Azərbaycan Respublikasının Prezidenti İlham Əliyev Türk Dövlətləri Təşkilatının Müsəlman Dini İdarə Rəhbərləri Şurasının üzvlərindən və müşahidəçilərindən, Seyid Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib.
Görüşdə geniş və əhatəli nitq söyləyən dövlətimizin başçısı Bakıda Türk Dövlətləri Təşkilatının Müsəlman Dini Rəhbərləri Şurasının 7-ci toplantısının və böyük şair, mütəfəkkir Seyid Yəhya Bakuviyə həsr olunmuş beynəlxalq konfransın keçirilməsinin mühüm rəmzi və tarixi mənaya malik olduğunu diqqətə çatdırıb. Prezident İlham Əliyev vurğulayıb ki, bu iki mühüm beynəlxalq tədbirin eyni vaxtda Bakıda təşkil olunması təsadüfi deyildir. Azərbaycan xalqı hər zaman öz dahi şəxsiyyətləri, mütəfəkkirləri və şairləri ilə fəxr edib. XV əsrdə yaşayıb-yaratmış və zəngin irs qoymuş Seyid Yəhya Bakuvi də belə dahi şəxsiyyətlərdən biridir.
Dövlət başçısı xatırladıb ki, Azərbaycan xalqı dünya mədəniyyət xəzinəsinə bir çox dahi simalar bəxş edib. XII əsrdə Nizami Gəncəvi və Xaqani Şirvani, XIV əsrdə İmadəddin Nəsimi, XV əsrdə Yəhya Bakuvi, XVI əsrdə Şah İsmayıl Xətai və Məhəmməd Füzuli kimi böyük şəxsiyyətlərin hər biri özlüyündə bir dünyadır. Onların qoyduqları tarixi-mədəni irs bu gün həmin mütəfəkkirlərin davamçıları olan Azərbaycan xalqı və bütün İslam aləmi üçün müstəsna dəyər kəsb edir.
Tədbirlərdə coğrafiyanın genişliyinə diqqət çəkən Prezident İlham Əliyev bildirib ki, toplantılarda Türk Dövlətləri Təşkilatına üzv ölkələrin dini liderləri ilə yanaşı, Gürcüstan və Suriya dini liderləri, habelə Şimali Qafqaz respublikalarının, xüsusilə Dağıstan və Çeçenistandan olan dini rəhbərlər iştirak edirlər. Bu geniş tərkibli iştirak sarsılmaz birliyin əyani nümunəsidir. Azərbaycanın bu prosesdə xüsusi rolu var, çünki ölkəmiz həm Türk dünyasının ayrılmaz parçası, həm də qədim Qafqaz diyarıdır. Tarixə nəzər salındıqda görünür ki, qədim Qafqaz Albaniyası paytaxtı Qəbələ şəhəri olmaqla məhz Azərbaycan ərazisində mövcud olub. Qədim Atabəylər dövlətinin paytaxtı isə digər gözəl şəhərimiz Naxçıvan olmuşdur. Bu tarixi faktlar bir daha göstərir ki, Türk dünyası və Qafqaz — bu iki məkan, əslində, vahid bir coğrafiyanı əhatə edib və Türk Dövlətləri Təşkilatına üzv olan yeganə Qafqaz ölkəsi Azərbaycandır.
Ölkəmizin İslam həmrəyliyinin gücləndirilməsi istiqamətindəki fəaliyyətindən danışan dövlətimizin başçısı vurğulayıb ki, Azərbaycan hər zaman çalışıb ki, bu həmrəyliyi əməli-praktiki addımlarla, öz real işi ilə möhkəmləndirsin. Dini liderlərin bir arada olması dostluq və qardaşlıq əlaqələrini daha da gücləndirir, dünyaya sülh və əmin-amanlıq mesajları verir. Müsəlman dini liderlərinin hər bir sözü icmalar üçün çox dəyərlidir və bu sözlər barışığa yönələndə regionda sülh bərqərar olur. Azərbaycanda İslam Əməkdaşlıq Təşkilatı və ICESCO xətti ilə çoxsaylı tədbirlər keçirilib, 2017-ci ildə Bakıda təşkil edilən IV İslam Həmrəylik Oyunları isə təkcə idman yarışı kimi deyil, böyük birlik bayramı kimi yadda qalıb.
Prezident İlham Əliyev gələn il Bakıda İslam Əməkdaşlıq Təşkilatının Zirvə Görüşünün keçiriləcəyini bəyan edərək bildirib ki, dünyada gedən mürəkkəb proseslərin fonunda belə bir tədbirin Azərbaycanda təşkili tamamilə məntiqidir. Çünki Azərbaycan təmsil olunduğu bütün platformalarda birləşdirici və barışdırıcı ölkə kimi çıxış edir. Ümid edilir ki, Zirvə Görüşünə qədər bəzi müsəlman ölkələri arasında gedən anlaşılmazlıq və toqquşmalar başa çatacaq. Azərbaycan müsəlman aləminin vahid bir ailə kimi birləşməsi, qarşıdurmaların dayandırılması və İslam dininə zərbə vurmaq istəyən ünsürlərin zərərsizləşdirilməsi üçün əlindən gələni edəcəkdir. Dövlət başçısı, həmçinin türk dövlətləri dini liderlərinin görüşləri ilə yanaşı, bu konfransın da hər il və ya iki ildən bir ənənəvi şəkildə keçirilməsi təşəbbüsünü irəli sürüb.
Nümayəndə heyətinin səfər çərçivəsində Qarabağa — Ağdam, Xankəndi, Xocalı və Şuşa şəhərlərinə səfər edəcəyini deyən Prezident, qonaqların həm 30 illik işğalın ağır fəsadlarını və dağıntılarını, həm də dirçələn Qarabağın yeni simasını öz gözləri ilə görəcəklərini diqqətə çatdırıb. Qeyd olunub ki, 30 il ərzində Ermənistanın işğalı altında qalmış torpaqlarımızda xalqımıza qarşı etnik təmizləmə aparılıb, 1 milyona yaxın azərbaycanlı doğma ocaqlarından didərgin salınıb, Xocalıda qanlı soyqırımı törədilib. 30 il sürən danışıqlar nəticə verməyib, çünki Ermənistanı dəstəkləyən böyük dövlətlər işğalı əbədiləşdirmək istəyirdilər.
Azərbaycan xalqının bu ədalətsizliyə son qoyaraq dünyada bir presedent yaratdığını vurğulayan dövlətimizin başçısı bildirib ki, xalqımız qan tökərək, döyüşərək, şəhidlərimizin və qəhrəman övladlarımızın fədakarlığı hesabına milli ləyaqətini, ərazi bütövlüyünü və suverenliyini bərpa edib. İşğalçılar torpaqlarımızdan qovulub, separatçılığa son qoyulub, separatçı liderlər və hərbi cinayətkarlar hazırda Azərbaycan həbsxanalarında öz cəzalarını çəkirlər.
İşğal dövründə Ermənistan dövlət siyasəti səviyyəsində 65 məscidi tamamilə dağıdıb, bəzi məscidlərdə isə xalqımızı və bütün İslam dünyasını təhqir etmək məqsədilə bilərəkdən heyvanlar, donuzlar saxlayıb. Şəhərlər və kəndlər sökülərək daşları, binaların dam örtükləri, hətta məzarlardakı qəbir daşları belə talan edilərək satılıb. Azərbaycan xalqı misli görünməmiş belə bir vəhşiliklə üz-üzə qalıb.
Bütün bu əzablara və soyqırımlara baxmayaraq, Azərbaycanın mülki şəxslərə qarşı heç vaxt müharibə aparmadığı, intiqamın yalnız döyüş meydanında alındığı qeyd olunub. Qələbədən dərhal sonra, 2021-ci ildən başlanan bərpa-quruculuq işlərində ilk obyekt kimi Ağdam məscidinin bərpasına başlanıldığı, bu günədək 12 məscidin bərpa edildiyi vurğulanıb. “Böyük Qayıdış” Proqramı çərçivəsində artıq Qarabağ və Şərqi Zəngəzurun 48 şəhər və kəndində 90 mindən çox insan məskunlaşıb və keçmiş köçkünlər qalib xalq kimi öz torpaqlarında yaşayırlar.
Dövlət başçısı beynəlxalq ikili standartlara toxunaraq bildirib ki, dünya 30 il ərzində bu işğala göz yumub. BMT Təhlükəsizlik Şurası, ATƏT, Avropa Şurası və Avropa Parlamenti işğalçı Ermənistana sanksiya tətbiq etməyib. Əksinə, Azərbaycan 2023-cü ilin sentyabrında öz suverenliyini tam təmin etdikdən cəmi 4 ay sonra Avropa Şurası ölkəmizə qarşı sanksiya tətbiq edib. Avropa Parlamentini rüşvətxorlar yuvası adlandıran Prezident İlham Əliyev, bu qurumun vitse-prezidentinin evindən milyardlarla dollar çıxması faktının ört-basdır edildiyini xatırladıb və dünyada İslam dininə qarşı elan olunmamış məqsədyönlü müharibənin gedildiyini diqqətə çatdırıb.
Müharibədə tam qalib gəlməsinə və istənilən gündəliyi diktə etmək imkanına baxmayaraq, Azərbaycanın müdrik sülh gündəliyini seçdiyi vurğulanıb. Bildirilib ki, bu qarşıdurma dayandırılmalı idi və bu addım ölkəmizin gələcək inkişafını təmin etdi. Əbu-Dabidə təqdim olunan “Zayed İnsan Qardaşlığı Mükafatı” da bu sülh xəttini dəstəkləyən və beynəlxalq müstəvidə gücləndirən mühüm bir addım olmuşdur.
Sonda Prezident İlham Əliyev bir daha qeyd edib ki, dünyada idarəolunmaz və xaotik vəziyyətin dərinləşdiyi bir şəraitdə Türk dünyasını və Qafqaz bölgəsini sülh şəraitində saxlamaq üçün hər bir tərəf böyük səylər göstərməli, birlik və həmrəyliyini daha da möhkəmləndirməlidir.