Tərtərdə Azərbaycanın Milli Qəhrəmanı Elman Hüseynovun 65 illiyinə həsr olunmuş tədbir keçirilib. Mərasimdə Tərtər Rayon İcra Hakimiyyətinin, rayon ictimaiyyətinin nümayəndələri, qəhrəmanın döyüş yoldaşları, ailə üzvləri iştirak ediblər. Tədbir iştirakçıları əvvəlcə Milli Qəhrəmanın və torpaqlarımızın azadlığı uğrunda şəhid olmuş vətən oğullarının xatirəsini bir dəqiqəlik sükutla yad edib, qəhrəmanın büstü önünə tər gül dəstələri qoyublar.
İştirakçılar öncə Milli Qəhrəmana həsr olunmuş videoçarxa baxıblar. Sonra onun həyat və döyüş yolu haqqında məlumat verilib. Qeyd olunub ki, Elman Hüseynov 1993-cü il yanvarın 15-də Vəng yüksəkliyi uğrunda gedən döyüşdə qəhrəmancasına şəhid olub.
1995-ci il yanvarın 15-də ölümündən sonra Azərbaycanın Milli Qəhrəmanı adına layiq görülüb.
Sonra Elman Hüseynovun tələbə yoldaşı Əli Əliyev, döyüş yoldaşları Suliddin Yusibov, Nizami Heydərov onunla bağlı xatirələrini bölüşüblər.
Qəhrəmanın oğlu Emin Hüseynov atası haqqında kövrək hisslərini danışıb, Respublika Prezidentinə şəhid ailələrinə, müharibə veteranlarına və əlillərə göstərilən diqqət və qayğıya görə öz minnətdarlığını bildirib.
Məktəblilərin ifasında Milli Qəhrəmana həsr edilmiş şeir parçaları dinlənilib.
Tədbirdə iştirak edən rayon icra hakimiyyətinin başçısı Müstəqim Məmmədov öz çıxışında deyib:
– Tərtərin Elman Hüseynov kimi qəhrəman oğulları var. Belə oğulların sayəsində Tərtər alınmaz qalaya çevrilib.
Bu gün respublika Prezidenti İlham Əliyev tərəfindən Qarabağ müharibəsi veteranlarına, şəhid ailələrinə, əlillərə böyük diqqət və qayğı göstərilir. Biz bunu rayonumuzun timsalında da aydın görürük.
Vətən yolunda canından keçmiş şəhidlərimizin adları əbədiləşdirilir. Tərtərdə onlarla şəhid adını daşıyan bulaq, məktəb, bağça, xəstəxana və küçə var. Rayonumuzun mərkəzi küçələrindən biri bu gün 65 illik yubileyinə yığışdığımız Elman Hüseynovun adını daşıyır. Həmin küçədə qəhrəmanın büstü qoyulub.
Bugünkü gənclərimiz də öz ata və qardaşlarının ənənəsinə sadiqdirlər. Tərtər döyüşən şəhər, alınmaz qaladır. İnanırıq ki, tezliklə torpaqlarımız işğaldan azad olacaq, işğaldan təmizlənmiş torpaqlarda Azərbaycan bayrağı dalğalanacaq.
-
15Mar
Müəllif: Redaktor, 13:54
Teqlər: Xəbərlər