ƏFSANƏVİ KƏŞFİYYATÇI
44 günlük Vətən müharibəsi üç minə yaxın igid oğlumuzun şəhidliyinə səbəb oldu. Elə oğullar ki hərəsi bir evin çırağı, bir elin vuran ürəyi, arxa-dayağı oğullar idi. Bu oğulların arasında həqiqi hərbi xidmət borcunu yerinə yetirən gənc əsgərlərimiz də var, illərlə Vətənin müdafiəsində dayanan zabitlərimiz də var. Ordumuzun tərkibində cəmləşən əsgər və zabitlərimiz 44 gün davam edən müharibədə öz iradə və güçləri ilə ölkəmizin tarixində yeni səhifələr açdılar. Canları-qanları bahasına Vətən torpaqlarımızın bütövlüyünü, şərəf və ləyaqətimiz hesab olunan Qarabağımızı bizə qaytardılar. Sübut etdilər ki, mənfur düşmənin illərlə zəbt etdiyi torpaqları çəmi 44 gündə azad etmək iqtidarında olan ordumuz və onu təmsil edən oğullarımız var. Məlumdur ki, müharibələrdə xalqımıza çoxsaylı zərbələr vuruldu. Şəhərlərimiz, kəndlərimiz raket və toplarla dağıdıldı. Dədə-baba yurdlarımıza ayaq basa bilmədik. Şükür ki, o murdar xislətli düşmənin qarşısına çıxa bilən oğullarımız alnımızın qaçqın-köçkün damğasını silərək bizə şərəf-şan gətirdilər. Bu gün həmin oğullarımız fəxr və qürurla yad edilir. Belə igid oğullardan biri də Vətən Müharibəsi Qəhrəmanı Naxçıvan Xüsusi Təyinatlı Qoşun briqadasının komandiri, əfsanəvi kəşfiyyatçı polkovnik-leytenant, Şəhid Anar Vaqif oğlu Əliyevdir.
Yaxınlarda Bəyimsarov kəndində yaşayan ailəsi ilə görüşdüm. Həyət darvazasından içəri keçəndə bizi saçları bəmbəyaz olmuş bir qadın qarşılayıb içəri dəvət etdi. Söhbətdən öyrəndim ki, bu qadın Anarın anası Səkinə müəllimdir. Mənə aydın oldu ki, qəhrəman şəhidimiz Anar müəllim ailəsində doğulub, boya-başa çatıb. Onun atası Vaqif də, anası Səkinə də müəllimdirlər. Atası evdə yoxuydu, harasa getmişdir. Anası bizə 3 kitab və albom göstərdi. Kitabları gözdən keçirdim, alboma da baxdım. “Əfsanəvi kəşfiyyatçı” adlı kitab diqqətimi çəkdi. Burada Şəhid Anar Əliyev haqqında xeyli xatirələr yazılıb. Bu xatirələr Anar şəhidlik zirvəsinə ucaldıqdan sonra ailəsinə verilmiş başsaglığı və təsəlli məktublarıdır.
2020-ci il 27 sentyabr. Ermənistan respublikasının silahlı quvvələri beynəlxalq hüquq normalarını pozaraq muxtəlif növ silahlardan –ağır artilleriya qurğularından və ballistik raketlərdən istifadə edərək müxtəlif istiqamətlərdən ölkəmizə qarşı növbəti təxribatlara başladılar. Bu təxribatların qarşısını almaq məqsədi ilə Silahlı Quvvələrimiz isə əks-hücuma keçdilər. Anar Əliyev 11 oktyabr 2020-ci il tarixdə xüsusi təyinatlı komandanlığın əməliyyat tabeçiliyinə ezam olundu. Onun döyüş yolu Xocavənd, Füzuli rayonlarının kəndlərindən və Şuşa şəhərindən keçdi. Anar həmişə çətin əməliyyatları öz üzərinə götürərdi. Öz briqadasının bir hissəsi ilə Füzuli Cəbrayıl, Zəngilan bölgələrinin, Hadrut Füzuli yüksəkliklərinin, Xocavəndin Buluton, Xırmancıq, Məlikcanlı, Ağbulaq, Edilli, Axurlu, Düdükçü, Tuğ kəndlərinin və eləcə də Şuşa yüksəkliklərinin azad edilməsində şəxsən özü iştirak etmişdir.
Anar Əliyev Xocavənd rayonunun kəndlərinin və 772 metrlik yüksəkliyin ələ keçirilməsi zamanı düşmənin xeyli canlı qüvvəsini məhv etmiş, onun çoxlu sayda zirehli texnikasını sıradan çıxarmışdır. Həmin yüksəklik Şuşa şəhərinə girişin açarı hesab olunurdu. Bu yüksəkliyin alınması o qədər də asan deyildi. Lakin, palkovnik-leytenant Anar Əliyev bu əməliyyatı böyük ustalıqla həyata keçirmiş, döyüş tapşırığını uğurla yerinə yetirmişdi. Adı çəkilən yüksəklik 21 oktyabr 2020-ci il tarixdə səhər-səhər işğaldan azad olundu. Anar Əliyevin döyüşü isə elə o gündən dayandı. O, həmin döyüşdə aldığı iki güllə yarasından azad etdiyi yüksəklikdən də yüksək zirvəyə ucaldı–şəhid oldu. Bacarıqlı kəşfiyyatçı zabit, qərargah rəisi, hərbi hissə komandiri, polkovnik-leytenant Anar Əliyevin şəhidlik xəbəri ölkə hüdudlarını aşdı. Anar Əliyevin şəhidliyinin ikinci günündə doğmalarının xəbəri olmamışdan Moskva televiziyalarının birində –”Azərbaycanın ən təcrübəli və qorxulu kəşfiyyatçı zabiti Anar Vaqif oğlu Əliyevin öldürülməsi” xəbəri yayılaraq bütün Anarsevərləri məyus etmişdir. Əfsanəvi kəşfiyyatçı zabitin nəşi 23 oktyabrda mühasirədən çıxarılaraq Füzuli Diaqnostika Mərkəzinə –Hərbi Səhra Xəstəxanasına, 24 oktyabrda isə valideynləri-nin yaşadığı Tərtər rayonunun Bəyimsarov kəndinə gətirilmişdir. 25 oktyabrda isə polkovnik-leytenant Anar Əliyev Müdafiə Nazirliyinin təşkil etdiyi yaylım atəşləri və Azərbaycan Himninin sədaları altında Bakı şəhərindəki ikinci Fəxri Xiyabanda dəfn edilmişdir. Dəfndə iştirak etməyə Naxçıvandan, Pakistan İslam Respublikasından xeyli insan gəldi. Gələ bilməyənlərsə başsağlığı teleqramları göndərdi. Onlardan bir neçəsini təqdim edirəm.
Əliyevlər ailəsinə
Polkovnik-leytenant Əliyev Anar Vaqif oğlunun torpaqlarımızın işğaldan azad olunması zamanı qəhrəmancasına şəhid olması ilə əlaqədar ailəsinə dərin hüznlə başsağlığı verirəm.
Allah rəhmət eləsin!
Vasif Talıbov
Naxçıvan MR Ali Məclisinin sədri.
Qardaşlar-bacılar, salam əleyküm! Mən Pakistandanam və mənim adım Superintendant Reyncers Mudassardır. Polkovnik-leytenant Anarın şəhadəti haq3qında eşitmək məndən ötrü şok bir xəbər oldu. Baş vermiş hadisə üçün kədərimi qəbul edin və Allaha polkovnik-leytenant Anara mərhəmət göstərməsi üçün dua edirəm. Xahiş edirəm, ailəmlə birlikdə kədərimizi qəbul edəsiniz. Amin!
R.Mudassar
Dua edirik: Allah mərhəmətli olduğu və şəhid olaraq qəbul etdiyi üçün ona xeyr-dua versin. Pakistandan
Kərim olan Allah qoy Anar Vaqif oğlunu öz cənnətində ən yüksək mərtəbədə bərqərar etsin. O mənim ən yaxşı dostum idi və onunla çox yaxşı xatirələrim var. Xatirəsi daim ürəklərdə qalacaq. Söhbətlərimiz zamanı o hə-mişə:”Yaşasın Pakistan!” deyərdi.
Biz onun Pakistanlı dostları da əziz qardaşımız Anar Vaqif oğlunun ailəsinə və Azərbaycana qarşı eyni hissləri keçiririk:–Yaşasın Azərbaycan!
Hörmətli cənab! Mən Şri-Lankadan olan mayor Cinet Subasinqheofam. Biz sizin oğlunuzla Pa-kistanda görüşmüşdük. Xahis edirəm mənim dərin hüznlü başsağlığımı qəbul edəsiniz. Mümkünsə, məni öz oğlunuz adlandıra bilərsiniz.
Bütün şəhidlərimiz kimi əfsanəvi kəşfiyyatçımız polkovnik-leytenant Anar Əliyev də ürəklərdə xatirələrə çevrilib. Doğmalarının, müəllimlərinin, əsgərlərin, zabitlərin, bir sözlə Anarsevərlərin hər biri onun haqqında şirin xatirələr söyləməyi özlərinə borc bilirlər. Onun təkcə vətənpərvər, bacarıqlı, savadlı hərbiçi-zabit olmasından deyil əsl Azərbaycanlı kişisinə xas olan insanlığından, qeyrətindən, dostluğundan yanayana “Əfsanəvi Qəhrəman” kitabında bəhs edilir. Anar Əliyev kimi oğullar seçilmişlər olurlar və Allahın bəxş etdiyi ən yüksək məqamla müjdələnirlər.
Ölkəmizin ərazi bütövlüyünün təmin edilməsində və işğal altındakı ərazilərin azad olunmasında şəxsi şücaətinə həmçinin hərbi qulluq vəzifəsini yerinə yetirərkən igidlik və mərdlik göstərdiyinə görə Anar Əliyev ölümündən sonra Ali Baş Komandan İlham Əliyevin Sərəncamı ilə “Vətən Müharibəsi Qəhrəmanı”, “Vətən uğrunda” və “Şuşanın azad olunmasına görə” medalları ilə təltif olunmuşdur. Şəhid zabitimiz 44 günlük Vətən mü-haribəsi başlanana qədər fərdi usta dərəcəsinə layiq görülmüş və 11 medalla təl-tif olunmuşdur.