İllər bir-birini əvəz edir, bir haray çağırır bizi. Bu haray neçə illərdir ki, çağırır, səslənir, kəsmək bilmir. Bu Qarabağ harayıdır, bu haray Qarabağ uğrunda şəhid olanların, qanına qəltan olanların, atasız uşaqların, oğulsuz ataların, anaların, qardaşsız bacıların harayıdır.
Bu gün ürəyimizdə yaraya dönən o yurd yerlərində şəhid olmuş igid oğullardan birinin – Vəzir Surxay oğlu Orucovun xatirəsini anaq.
Vəzir Orucov 26 dekabr 1956- cı ildə Tərtər rayonunun Xoruzlu kəndində anadan olmuşdur.Atası Surxay kişi 1949-cu ildə öz ailəsi ilə birlikdə Dərələyəz mahalından deportasiya olunmuşdur. Vəzir Orta təhsilini Xoruzlu kənd orta məktəbində almış, 1974-cü ildə Bakı Yüngül Sənaye Texnikumuna daxil olmuş, 1975-ci ildə hərbi xidmətə çağırılmış, 1977-ci ildə hərbi xidmətini başa vuraraq təhsilini davam etdirmişdir. 1984-cü ildə Vəzir Rusiyanın Arxangelsk vilayətinin Berkova şəhərinə köçmüşdür. 1992-ci ildə, Xocalı soyqırımını eşidərək Azərbaycana qayıtmışdır. May ayının 4-də “Tərtər Özünümüdafiə Batalyonu”-na daxil olmusdur.Vəzir sıravi döyüşçü kimi mübarizəyə başlasa da, komandirlik vəzifəsinə qədər yüksəlmişdir.
O, Tərtər şəhərinə getmək adıyla evdən çıxır, Şıxarx istiqamətində qarşısına çıxan bir nəfər yaralı polisin silahını götürüb, heç kimə heç nə demədən geri qayıdaraq Ağdərə uğrunda gedən döyüşə qatılır. Həmin axşam bir erməni əsiri ilə geri dönür. Əsiri qərərgaha təhvil verib evlərinə yollanır. Anasına deyir ki, daha mənim yolumu gözləmə.
1 sentyabr 1992-ci ildə Çıldıran kəndi uğrunda gedən döyüşdə düşmən tankını məhv edərkən ağır yaralanır və müalicə üçün xəstəxanaya yollanır. Xəstəxanadan çıxan Vəzir yenidən cəhbəyə qayıdır. 1993-cü il martın 22-də Ağdərə rayonunun Qlobus adlanan yüksəkliyi uğrunda gedən döyüşlərdə qəhrəmancasına şəhid olur.
Azərbaycan Respublikası Prezidentinin 27 mart 1993-cü il tarixli 495 saylı fərmanı ilə Orucov Vəzir Surxay oğluna ölümündən sonra Azərbaycanın Milli Qəhrəmanı adı verilib.
2015-ci il 28 dekabrda Rusiya jurnalisti Aleksandr Nevzorov Qarabağ münaqişəsi barədə xatirələrini bölüşmək üçün Azərbaycana gəlir. O, Vəzir haqqında bu fikirləri söyləyir:
– Mənim indiyədək tanıdığım azərbaycanlıların içərisində ən cəsuru Vəzir idi.
– 2015-ci ildə Tərtərin Veteranlar bağında Vəzir Orucovun büstü ucaldılıb və onun adına küçə verilib.
İndiyədək Vəzirin anım günləri dəfələrlə qeyd olunub. Amma bu tədbir digərlərindən fərqlənir, çünki onun adına layiq Camalı var.
Bu gün sənin bayramını təbrik etməyə gücüm yoxdur, qardaşım. Sənin şəklini bəzədik ki, bəlkə könlümüz təsəlli tapa. Əzizlərimiz, bu gün biz yenə də bir şəhidin, bir igidin xatirəsini yad etdik. Arzumuz budur ki, belə anım günlərini ömürlük sağalmayan yaramız olan Qarabağımızda qeyd edək. Bax, o gün şəhidlərimizin, eləcə də Milli Qəhrəmanımız Vəzir Orucovun narahat ruhu sakitlik tapar. Ali Baş Komandanımız, möhtərəm Prezidentimizin bir əmri bəsdir ki, igid oğullarımız torpaqlarımızı yağı düşməndən azad etsinlər. Üçrəngli bayrağımız işğal olunmuş Şuşamızda dalğalansın.
Dünya ermənilərinin xislətinə, vəhşiliyinə lənət oxuyuruq.
Aybəniz Məmmədova,
Tərtər Tarix-Diyarşünaslıq muzeyinin direktor əvəzi