KOLLEKTİVİMİZİN ƏN KİÇİYİ
İki il əvvəl redaksiyamızda kompüterçi işləmək üçün 3 nəfər müraciət etmişdi. Adəti üzrə hər üçünə sınaq müddəti verildi ki, qəzet proqramını öyrənsinlər. Təcrübəli kompüterçilər öz peşələrini həvəslə onlara öyrətməyə başladılar. Müraciət edənlərdən bir nəfəri–Aysel hər bir incəlikləri tez mənimsəməyə çalışdı. O, orta məktəb partası arxasından yenicə ayrılmışdı. Şəhər 5 saylı tam orta məktəbini bitirmişdi. Bu gün dövrümüz kompüter əsri olduğu üçün Aysel seçimində yanılmamışdı. Çox az bir zamanda lazım olan proqramları mənimsəyərək, kompüterçi işinə qəbul edildi. Onunla birlikdə gələnlərdən fərqləndi, tez bir zamanda qəzet səhifələrini lazım olan səviyyədə qurmağı bacardı.
Ayselin kollektivimizə daxil olduğu iki il ərzində, o, öz işi, səmimiyyəti ilə hamının sevimlisi olub. Redaksiyadakı digər işlərin görülməsində də yaxından köməklik göstərir.
Gənclər Günü ilə əlaqədar məqalə hazırlayanda ilk yadıma düşən Aysel oldu. Fikirləşdim ki, nümunəvi gənclərimizdən biri də hamımızın kiçiyi olan bu qızdan niyə də yazmayım. Fikrimi baş redaktora bildirdim. Etiraz etmədi. Ayselin işinə qarşı məsuliyyətli olması, verilən tapşırığı layiqincə yerinə yetirməsi kollektivimizin bütün üzvlərinin razılığına səbəb olub. Bunun nəticəsidir ki, YAP Tərtər Rayon Təşkilatı və çalışdığı “Yeni Tərtər” qəzeti redaksiyası tərəfindən “Diplom”lar və qiymətli hədiyyələrlə mükafatlandırılıb.
Ulu Öndər Heydər Əliyev gənclərə çox böyük önəm verir: “Gənclər Azərbaycanın gələcəyidir. Gənclərə hər yerdə qayğı göstərilməli, onların inkişafı daim diqqət mərkəzində olmalıdır”. –deyirdi.
Aysel daim öz üzərində çalışır, bilmədiklərini öyrənir. İnanırıq ki, bu qız gələcəkdə öz səmimiyyəti, işgüzarlığı və sadəliyi ilə onu tanıyanların hörmətini qazanacaqdır.
Kollektivimizin ən kiçiyi gənc Ayselimizə yeni-yeni uğurlar arzulayırıq.
Elfuzə CAMALQIZI