Azərbaycan Respublikasının Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş idarəsinin və Tərtər Rayon İcra Hakimiyyətinin birgə təşkilatçılığı ilə Qarabağ Regional Memarlıq və Şəhərsalma Baş İdarəsi yaradılmasının dördüncü ili münasibəti ilə tədbir keçirilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, Qarabağ Regional Memarlıq və Şəhərsalma Baş İdarəsinin rəisi Qədir Babayev, Tərtər Rayon Polis Şöbəsinin rəisi, polis polkovniki Elçin Qasımov, Tərtər Rayon Məhkəməsinin sədri Tahir Qubadov, Tərtər Hərbi prokuroru Emin Vəliyev, Qarabağ Regional Memarlıq və Şəhərsalma Baş İdarəsinin, Ağdam, Ağcabədi, Bərdə, Füzuli və Tərtər rayon İcra Hakimiyyətlərinin əməkdaşları, İƏD üzrə nümayəndələr, bələdiyyə sədrləri iştirak ediblər.
Tədbir iştirakçıları öncə Ulu Öndər Heydər Əliyevin Mərkəzi meydanda ucaldılmış abidəsini ziyrət edib, önünə gül dəstələri düzüblər.
Tərtər Rayon İcra Hakimiyyətinin iclas zalında davam etdirilən tədbirdə əvvəlcə Ümummilli Lider Heydər Əliyevin və torpaqlarımızın ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib, Dövlət Himni səsləndirilib.
Sonra Tərtər Rayon İcra Hakimiyyətinin başçısı Müstəqim Məmmədov tədbiri açaraq qonaqları salamlayıb, bildirib ki, Azərbaycan Respublikası Dövlət Şəhərsalma və Arxitektura Komitəsinin yanında Qarabağ Regional Memarlıq və Şəhərsalma Baş İdarəsinin yaradılmasının dördüncü ilinin tamam olmasını böyük qürur hissi ilə qeyd edirik. Bu əlamətdar gün yalnız bir idarənin yaranma tarixi deyil, eyni zamanda dövlətimizin işğaldan azad olunmuş torpaqlarda həyata keçirdiyi irimiqyaslı bərpa və yenidənqurma siyasətinin mühüm mərhələsidir.
Qarabağ Regional Memarlıq və Şəhərsalma Baş İdarəsinin rəisi Qədir Babayev çıxış edərək Dövlət Şəhərsalma və Arxitektura Komitəsinin Azərbaycan Respublikası Prezidentinin ölkəmizdə dövlət idarəetmə strukturunu təkmilləşdirmək məqsədi ilə imzaladığı 28 fevral 2006-ci il tarixli sərəncamına əsasən 1993-cü ildən fəaliyyət göstərən Dövlət Tikinti və Arxitektura İşləri Komitəsinin bazasında yaradıldığını bildirib.
Azərbaycan Respublikası Prezidentinin 2007-ci il 9 noyabr tarixli Fərmanı ilə təsdiq edilmiş Azərbaycan Respublikası Dövlət Şəhərsalma və Arxitektura Komitəsi haqqında əsasnaməyə uyğun olaraq Komitə şəhərsalma, ərazi planlaşdırılması, arxitektura və bununla bağlı layihələndirmə sahələrində dövlət siyasətini və tənzimləməsini həyata keçirən mərkəzi icra hakimiyyəti orqanıdır.
Qarabağ Regional Memarlıq və Şəhərsalma Baş İdarəsi 12 avqust 2021-ci il tarixində Azərbaycan Respublikasının Prezidenti cənab İlham Əliyevin Fərmanı ilə təsis olunmuşdur. Bu qərar, dövlətimizin Qarabağ və ətraf regionlarda müasir şəhərsalma siyasətini sistemli şəkildə həyata keçirmək, memarlıq irsini qorumaq, yeni yaşayış məntəqələri və sosial infrastruktur yaratmaq istiqamətində atdığı strateji addımlardan biri olmuşdur.
Cənab Prezident İlham Əliyevin təşəbbüsü və tövsiyəsi ilə Qarabağ və Şərqi Zəngəzurda azad iqtisadi zonalar yaradılır. Bu zonalar yerli və xarici investorlar üçün əlverişli imkanlar açır, yeni sənaye və kənd təsərrüfatı müəssisələrinin yaradılmasına şərait yaradır. İndiyədək onlarla investor bölgəyə cəlb olunmuş, müxtəlif sahələr üzrə layihələr icra edilməyə başlanmışdır. Bu, minlərlə yeni iş yerinin açılmasına, Qarabağa qayıdan soydaşlarımızın məşğulluğunun tə-min edilməsinə xidmət edir və bu istiqamətdə işlər qarşıdakı illərdə daha geniş miqyasda davam etdiriləcəkdir.
Bizim əsas missiyamız Qarabağın hər qarışını dirçəltmək, müasir şəhərsalma standartlarına uyğun, eyni zamanda milli-mədəni dəyərləri qoruyan yaşayış mühitini bərpa etməkdir. Qarşımızda hələ böyük hədəflər var, lakin əminik ki, dövlətimizin rəhbərliyi, xalqımızın dəstəyi və sizin əzmkarlığınızla bütün məqsədlərimizə çatacağıq.
Tərtər Rayon Polis Şöbəsinin rəisi, polis polkovniki Elçin Qasımov, Tərtər Rayon Məhkəməsinin sədri Tahir Qubadov çıxış edərək Qarabağ Regional Memarlıq və Şəhərsalma Baş İdarəsinin fəaliyyətinin dörd ilinin tamam olması münasibəti ilə kollektivin hər bir əməkdaşını təbrik edib, möhkəm sağlamlıq, işlərində uğurlar və yeni nailiyyətlər arzulayıblar.
Sonda Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi və Tərtər Rayon İcra Hakimiyyəti tərəfindən idarənin bir qrup əməkdaşına fəxri fərmanlar təqdim edilib, Qarabağda aparılan yenidənqurma işlərinə aid film nümayiş olunub.