Dünyada ən uca zirvə anadır
Rayonumuzdakı «Asiman» şadlıq sarayında 8 Mart–Beynəlxalq Qadınlar Günü münasibətilə təşkil olunmuş bayram tədbiri məhz onlara–dünyanın ən uca zirvəsi olan ana və bacılarımıza həsr olunmuşdur. Zalda şəhid anaları, rayonumuzun tanınmış ağbirçəkləri, əmək də və ictimai həyatımızda fərqlənən tərtərli qadınlar əyləşmişdilər. Əlbəttə ki, onlarla bərabər bu tədbirdə qadınların daim həyatda arxalandıqları, «başlarının tacı» hesab etdikləri kişilər iştirak edirdilər. Rayon icra hakimiyyətinin başçısı Müstəqim Məmmədovun şəxsi iştirakı və tapşırığı əsasında onlar əllərindən gələni etmişlər ki, qadınlarımızın üzü gülsün, könlü sevinsin.
Yevlax rayon Mədəniyyət və Turizm şöbəsinin nəzdində əməkdar mədəniyyət işçisi İlqar Əhmədovun rəhbərliyi ilə fəaliyyət göstərən «Kür» instrumental ansamblı da bu vəzifənin öhdəsindən layiqincə gəldi.
Heç kim şənliyin necə başlayıb, necə başa çatdığını hiss etmədi.
Tərtərli qadınları Beynəlxalq Qadınlar Günü münasibətilə təbrik edən rayon rəhbəri Azərbaycan qadınının cəmiyyətimizdəki yüksək rolundan danışdı, qeyd etdi ki, Azərbaycanın birinci xanımı, UNESCO və İSESCO-nun xoşməramlı səfiri Mehriban xanım Əliyevanın xalqımızın mədəniyyətinin, incəsənətinin təbliği, mili adət və ənənələrimizin yaşadılması və digər sahələrdə apardığı gərgin fəaliyyəti xanımlarımıza gözəl nümunədir.
Sonra Müstəqim Məmmədov tərtərli qadınların rayonumuzun ictimai-siyasi həyatında əzmlə çalışdıqlarını qeyd etdi, onların hər birinə əmin-amanlıq, xoşbəxtlik arzuladı.
Azərbaycanın Milli Qəhrəmanı Vəzir Orucovun anası Maya Orucova, ağbirçəklər adından Nübar Mədətli, Sofya Həsənova, əlil qadınlar rayon cəmiyyətinin sədri Tükəzban Əliyeva ölkəmizdə qadınlara göstərilən diqqət və qayğıya görə möhtərəm prezidentimiz İlham Əliyev və rayon rəhbərliyinə minnətdarlıqlarını bildirdilər.
Bayram münasibətilə qadınlarımızı rayon təhsil şöbəsinin müdiri Aydın Qarayev, mərkəzi rayon xəstəxanasının baş həkimi Yaşar Hüseynov, şəhər İƏD üzrə icra nümayəndəsi Sahib Həsənov, rayon mədəniyyət və turizm şöbəsinin müdiri Gündüz Mursəlov təbrik etdilər.
Bayram münasibətilə rayonun ictimai-siyasi həyatında fərqlənən bir qrup qadına rayon icra hakimiyyətinin və YAP rayon təşkilatının Fəxri Fərmanları təqdim olundu və qiymətli hədiyyələr verildi.
Svetlana Bağırova