GƏNCLİYİN MÜKAFATI
İnsan ömrü mərhələlərdən ibarətdir. Körpəlik, uşaqlıq, gənclik, ahıllıq, qocalıq. Bu mərhələlərin oxşar əlamətləri var. Məsələn, körpəliklə qocalıqda qayğıya daha çox ehtiyac duyulur, gəncliklə ahıllıqda güc, qüvvət, ağıl, enerji yada düşür. Bu mərhələdə həyatda hər şeyə nail olmaq istəyirsən. Elə qazanılan bütün uğurlar məhz gənclik və ahıllıq illərinə təsadüf edir. Ən önəmlisi təhsil almaq, elm öyrənmək, həyatın fəlsəfəsini başa düşməkdir.
Sarızadə Günel Nofəl qızı ömrünün gənclik dövrünü yaşayır. O, Hüləbətli kəndində dünyaya göz açıb. Elə həmin kənddə orta təhsilini alıb. Hazırda Bakı şəhərindəki Azərbaycan Kooperasiya Universitetinin riyaziyyat fakültəsinin 4-cü kurs tələbəsidir. Dövlət imtahanları qarşısında o, ana nənəsigilə qonaq gəlib. Onunla görüşümüzdə tələbəlik illərindən–yoldaşlarından, müəllimlərindən, geniş auditoriyalardan böyük maraqla danışdı və dedi:
–Tələbə olmaq ən böyük arzum idi. Çox şükür ki, 2013 ildə orta məktəbi bitirəndə üniversitetə qəbul olundum. Bu, mənim ilk uğurum, həm də sərbəst həyata açılan qapım idi. Təhsil aldığım bu dörd il mənim hərtərəfli formalaşmağımda öz bəhrəsini verdi. İndi artıq mən bir mütəxəssis kimi qaynar həyata atılmaq üçün həm ilin yekun, həm də dövlət imtahanlarına hazırlaşıram. Bir tələbə kimi üzərimə düşən məsuliyyəti başa düşürəm. Universiteti müvəffəqiyyətlə başa vurmaq üçün müəllimlərimin bütün tapşırıqlarına layiqincə əməl etməyə çalışıram. Tətildə doğmalarımın əhatəsində olmağı xoşlayıram. Nənələrim Zümrüd və Şölənin yanına gedib onları yoxlayıram, anamın ev işlərinə əl atıram. Orta məktəb müəllimlərimlə, sinif yoldaşlarımla görüşürəm. Bütün bunlar mənim istirahətimi səmərəli təmin edir. Universitetə daha yaxşı əhval-ruhiyyə ilə qayıdacağam.
Mən ailənin yeganə övladıyam. Ata-anamın, mənə zəhmət çəkən müəllimlərimin etimadını doğrultmaq, doğma Azərbaycanımın layiqli övladı olmaq üçün öz üzərimdə daim çalışmalıyam.
Günelin şəxsində bütün tələbələrə mənalı gənclik, ağıl, zəka və müdriklik arzulayıram ki, ahıllıq və qocalığa alnıaçıq, üzüağ çatsınlar. Çünki bu mərhələlər gəncliyin mükafatıdır.
Elfuzə Vəliyeva