Tərtər rayonunda təhsilin inkişafı üçün çalışan məktəb direktorları olub ki, onlar bu gün böyük ehtiramla yad edilir. Əsəd Məmmədov, Sabir Paşayev, Kamil Sadıqov və bir çox başqaları öz fəaliyyətləri dövründə təhsilin və təlim-tərbiyənin günün tələbi səviyyəsində olmasına çalışıblar. Belə məktəb direktorlarından biri–Sadıqov Kamil Yusif oğlunun həyat yolu ilə tanış olmağı qərara aldım.
60-cı illərin sonu, 70-ci illərin əvvəlində orta məktəb şagirdi idim. Kamil Sadıqovun özü kimi, həyat yoldaşı Zərifə müəllimə də pedaqoji təhsilli idi. Öz ixtisaslarını ürəkdən sevərək tədris edirdilər. Təhsildə olduğu kimi, şəxsi həyatda da bir-birilərini tamamlayırdılar. Onlar hər ikisi əslən Qərbi Azərbaycanın İrəvan şəhərindən idilər. Aralarında 3 yaş fərq varıydı. Kamil Sadıqov 1926-cı ildə sənətkar ailəsində, Zərifə Məmmədova isə 1929-cu ildə ziyalı ailədə dünyaya gəlmişdilər.
Taleyin gərdişi Kamil müəllimin və onun ailəsinin yaşayışını Tərtər rayonuna qismət etmişdir. Lakin ilk əmək fəa-liyyətinə Qərbi Azərbaycanda orta ixtisas təhsili aldıqdan sonra, 1943-cü ildə başlamışdır. İrəvan Dövlət Pedaqoji İnstitutunun Azərbaycan şöbəsinin dil-ədəbiyyat fakültəsinə qəbul olunaraq ali təhsil alırdı. 1948-ci ildə Azərbaycan bölməsi Bakıya köçürüldüyünə görə, o, təhsilini Azərbaycan Dövlət Pedaqoji İnstitutunda davam etdirməli olub. 1950-ci ildə institutu bitirdikdən sonra təyinatla Tərtərə gəlir və bütün əmək fəaliyyəti burada təhsilin inkişafına sərf olunur. 1950-1951-ci dərs ilində Mamırlı kəndində səkkizillik məktəbə direktor təyin olunur. 1951-52-ci dərs ilində Evoğlu kənd tam orta məktəbində tədris işləri üzrə direktor müavini, 1953-1964-cü illərdə isə 1 saylı tam orta məktəbində müəllim və direktor müavini vəzifələrində çalışır.
1965-1973-cü illər Kamil müəllimin fəaliyyətində daha uğurlu illərdən hesab olunur. Təhsildə göstərdiyi xidmətlərini nəzərə alaraq Tərtər rayon Xalq Maarif Şöbəsinin müdiri vəzifəsinə irəli çəkilir. Harada çalışmasından asılı olmayaraq gənc nəslin təlim-tərbiyəsində yüksək irəliləyişlərin əldə olunmasına, təhsilin səviyyəsinin yüksəldilməsinə nail olmuşdur. Kamil müəllimin zəhməti “Qabaqcıl maarif xadimi” döş nişanına, “1941-45-ci illərdə Böyük Vətən Müharibəsindəki cəsarətli əməyə görə” medalına, “Əməkdə fərqlənməyə görə”, “V.İ.Leninin 100 illiyi” xatirə medalına, Azərbaycan SSR Ali Soveti və Maarif Nazirliyinin fəxri fərmanlarına layiq görülüb. Kamil Sadıqov 1974-cü ildən ömrünün sonunadək–2003-cü il iyul ayına kimi şəhər 6 saylı tam orta məktəbin direktoru vəzifəsində çalışıb. Ömrünün 50 ildən çox hissəsini təhsilin inkişafına sərf etmiş Kamil müəllimin şəxsi həyatında bəzi büdrəmələr baş vermişdir. Ona həyatda və təhsildə yol yoldaşı Zərifə müəllimin həyatdan vaxtsız getməsi bir zərbə oldu. Çox götür-qoydan sonra ikinci dəfə Bəsti adlı xanımla ailə həyatı qurur və ömrünün sonunadək–21 il onunla birgə yaşayır. 2003-cü il avqust ayının 22-də ürək çatışmazlığından dünyasını dəyişir.
Kamil müəllimin həyatda 3 övladı–2 qızı, 1 oğlu və 7 nəvəsi qalıb. Hazırda övladları ailəli olmaqla 2-si xaricdə, bir qızı isə Tərtər şəhərində yaşayır və ata-anasının yolunu davam etdirir. Müəllimdir.
Müəllif fikri: Kamil müəllimin həyat yoldaşı, 21 il birgə ömür sürdüyü və hazırda onun evinin çırağını yandıran Bəsti xanım şəkərli diabet xəstəliyindən əziyyət çəkir. Ehtiyaclarını, dərdini dilə gətirən qadın olmadığı üçün heç kimə müraciət etmir, hətta doğması olan övladlarına da. Lakin biz hiss etdik ki, işlədikləri məktəb kollektivi və ya rayon təhsil şöbəsi tərəfindən həm Kamil müəllimin, həm də özünün anılmasını, qapılarının açılmasını çox istəyir. Zənn edirik ki, bu, o qədər də çətin bir məsələ deyil. Anın ki, siz də anılasınız.
Elfuzə VƏLİYEVA