![\"\"](\"http:\/\/www.yeniterter.az\/wp-content\/uploads\/1-1-1-223x300.jpg\")
H\u0259r bir mill\u0259tin varl\u0131\u011f\u0131n\u0131n m\u00fch\u00fcm amill\u0259rind\u0259n biri olan ana dili onun q\u00fcrur m\u0259nb\u0259yidir.\nAz\u0259rbaycan xalq\u0131 zaman-zaman represiyalara m\u0259ruz qalsa da \u00f6z ana dilini qoruyub saxlam\u0131\u015fd\u0131r: Xalq\u0131n alov dilli \u015fairi X\u0259lil Rza Ulut\u00fcrk b\u00f6y\u00fck q\u00fcrur hissi il\u0259 s\u00f6yl\u0259yib.
\nYaddan \u00e7\u0131xmaz ana dilim,
\nDo\u011fransam da dilim-dilim…
\nB\u0259li, bu i\u015fd\u0259 b\u0259dii s\u00f6z ustalar\u0131n\u0131n, \u0259d\u0259biyyat\u0131m\u0131z\u0131n korifeyl\u0259rinin \u0259v\u0259zsiz xidm\u0259tl\u0259ri vard\u0131r. Onlar \u00fcmumxalq dilin\u0259 h\u0259mi\u015f\u0259 f\u0259al m\u00fcnasib\u0259t b\u0259sl\u0259mi\u015f, onun z\u0259nginl\u0259\u015fm\u0259si v\u0259 h\u0259rt\u0259r\u0259fli inki\u015faf\u0131 \u00fc\u00e7\u00fcn b\u00f6y\u00fck f\u0259dakarl\u0131qlar g\u00f6st\u0259rmi\u015fl\u0259r.
\nDilimiz milli s\u0259rv\u0259timizdir. Bu g\u00fcn bizim t\u0259dris proqram\u0131nda dilimizi tam \u015f\u0259kild\u0259 ifad\u0259 etm\u0259k, \u00f6yr\u0259tm\u0259k \u00fc\u00e7\u00fcn geni\u015f imkanlar var. Ancaq dili yaln\u0131z proqram \u00e7\u0259r\u00e7iv\u0259sind\u0259 t\u0259dris etm\u0259kl\u0259 kifay\u0259tl\u0259nm\u0259k olmaz. Ana dilimizi t\u0259dris ed\u0259n m\u00fc\u0259llim \u0259lisilahl\u0131 \u0259sg\u0259r kimi onun ke\u015fiyini \u00e7\u0259km\u0259li v\u0259 dilimizi sevdirm\u0259yi bacarmal\u0131d\u0131r.
\nFikrimizc\u0259 Az\u0259rbaycan dilinin daxili imkanlar\u0131 hesab\u0131na s\u00f6zl\u0259rin qar\u015f\u0131l\u0131qlar\u0131n\u0131n verilm\u0259sin\u0259 \u00e7ox g\u0259r\u0259k var. N\u0259d\u0259n \u201cAllah\u201d s\u00f6z\u00fcn\u00fc \u201cTanr\u0131\u201d, \u201cpilyaj\u201d s\u00f6z\u00fcnu \u201c\u00e7im\u0259rlik\u201d, \u201ctransilyasiya\u201d s\u00f6z\u00fcn\u00fcn \u201ccanl\u0131 yay\u0131m\u201d, son ill\u0259rd\u0259 dilimizd\u0259 daha \u00e7ox i\u015fl\u0259dil\u0259n \u201c\u015fou\u201d s\u00f6z\u00fcn\u00fc \u201c\u0259yl\u0259nc\u0259\u201d, \u201csvetafor\u201d s\u00f6z\u00fcn\u00fc \u201ci\u015f\u0131qfor\u201d, \u201ckomp\u00fcter\u201d s\u00f6z\u00fcn\u00fc \u201cbilgisayar\u201d, \u201ckreativ\u201d s\u00f6z\u00fcn\u00fc \u201cyarad\u0131c\u0131\u201d, \u201crazetka\u201d s\u00f6z\u00fcn\u00fc \u201celektrik yuvas\u0131\u201d kimi i\u015fl\u0259tmirik. M\u0259nc\u0259, bunun ba\u015fl\u0131ca s\u0259b\u0259bi dil\u0259 d\u0259b kimi yana\u015f\u0131lmas\u0131d\u0131r. N\u0259tic\u0259d\u0259 dilimiz\u0259 x\u0259l\u0259l g\u0259lir.
\nB\u0259zil\u0259ri rus s\u00f6zl\u0259ri i\u015fl\u0259tdikd\u0259n sonra \u00fczr ist\u0259yir v\u0259 \u0259v\u0259zind\u0259 dilimizd\u0259 olan \u0259r\u0259b m\u0259n\u015f\u0259li s\u00f6zl\u0259r i\u015fl\u0259dir. M\u0259s\u0259l\u0259n \u201cru\u015fqa\u201d dey\u0259nl\u0259r guya s\u0259hvl\u0259rini d\u00fcz\u0259ldirmi\u015f kimi \u201cq\u0259l\u0259m\u201d s\u00f6z\u00fcn\u00fc i\u015fl\u0259dir. Halbuki q\u0259l\u0259m s\u00f6z\u00fc d\u0259 \u0259r\u0259b m\u0259n\u015f\u0259li s\u00f6zd\u00fcr. M\u0259nim \u00fc\u00e7\u00fcn \u201cq\u0259l\u0259m\u201d s\u00f6z\u00fc \u201cru\u00e7qa\u201d s\u00f6z\u00fc il\u0259 eyni \u0259h\u0259miyy\u0259t k\u0259sb edir. \u018fslind\u0259 is\u0259 bu s\u00f6zl\u0259rin t\u00fcrkc\u0259 qar\u015f\u0131l\u0131\u011f\u0131 olaraq \u201cyazan\u201d ifad\u0259si i\u015fl\u0259dilm\u0259lidir. Biz bir \u015feyi pozan \u0259\u015fyaya \u201cpozan\u201d deyiriks\u0259, yazan \u0259\u015fyaya da yazan dem\u0259liyik v\u0259 bu kimi s\u00f6zl\u0259ri \u00f6z \u0259traf\u0131m\u0131zda yaymal\u0131y\u0131q. Biz yava\u015f-yava\u015f \u0259cn\u0259bi s\u00f6zl\u0259ri h\u0259d\u0259f al\u0131b dilimizd\u0259n \u00e7\u0131xarsaq, b\u00f6y\u00fck t\u0259mizl\u0259m\u0259l\u0259r\u0259 nail olar\u0131q. \u00c7\u00fcnki k\u00fctl\u0259vi \u015f\u0259kild\u0259 i\u015fl\u0259dil\u0259n bel\u0259 s\u00f6zl\u0259r dilimizin safl\u0131\u011f\u0131n\u0131 pozur, yad t\u0259sirl\u0259r\u0259 \u015f\u0259rait yarad\u0131r. D\u00fczd\u00fcr, b\u00fct\u00fcn al\u0131nma s\u00f6zl\u0259rin v\u0259 terminl\u0259rin qar\u015f\u0131l\u0131\u011f\u0131n\u0131 verm\u0259k qeyri-m\u00fcmk\u00fcnd\u00fcr. Bununla b\u0259rab\u0259r dil\u00e7il\u0259rimiz bu bar\u0259d\u0259 d\u00fc\u015f\u00fcnm\u0259li, dilimizin \u00f6z imkanlar\u0131ndan yararlanmal\u0131, yeni s\u00f6zl\u0259r v\u0259 terminl\u0259r ifad\u0259 etm\u0259lidirl\u0259r.
\nD\u00f6vl\u0259t\u00e7iliyin t\u0259m\u0259linin, milli varl\u0131\u011f\u0131n\u0131n m\u0259d\u0259niyy\u0259t\u0259 ba\u011fl\u0131 oldu\u011funu ayd\u0131n d\u0259rk ed\u0259n ulu \u00f6nd\u0259r Heyd\u0259r \u018fliyev deyib: \u201cBiz \u00f6z milli-m\u0259n\u0259vi d\u0259y\u0259rl\u0259rimizl\u0259 f\u0259xr edirik\u201d.
\nXalq\u0131n h\u0259r bir n\u00fcmay\u0259nd\u0259si \u00f6z dilinin t\u0259mizliyi u\u011frunda m\u00fcbariz\u0259 aparma\u011fa, dili yad \u00fcns\u00fcrl\u0259rd\u0259n qoruma\u011fa borcludur. Biz ba\u015fqa dill\u0259r\u0259 ehtiramla yana\u015fmaqla b\u0259rab\u0259r ana dilimiz\u0259 x\u00fcsusi diqq\u0259t yetirm\u0259li, onu ya\u015fatmal\u0131y\u0131q.
\nDilimiz milli-m\u0259n\u0259vi d\u0259y\u0259rimizdir. Dilimiz varsa, biz d\u0259 var\u0131q.<\/p>\n