Bu gün Azərbaycan Respublikası xalqımızın milli maraqlarını rəhbər tutaraq, yeni reallıqlar şəraitində müstəqil siyasətini daha cəsarətlə, prinsipiallıqla davam etdirir, Konstitusiyanın tələblərinə və öz suveren hüquqlarına əsaslanaraq, qarşıda duran strateji hədəflərə doğru inamla irəliləyir.
İlham Əliyev,
Azərbaycan Respublikasının Prezidenti
İLHAM ƏLİYEV VƏ DÖVLƏTÇİLİK İRSİ
Azərbaycanın dövlətçilik ənənələri əsrlərin sınağından keçərək formalaşmış və müasir dövrdə yeni inkişaf mərhələsinə qədəm qoymuşdur. Sovet İttifaqının dağılması ilə Azərbaycan 1991-ci ildə yenidən müstəqilliyini bərpa etdi. Lakin müstəqilliyin ilk illəri siyasi və iqtisadi çətinliklərlə müşayiət olunurdu. Ölkə daxili çəkişmələr, iqtisadi böhran və xarici təhdidlər qarşısında idi. Hakimiyyətin qeyri-sabitliyi dövlət strukturlarının zəifləməsinə, sosial və iqtisadi problemlərin dərinləşməsinə səbəb olmuşdu. Bundan əlavə, Ermənistanın Azərbaycana qarşı təcavüzü və Dağlıq Qarabağda baş verən müharibə ölkəni daha da zəiflətdi. Belə bir mürəkkəb dövrdə xalqın təkidli tələbi ilə Heydər Əliyev hakimiyyətə qayıtdı və dövlət quruculuğunun əsasını qoydu. Onun uzaqgörən siyasəti nəticəsində siyasi sabitlik təmin edildi, iqtisadi dirçəlişə başlanıldı və beynəlxalq aləmdə Azərbaycanın mövqeyi gücləndi. 1994-cü ildə “Əsrin müqaviləsi” adlı neft kontraktı imzalandı və bu, ölkənin iqtisadi inkişafının əsasını qoydu. Azərbaycanın enerji resurslarından səmərəli istifadə etməsi qlobal enerji bazarında mühüm rol oynamasına və iqtisadiyyatının güclənməsinə səbəb oldu.
1995-ci ildə qəbul edilən Konstitusiya müasir Azərbaycan dövlətçiliyinin hüquqi əsaslarını müəyyən etdi. Bu dövrdən etibarən ölkədə iqtisadi, siyasi və hərbi sahələrdə köklü islahatlar aparıldı. Hüquq sistemi modernləşdirildi, dövlət idarəçiliyində şəffaflıq artırıldı və vətəndaş cəmiyyəti inkişaf etdirildi. Ordu quruculuğuna xüsusi diqqət yetirildi, müdafiə sənayesi gücləndirildi və müasir hərbi texnologiyaların ölkəyə gətirilməsi təmin olundu.
Azərbaycan dövlətçiliyi tarix boyu mürəkkəb sınaqlardan keçsə də, müasir dövrdə yeni bir inkişaf mərhələsinə qədəm qoyub. Bu gün Azərbaycan regionun lider dövlətlərindən biri kimi bölgə siyasətini formalaşdıran əsas aktorlardan sayılır. Xüsusilə, enerji diplomatiyası, nəqliyyat dəhlizləri və hərbi gücün artırılması istiqamətində aparılan siyasət dövlətçiliyin möhkəmlənməsinə töhfə verib.
Azərbaycanın müasir inkişafı və güclənməsi Prezident İlham Əliyevin uzaqgörən və çevik siyasəti ilə sıx bağlıdır. 2003-cü ildən etibarən onun rəhbərliyi altında həyata keçirilən islahatlar, strateji layihələr və beynəlxalq siyasətdə ba-lanslı yanaşma ölkənin regional və qlobal arenada mövqeyini gücləndirib. İlham Əliyevin liderliyi ilə Azərbaycanda siyasi sabitlik təmin olunub, iqtisadi inkişafın yeni mərhələsinə qədəm qoyulub və sosial rifahın artırılması istiqamətində ardıcıl addımlar atılıb. Onun təşəbbüsü ilə həyata keçirilən genişmiqyaslı iqtisadi islahatlar qeyri-neft sektorunun inkişafına təkan verib, kənd təsərrüfatı, sənaye və texnologiya sahələrində modernizasiya aparılıb.
Prezident İlham Əliyevin xüsusi diqqəti sayəsində Azərbaycan regionda və dünyada mühüm enerji mərkəzinə çevrilib. O, 1994-cü ildə Ümummilli Lider Heydər Əliyevin imzaladığı “Əsrin müqaviləsi”nin uğurlu davamçısı olaraq, ölkənin enerji resurslarının effektiv istifadəsini təmin edib və yeni qaz kəmərlərinin inşasına start verib. Onun təşəbbüsü ilə həyata keçirilən TANAP, TAP kimi enerji layihələri Azərbaycanın Avropanın enerji təhlükəsizliyindəki strateji rolunu artırıb. COP29-un Azərbaycanda keçirilməsi də məhz Prezident İlham Əliyevin ölkəni yaşıl enerji mərkəzinə çevirmək istiqamətində atdığı mühüm addımların nəticəsidir.
İlham Əliyevin liderliyi ilə Azərbaycan Avrasiya nəqliyyat qovşağına çevrilib. Xəzər regionunun ən mühüm nəqliyyat dəhlizlərinin mərkəzində yerləşən ölkə Bakı-Tbilisi-Qars dəmir yolu, Zəngəzur dəhlizi, Şərq-Qərb və Şimal-Cənub nəqliyyat layihələri kimi qlobal təşəbbüslərin aparıcı qüvvəsinə çevrilib. Bu layihələr Azərbaycanın təkcə iqtisadi deyil, həm də geosiyasi əhəmiyyətini artırıb.
Prezident İlham Əliyevin rəhbərliyi altında Azərbaycanın hərbi gücü sistemli şəkildə möhkəmləndirilib. Ordunun maddi-texniki bazası gücləndirilib, ən müasir silah və texnologiyalar əldə edilib, döyüş qabiliyyəti artırılıb. 2020-ci ildə 44 günlük Vətən müharibəsində və 2023-cü ildə keçirilən lokal xarakterli antiterror əməliyyatında əldə edilən tarixi qələbə Azərbaycanın suverenliyini tam bərpa etməklə yanaşı, Prezident İlham Əliyevin uzaqgörən siyasətinin və strateji komandanlığının nəticəsi oldu. Bu müharibə zamanı onun beynəlxalq diplomatik arenada apardığı uğurlu siyasət, informasiya savaşındakı qətiyyətli addımları və xalqa verdiyi inam Azərbaycanın qələbəsini təmin edən əsas amillərdən biri oldu. Ölkəmizdə həyata keçirilən sənayeləşmə, kənd təsərrüfatının inkişafı, innovasiya və texnologiyalara əsaslanan iqtisadiyyat quruculuğu sayəsində Azərbaycan dayanıqlı iqtisadi inkişaf yoluna qədəm qoyub. Son illərdə qeyri-neft sektorunun inkişafına xüsusi diqqət ayrılıb, sosial rifah layihələri genişləndirilib və infrastruktur yenidən qurulub. Azərbaycanda işsizliyin minimum səviyyəyə endirilməsi, əhalinin sosial müdafiəsinin gücləndirilməsi və aztəminatlı təbəqələrin rifahının yaxşılaşdırılması üçün bir sıra mühüm təşəbbüslər həyata keçirilib. Prezident İlham Əliyevin Qarabağ və Şərqi Zəngəzurun yenidən qurulması ilə bağlı apardığı siyasət Azərbaycanın dövlətçilik tarixində yeni bir səhifə açıb. Şuşa şəhərinin mədəniyyət paytaxtı elan edilməsi, işğaldan azad olunmuş ərazilərdə “Ağıllı kənd” və “Ağıllı şəhər” layihələrinin icrası, müasir infrastrukturun yaradılması və məcburi köçkünlərin doğma yurdlarına qayıtması istiqamətində görülən işlər Azərbaycan dövlətinin gücünü və vətəndaş rifahına verdiyi önəmi nümayiş etdirir.
İlham Əliyevin rəhbərliyi ilə Azərbaycan təkcə daxili sabitliyi və inkişafı təmin etməklə kifayətlənməyib, eyni zamanda, beynəlxalq arenada nüfuzunu gücləndirib. Azərbaycan Qoşulmama Hərəkatına sədrlik etməklə, Türk Dövlətləri Təşkilatında mühüm rol oynamaqla və BMT, Avropa İttifaqı, İslam Əməkdaşlıq Təşkilatı və digər beynəlxalq təşkilatlarla əməkdaşlığı inkişaf etdirməklə qlobal diplomatiyanın əsas aktorlarından birinə çevrilib.
Azərbaycanın müasir dövlətçilik ənənələri Prezident İl-ham Əliyevin uzaqgörən, stra-teji və dinamik idarəetməsi nəticəsində daha da güclənib. Onun rəhbərliyi ilə Azərbaycan siyasi sabitlik, iqtisadi inkişaf, güclü ordu və qlobal arenada artan nüfuzu ilə yeni dövrə qədəm qoyub. Qarabağ zəfəri və post-müharibə dövrün-də aparılan yenidənqurma siyasəti dövlətçiliyin möhkəmlənməsinin və xalqın rifahının təmin olunmasının bariz nümunəsidir. İlham Əliyevin li-derliyi ilə Azərbaycanın gələcəyi daha da parlaq və güclü görünür.
Şəbnəm ZEYNALOVA,
Siyasi Elmlər üzrə fəlsəfə doktoru