Respublikamız dünyanın pambıqçılıq ölkələrindən biri hesab edilir. Azərbaycanda pambıqçılığın inkişaf etdirilməsi üçün zəngin ənənə və böyük potensial mövcuddur.
Azərbaycan Respublikasının Prezidenti cənab İlham Əliyevin bilavasitə təşəbbüsü və rəhbərliyi ilə son illər ölkəmizdə reallaşdırılan iqtisadi islahatlar, sahibkarlıq fəaliyyətinin təşviq edilməsi, onlar üçün münbit şəraitin yaradılması istiqamətində atılan addımlar, imzalanan fərman və sərəncamlar artıq öz bəhrəsini verməkdədir.
Tərtər rayonunda 2017-ci ildə 3123 hektar sahədə çiyid səpilib. Rayonda pambıq əkini və tədarükü ilə 2 məntəqə məşğul olur. “Qarabağ Regional” filialının Tərtər məntəqəsi və Tərtər Pambıq İstehsalı və Tədarükü Məntəqəsi.
“Qarabağ Regional” filialının Tərtər məntəqəsində 2017-ci ilin pambıq mövsümündə 125 nəfər daimi işçi çalışır. Pambıq qəbulunda və emalında isə əlavə olaraq 120 nəfər işçi cəlb olunub.
Məntəqənin ümumi tutumu 10000 tondur. 678 nəfər müqaviləçi ilə 1980,5 hektar sahədə pambıq əkilib ki, bu da keçən ildəkindən 5 dəfə çoxdur.
Hal-hazırda məntəqədə 5 əkin, 14 becərmə, 6 dərmansəpən traktor, 7 ədəd pambıqyığan kombayn, 40 ədəd traktor qoşqusu var.
Tərtər Pambıq İstehsalı və Tədarükü Məntəqəsi ilə müqavilələr əsasında 2017-ci ildə 1063 hektar sahədə pambıq əkilib. Bu sahələrdə becərmə işləri aqrotexniki qaydada aparılıb. Yetişdirilmiş məhsulu vaxtında və itkisiz yığmaq üçün məntəqədə 26 traktor qoşqusu, 2 pambıqyığan kombayn, 1 yükləyici, 4 nəqliyyat, 13 becərmə traktoru, 1 yük, 2 minik maşını mövcuddur. Sahələrdən xam pambığın məntəqəyə və məntəqədən emal zavodlarına itkisiz daşınması və təhlükəsizliyin təmin edilməsi üçün traktorlara qığılcımsöndürənlər və qoşquların üzərinə çəkmək üçün örtüklər hazırlanıb. Məntəqə işçiləri qanunvericiliyə uyğun olaraq texniki təhlükəsizlik qaydaları ilə məlumatlandırılıb. Tədarük olunmuş xam pambığın keyfiyyətli saxlanılması üçün taya yerləri tam təmir olunub. Tədarük zamanı xam pambığın tayalara yığılmasından ötrü 2 ədəd PL və 2 ədəd trancportyor təmir olunaraq saz vəziyyətə gətirilib. Qəbul olunmuş xam pambığın uçotunu tam dürüst apararaq dəyərini vaxtında fermerlərin hesablarına köçürmək üçün yeni kompüter avadanlıqları alınıb. Tədarük olunmuş pambığın yanğından mühafizəsi təlimatda tələb olunan qaydada təşkil olunub. Belə ki, 19 ədəd yanğından mühafizə şitləri, su hovuzu təmir olunub.
Natiq MUSAYEV,
Tərtər RİHB aparatında baş məsləhətçi