Atayev Eyvaz Nemət oğludur. Daha ətraflı »

QAYĞIKEŞLİYİN ƏYANİ TƏZAHÜRLƏRİ

Didərginlik ağır dərddir

Didərginlik filçəkməz ağır dərddir. Bunun da üzərinə ehtiyacın yaratdığı əzabları gələndə, insan həyatı məşəqqətə düçar olur. Bu ağrıları, əlbəttə, onun içindən keçib yaşayanlar bilər. Yurd həsrətindən bağrı qana dönən, ürəyi qürbətdə pörşələnən, ehtiyacın məngənəsində sıxılan, qüruru düşmən tərəfindən tapdalanan, hissiyatı aşağılanan, varlığı xıncım-xıncım olunan, bunlar azmış kimi, qeyrətinə, namusuna ləkə gətirilən insanların ağrı-acısını kənardan baxmaqla necə duymaq olar ki?!
Zaman-zaman ermənilərin məkrindən yurd-yuvası dağılan, yüz illər boyu yaşadığı dədə-baba torpaqlarından didərgin salınan, əzizlərinin gorgahları təhqir olunan, inanc yerləri–pirləri, ocaqları darmadağın edilən, gözlərinin qarşısında körpə yaşlı qızlarının, gəlinlərinin, ömür-gün yoldaşlarının başlarına müsibətlər gətirilən insanlara hansı toxtaqlığı verəsən?! Daha ətraflı »

AZƏRBAYCAN RESPUBLİKASININ PREZİDENTİ İLHAM ƏLİYEV TƏRTƏR HAQQINDA:

…Bu gün Tərtər rayonu uğurla inkişaf edir. Sosial-iqtisadi inkişaf göz qabağındadır. Düşmənlə  üz-üzə dayanan tərtərlilər həmişə Azərbaycan dövlətçiliyinin möhkəmlənməsində  xüsusi rol oynamışlar.                

Tərtər rayonunda işlər düzgün qurulub. Mən rayonda dəfələrlə olmuşam. Xüsusilə  son vaxtlar burada gedən quruculuq-abadlıq işləri məni çox sevindirir. Əminəm ki, sizi də sevindirir.

Tərtər şəhəri abadlaşıb, gözəlləşib. Bu gün Tərtər müasir, abad şəhərdir, rayon inkişaf edir, vətəndaşlar daha da yaxşı yaşayırlar.

Bununla bərabər rayonun sosial-iqtisadi inkişafına da böyük diqqət göstərilmişdir.

Tərtər sakinləri qəhrəmandırlar. Onlar burada döyüş bölgəsində, düşmənlə üz-üzə möhkəm dayanıblar və atılan, evlərinə dəyən mərmilər onların iradəsinə zərrə qədər təsir etməmişdir.

Mən 10 il bundan əvvəl Prezident kimi birinci dəfə Tərtər rayonunda olmuşam, bu yerdə vətəndaşlarla görüşmüşəm. O vaxt Tərtərin siması tam başqa idi. Bu gün Tərtər müasir, abad şəhərdir, rayon inkişaf edir, vətəndaşlar daha da yaxşı yaşayırlar. Daha ətraflı »

2018-ci il ərzində Tərtər rayonunda 4380 iş yerləri açılıb ki, onun 563-ü daimi iş yerləridir. Daimi iş yerlərinin 47-si və ya 8,3 faizi yeni yaradılmış müəssisə və təşkilatlarda, 178-i və ya 31,7 faizi mövcud müəssisə və təşkilatlarda, 338-i və ya 60 faizi fiziki şəxslər tərəfindən yaradılıb. Bundan başqa 2018-ci il ərzində 3817 mövsümi iş yerləri açılıb.
“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın dövr ərzində rayonda 15296 iş yerləri açılıb ki, onun da 4715-i daimi iş yerləridir.

Tərtər Rayon
Statistika İdarəsi

Cəbhə bölgəsində yerləşən Tərtər şəhəri bu gün özünün yeni həyatını, çiçəklənən dövrünü yaşayır. Həyata keçirilən uğurlu iqtisadi siyasət, regionların sosial-iqtisadi inkişafına dair Dövlət proqramlarının icrası, infrastrukturun yenilənməsi, genişmiqyaslı yenidənqurma və tikinti-quruculuq işləri sayəsində Tərtər şəhərinin siması büsbütün dəyişib. Düşmənlə bir neçə addımlıqda yaşayan, işləyən və mübarizə aparan qəhrəman tərtərlilər doğma şəhərlərinin daha da gözəlləşməsi və rayonun sosial-iqtisadi inkişafı naminə əzmlə çalışırlar. Dövlətimizin qayğısı və tərtərlilərin fədakarlığı sayəsində Tərtər şəhəri ölkəmizin ən gözəl, abad, səliqəli şəhərlərindən birinə çevrilib. Daha ətraflı »

Şəhərimizin ən yaraşıqlı küçələrindən biri olan Qaçay Mehdiyev küçəsində abadlıq işlərinə başlanılıb. Burada divarlar aqlay və bəzək daşları ilə üzlənir. Kommunikasiya–işıq, qaz, su və telefon xətləri qaydaya salınır. Ağacların artıq budaqları kəsilir və digər təmizlik işləri görülür. Bu işlər başa çatandan sonra isə küçəyə asfalt örtük salınacaq.
Küçənin abadlaşdırılması sakinlər tərəfindən böyük razılıqla qarşılanır.
Valeh İsfəndiyarov:
-Son illər Tərtər şəhəri çox dəyişib, gözəlləşib. İndi bizim küçədə də görülən işlər ürəyimizdən xəbər verir. Buna görə də rayon rəhbərliyinə öz minnətdarlığımızı bildiririk.
Namiq Əsədov:
-Bizim küçə Tərtərin ilk şəhidi olan Qaçay Mehdiyevin adını daşıyır. Amma son vaxtlar buranın görkəmi şəhərimizin ümumi görünüşündən bir az geri qalırdı. Bəzi elektrik və telefon xətləri, qaz və su boruları səliqəsizlik yaradırdı. indi bütün bu nöqsanlar aradan qaldırılır.

“Yeni Tərtər”

İnsanların məişəti yaxşılaşdıqca, əhval-ruhiyyələri də yüksəlir. Bu baxımdan bizim Rəcəbli kəndinin sakinləri ötən ili sevinclə yola salır, Yeni ili xoş niyyətlərlə qarşılaylırlar.
Kəndimiz rayonumuzda qazlaşdırılan son yaşayış məntəqəsi oldu. Bununla da möhtərəm Prezidentimiz İlham Əliyevin Tərtər rayonunun qazlaşdırılmasının 100 faiz təmin edilməsi barədə tapşırığı yerinə yetirildi.
Bu bayramqabağı günlərdə ailə üzvlərimizin, nəvələrimin xoş qayğılarını görəndə, ürəyim fərəhlə döyünür. Sevinirəm ki, onların həyatı rahatdır, məişət problemləri həll olunub.
Təkcə bizim ailədə deyil, indi Rəcəblidə, həmçinin qonşu kəndlərin hər birində insanların qışın soyuğundan qorxusu yoxdur. İşıqlarımız da fasiləsiz yanır.
Belə bir şəraiti bizə yaratdıqlarına görə Prezidentimizə, dövlətimizə və tapşırılan işləri məsuliyyətlə icra edən bütün insanlara cansağlığı arzulayıram. Evləriniz həmişə isti və işıqlı, süfrələriniz ruzi-bərəkətli olsun!

Sadıq TAĞIYEV,
Rəcəbli kəndinin sakini

Bu günlərdə xalqımız Azərbaycanın dövlət müstəqilliyinin bərpasının 27-ci ildönümünü qeyd etdi. Müstəqilliyimizin ilk illərini yaşlı nəsilin nümayəndələri yaxşı xatırlayırlar. Əslində həmin dövrdə görülən işlər qurucu yox, dağıdıcı bir xarakter daşıyırdı. Bir tərəfdən ermənilərin bizə qarşı apardıqları işğalçılıq siyasəti, əsassız torpaq iddiaları, digər tərəfdən dövləti idarə edənlərin səriştəsizliyi ölkədə anarxiya və özbaşınalıq yaratmışdı.
Bütün bunların müqabilində ölkə vətəndaş müharibəsi astanasında dayanmışdı.
Məhz belə bir çətin məqamda Azərbaycan xalqı müdriklik və uzaqgörənlik göstərərək, dövlətimizin idarə edilməsini öz xilaskarına–ulu öndər Heydər Əliyevə tapşırdı. Təcrübəli dövlət xadimi, görkəmli siyasətçi ilk növbədə ölkədə sabitlik və vətəndaş birliyi yaradılmasına nail oldu. Bundan sonra isə Azərbaycan Respublikasının qarşısında duran məsələlərin həllinə başladı. Daha ətraflı »

QAYĞIYA GÖRƏ MİNNƏTDARIQ

Bu günlərdə yaşadığımız Vüqar Həsənov küçəsində abadlıq işlərinə başlanması burada yaşayanlar tərəfindən böyük razılıq hissi ilə qarşılanıb. Belə ki, ərazidə olan 5 ikimərtəbəli ictimai yaşayış binasının dam örtükləri dəyişdirilir, fasad hissələri rənglənib qaydaya salınır. Binaların ətrafına asfalt salınır, yaşıllaşdırma işləri görülür.
Yaşlı insanların arzusu nəzərə alınaraq, binaların arasında istirahət guşəsi yaradılır.
Bütün bunlar möhtərəm Prezidentimiz İlham Əliyevin ölkə vətəndaşlarına göstərdiyi diqqət və qayğıdan irəli gəlir.
Mən öz adımdan, bu 5 binada yaşayan bütün sakinlər adından ölkə başçısına dərin minnətdarlığımı bildirirəm.

Billurə ƏBİLOVA,
Vüqar HƏSƏNOV küçəsindəki 5 nömrəli binanın sakini