XX əsrdə İkinci Dünya müharibəsi illəri bəşəriyyət üçün ən ağır və dəhşətli dövr olub. Almaniyada və İtaliyada yaranmış faşizm nəinki bu ölkələrin özünü, hətta bütün bəşəriyyəti təhlükə altına aldı.
İkinci Dünya müharibəsi illərində Azərbaycan xalqı həm ön, həm də arxa cəbhədə böyük qəhrəmanlıq və igidlik nümunələri göstərib. 1941-1945-ci illərdə 600 mindən çox azərbaycanlı oğlan və qız cəbhəyə yollanıb. Onlardan 300 mini bu müharibədə həlak olub, Azərbaycan diviziyaları Qafqazdan Berlinəcən mübariz yol keçib.
130-a yaxın həmyerlimiz Sovet İttifaqı Qəhrəmanı adına layiq görülüb, 30 nəfəri Şərəf ordeni ilə təltif olunub. 170 min Azərbaycan əsgər və zabiti SSRİ-nin müxtəlif orden və medalları ilə təltif edilib. 
İki dəfə Sovet İttifaqı Qəhrəmanı Həzi Aslanov, Sovet İttifaqı qəhrəmanları İsrafil Məmmədov, Ruslan Vəzirov, Adil Quliyev, Ziya Bünyatov, Gəray Əsədov, Məlik Məhərrəmov, Mehdi Hüseynzadə, generallar Mahmud Əbilov, Akim Abbasov, Tərlan Əliyarbəyov, Hacıbaba Zeynalov və bir çox başqaları öz qəhrəmanlıqları ilə xalqımızın şərəfli tarixinə yeni sətirlər yazıblar.
9 May Qələbə bayramı ilə bağlı Tərtər Rayon Böyük Vətən Müharibəsi, Əmək, Silahlı Qüvvələr və Hüquq–Mühafizə Veteranları Şurasının sədri İman Almuradovla görüşüb söhbət etdik. O, məlumat verərək bildirdi ki, 1941-1945-ci illərdə Tərtər rayonundan müharibəyə 2417 nəfər gedib. Onların 1079 nəfəri müharibədə həlak olub.
Hazırda rayonumuzda 4 nəfər Böyük Vətən müharibəsi veteranı var. Onlar Cəmilli kəndindən Cavanşir Bürcəliyev, Qaynaq kəndindən Vəli Behbudov, Hacıqərvənd kəndindən Musa Abbasov və Köçərli kəndindən İsmayıl Yunisov.
Hər sahədə olduğu kimi, Böyük Vətən müharibəsi iştirakçıları da ölkə Prezidenti İlham Əliyevin diqqətindən kənarda qalmırlar.
Qələbə Günü münasibəti ilə sağ qalan hər bir veterana min manat, dünyasını dəyişənlərin dul arvadlarına 500 manat məbləğində birdəfəlik müavinət verilir.
“Yeni Tərtər”