Bu ilin may ayında Qubada Beynəlxalq Ailə Günü münasibəti ilə Azərbaycan Xalq Cüm-huriyyətinin 100 illik yubileyinə həsr edilmiş “Ailə bayramı” keçirilib. Bu tədbirdə rayonumuzu Axundovlar ailəsi təmsil edib. Ata–Mahal Axundov, ana–Vəfa Məmmədova, övladlar–Azərbaycan Respublikası Prezidenti yanında Dövlət İdarəçilik Akademiyasının Beynəlxalq münasibətlər fakültəsinin tələbələri Fərid və Fəridə, uşaqların dayısı Mayıl Məmmədov bu bayramda intellektual bilik yarışması üzrə respublikamızın bütün bölgələri arasında Tərtər rayonunu layiqincə təmsil edərək, birinci yerin qalibi olmuşlar.
“Ailə bayramı”nda yarışlar 6 nominasiya üzrə keçirilib: “İstedadlar”, “Ləziz yeməklər”, “Bacarıqlı əllər”, “İdman”, “İntellektual bilik yarışması” və “Ailə səcərəsi haqqında məlumat”.
Hər bir bölgə burada ayrıca güşə ilə təmsil olunmuşdu. Axundovlar ailəsinin öz ailə səcərəsi haqqında hazırladıqları məlumat bayram iştirakçılarının xüsusi diqqətini cəlb edib. Burada ailə üzvləri barədə toplanmış çox maraqlı sənədlər eyni zamanda Axundovların yaşadıqları doğma Tərtər rayonunun həyatını əks etdirirdi. Axı, hər bir ailə cəmiyyətin kiçik özəyidir və onun əldə etdiyi nailiyyətlər bilavasitə mənsub olduğu xalqın, bölgənin tarixinin güzgüsüdür.
Azərbaycan Respublikası Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Axun-dovlar ailəsinə “Azərbaycan Xalq Cümhuriyyətinin 100 illik yubileyinə həsr edilmiş “Ailə bayramı”nda intellektual yarışmada qalıb gəldiyinə görə” diplomunu və hədiyyə təqdim edib.
Bir ənənə kimi hər il “Ailə bayramı”nın keçirilməsi ölkəmizdəki ən nümunəvi ailələrin bacarıq və istedadlarını üzə çıxarmaqla, xalqımızın adət-ənənələrini yaşadır və cəmiyyətimizdə ailə müqəddəsliyinin qorunmasına xidmət edir. Bu baxımdan rayonumuzu təmsil edən Axundovlar ailəsinin qələbəsi olduqca əhəmiyyətlidir. Biz onları bir daha təbrik edir, ailənin hər bir üzvünə cansağlığı, sevincli günlər və yeni-yeni uğurlar arzulayrıq.
“Yeni Tərtər”