Təhsil Nazirliyinin müvafiq sərəncamı ilə 2017-2018-ci tədris ili respublikamızın bütün ümum-təhsil məktəblərində “Təhsildə keyfiyyət ili” elan edilmişdir. Cari dərs ilinin əvvəlindən respublikamızın hər yerində olduğu kimi, Tərtər Rayon Təhsil Şöbəsində də “Təhsildə keyfiyyət ili” çərçivəsində nəzərdə tutulmuş tədbirlərin icrasına başlanılmışdır.
Bununla bağlı hər bir məktəbdə maarifləndirmə işləri aparılmış, görüləcək işlərə dair tədbirlər planı hazırlanmış və Təhsil Şurasında müzakirə edilmişdir.
Rayon məktəbləri üzrə buraxılış imtahanlarının nəticələri, son 3 ildə ali məktəblərə qəbulun vəziyyəti, ayrı-ayrı fənlər üzrə təlimin keyfiyyət göstəriciləri təhlil olunmuş, məktəblərin reytinq cədvəlləri hazırlanmışdır.
Tədbirlər planına uyğun olaraq aşağı reytinqə malik olan məktəblərdə “Təhsildə keyfiyyət ili” ərzində monitorinqlərin keçirilməsi nəzərdə tutulmuşdur. Hal-hazırda bu sahədə işlər davam etdirilir.
Rayon üzrə xüsusi istedada malik uşaqların aşkara çıxarılması, fərdi işin təşkili diqqətdə saxlanılır. Onlarla əlavə məşğələlərin keçirilməsi ixtisas müəllimlərinə tapşırılmışdır.
Məktəb-valideyn münasibətlərinin yaxşılaşdırılması üçün məktəblərdə “Açıq qapı” günlərinin təşkil olunması nəzarətdə saxlanılır. Bunlarla yanaşı, aprel-iyun aylarında buraxılış siniflərində təhsil alan şagirdlər üçün məktəblərdə əlavə məşğələ saatları-nın təşkil olunması planlaşdırılmışdır.
Ümid edirik ki, görülən tədbirlər nəticəsində məktəblərdə tədrisin keyfiyyətinin yüksəldilməsinə nail olacağıq.
Surxay MİRZƏYEV,
rayon təhsil şöbəsinin müdiri