Fədakar və qəhrəman insanlar
Beynəlxalq Müəllimlər Gününün qeyd olunması ilə bağlı qərarı YENESKO 1966-cı il oktyabrın 5-də vermişdir. Bu təşkilat tərəfindən müəllimlərin statusunun artırılması ilə bağlı tövsiyə xarakterli sənəd də qəbul olunmuşdur. İndi oktyabrın 5-ni dünyanın 100-dən artıq ölkəsi müəllimlərin peşə bayramı kimi qeyd edir. Müstəqil Azərbaycanda isə bu bayramın keçirilməsi ilə bağlı sərəncamı Ulu Öndər Heydər Əliyev vermişdir.
Müəllim peşəsini yüksək qiymətləndirən Ümummilli Lider Heydər Əliyev deyirdi: “Həyatını müəllimliyə həsr edən insanlar həqiqətən fədakar, xalqına, millətinə sədaqətli və eyni zamanda qəhrəmanlıq göstərən insanlardır.”
Azərbaycanda Beynəlxalq Müəllimlər Günü 1993-cü ildən qeyd edilir. Ölkəmizdə bu günə dövlət səviyyəsində diqqət ayrılır.
Müəllimlik dünyada ən çətin, eyni zamanda ən şərəfli və ən gözəl peşədir. Müəllim əməyinin nəticəsində cəmiyyət formalaşır, savadlı, bilikli, geniş dünyagörüşlü şəxslər yetişir. Bu şəxslər isə cəmiyyəti daha da inkişaf etdirir.
Rayonumuzun müəllimləri də xalqımızın mədəni və mənəvi səviyyəsinin yüksəldilməsində savadlı, vətənpərvər gənc nəslin formalaşmasında rol oynayırlar. Təsadüfi deyil ki, rayonumuz öz təhsil ənənəsi ilə həmişə yaddaşlarda qalmış, ölkəmizə çoxlu sayda savadlı şəxslər bəxş etmişdir.
Biz də bu gözəl gün münasibətilə Vətənimizin hər güşəsində, hər bölgəsində fəaliyyət göstərən müəllimlərimizi təbrik edir, onlara bu çətin və şərəfli yolda uğurlar diləyirik.