Əziz tərtərlilər, Sizi Novruz bayramı münasibəti ilə səmimi qəlbdən təbrik edirəm. Sizə uzun ömür, can sağlığı, xoşbəxtlik, süfrələrinizə bol ruzi, bərəkət arzulayıram.Novruz bayramı əsrlərin sınağından çıxmış, ta bu günədək gəlib çatmış milli-mənəvi dəyərlərimizi, adət-ənənələrimizi özündə yaşadan Milli Bayramımızdır. Xalqımız min illərdir ki, Novruzun gəlişini bayram edir.
Fərəhli haldır ki, cəmiyyətimiz dədə-babadan miras qalmış Novruz əxlaqi dəyərlərini bu gün də yaşadıb davam və inkişaf etdirməkdədir.
1993-cü ildə Novruz bayramı Ulu Öndər Heydər Əliyevin Sərəncamı ilə ümumxalq bayramı elan edilib, onun üzərindən bütün qadağalar birdəfəlik götürülüb, xalq Novruzu hər yerdə özünün böyük milli bayramı kimi kütləvi şənliklərlə qeyd etməyə başlayıb, Novruz beynəlxalq təşkilatlar tərəfindən yüksək qiymətləndirilərək dünyaya sürətlə yayılmağa başlayıb.
Artıq 5 ildir ki, 44 günlük Vətən müharibəsində düşmən üzərində qazanılan möhtəşəm Qələbə-Zəfər günü Odlar yurdu Azərbaycanımıza əbədi bir bahar gətirib. Artıq torpaqlarımızin azadlığı, suverenliyi tam bərpa olunub. Bu baharı bizə gətirən şəhidlərimizə-işğaldan azad edilmiş torpaqlarımızda aparılan lokal xarakterli antiterror əməliyyatlarında canlarını qurban vermiş oğullarımıza Ulu Tanrıdan rəhmət diləyir, şəhid analarının qarşısında baş əyir, qazilərimizə can sağlığı arzulayırıq.
Vətən yolunda canlarını qurban vermiş şəhidlərin, sağlamlıqlarını itirmiş qazilərin, müharibə veteranlarının-Azərbaycanımızın döyüşən igid oğul və qızlarının sayəsində uzun illərdən sonra soydaşlarımız doğulub-böyüdükləri torpaqları ziyarət edə bildilər. Doğma Qarabağımıza Şuşaya, Xankəndinə, Xocalıya, Ağdama, Cəbrayıla, Qubadlıya, Ağdərəyə və digər işğaldan azad olunmuş torpaqlara gedə bildilər. İşğaldan azad edilmiş torpaqlarımızda qalanan bayram tonqalları neçə illik yurd həsrətimizə, nisgilimizə son qoydu, qəlblərdəki doğma yurd həsrətinin buzlarını əritdi.
Qoy yurd yerlərimizdə çatılan tonqallarımız bir daha sönməsin!
Möhtərəm Prezidentimiz cənab İlham Əliyevin, Birinci vitse-Prezident Mehriban xanım Əliyevanın diqqət və qayğısı ilə işğaldan azad edilmiş torpaqlarımızda, şəhər və rayonlarımızda nəhəng quruculuq işləri başlanıb. Ağıllı kəndlər salınır, şəhərlər bərpa edilir, insanların rahat yaşaması üçün hər cürə şərait yaradılır.
Ali Baş Komandanımız cənab İlham Əliyevin rəhbərliyi altında doğma Qarabağımız yenidən dirçəlir, bir gülüstana çevirilir və doğma yerlərə sakinlərinin qayıdışı davam edir. Bu qayıdış bir daha düşmənə mənəvi zərbə vurur, şəhidlərimizin ruhunu şad edir.
İcazə verin, möhtərəm prezidentimiz cənab İlham Əliyevi əmin edim ki, qarşıya qoyduğu vəzifələrin yerinə yetirilməsi üçün bütün tərtərlilər “Konstitusiya və Suverenlik İli”ndə də var qüvvələri ilə çalışacaq, müstəqil Azərbaycan dövlətinin daha da çiçəklənməsi naminə öz töhfələrini verəcəklər.
İnanırıq ki, Novruz bayramı xalqımıza sevinc, bol ruzi, bərəkət gətirəcək.
Bir daha Sizləri Novruz bayramı münasibəti ilə təbrik edir, Sizə ən xoş arzularımı çatdırır, şəhid anaları qarşısında baş əyirəm!
Novruz bayramınız mübarək!